Te lek yachʼil kʼop ya yal te Mateo

18 Ta yorail-abi, te jnopojeletik talik ta stojol te Jesús sok jich la sjojkʼoybeyik: «¿Machʼa-a te mukʼ skʼoplal ya xkʼot ta banti te Wentainel* yuʼun te chʼulchane?». 2 Jich te Jesús la yikʼ tal jtul chʼin kerem, la stejkʼan ta yolilik 3 sok jich la yal: «Jamal ya kalbeyex, teme maba ya ajeltay te atalelik* sok teme ma jichuk ya xkʼoex te bitʼil te chʼin achʼix keremetik, maʼyuk bin-ora ya x-ochex ta Wentainel* yuʼun te chʼulchane. 4 Jaʼ yuʼun, te machʼa pekʼel ya yakʼ sba jich bitʼil te chʼin kerem ini jaʼme mukʼ skʼoplal ya xkʼot ta banti te Wentainel* yuʼun te chʼulchane, 5 te machʼa ya yikʼ ta stojol ta swenta jbiil jtul chʼin kerem jich bitʼil ini joʼonme la yikʼon-abi. 6 Pero, te machʼa ya yakʼ xyal ta mulil* jtuluk te machʼatik pekʼel yakʼoj sbaik te ay schʼuunel yoʼtanik ta jtojole, jaʼ lek te ya yichʼ chukbeyel ta snukʼ te jsejp ton yuʼun molino te ya sjoyoyin jkojt burro sok te akʼa yichʼ chʼojel ochel ta skʼubulil mar.

7 »¡Ayme swokol te ants winiketik te ya yakʼ xyal ta mulil te yantike! Ta melel, aynanix-a te bintik ya yakʼ xyalotik ta mulile, pero ¡ayme swokol te machʼa ya yakʼ xyal ta mulil te yane! 8 Jich yuʼun, teme ya yakʼbat ale amul te jchʼix akʼab o te jchʼix awoke, boja lokʼel sok chʼoja bael ta namal.* Jaʼ lekxan te ya ata te akuxlejal manchukme jchʼixnax akʼab o jchʼixnax awok, jaʼ wokol teme schebal akʼab o schebal awok ya awichʼ chʼojel bael ta kʼajkʼ ta sbajtelkʼinal.* 9 Jaʼnix jich, teme ya yakʼbat ale amul te jpʼij asite, lokʼesa sok chʼoja bael ta namal.* Jaʼ lekxan te ya ata te akuxlejal manchukme jpʼijnax asit, jaʼ wokol teme schebal asit ya awichʼ chʼojel bael ta Gehena.* 10 Tsajtayame* abaik te manchuk ya apʼajik jtuluk te machʼatik pekʼel yakʼoj sbaik, melel spisil-ora yakik ta kanantayel yuʼun te chʼul-abatetik te ya yilbeyik sit te jTat te ay ta chʼulchane. 11 *

12 »¿Bin xchiex yuʼun? Teme ay jtul winik te ay 100 ta kojt tuminchijetik yuʼun sok te ya xchʼay jkojtuk yuʼune, ¿mabal yakuk yijkitay jilel te 99 ta kojt ta witstikil sok te ya xbajt sle tal te jkojt chʼayeme? 13 Teme la sta tale, jamal ya kalbeyex te jaʼ ya x-akʼbotxan bayal stseʼelil yoʼtan yuʼun te jkojt tuminchij-abi te bitʼil te 99 ta kojt te maba chʼayike. 14 Jaʼnix jich-euk, te jTat* te ay ta chʼulchane ma skʼan te ya xchʼay jtuluk te machʼatik pekʼel yakʼoj sbaike.

15 »Jaʼ yuʼun, teme ay la sta smul ta atojol te awermanoe, baan, kʼopona ta stukel sok akʼbeya snaʼ te bin ma lek la spase.* Teme la yaʼiybat te akʼope, jichme la akoltay te awermano yuʼun ya spas te bin leke. 16 Pero, teme maba la yaʼiybat te akʼope, ikʼa bael jtul o chaʼtul ajoy yuʼun jich ya xkʼot ta testigoetik awuʼun. Melel te kʼalal ay bin ya yichʼ chajpanel, ya skʼan te ay chaʼtul o oxtul testigoetik te ya yalik te bin kʼot ta pasele. 17 Teme maba la yaʼiybey skʼopik-euke, akʼbeya snaʼ te congregación. Teme jaʼnix jich ma la yaʼiybey skʼop te congregacione, jich akʼa kʼotuk awuʼun te bin-utʼil jyanlum sok jich bin-utʼil jkʼanpatan.

18 »Jamal ya kalbeyex, spisil te bin ya achukik ta balumilal, chukulix ta chʼulchan-a, spisil te bin ya atilik* ta balumilal, tilbilix* ta chʼulchan-a. 19 Jamal ya kalbeyex, teme ay chaʼtulex te ayex ta balumilal te acuerdo ayex yuʼun ay bin mukʼ skʼoplal ya akʼanike, yame yakʼbeyex te jTat te ay chʼulchane. 20 Melel te banti ay chaʼtul o oxtul te stsoboj sbaik ta swenta jbiil, teyme ayon ta yolilik».

21 Jich te Pedro tal ta stojol te Jesús sok jich la sjojkʼoybey: «Kajwal, ¿jayeb buelta ya skʼan ya jpasbey perdón te kermano teme la sta smul ta jtojole? ¿Jukeb bueltabal?». 22 Jich la yal te Jesús: «Maʼuk, maba ya kalbat te jaʼnax jukeb buelta, 77 buelta ya skʼan ya apasbey perdón.

23 »Te Wentainel* yuʼun te chʼulchan jaʼ pajal kʼoem sok jtul ajwalil te la skʼanbey sbet te j-abatetik yuʼune. 24 Te kʼalal jajch skʼan te betile, la yikʼik tal ta stojol jtul j-abat te 10 mil talento* sbete. 25 Ta skaj te ma xjuʼ yuʼun stojel te sbete, la yal ta mantal te ajwalil te akʼa yichʼ chonel te j-abat, te yinam sok te snichʼnab soknix spisil te bintik ay yuʼun swenta jich ya xtojob-a te sbete. 26 Pero, te j-abate la skejan sba ta stojol te yajwale sok jich la skʼanbey wokol: ‹Maliyawonxan, ya jtojbat spisil te jbete›. 27 Ta skaj te bin la spase, naʼbot yoʼbolil sba yuʼun te yajwale, jich la schʼaybey te sbete sok la skoltay bael. 28 Pero, te kʼalal lokʼ baele, la sta sba sok jtul sjoy ta abatil te ay 100 denario* sbet yuʼune. La stsak sok jajch ta spichʼbeyel te snukʼe. Jich la yalulanbey: ‹¡Tojbon spisil te abete!›. 29 Te sjoy ta abatile la skejan sba ta stojol sok jich la skʼanbey wokol: ‹Maliyawonxan, ya jtojbat te jbete›. 30 Pero ma la skʼan yaʼiybey te skʼope. Jich bajt sok la yal ta mantal te akʼa yichʼ otsesel ta chukojibal jaʼto teme la stoj te sbete. 31 Te kʼalal la yaʼiy stojol te yantik sjoʼtakik ta abatile, kʼax maba lek la yaʼiyik, jich yuʼun bajt scholbeyik yaʼiy te yajwalik spisil te bin kʼot ta pasele. 32 Jich yuʼun, te ajwalile la stikun ta ikʼel te j-abate sok jich la yalbey: ‹¡Ma lekil j-abatat! La jchʼaybat spisil te abet te kʼalal la akʼanbon wokole. 33 ¿Mabal lajuk skʼan anaʼbey yoʼbolil sba te ajoy ta abatil jich bitʼil te la jnaʼbat yoʼbolil abae?›. 34 Kʼaxto ilin te ajwalile, jaʼ yuʼun la yakʼbey ta skʼab te jkananchukojibaletik jaʼto teme la stoj spisil te sbete. 35 Jaʼme jich ya spasbeyex te jTat te ay ta chʼulchan teme maba ya apasbeyik perdón sok spisil awoʼtanik te awermanotakike».