Proverbios
2 Jnichʼan, teme ya awichʼ ta wenta te jkʼop
sok teme ya akʼej ta awoʼtan te mantaliletik kuʼune
2 te kʼalal ya awakʼ achikin ta yaʼiyel stojol te pʼijil oʼtanil
sok te ya ajam awoʼtan ta swenta te bintik ay ta naʼel stsajtayel,*
3 jaʼnix jich teme ya akʼan ta aw te bintik ay ta ichʼbeyel swentail
sok teme ya akʼan ta aw ta sleel te bintik ay ta naʼel stsajtayel,*
4 teme maba ya akom aba ta sleel ini jich te bin-utʼil te plata
sok teme spisil-ora ya ale jich te bin-utʼil te nakʼbil kʼulejalil,
5 jichme ya xkʼot ta awoʼtan te bitʼil ta xiʼel te Jehová
sok yame anaʼbey sba te Diose.
6 Melel te Jehová jaʼ ya yakʼ pʼijil oʼtanil;
jaʼ ya xlokʼ tal ta ye te bin ay ta naʼel sok te bintik ay ta naʼel stsajtayel.*
7 Te Dios ya yakʼbey spʼijil yoʼtan te machʼatik toj yoʼtanik;
jaʼ jun majkilal ya xkʼot ta stojol te machʼatik jun yoʼtanik.
8 Te Dios ya skanantaybey sbe te machʼatik toj yoʼtanik
sok ya skanantaybey sbe te machʼatik jun yoʼtanik ta stojol.
9 Jichme ya xkʼot ta awoʼtan te bin toj ta pasel, te bin lek ta pasel sok te ma skʼan ya stsaawanat,
yame xkʼot ta awoʼtan spisil te beetik yuʼun te bintik lek ta pasel.
10 Te kʼalal ya x-och ta awoʼtan te pʼijil oʼtanil
sok te ay sbujtsʼ ya xkʼot ta awoʼtan te bin ay ta naʼel,
11 jichme ya skanantayat te bitʼil ya anaʼ stuuntesel te snopojibal awuʼun
sok jaʼme ya skanantayat te bintik ay ta naʼel stsajtayel*
12 yuʼun maba ya atʼun te chopol* be,
swenta maba ya atʼunbey stalel te winik te kʼax chopol te bintik ya yal,
13 swenta maba ya atʼun te machʼatik ya yijkitayik te tojil be
yuʼun jaʼ ya stʼunik bael te beetik yuʼun te ijkʼal kʼinale,
14 swenta maba ya atʼun te machʼatik ya smulanik spasel te bintik chopol*
—te tseʼelnax yoʼtanik ta loʼlaywanej sok ta spasel te bintik ma lek—,
15 swenta maba ya atʼun te machʼatik ma stʼunojik te tojil beetik,
te jaʼ stʼunojik te beetik te jkʼaxel kʼejel ya x-ikʼawan bael.
16 Te pʼijil oʼtanil ya skoltayat lokʼel ta stojol te ants te maba ay ta tojil be,*
ya skoltayat lokʼel ta stojol te j-antsinel ants* te ya xmonawan ta tʼujbil kʼopetik.
17 Jaʼ te ants te ya yijkitay te smamalal te nujpun sok te kʼalal achʼixto-a
sok te ya xchʼay ta yoʼtan te chapbilkʼop la spas ta stojol te Diose.
18 Te machʼatik ya x-ochik ta sna te ants ya xlajik yuʼun,
te beetik yuʼune ya x-ikʼawan bael te banti ay te machʼatik lajemik te maʼyuk bin ya xjuʼ ya spasikix.
19 Spisil te machʼatik ya sjokinik ta wayel te ants maba ya sujtikix tal
sok maba ya sujtikix tal ta sbelal te kuxlejalile.
20 Jich yuʼun, te jaʼate, jaʼme xa atʼun te be yuʼun te machʼatik lek yoʼtanik,
mame xlokʼat ta beetik yuʼun te machʼatik toj yoʼtanik.
21 Melel jaʼnax te machʼatik toj yoʼtanik ya xkuxinik ta balumilal
sok jaʼnax te machʼatik jun yoʼtanik ya xnainik tey-a.
22 Pero, te machʼatik chopolik* yame yichʼik lajinel
sok te j-akʼawetik ta kʼabal yame yichʼik bulel lokʼel ta balumilal.