TE BIN-UTʼIL TA SITINTAYEL TE WOKOLIL

4 | Mame xchʼay smukʼul awoʼtan

¿BIN YUʼUN MUKʼ SKʼOPLAL?

Te bitʼil ayotik ta kuxinel ta jun balumilal te banti ay bayal wokolil, ya xjuʼ ya stsakotik chamel yuʼun sok mel-oʼtan. Te machʼatik ay bin ma lek kʼaxem ta skuxlejalik, ya xchʼay smukʼul yoʼtanik. ¿Bin ya xkʼot ta pasel ta stojolik?

Ay machʼatik ma skʼan ya snopik te bin yato xkʼot ta pasel.
Ay machʼatik ya yuchʼik trago o ya stuuntesik droga.
Ay yantik ya skuyik te maʼyuk swentail te skuxlejalik, jaʼ yuʼun ya yalik: «¿Bin yuʼun te kuxulone?».

¿Anaʼojbal-a?

Ayniwan jkʼaxelnax te awokol sok te ya xkʼax bael ta patil.
Teme ma xlaj skʼoplal te awokol, ayniwan bin ya xjuʼ ya apas yuʼun ya xkujch awuʼun-a.
Te Biblia ya yal te ya xlaj skʼoplal te wokoliletik.

¿Bin ya xjuʼ ya apas?

Te Biblia jich ya yal: «Jaʼ yuʼun mame xa amel awoʼtanik yuʼun te pajele, melel te pajele aynanix swokolil-euk-a. Tikʼuk-a te wokoliletik ay awuʼunik ta kʼajkʼal ini» (Mateo 6:34).

Junukme awoʼtan. Mame xa amel awoʼtan yuʼun te bin wokolil ya xkʼax pajel.

Teme ya amel awoʼtan yuʼun te bin ma lek ya xkʼot ta pasel, jaʼnax ya yakʼbatxan estrés sok maʼyuk smukʼul awoʼtan.

TE BIN-UTʼIL TA SITINTAYEL TE WOKOLIL: Chaʼoxchajp consejoetik

PASA TE BIN LEK

Te Biblia jich ya yal: «Spisil cʼahcʼal ay swocol te machʼa pichʼil yoʼtan, yan te machʼa tseʼel yoʼtan spisil ora ay ta qʼuin ya yaʼiy» (Proverbios 15:15). Teme jaʼ ya xbajt awoʼtan te awokole, maniwan ya atabey schajpajib. Pero teme jaʼ ya xbajt ta awoʼtan te bin leke, yame xjuʼ awuʼun sitintayel.

Ma xa awil bayal noticia.
Ta jujun kʼajkʼal nopa cheʼoxebuk te bin ya xjuʼ ya awal wokol yuʼune.
Akʼa ta jun lista te bin ya apas ta jujun kʼajkʼal. Parte parte xa awakʼ te aʼtelil ya apase, jichme ya awil te bin juʼemix awuʼun spasele.

KʼANA KOLTAYEL

Te Biblia jich ya yal: «Te machʼa tʼutʼ […] ya scontrahin spisil lequil tojobtesel» (Proverbios 18:1). Maʼyuk machʼa ya xjuʼ te stukel ya xlokʼ ta chʼen. Ya skʼan te ay machʼa ya xkoltayot yuʼune.

Kʼanbeya koltayel te afamilia sok te awamigotak.
Mame skʼan ya xchʼay ta awoʼtan te ya xjuʼ ya akoltay-euk te yantik. Teme jich ya apase, jaʼ ya skoltayat ta sitintayel te awokole.
Teme maʼyukix smukʼul awoʼtan sok te jich ya awaʼiy te ma xa akʼan ya xkuxinatix, baanme ta doctor. Melel te kʼalal jich ya kaʼiy jbatik, ya xjuʼ te ayotik ta chamel, jich bitʼil te tulan mel-oʼtan. Bayal ants winiketik staoj spoxilik.a

a Te revista ¡Wikʼame asit! ma xyal te bin poxil ya xjuʼ ya awichʼ.

Te Biblia ya yakʼ smukʼul koʼtantik

Te machʼa la stsʼibay te salmo, jich la yalbey te Dios: «Ha tsumbil cʼahcʼ yuʼun coc te acʼope, ha ya sacubtes te be cuʼune» (Salmo 119:105). ¿Bin ya skʼan ya yal?

Te foco bayal ya skoltayotik yuʼun ya kil te jbetik ta ajkʼabal. Jaʼnix jich te Biblia yichʼoj bayal tojobtesel te ya skoltayotik kʼalal ay bin ya jtatik ta nopel spasel.

Te sakal kʼinal ya yakʼ kiltik te bin ay ta be. Jaʼnix jich, te Biblia ya yakʼ kiltik te bin yakotik ta smaliyel ta pajel chaʼbej.

Te Biblia ma jaʼuknax jun libro te ya yal te banti chiknaj tal te ants winiketik. Jaʼnix jich ya yakʼbotik smukʼul koʼtantik ta pajel chaʼbej sok ya yakʼbey sujtib te jojkʼoyeletik ini:

¿Bin-utʼil?

¿Bin-ora jajch te wokolile? Te Biblia jich ya yal: «Jich yuʼun, ta swenta jtul winik och mulil ta balumilal sok ta swenta te mulil och te lajele, jich te lajele kʼax ta stojol spisil te ants winiketik, melel spisil la sta smulik»(Romanos 5:12).

¿Bin yuʼun?

¿Bin yuʼun te ma juʼem kuʼuntik schajpanel te jwokoltike? Te Biblia jich ya yal: «Te ants-winic ma haʼuc scuentahinej te be yuʼune» (Jeremías 10:23). Tikʼnax-a te ya kiltik te bintik yak ta kʼoel ta pasel te yuʼun-nix melel-a te bin ya yale.

¿Bin-a?

¿Bin ya xbajt spas te Diose? Te Biblia jich ya yal: «Yame xkustiklanbot yaʼlel sitikyuʼun te Diose, maʼyukix lajel, maʼyukix mel-oʼtan, okʼel sok te bin kʼux» (Apocalipsis 21:4).