Jaʼme ay ta akʼab stsael te bin kuxlejalil ya akʼane

¿YUʼUN-NIXBAL YA XJUʼ-A TE JAʼAT YA ATSA TE BIN TE KUXLEJALIL YA AKʼANE? Ay machʼatik ya schʼuunik te albilixlaj te bintik ya xkʼot ta skuxlejale. Jich yuʼun te kʼalal ay bin ma xlokʼ ta pasel yuʼunike, ya yalik te yuʼun-nixlaj jich albilix tal skʼoplalik-a.

Ay yantik te ya xchebaj yoʼtanik te kʼalal ya yilik te maʼyuk schajpajibal te bintik ma tojuk ta pasele sok te bayal utsʼinele. Ay ya skʼan ya slekubtes te skuxlejalike, pero ya smel yoʼtanik yuʼun te ay ma xkʼot ta pasel te bin snopojik ta skaj te guerraetik, utsʼinel, chamel o te bintik ya xkʼax te bayal bintik ya sjin jilele. Jaʼ yuʼun ya snopik te tojolnax te ya spasik tulane.

Melelnix-a te kʼalal ay bin ajkʼnax ya xkʼot ta jtojoltike ya xjuʼ ya sjel te bintik jnopojtik ya jpastik ta jkuxlejaltike (Eclesiastés 9:11). Pero joʼotiknix ay ta jwentatik stsael teme ya jkʼantik te kuxlejalil ta sbajtelkʼinale. Te Biblia jaʼnix jich ya yakʼ jnoptik te ay ta jwentatik stsael te kuxlejalil-abi. ¿Bin yuʼun te jich ya kaltike?

Te kʼalal nopol ya x-ochikix-a te israeletik ta Kʼinal te albil skʼoplal ya yichʼike jich albotik yuʼun Dios ta swenta te Moisese: «La jcaʼbeyex atsahic te cuxlejal soc te lajel, te bendición soc te chopol cʼoblalil. Tsaha hiche te cuxlejal, scuenta yuʼun ya xcuxajat soc te patil al-nichʼaniletic awuʼun, te cʼux yac awaʼiy ta awoʼtan te Jehová te Dios awuʼun, te yac awichʼbe ta mucʼ scʼop soc te yac atʼun bahel» (Deuteronomio 30:15, 19, 20).

«La jcaʼbeyex atsahic te cuxlejal soc te lajel, te bendición soc te chopol cʼoblalil. Tsaha hiche te cuxlejal» (Deuteronomio 30:19).

Te Diose la slokʼes tal ta mosoinel ta Egipto te israeletik sok la yakʼbey smulan te libre ya x-ayinik sok te tseʼel yoʼtan ya xnainik ta Kʼinal te albil skʼoplal ya yichʼike. Pero ma jichuknax ya staik te bendicionetik-abi. Ay bin la skʼan la spasik, jaʼ te ya stsaik te «cuxlejal». ¿Bin-utʼil? Jaʼ te kʼux ta yoʼtanik te Diose, te ya yichʼbeyik ta mukʼ te skʼope sok te ya stʼunike.

Jaʼ jich ya skʼan ya apas-euk. Jaʼ chikan te bin ya atsae jaʼme jich ya xkʼot te akuxlejal ta pajel chaʼbeje. Teme jaʼ kʼux ta awoʼtan te Diose, ya awichʼbey ta mukʼ te skʼope sok te ya atʼune, jaʼme yakat ta stsael te kuxlejalil ta sbajtelkʼinal ta jun nichimal kʼinal liʼ ta Balumilal. Kiltik te bintik smakojbey skʼoplal ta jujunchajp-abi.

KʼUXUK TA KOʼTANTIK TE DIOSE

Ta swenta te chʼul espíritu te jpuk-kʼop Juan la stsʼibay te jaʼ «jkʼuxul-oʼtanil stukel te Diose», jaʼ te talelil yuʼun Dios te kʼax chikan ta ilele (1 Juan 4:8). Te Jesús snaʼoj-abi, jich yuʼun te kʼalal la sjojkʼoybeyik te bin mantalil te mukʼxan skʼoplale, jich la yal: «Kʼuxukme xa awaʼiy ta awoʼtan te Jehová te Dios awuʼun ta spisil awoʼtan, ta spisil akuxlejal sok ta spisil apʼijil» (Mateo 22:37). Yame skʼan sok skʼuxul awoʼtan te bitʼil ya awamigoin te Diose, mame ta skajuk xiwel o ya akuy te yuʼun-nanix jich ya skʼan pasel-ae. Pero, ¿bin yuʼun ya skʼan te kʼuxuk ta koʼtantik te Diose?

Te skʼuxul yoʼtan te Jehová ta stojol te ants winiketike jaʼ jich kʼoem te bin-utʼil jtul tatil kʼux ta yoʼtan te yal snichʼnabe. Manchukme jmulawil te meʼil tatiletike ya spasik tulan ta spʼijubtesel, ta skoltayel, ta yakʼbeyel smukʼul yoʼtan sok ta stojobtesel sok yutsil yoʼtanik te yal snichʼnabike, melel jaʼ ya skʼanik te ayuk stseʼelil yoʼtanik sok te lekuk te skuxlejalike. ¿Bin ya skʼanik-euk te meʼil tatiletik ta stojol te yal snichʼnabike? Jaʼ te kʼuxuk ya x-aʼiyotik, te yakuk schʼuunbotik te smantale sok te yakuk xkʼot ta yoʼtanik te jaʼ ta swenta slekilalik te bintik ya yichʼik albeyele. Jich bitʼil te toj stukel te jTatik te ay ta chʼulchane, ¿mabal stojiluk ya awaʼiy te ya skʼanbotik te kʼuxuk ta koʼtantik sok te yakuk kalbeytik wokol yuʼun spisil te bintik spasoj ta jtojoltike?

KICHʼBEYTIK TA MUKʼ TE SKʼOPE

Jich yuʼun teme ya jkʼan ya kichʼbeytik ta mukʼ te skʼop te Diose, ya skʼan ya jnaʼtik te bintik ya yalbotike. Maba ya skʼoponotikix tal te Dios, pero ya xjuʼ ya kaʼiybeytik te skʼop te kʼalal ya jkʼopontik te Biblia sok te ya jpas ta jkuxlejaltik te bintik ya yale (1 Juan 5:3).

Te Jesús la yakʼ ta naʼel te bayal skʼoplal te ya skʼan ya kichʼtik ta mukʼ te skʼop te Diose jich la yal: «Mame jaʼuknax ta pan ya xkuxin te winike, jaʼ ya xkuxin ta swenta schʼuunbeyel skʼop te Jehovae» (Mateo 4:4). Bayal skʼoplal te ya xweʼotike, pero jaʼ bayalxan skʼoplal te ya jnoptik te skʼop Diose. ¿Bin yuʼun? Te pʼijil ajwalil Salomón jich la yal: «Como ha mahquilal te pʼijil-oʼtanil, ha nix hich ha mahquilal te taqʼuine, pero ha lec xan a te pʼijil-oʼtanil, yuʼun ya yaʼbe scuxlejal te machʼatic yichʼojique» (Eclesiastés 7:12). Te pʼijil oʼtanil sok te bintik ya jnoptik ta swenta te Diose jaʼme ya skoltayotik ta ora ini sok jaʼnix ya skoltayotik ta stsael te lekil bee, jaʼ te kuxlejalil ta sbajtelkʼinale.

JTʼUNTIK TE DIOSE

Te yan tal artículo ay la kalbeytik skʼoplal te bin la yal te Jesuse: «Chʼin-nax sjamalel te tiʼnail sok chʼin-nax sjamalel te be te ya x-ikʼawan bael ta kuxlejalile, sok ma bayaluk te machʼatik ya x-ochik tey-ae» (Mateo 7:13, 14). Swenta ya xbeenotik ta bee-abi ya skʼan te ayuk machʼa pʼijuben ta lek yuʼun ya stojobtesotik bael te banti ya jkʼan xkʼootike, jaʼ te kuxlejalil ta sbajtelkʼinal. Jich yuʼun bayal skʼoplal te ya jtʼuntik te Diose (Salmo 16:8). Pero ¿bin-utʼil ya skʼan ya jpastik?

Melelnix-a te bayal kaʼteltik ta jujun kʼajkʼale. Kʼax makalotik te maʼyukix lek jtiempotik ta snopel te bin ya skʼan te Dios ta jtojoltike. Jaʼ yuʼun jich ya sjultes koʼtantik te Bibliae: «Tsajtayame abaik ta lek te manchuk jichukex te bin-utʼil machʼatik ma snaʼik kʼinale, jichukexme te bin-utʼil machʼatik ay spʼijil yoʼtanik, naʼaikme stuuntesel ta lek te tiempo, melel chopol te bintik ya xkʼot ta pasel ta jujun kʼajkʼale» (Efesios 5:15, 16). Te bin ya skʼan ya yal te ya jtʼuntik te Diose, jaʼ te nail ya kakʼ ta jkuxlejaltik te bitʼil kamigoinej jbatik soke (Mateo 6:33).

JAʼME AY TA AWENTA STSAEL

Manchukme ma xjuʼ ya ajeltayix te bintik la apas tal ta nameye, ay bin ya xjuʼ ya apas sok te afamilia yuʼun kʼax lek ya x-ayin te akuxlejalik ta pajel chaʼbeje. Te Biblia ya yakʼ ta nopel te kʼax kʼuxotik ta yoʼtan te jTatik Jehová te ay ta chʼulchane sok ya yalbotik te bintik ya skʼan ya jpastike. Ilawil te bin la yal te j-alwanej Miqueas:

«Haʼat ants-winicat, te Jehová la yalbatix te bin lec, te bin ya scʼambat ta atojol: ha te yac apas te bin toj ta pasel, te cʼux ta awoʼtan te cʼuxultaywanej, soc te peqʼuel yac awacʼ aba ta stojol te Dios awuʼune» (Miqueas 6:8).

Jaxan te jaʼate, ¿yabal awakʼ aba ta stojol te Diose? Teme ya achʼuun te ikʼel yuʼun te Diose, yame yakʼbat te bendicionetik te schajpanoj ta stojol te yamigotake. Jaʼme ay ta akʼab stsael te bin ya akʼane.