Mukʼuk skʼoplal ya kiltik te skʼoponel Dios

1. ¿Bin-utʼil ya skʼan ya kiltik te skʼoponel Dios?

TE Jpaswanej yuʼun te chʼulchan sok te Balumilal yakʼbeyojotik jun mukʼul majtanil: jaʼ te ya xjuʼ ya jkʼopontike. Kiltik te bin-utʼil ya xjuʼ ta pasel. Ya xjuʼ ya kalbeytik te bin ay ta koʼtantik chikan biluk ora, chikan bin kʼopil sok te ma puersauk ya jlokʼes jcitatik. Ya xjuʼ ya jkʼopontik te jTatik te kʼuxotik ta yoʼtan chikan teme ayotik ta jun hospital o ta chukojibal, melel jnaʼojtik te yananix yaʼiybotik-a te jkʼoptike. ¿Mabal jichuk te jaʼ jun mukʼul majtanile?

2. ¿Bin-utʼil la yakʼ ta ilel te ajwalil David te jaʼ jun mukʼul majtanil la yil te skʼoponel Diose?

² Jaʼ jun mukʼul majtanil la yil te ajwalil David te skʼoponel Dios. Ta jun kʼayojil jich la yalbey te Jehová: «Acʼa mohuc bahel ta atojol hich te bin utʼil pom te bin ya calbat» (Sal. 141:1, 2). Ta skʼajkʼalel te David la yichʼ tuuntesel pom te chʼultesbil ta yichʼel ta mukʼ te Jehová sok kʼax lek ya schajpanik te sacerdoteetik (Éx. 30:34, 35). Kʼalal te David la yalbey skʼoplal te pom, jich yilel te jaʼ la skʼan la yal te ya snop ta lek te bin ya yalbey te sTat te ay ta chʼulchan. Jaʼnix jich ya skʼan ya jpastik-euk, melel ya jkʼantik te lekuk ya yil te bin ya kalbeytik te Jehovae.

3. ¿Bin-utʼil ya skʼan ya jkʼopontik te Jehová sok bin yuʼun?

³ Te kʼalal ya jkʼopontik te Jehová ya skʼan te mukʼ skʼoplal ya kiltik, ma skʼan te jich ya xkʼopojotik te bin-utʼil kʼayemotik ta kʼop. Jnop kaʼiytik te najalsitiletik la yilik te Isaías, Ezequiel, Daniel sok Juan. Manchukme yanyantik-a te bin la yilike, pajal stukel te kʼalal la yalik te jaʼ Ajwalil te Jehová te kʼax bayal yuʼele. Te Isaías la yil te Jehová te «hucul ta huctajibal te toyol soc toybil scʼoblal» (Is. 6:1-3). Te Ezequiel la yil te nakal ta jun carro sok te «ay stsʼanabul ta sjoyobal» (Ezeq. 1:26-28). Te Daniel la yil jtul «Mamal» te slapoj sak skʼuʼ spakʼ sok nakal ta sjuktajib te yak ta tilel skʼajkʼal (Dan. 7:9, 10). Jaʼnix jich te Juan la yil te nakal te Jehová ta sjuktajib sok ta sjoyobal «ay xojob te hich yilel te bin utʼil esmeralda» (Apoc. 4:2-4). Snopilanel te bitʼil kʼax bayal yuʼel te Jehová, ya yakʼ xjul ta koʼtantik te jaʼ jun mukʼul majtanil te ya xjuʼ ya jkʼopontike sok te kʼax mukʼ skʼoplal te lekuknax te bin ya kaltike. Jaʼ yuʼun, ¿bin ya xjuʼ ya kalbeytik te kʼalal ya jkʼopontike?

«HICH ME XACʼOPONIC TE DIOSE»

4. ¿Bin ya yakʼ jnoptik ta swenta te kʼopetik la stuuntes ta oración te Jesuse? (Mateo 6:9, 10).

⁴ (Kʼopona Mateo 6:9, 10). Te kʼalal pʼijubteswan ta wits te Jesús, la snojptes te jnopojeletik yuʼun te bin-utʼil ya skʼan ya skʼoponik te Dios. Te kʼalal la yal «hich me xacʼoponic te Diose», te bin la yalbey skʼoplal jaʼ te bin skʼanojel yoʼtan te Jehová: te yakuk yichʼ chʼultesel te sbiil, te yakuk xtalix te Wentainel yuʼun te banti ya slajinlan spisil te skontratake sok te yakuk xkʼotix ta pasel te bintik jamal yaloj ya spas ta swenta te Balumilal sok te ants winiketik. Teme jaʼ ya kalbeytik skʼoplal spisil ini te kʼalal ya jkʼopontik te Diose, jich ya kakʼtik ta ilel te mukʼ skʼoplal ya kiltik te skʼanojel yoʼtane.

5. ¿Bin yuʼun ya jnaʼtik te ma chopoluk te ya jkʼanbeytik te Jehová te bin ya xtuun kuʼuntike?

⁵ Te kʼalal la skʼopon Dios te Jesús, la yakʼ ta ilel te ma chopoluk te ya jkʼanbeytik te Dios te bin ya skʼan koʼtantik. Ya xjuʼ ya jkʼanbeytik te Jehová te yakuk yakʼbotik te jweʼel kuchʼeltik ta jujun kʼajkʼal, te yakuk spasbotik perdón yuʼun te jmultik, te yakuk skanantayotik yuʼun ma xyalotik ta mulil sok ma xyakʼ te ya xyalotik ta spejtsʼ te Pukuje (Mat. 6:11-13). Te kʼalal jich ya jpastike, ya kakʼtik ta ilel te jaʼ smukʼulinej koʼtantik te Jehová sok te jaʼ ya jkʼantik te lekuk ya yilotike.

6. ¿Jaʼnaxbal ya skʼan ya jkʼanbeytik Dios te bin la yal te Jesús ta skʼoponel te sTate?

⁶ Te Jesús ma la yalbey te jnopojeletik te jaʼuk ya yalulanik te bin la yal ta skʼoponel te sTate. Ta yanyantik buelta te la skʼopon te sTate, la yal te bin ya smel yoʼtan ta yorail-abi (Mat. 26:39, 42; Juan 17:1-26). Jaʼnix jich ya xjuʼ ya kalbeytik te Dios te bin ya jmel koʼtantik yuʼun. Jich bitʼil te kʼalal ay bin ya jtatik ta nopel spasel, ya xjuʼ ya jkʼanbeytik jpʼijiltik te Jehová (Sal. 119:33, 34). Jaʼnix jich te kʼalal ya kichʼtik jun aʼtelil te tulan yilel, ya xjuʼ ya jkʼanbeytik spʼijil koʼtantik te Jehová sok te lekuk ya jpastik te kaʼteltik (Prov. 2:6). Te meʼil tatiletik ya xjuʼ ya skʼoponik Dios ta stojol te yal snichʼnabik, jaʼnix jich te alnichʼanetik ya xjuʼ ya skʼoponik Dios ta stojol te smeʼ statik. Jaʼnix jich, ta jpisiltik ya xjuʼ sok ya skʼan ya jkʼopontik Dios ta stojol te machʼatik ya jnojptestik ta Biblia sok te machʼatik ya jcholbeytik skʼop Dios. Pero te skʼoponel te Diose mame jaʼuknax te ay bin ya jkʼanbeytik.

7. ¿Bin yuʼun ya skʼan ya kalbeytik yutsil skʼoplal te kʼalal ya jkʼopontik te Diose?

⁷ Te kʼalal ya jkʼopontik te Diose, mukʼ skʼoplal te ya kalbeytik yutsil skʼoplal, melel snujpʼ te jich ya jpastike. Te machʼa la stsʼibay te salmo, jich la yalbey: «Lec awoʼtan soc jpas-perdonat». Sok jich la yalxan: «Ha Diosat te ay scʼuxul awoʼtan soc lec awoʼtan; ma orahuc ya xʼilinat, soc mucʼ te scʼuxul awoʼtan soc te smelelil acʼope» (Sal. 86:5, 15). Bayal te bin yuʼun ya kalbeytik yutsil skʼoplal te Jehová ta swenta te bin yilel stalel sok te bintik ya spase.

8. ¿Bintik ya xjuʼ ya kalbeytik wokol yuʼun te Jehová te kʼalal ya jkʼopontike? (Salmo 104:12-15, 24).

⁸ Ma jaʼuknax ya kalbeytik yutsil skʼoplal te Jehová, jaʼnix jich ya skʼan ya kalbeytik wokol yuʼun spisil te bin ya yakʼbotik, jich bitʼil te bayal ta chajp nichimetik, te weʼel uchʼelil sok te bitʼil ay kamigotaktik. Spisil ini ya yakʼbotik te jTatik te kʼuxotik ta yoʼtan, melel jaʼ ya skʼan te ayuk stseʼelil koʼtantik (kʼopona Salmo 104:12-15, 24). Pero jaʼ ya kaltikxan wokol ta swenta te ya yakʼbotik te bin ya xtuun kuʼuntik ta swenta te schʼuunel koʼtantik sok te bin tʼujbil ya jmaliytik ta pajel chaʼbej.

9. ¿Bin ya xjuʼ ya jpastik swenta ma xchʼay ta koʼtantik yalbeyel wokol te Jehová? (1 Tesalonicenses 5:17, 18).

⁹ Ya xjuʼ te ya xchʼay ta koʼtantik yalbeyel wokol te Jehová ta swenta te bintik spasoj ta jtojoltik. ¿Bin ya xjuʼ ya jpastik yuʼun ma xchʼay koʼtantik? Ya xjuʼ ya jtsʼibaytik te bintik jkʼanbeyojtik te Jehová sok te ya kiltik bin-utʼil sjakʼbeyojotik. Patil ya kalbeytik wokol ta swenta te skoltayojotike (kʼopona 1 Tesalonicenses 5:17, 18). ¿Mabal tseʼeluk koʼtantik sok kʼanbil ya kaʼiy jbatik kʼalal ay machʼa ya yalbotik wokol? Jaʼnix jich te Jehová ya x-akʼbot stseʼelil yoʼtan kʼalal ya kalbeytik wokol ta swenta te ya sjakʼbotik te jkʼoptike (Col. 3:15). Pero ayxan te bin yuʼun ya kalbeytik wokol te Jehová te kʼax mukʼ skʼoplale. Kiltik bin-a.

KALBEYTIK WOKOL JEHOVÁ TA SWENTA TE SNICHʼAN

10. ¿Bin yuʼun ya kalbeytik wokol te Jehová ta swenta te la stikun tal te Jesuse? (1 Pedro 2:21).

¹⁰ (Kʼopona 1 Pedro 2:21). Ya skʼan ya kalbeytik wokol te Jehová ta swenta te la yakʼ tal te sNichʼan yuʼun ya snojptesotik. Te kʼalal ya jnoptik ta swenta te skuxlejal te Jesús, bayal bin ya jnoptik ta stojol te Jehová sok te bin ya skʼan ya jpastik yuʼun ya kakʼbeytik stseʼelil yoʼtan. Teme ya kakʼtik ta ilel schʼuunel koʼtantik te bitʼil la yakʼ sba ta lajel te Jesús, ya xjuʼ ya jmulanbeytik yutsilal te bitʼil ya xjuʼ ya kamigointik te Jehová sok te ayuk slamalil koʼtantik ta stojol (Rom. 5:1).

11. ¿Bin yuʼun ya jkʼopontik Dios ta swenta sbiil te Jesús?

¹¹ Ya kalbeytik wokol te Jehová, melel ya xjuʼ ya jkʼopontik ta swenta te sNichʼane. Te Jehová ya stuuntes te Jesús yuʼun ya yakʼbotik te bin ya jkʼanbeytike. Teme ya jkʼopontik ta swenta te sbiil te sNichʼane, te Jehová ya yaʼiybotik te jkʼoptik sok ya sjakʼbotik. Te Jesús jich la yal: «Spisil te bin yac acʼambeyic te Tatil ta scuenta jbihil, ya jpasbeyex, scuenta yuʼun hich ya xʼichʼot ta mucʼ a te Tatil ta scuenta te Nichʼanile» (Juan 14:13, 14).

12. ¿Bin yuʼun ya kalbeytikxan wokol te Jehová ta swenta te sNichʼane?

¹² Te Jehová ya spasbotik perdón yuʼun te jmultik ta swenta te la yakʼ sba ta lajel te Jesús. Te Biblia ya yal te Jesús jaʼ te «mucʼul sacerdote» kuʼuntik sok te ay ta «swaʼel-cʼab ta smucʼul-huctajib te Machʼa cʼax bayel yutsilal ta chʼulchan» (Heb. 8:1). Jaʼnix jich ya yal te «ay machʼa ya xcʼopoj cuʼuntic ta stojol te Tatil, ha te Jesucristo» (1 Juan 2:1). Ya kaltik bayal wokol te la yakʼbotik te Jehová jtul Mukʼul Sacerdote te ya snaʼ yoʼbolil jbatik, te ya xkʼot ta yoʼtan te bin ma xjuʼ kuʼuntik spasel sok te «ya xcʼopoj cuʼuntic» (Rom. 8:34; Heb. 4:15). Te manchuk la yakʼ sba ta lajel te Jesús, ma xjuʼ ya jkʼopontik te Jehová te jichuke, melel jmulawilotik. Ya kalbeytik bayal wokol te Jehová ta swenta te la yakʼ ta lajel ta jtojoltik te sNichʼan te kʼux ta yoʼtane.

JKʼOPONTIK DIOS TA STOJOL TE KERMANOTAKTIK

13. ¿Bin-utʼil la yakʼ ta ilel te Jesús te kʼux ta yoʼtan te jnopojeletik yuʼune?

¹³ Ta ajkʼabal te kʼalal nopol ya yichʼix milel-a te Jesús, jalaj ta skʼoponel te sTat yuʼun ya skʼanbey te yakuk skanantay te jnopojeletik yuʼun ta stojol te Pukuje (Juan 17:15). Jich la yakʼ ta ilel te bayal skʼuxul yoʼtan, manchukme lajelix-a la smel yoʼtan ta stojol te jnopojeletik yuʼune.

14. ¿Bin-utʼil ya kakʼtik ta ilel te kʼux ta koʼtantik te kermanotaktik?

¹⁴ Jich bitʼil la spas te Jesús, ma jaʼuknax ya xbajt ta koʼtantik skʼanel te bin ya xtuun kuʼuntik. Jaʼnix jich ya jkʼopontik Dios ta stojol te kermanotaktik. Jich ya jchʼuuntik te mantalil la yakʼ te Jesús te talel kʼaxel kʼuxuk ya kaʼiy jbatik sok jich ya kakʼbeytik yil te Jehová te kʼux ta koʼtantik te kermanotaktike (Juan 13:34). Jaʼnix jich jnaʼojtik te maba yakotik ta schʼayel jtiempotik te kʼalal jich ya jpastike. Te Biblia ya yal «te machʼa toj yoʼtan, ay yuʼel soc bayel bin ya xcʼoht ta pasel yuʼun» (Sant. 5:16).

15. ¿Bin yuʼun ya skʼan te yakuk jkʼopontik Dios ta stojol te kermanotaktik?

¹⁵ Ya skʼan te yakuk jkʼopontik Dios ta stojolik te kermanotaktik, melel ya xkʼaxik ta tulan wokoliletik. Ya xjuʼ ya jkʼanbeytik te Jehová te yakuk xkoltayotik yuʼun ya xkujch yuʼunik te wokoliletik jich bitʼil te chameletik, te ya xkʼax te bintik ya sjin jilel, te guerraetik o te kontrainel. Jaʼnix jich ya xjuʼ ya jkʼopontik Dios ta stojol te hermanoetik te ya slokʼes sba ta yoʼtanik ta skoltayel te yantik. Ayniwan machʼa ya anaʼbey sba te jich yak ta kʼaxel ta stojole. ¿Bin yuʼun ma xa awalbey sbiil te kʼalal ya akʼopon te Diose? Kʼalal ya jkʼanbeytik te Jehová te yakuk xkujch yuʼunik te swokolik te kermanotaktik ya kakʼtik ta ilel te kʼux ta koʼtantike.

16. ¿Bin yuʼun ya skʼan ya jkʼopontik Dios ta stojol te hermanoetik te ya stojobtesotike?

¹⁶ Te hermanoetik te ya stojobtesotik ta congregación ya yalik bayal wokol te ya jkʼopontik Dios ta stojolik, melel ya xkoltayotik yuʼun. Jich la yaʼiy sba te jpuk-kʼop Pablo kʼalal jich la stsʼibay: «Soc ha nix hichon, cʼopombonic Dios scuenta yuʼun te cʼalal ya xcʼopojon ya xʼaʼboton bin ya cal, scuenta yuʼun ma ba ya xiwon ta yaqʼuel ta nopel te lec yachʼil cʼop te mayuc ta naʼel ta nahil to» (Efes. 6:19). Jaʼnix jich ta ora ini ay hermanoetik te ya stojobtesotik sok tulan ya x-aʼtejik. Te kʼalal ya jkʼanbeytik te Jehová te yakuk x-akʼbotik bendición ya kakʼtik ta ilel te kʼux ta koʼtantike.

KʼALAL YA JKʼOPONTIK DIOS TA KOMONSITIL

17, 18. ¿Bin-ora ya xjuʼ ya kichʼtik albeyel te ya jkʼopontik Dios ta komonsitil, sok bin ya skʼan ya kichʼtik ta wenta?

¹⁷ Ayniwan ya kichʼtik albeyel te ya jkʼopontik Dios ta komonsitil. Jich bitʼil kʼalal jtul hermana ay machʼa ya snojptes ta Biblia ya skʼanbey te yan hermana te ya skʼopon Dios ta sjajchibal. Pero te yan hermana maniwan snaʼbey sba ta lek te estudiante, jaʼ yuʼun yaniwan yal te jaʼ ya skʼopon Dios ta slajibal. Jich ya xjuʼ ya yal te bin ya xtuun yuʼun te estudiantee.

¹⁸ ¿Jaxan teme ya xkʼanbot te ya skʼopon Dios jtul hermano ta tsoblej yuʼun scholel skʼop Dios o ta tsoblej ta congregación? Te hermanoetik te ay ta swentaik spasel-abi ya skʼan te kʼoem ta yoʼtanik bin swentail te tsobleje. Te kʼalal ya skʼoponik te Diose ma jaʼuk yuʼun ya stojobtesik te congregación o ya yalik anuncioetik. Jteb ma spisiluk te tsoblejetik jaʼnax ya yichʼ akʼel joʼeb minuto yuʼun te kʼayojil sok te skʼoponel Dios. Jich yuʼun te hermanoetik te ay ta swentaik skʼoponel Dios ma skʼan te «bayel ya xcʼopojic», kʼaxemtoxan-a teme jaʼ ta sjajchibal te tsobleje (Mat. 6:7).

MUKʼUK SKʼOPLAL YA KILTIK TE SKʼOPONEL DIOS

19. ¿Bin ya skoltayotik yuʼun chapalotik-a te kʼalal ya xtal te skʼajkʼalel te Jehová?

¹⁹ Te bitʼil nopolix te skʼajkʼalel te Jehová, ya skʼan te mukʼxan skʼoplal ya kiltik te skʼoponel Dios. Melel te Jesús jich la yal: «Wihcʼa me asitic, cʼoponahic Dios spisil ora scuenta yuʼun ma ba ya xcʼoht ta acuentahic spisil te bintic ya xcʼoht ta pasel» (Luc. 21:36). Teme spisil-ora ya jkʼopontik Dios, tulanxan ay te schʼuunel koʼtantik sok chapalotik te kʼalal ya xtal te skʼajkʼalel te Jehová.

20. ¿Bin ya xjuʼ ya jpastik yuʼun jichuk kʼoem bitʼil chikʼbil pom te kʼalal ya jkʼopontik te Diose?

²⁰ ¿Bin la kilbeytik skʼoplal ta artículo ini? Te mukʼ skʼoplal ya kiltik te ya jkʼopontik te Jehová. Te bintik mukʼ skʼoplal ya xjuʼ ya kaltik te kʼalal ya jkʼopontike, jaʼ te stsakojuk skʼoplal sok te skʼanojel yoʼtane. Jaʼnix jich ya kaltik wokol yuʼun te sNichʼane sok te Wentainel yuʼun, soknix ya jkʼopontik Dios ta stojol te kermanotaktik. Sok ya xjuʼ ya jkʼanbeytik te Jehová te yakuk yakʼbotik te bin ya xtuun kuʼuntik ta jkuxlejaltik sok te yakuk xtulanubxan te schʼuunel koʼtantik. Teme ya jnoptik ta lek te bin ya kalbeytik te Jehová, ya kakʼtik ta ilel te mukʼ skʼoplal ya kiltike. Te kʼalal ya jkʼopontik te Jehová, jich kʼoem ta sit bitʼil chikʼbil pom te sumetnax yikʼ sok «lec yoʼtan yuʼun» (Prov. 15:8).