Kuxlejalil ta achʼ balumilal te banti ay lamal kʼinal

Te kʼalal ya awil te lokʼomba te ay ta jun ini, ¿bin xiʼ awoʼtan yuʼun? ¿Maʼbal yakuk smulan awoʼtan te lamal kʼinal, te tseʼel oʼtanil sok te bintik lek ya awil ta lokʼomba ini? Yak. Jaʼukmeto, ¿wayichajelnaxbal te ya sta yorail te jich ya xkʼot ta pasele?

Melel ay bayal ants winiketik te jichniwan ya snopik ta skaj te ya yilik te ay tulan wokolil, jich bitʼil: guerra, utsʼinel, wiʼnal, chamel, meʼel mamalubel sok yantikxan wokolil. Jaʼukmeto, ay bin lek ya xjuʼ ta maliyel. Te Biblia ya yal te «yakotik ta smaliyel te bin yaloj te Diose, jaʼ te yachʼil chʼulchan sok yachʼil balumilal, te banti ya xnain te bin toj ta pasele» (2 Pedro 3:13; Isaías 65:17).

Jich bitʼil ya yal te Biblia, te «yachʼil chʼulchan» sok te «yachʼil balumilal» maʼme jaʼuk ya yalbey skʼoplal yan chʼulchan sok yan balumilal jich bitʼil ya jtatik ta ilele, señail kʼopnaxme, melel te chʼulchan sok te Balumilal te ya jtatik ta ilele, kʼax lek la yichʼtiklan pasel. Te Biblia ya yal te stalel ayik ta sbajtʼel kʼinal (Salmo 89:36, 37; 104:5). Te kʼopil «yachʼil balumilal» jaʼ skʼoplal te tojil ants winiketik te ya xkuxinik jilel leʼ ta Balumilal, te kʼopil «yachʼil chʼulchan» jaʼ skʼoplal te machʼatik toj ya xmantalajik kʼalalto ta chʼulchan ta swenta te ants winiketik te ya xjilik leʼ ta Balumilale. Jaʼukmeto, ¿yuʼunixbal melel-a te ya xkuxinik tojil ants winiketik leʼ ta Balumilal te jaʼ skʼoplal te «yachʼil balumilal[e]»?

Jaʼ ini, jaʼme skʼanojel yoʼtan Dios ta xjajchʼibal te ayuk tʼujbil kuxlejalil leʼ ta Balumilal. Te Dios la yakʼ ta tʼujbil nichimal kʼinal Edén te sbabial ants winik sok jich albotik yuʼun: «Sitinan sok pʼola abaik, nojesaik ta swolol te balumilal, sok tuunaik te kʼinale» (Génesis 1:28). Jich, te skʼanojel yoʼtan te Diose, jaʼ te alnichʼnajikuk sok te lajuk smukʼubtesik te nichimal kʼinal ta swolol te Balumilale. Jaʼukmeto, ta patil yoloj la xkʼaxuntaybeyik smantal te Diose, jich la yakʼik ta ilel te la spʼajik te xkuxlejalik ta sbajtʼel kʼinal, manchukme jich la spasik, te skʼanojel yoʼtan te Diose maʼba yanaj. ¡Yananixme xkʼot ta pasel ta yachʼil Balumilal-a! (Isaías 55:11).

Te kʼalal ya akʼopon te Dios jich bitʼil la yakʼ ta nopel te Jesucristo jaʼme yakat ta skʼanel te akʼa talukix te mantaltesel yuʼun te Diose, te kʼalal jich ya awale jaʼ ya akʼan te yakuk xmantalteswanix te Ajwalil tsabil yuʼun te Diose, swenta ya slajin te bintik chopol sok te akʼa swentainix te yachʼil balumilale (Mateo 6:9, 10). Ayukme smukʼul koʼtantik te ya yaʼiybotik stojol jkʼoptik te Diose, melel jamal yaloj ta Skʼop: «Te machʼatik toj yoʼtanik yame yichʼik jilel te kʼinale, sbajtʼel kʼinal ya xnainik tey-a» (Salmo 37:29).

Te kuxlejalil ta achʼ balumilal yuʼun te Diose

Te Ajwalil tsabil yuʼun te Diose yame yakʼ bayal lekilal ta Balumilal te maʼyuk bin ya spaje, jichme ya yakʼ kʼotuk ta pasel te skʼanojel yoʼtan te Dios te snopoj ta xjajchʼibaltotal te jaʼuk ya yaʼiybeyik sbujtsʼ te kuxlejalil leʼ ta Balumilal te lum yuʼune. Yame xlaj skʼoplal te il-oʼtantayel sok te pʼajele, ta patil spisil te ants winiketik te ya xkuxinik ta Balumilal yame yamigoin sbaik. Te Diose ya yal ta Biblia te «jkʼaxel ya slajinbey skʼoplal te guerra kʼalal ta slajibal balumilal». «Ni jpamuk lum ya stsakxan spuñal ta smilel yan, ni maʼyukix machʼa ya yichʼ pʼijubtesel ta guerra» (Salmo 46:9, XCD; Isaías 2:4, XCD).

Ta patil, jichme ya xkʼot ta nichimal kʼinal ta swolol te Balumilale. Te Biblia ya yal: «Ay yutsil kʼinal ya yaʼiyik te jochol takin kʼinal sok te takin lum; tseʼel yoʼtan te jochol takin kʼinal, jich ya xnichin te bin utʼil te tsajal nichime. [...] Ya xtʼom lokʼel jaʼ ta jochol takin kʼinal, snojel jaʼ ta takin lum. Te takin lum ya sutpʼij ta yawil jaʼ, te kʼinal te maʼyuk yaʼlel ya sutpʼij ta slokʼib-jaʼetik» (Isaías 35:1, 6, 7).

Ta nichimal kʼinal maʼyukix-a te bin ya yakʼ mel oʼtane. Maʼme ayukix bin ora te ay machʼa ya yil swokol ta wiʼnal ta swenta te maʼyuk weʼelile. «Yame yakʼ sit te bin ya xkol ta kʼinal», xiʼ te Biblia (Salmo 67:6; 72:16). Yame smulanbeyik sit te yaʼtelike, jich bitʼil ya yal te Jpaswanej kuʼuntike: «Ya spasik naetik sok ya xnainik tey-a, ya stsʼunik tsʼusubiltik sok ya sloʼbeyik sit. [...] Sok maʼba ya yaʼiy tsʼumbajel te yan machʼa ya sweʼ» (Isaías 65:21, 22).

Ta achʼ balumilal yuʼun te Diose te ants winiketik maʼba ya slats sbaikix ta nainel ta tut naetik, melel jich yaloj te Diose: «Ya spasik naetik sok ya xnainik tey-a [...]. Maʼba ya spasik naetik te yan machʼatik ya xnainik tey-a». Jaʼnix jich ya yal te Biblia: «Maʼba tojolnax ya x-aʼtejik» (Isaías 65:21-23). Jich yuʼun te ants winiketik yame sitin te yaʼtelik sok yame smulanik spasel. Maʼme ayuk bin ora te ay machʼa ya xkʼojobaj yaʼiy te xkuxlejale.

Te Ajwalil tsabil yuʼun te Diose yame yakʼ lamal kʼinal, jich te chambalametik lekme ya yil sbaik, jaʼnixme jich te ants winiketik sok te chambalemetik lekme ya yil sbaik euk jich bitʼil ay ta xjajchʼibal ta tsʼumbil kʼinal Edén. Te Biblia ya yal: «Te jaʼmal tsʼiʼ jun yoʼtan ya yakʼ sba sok te tuminchij, te choj pajal ya smejtsan sba sok te tentsun, junax ayik te tut wakax, te tsajal choj sok te alakʼil chambalam, sok ya xtojobtesotik bael yuʼun alal» (Isaías 11:6-9; Oseas 2:18).

¡Nopanax awaʼiy, yame xtupʼ skʼoplal spisil chamel sok yame xlekubik te machʼatik sikuben yok skʼabik ta nichimal kʼinal! Te Skʼop Dios jamal ya yal: «Maʼyuk machʼa te nainem ta Sión te jich ya yal: Ayon ta chamel» (Isaías 33:24). «Yame xkustiklambot yaʼlel sitik yuʼun te Diose; maʼyukix lajel, mel-oʼtan, okʼel o te bin kʼux, como kʼaxix spisil te bintik ay ta nailto» (Apocalipsis 21:4).

¿Bin utʼil ya xjuʼ ta tael awuʼun te kuxlejalil ini?

Laniwan stijbat awoʼtan te bintik yaloj te Dios ta swenta te kuxlejalil ta tojil achʼ balumilal. Manchukme ay machʼatik maʼ xchʼuun yoʼtanik te ya xkʼot ta pasel te utsilal ini, ta skaj te kʼax bayal te lekilal, jaʼukmeto, te Jpaswanej kuʼuntike ay bayal yuʼel te ya xjuʼ ya yakʼxan te bin ya xtuun yuʼun te ants winiketike (Salmo 145:16; Miqueas 4:4).

Jich yuʼun, teme ya jkʼantik xkuxinotik ta sbajtʼel kʼinal leʼ ta Balumilal ayme bintik ya skʼan jpastik. Ta jun buelta kʼalal la skʼopon Dios te Jesuse, la yal junuk te bin tulan skʼoplal ya skʼan jpastik: «Jich ay te kuxlejal sbajtʼel kʼinal: jaʼ te ya snaʼbat aba, te jaʼat mero Diosat atukel, sok te ya snaʼbey sba te Jesucristo te tikombiltal awuʼune» (Juan 17:3).

Teme yuʼunix ya jkʼantik xkuxinotik ta achʼ balumilal yuʼun te Diose, nailme ya skʼan jnoptik bin-a te skʼanojel yoʼtan te Diose sok yame skʼan jpastik ta jkuxlejaltik, melel «yame xkʼax bael te balumilal sok te bintik mulambil yuʼun te machʼatik ayik ta skuenta, yan te machʼa ya spas te bin ya skʼan yoʼtan te Diose, sbajtʼel kʼinal ya xkuxaj stukel». Teme jich ya jpastike, yame xjuʼ jmulantik ta sbajtʼel kʼinal te bayal utsilal te ya yakʼtal ta jtojoltik te Jkʼuxul oʼtanil Jpaswanej kuʼuntike (1 Juan 2:17).