TE BIN-UTʼIL YA XLAJ SKʼOPLAL TE PʼAJAW

1 | Mame stsaawanat

Te Biblia jich ya yal:

«Mayuc machʼa nax tsahbil yuʼun Dios, ta spisil nacionetic lec yoʼtan yuʼun te machʼa yichʼoj ta mucʼ soc te toj bin ya spas» (HECHOS 10:34, 35).

Te bin ya skʼan ya yal:

Te Dios Jehováa ma jaʼuk mukʼ skʼoplal ya yil te banti talemotik, te jtsʼumbaltik o te bin kileltike. Te bin mukʼ skʼoplal ta yoʼtane, jaʼ te bin ya jnoptik sok te bin yaʼiyel ya kaʼiy jbatike. Te Biblia jich ya yal: «Te ants-winic ha ya yil te bin chican ta sit, yan te Jehová ha ya yil te bin yilel te oʼtanile» (1 Samuel 16:7).

Pasa awil ini:

Manchukme maba ya xjuʼ ya kiltik te bin ay ta yoʼtan te ants winiketike, ya xjuʼ te ya jtʼunbeytik stalel te Jehová te kʼalal maba ya stsaawanotike. Pasa tulan yuʼun maba ya anop te pajal spisil te ants winiketike. Teme ya ata ta ilel te maba lek te bin ya anop ta stojol te ants winiketik ta skaj te stsʼumbal o te banti talem, kʼanbeya koltayel te Dios yuʼun manchuk ya stsaawanat sok te ya alokʼes te bin ma lek ya anop ta stojol te yantike (Salmo 139:23, 24). Naʼame te yananix skoltayat-ae (1 Pedro 3:12).

a Jehová sbiil te Diose (Salmo 83:18).

«Maʼyuk bin-ora jokinej-a te machʼa sakike [...]. Ta ora ini ayonix ta jun familia te banti kʼux ya yaʼiy sbaik» (TITUS).

Te bin kʼax ta skuxlejal (TITUS)

La yijkitay te pʼajaw

Te Titus ochem ta jun banda-a te mero chopolik sok ya yilayik te ley ta swenta te parte ya x-ayinik te machʼatik yan stsʼumbalik. Jich ya schol kaʼiytik: «Ya xbootik ta sjachel kʼop ta lugaretik te banti maba lek ilbil te machʼatik ijkʼike, jich bitʼil ta hoteletik sok ta cantinaetik». Te Titus ya snaʼ te mero ya xpʼajawan-ae, jich ya yal: «Spisil-ora te kʼalal ay machʼa ya kut jba sok, chikan teme ants o winik, joʼon nail ya xmajawanon-a».

Kʼalal te Titus jajch snop te Biblia sok te testigoetik yuʼun Jehová, jelon te skuxlejal. Jaʼ koltayot yuʼun te skʼoponel te Biblia. Te bin tijbot yoʼtan yuʼun jaʼ te la snop te bin ya xkʼot ta pasel ta pajel chaʼbej liʼ ta Balumilal te banti «mayuquix lajel, mel-oʼtan, oqʼuel o te bin cʼux» (Apocalipsis 21: 3, 4).

Ta sjajchibal wokol la yaʼiy te maba ya xpʼajawane. Jich ya yal: «Wokol la kaʼiy sjelontesel te bin ya jnop sok te bin ya jpase». Pero bayal koltayot yuʼun te bin la snop ta Hechos 10:34, 35, te banti ya yal te maba ya stsaawan te Diose.

¿Bin kʼot ta pasel?, te Titus jich ya yal: «Te kʼalal la kil te kʼuxul oʼtanil ya yakʼbey sba yilik te testigoetik yuʼun Jehová, manchukme yan stsʼumbalik-a o te bin yilelike, kʼot ta koʼtan te jaʼik te machʼatik ayik ta smelelil religión. Sok te kʼalal matoba kichʼoj jaʼ-ae, jtul sakil hermano la yikʼon ta weʼel ta sna. Chajpnax laj kil-a, melel maʼyuk bin-ora jokinej-a te machʼa sakike, ni jaʼuk te ya xweʼon soke. Ta ora ini ayonix ta jun familia te banti kʼux ya yaʼiy sbaik».