Maʼyuk bin-ora ya yijkitayotik te Jehová

1, 2. 1) ¿Bin yuʼun ya kaltik te maʼyuk bin-ora jtukel ya xjilotik kʼalal ya xkʼax jwokoltik? 2) ¿Bin ya kiltik ta artículo ini?

TEME ayotik ta sitintayel jun tulan wokolil, jichniwan ya kaʼiy jbatik te chʼayemotik ta selva sok te ma jnaʼtik banti ya xbootik. Pero maba jtukel ayotik, melel te jTatik te ay ta chʼulchan te ay skʼuxul yoʼtan ya yil te jwokoltik sok ya yalbotik ta jamal te ya sjokinotike. Te Jehová sok skʼuxul yoʼtan jich ya yalbey ta jujuntul te j-abatetik yuʼune: «Ya jcoltayat» (Is. 41:10).

² Ta artículo ini ya kalbeytik skʼoplal chanchajp te bin-utʼil ya skoltayotik te Jehová: 1) ya stojobtesotik, 2) ya yakʼbotik te bin ya xtuun kuʼuntik, 3) ya skanantayotik sok 4) ya yakʼ smukʼul kʼinal kaʼiytik. Jamal yalojbotik te chikan bin wokolil ya xkʼax ta jkuxlejaltik maʼyuk bin-ora ya xchʼayotik ta yoʼtan sok maʼyuk bin-ora ya spijtesotik. Jaʼ yuʼun maʼyuk bin-ora jtukel ayotik.

TE JEHOVÁ YA STOJOBTESOTIK

3, 4. ¿Bin-utʼil ya stojobtesotik te Jehová? (Salmo 48:14).

³ (Kʼopona Salmo 48:14). Te Jehová ya snaʼ te ma xjuʼ ya jtukeltay jbatik jaʼ yuʼun ya yakʼbotik te tojobtesel te ya xtuun kuʼuntike. ¿Bin-utʼil ya spas? Jun te bin-utʼil ya spas jaʼ ta swenta te Biblia (Sal. 119:105). Ta swenta te sKʼope ya skoltayotik yuʼun lekuk te bin ya jtatik ta nopel spasel sok te yakuk jtatik lekil taleliletik te ya skoltayotik yuʼun ayuk stseʼelil koʼtantik sok te ayuk smukʼul koʼtantik ta swenta te kuxinel ta sbajtelkʼinal.a Jich bitʼil, ya snojptesotik ta spasel perdón sok ma jkʼejtik ilinba ta koʼtantik, te manchuk ya xloʼlaywanotik sok te talel jkʼaxel ya jkʼuxultay jbatik ta spisil koʼtantik (Sal. 37:8; Heb. 13:18; 1 Ped. 1:22). Yakʼel ta ilel te taleliletik ini ya skoltayotik yuʼun lekil meʼil tatiletik ya xkʼootik, lekil mamalalil sok lekil amigo ya xkootik.

⁴ Ta Biblia, te Jehová yakʼoj ta tsʼibayel relatoetik ta swenta ants winiketik te jaʼnix jich la sitintayik wokoliletik sok te jich la yaʼiy sbaik-euk te bin-utʼil ya kaʼiy jbatike (1 Cor. 10:13; Sant. 5:17). Kʼalal ya jkʼopontik sok ya jpas ta jkuxlejaltik te bin ya jnoptike, ay cheb te bin-utʼil ya skoltayotik. Sbabial, ya jtatik ta ilel te ma joʼotiknax te ya jsitintaytik wokoliletik ta jkuxlejaltik; ay machʼatik te ay la sitintayik jun wokolil jich bitʼil te joʼotike sok ya yakʼ kiltik te bin-utʼil kujchem yuʼunik ta swenta te koltayel yuʼun te Jehová (1 Ped. 5:9). Sok schebal, ya jnoptik te bin-utʼil ya xjuʼ ya jsitintaytik te wokoliletike (Rom. 15:4).

5. ¿Machʼatik ya stuuntes te Jehová yuʼun ya stojobtesotik?

⁵ Yanxan te bin-utʼil ya stojobtesotik te Jehová, jaʼ ta swenta te hermanoetike.b Te superintendenteetik yuʼun circuito ya yulaʼtayik te congregacionetik sok ya yakʼ sdiscursoik te ya yakʼbey yichʼ yip te schʼuunel koʼtantik sok ya skoltayotik yuʼun junuk ayotik (Hech. 15:​40–16:5). Te ancianoetik jaʼnix jich ay skʼoplal ta yoʼtanik ta jujuntul te publicadoretik (1 Ped. 5:​2, 3). Te meʼil tatiletik ya snojptes te yal snichʼnabik yuʼun kʼuxuk ta yoʼtanik te Jehová, te lekuk te bin ya staik ta nopel spasel sok te yakuk skʼaytes sba ta spasel te bintik lek ya yal te Diose (Prov. 22:6). Te hermanaetik te ayix yaʼbilalik ya skoltay te jchʼiel hermanaetik ta swenta te lekil ejemplo yuʼunik, te ya yakʼbeyik consejo sok te ya yakʼbeyik smukʼul yoʼtanik (Tito 2:​3-5).

6. ¿Bin ya skʼan ya jpastik yuʼun ay bin lek ya xlokʼ kuʼuntik-a ta swenta te tojobtesel ya yakʼbotik te Jehová?

⁶ Te Jehová ya yakʼbotik te tojobtesel te ya xtuun kuʼuntike. ¿Bin ya skʼan ya jpastik yuʼun ayuk bin ya xlokʼ kuʼuntik-a ta swenta te tojobtesel ya yakʼbotik sok te ya kakʼtik ta ilel te ya kaltik wokol yuʼune? Te Proverbios 3:​5, 6 jich ya yal: «Acʼa smucʼulin awoʼtan te Jehová, ma me xawichʼ aba ta cuenta yuʼun te bin anopoj. Ta spisil te bintic yac apas, naʼa me te Jehová, ha ya stojobtesbat te behetic awuʼun». ¿Bin ya xlokʼ kuʼuntik-a? «Jaʼ me ya yicʼat bael ta tojil be stuquel». Jaʼ ya skʼan ya yal te ya skoltayotik yuʼun manchuk ya jta jwokoltik sok te tseʼeluk koʼtantik. ¡Ya kaltik bayal wokol ta stojol te Jehová te kʼax kʼuxotik ta yoʼtan sok te ya yakʼbotik ta jujuntul te consejoetik te ya xtuun kuʼuntike! (Sal. 32:8).

TE JEHOVÁ YA YAKʼBOTIK TE BINTIK YA XTUUN KUʼUNTIKE

7. Jich bitʼil ya yal Filipenses 4:19 ¿Bin-utʼil ya skoltayotik te Jehová?

⁷ (Kʼopona Filipenses 4:19). Te Jehová ma jaʼuknax ya stojobtesotik ta swenta schʼuunel koʼtantik, jaʼnix jich ya yakʼbey bendición te bitʼil ya jpastik tulan ta stael te bin ya xtuun kuʼuntike, jich bitʼil te jweʼeltik, te jkʼuʼ jpakʼtik sok te banti ya xkuxinotik (Mat. 6:33; 2 Tes. 3:12). Stalelnanix-a te ya jmel koʼtantik ta swenta te bin ya xtuun kuʼuntike, pero te Jehová ya yalbotik te ma skʼan ya jmel koʼtantik ta swenta-abi (Mateo 6:25). ¿Bin yuʼun? Melel te jTatik jamal ya yalbotik te maba ya yijkitay te j-abatetik yuʼun te jun yoʼtanik ta stojole (Mat. 6:8; Heb. 13:5). Ya xjuʼ ya schʼuun koʼtantik te ya skʼotes ta pasel te bin ya yal sok te ya yakʼbotik te bin ya xtuun kuʼuntike.

8. ¿Bin-utʼil koltayot yuʼun Jehová te David?

⁸ Jnop kaʼiytik bin-utʼil te Jehová la skoltay te David te kʼalal ay ta anel ta stojol-a te ajwalil Saúl. Ta yorail te wokolil-abi, te Jehová la yakʼbey te David sok te winiketik yuʼun te bin ya xtuun yuʼunike. Ta tiempo-abi te David jich la stsʼibay: «Queremon te namey, yoʼtic mamalonix, pero mayuc quiloj te pihtesbil te machʼa toj yoʼtan, soc mayuc quiloj te yac ta scʼanel pan te snichʼnabe» (Sal. 37:25). Jichniwan awiloj ta akuxlejal-euk te bin-utʼil yakʼojbat te bintik ya xtuun awuʼun te Jehová o te bintik ya xtuun yuʼun te hermanoetike.

9. ¿Bin-utʼil te Jehová ya yakʼbey te bin ya xtuun yuʼun te j-abatetik yuʼun ta ora ini te kʼalal ya xkʼax te bintik ya xjinawan jilel? (Jaʼnix jich ilawil te fotoetik).

⁹ Jaʼnix jich, te Jehová ya yakʼbey te bin ya xtuun yuʼun te j-abatetik yuʼun te kʼalal ya xkʼax te bintik ya xjinawan jilel. Jich bitʼil, ta sbabial siglo te jchʼuunjeletik ta bayuk lugaretik la stikunik koltayel ta stojol te hermanoetik ta Jerusalén, te ayik ta kʼaxel ta tulan wiʼnal ta yorail-abi (Hech. 11:​27-30; Rom. 15:​25, 26). Ta ora ini te lum yuʼun te Dios, jaʼnix jich ya yakʼik ta ilel te yutsil yoʼtanik. Te kʼalal ya xkʼax te bintik ya xjinawan jilel, ta swenta te skʼuxul yoʼtan te Jehová ya stijbey yoʼtan te j-abatetik yuʼun, yuʼun ya yakʼik weʼeliletik, jaʼ, kʼuʼul pakʼal sok poxiletik te banti ya xkʼax te bintik ya xjinawan jilele. Jaʼnix jich ay hermanoetik te ya x-aʼtejik ta slekubtesel te naetik sok te sNail Tsoblejetik te jinemik jilel. Ta oranax ya schajpanik te bin-utʼil ya yakʼbeyik smukʼul yoʼtanik sok koltayel ta swenta schʼuunel yoʼtanik te machʼatik jin snaik o teme ay machʼa laj yuʼunike.c

10, 11. ¿Bin ya yakʼbat anop te bin kʼax ta stojol te Boris?

¹⁰ Te Jehová bayal yutsil yoʼtan, jaʼ yuʼun ya yakʼbey te bintik ya xtuun yuʼun te machʼatik ma jaʼuk j-abatetik yuʼune. Te joʼotik ya jkʼayinbeytik te talelil-abi sok ya jletik bintik-utʼil ya jpastik te bintik lek ta stojol te yantik te ma jaʼuk Testigoetik (Gál. 6:10). Ta swenta-abi bayal buelta ay bin lek ya xlokʼ-a. Kiltik te bin kʼax ta stojol te Boris, jtul director ta escuela te kuxinem ta Ucrania. Manchukme ma jaʼuk testigo yuʼun Jehová, spisil-ora lek ya yil sok ya yichʼ ta mukʼ te alumnoetik yuʼun te jaʼik Testigoetik. Kʼalal jajch te guerra la snop te ya xbajt ta anel ta jun lugar te banti maʼyuk guerra sok la yichʼ koltayel yuʼun te hermanoetik. Ta patil bael kʼot ta Snaʼojibal slajel te Jesús. Kʼalal ya snop te bintik-utʼil koltayot yuʼun te hermanoetik, te Boris jich ya yal: «Te testigoetik yuʼun Jehová la yakʼbonik te bintik ya xtuun kuʼune sok la skanantayonik. Ya kalbeyik bayal wokol yuʼun».

¹¹ Jpisiltik ya xjuʼ ya jkʼayinbeytik stalel te jTatik te ay ta chʼulchan, jich bitʼil te ya snaʼ yoʼbolil jbatike, kʼalal ya kakʼbeytik koltayel te machʼatik ya xtuun yuʼunik, manchukme ma jaʼuk Testigoetik (Luc. 6:​31, 36). Schʼuunoj koʼtantik te kʼuxul oʼtanil te ya kakʼbeytik yilik, jaʼ ya xtijbot yoʼtanik yuʼun ya skʼan ya snopik ta swenta te Jehová sok te yakuk sjokinotik ta abatinel ta stojol (1 Ped. 2:12). Chikan teme ya x-abatinik ta stojol te Jehová o maʼuk, tseʼel koʼtantik, melel jaʼ bayalxan ya yakʼ stseʼelil koʼtantik te kʼalal ay bin ya kakʼbeytik te yantike (Hech. 20:35).

TE JEHOVÁ YA SKANANTAYOTIK

12. ¿Bin yaloj ta jamal te Jehová te ya spas ta stojol te lum yuʼune? (Salmo 91:​1, 2, 14).

¹² (Kʼopona Salmo 91:​1, 2, 14). Te Jehová yaloj ta jamal te ya skanantaybey te schʼuunel yoʼtan te lum yuʼune. Sok te maba ya yakʼ te Satanás ya sbolobtesbey skʼoplal te smelelil yichʼel ta mukʼ yuʼune (Juan 17:15). Kʼalal ya xjajch te «tulan wokolil», schʼuunoj koʼtantik te ya skʼotes ta pasel te Jehová te ya skanantaybey te schʼuunel yoʼtan te lum yuʼun sok te skuxlejale (Apoc. 7:​9, 14).

13. ¿Bin-utʼil ya skanantay ta jujuntul te j-abatetik yuʼun te Jehová?

¹³ ¿Bin-utʼil ya skanantay ta jujuntul te j-abatetik yuʼun te Jehová? Sbabial, jaʼ te yakʼojbotik te Biblia yuʼun ya skoltayon yuʼun ya jnaʼtik stsajtayel te bintik lek sok te bintik maba leke (Heb. 5:14). Spasel te tojobteseletik te ya yakʼ te Biblia, jich kʼoem bin-utʼil majkilal te ya skanantay te jkuxlejaltik sok te schʼuunel koʼtantik (Sal. 91:4). Yan-xan, jaʼ te ya skanantayotik ta swenta te congregación (Is. 32:​1, 2). Kʼalal ya jokintik te ants winiketik te kʼux ta yoʼtanik te Jehová sok te ya schʼuunbeyik te smantale, ya yakʼbotik smukʼul koʼtantik sok yip koʼtantik te ya xtuun kuʼuntik ta spʼajel te bintik ma lekuk (Prov. 13:20).

14. 1) ¿Bin yuʼun te Jehová ma spisiluk-ora ya slajinbey skʼoplal te pruebaetik ya jsitintaytike? 2) ¿bin ya yalbotik ta jamal te Salmo 9:10? (Jaʼnix jich ilawil te nota).

¹⁴ Ta namey kʼinal te Jehová ay baeltik te la skanantay te j-abatetik yuʼune, pero ma spisil-ora jich la spas. Te Biblia jich ya yal: «Ay bintic ya xcʼoht ta stojol spisilic» (Ecl. 9:11). Jich bitʼil ta namey kʼinal, ta ora ini te Jehová ya yakʼ te ya xkʼax swokol ta kontrainel te j-abatetik yuʼun o te ya xlajik ta swenta-abi. ¿Bin yuʼun? Yuʼun jich ya yakʼbey yil te jaʼ jpaslot te Satanás (Job 2:​4-6; Mat. 23:34). Te Jehová ma spisiluk-ora ya slajinbey skʼoplal te pruebaetik te ya jsitintaytike, pero ya xjuʼ ya schʼuun koʼtantik te maʼyuk bin-ora ya yijkitay te machʼatik kʼux ya x-aʼiyot yuʼune (Sal. 9:10).d

TE JEHOVÁ YA YAKʼ SMUKʼUL KʼINAL KAʼIYTIK

15. ¿Bin-utʼil ya yakʼbotik smukʼul kʼinal kaʼiytik te Jehová ta swenta te oración, te Biblia sok ta swenta kermanotaktike? (2 Corintios 1:​3, 4).

¹⁵ (Kʼopona 2 Corintios 1:​3, 4). Jpisiltik ay baeltik te ya xkʼax ta jtojoltik te mel-oʼtan sok te bin kʼux ya kaʼiytik. Ayotikniwan ta mel-oʼtan ta ora ini ta swenta jun wokolil sok te ya yakʼ te jtukel ya kaʼiy jbatike. Manchukme jich yilel te maʼyuk machʼa ya xkʼot ta yoʼtan te wokolil yak ta kʼaxel ta jtojoltike, te Jehová ya xkʼot ta yoʼtan stukel. Ma jaʼuknax-abi, jaʼnix jich «ya yakʼ smukʼul kʼinal kaʼiytik ta spisil te jwokoltik». ¿Bin-utʼil ya spas? Jaʼ ta swenta te oración, te Biblia sok ta swenta te kermanotaktike. Kʼalal ya jkʼopontik, ya sutbotik te jkʼoptik te kʼalal ya yakʼbotik «te lamalkʼinal te ya yakʼ te Dios te kʼax mukʼ, te maʼyuk jtuluk ants winik te ya xjuʼ ya xkʼot ta yoʼtan» (Filip. 4:​6, 7). Kʼalal ya jkʼopontik te Biblia ya kiltik te kʼax kʼuxotik ta yoʼtan, ya jnoptik te lekil consejoetik yuʼun sok ta swenta te smukʼul koʼtantik ya yakʼbotike. Kʼalal ayotik ta tsoblej sok te kermanotaktike ya yakʼ kiltik te skʼuxul yoʼtanik sok ya yakʼbotik smukʼul koʼtantik te lokʼemik tal ta Biblia.

16. ¿Bin ya yakʼbat anop te bin kʼax ta skuxlejal te Nathan sok te Priscilla?

¹⁶ Yuʼun ya xkʼot ta koʼtantik te bin-utʼil ya yakʼ smukʼul kʼinal kaʼiytik sok smukʼul koʼtantik te Jehová ta swenta te sKʼop, kiltik te bin kʼax ta skuxlejal te Nathan sok te Priscilla te kuxinemik ta Estados Unidos. Ayix tal cheʼoxeb jaʼbil, la snopik te ya xbajtik ta yan lugar yuʼun ya xkoltaywanik ta scholel skʼop Dios. Te Nathan jich ya yal: «Smukʼulinel koʼtantik-a te jaʼ ya yakʼbotik bendición te Jehová». Manchukme jich abi, kʼalal kʼotik ta yachʼil scongregacionik, tsakotik ta chamel sok la yil swokolik ta swenta takʼin. Ta patil sujtik ta slumalik, pero jaʼnix jich la yil swokolik ta swenta takʼin. Jich la yal: «La jojkʼoybey jba bin yuʼun te maba la yakʼbotik bendición te Dios te bitʼil jmaliyojtik-ae. Sok jajch jojkʼoybey jba teme ay bin ma lek jpasoje». Pero, ta patil la staik ta ilel te maba ijkitaybilik yuʼun te Jehová. Te Nathan jich ya yal: «Ta yorail te wokoliletik-abi, te skʼoponel te Biblia jich kʼoem te la kaʼiybey skʼop jtul kamigo te ya yakʼbon smukʼul koʼtan sok lekil consejoetik. La jnoptik te ma jaʼuk ya skʼan ya xbajt ta koʼtantik te jwokoltike, te jaʼuk ya xbajt ta koʼtantik te bitʼil ya skoltayotik te Jehová ta sitintayel te jwokoltike. Jaʼ te bin ya skoltayotik yuʼun ya jchajpan jbatik ta sitintayel te pruebaetik te ya xtal ta patile».

17. ¿Bin-utʼil la yichʼ akʼbeyel smukʼul kʼinal yaʼiy jtul hermana te Helga sbiil? (Jaʼnix jich ilawil te fotoetik).

¹⁷ Jich bitʼil la kiltikix, te hermanoetik ya xjuʼ ya yakʼbotik smukʼul kʼinal kaʼiytik. Kiltik te ejemplo yuʼun te Helga te kuxinem ta Hungría. Ta bayal jaʼbil la sitintay jun wokolil te ma lek ya yaʼiy sba yuʼun sok te maʼyuk skʼoplal la yaʼiy sbae. Ta ora ini kʼalal ya sjultes ta yoʼtan te wokolil-abi, ya xkʼot ta yoʼtan te bin-utʼil akʼbot smukʼul kʼinal yaʼiy yuʼun te Jehová ta swenta te congregación. Jich la stsʼibay: «Te Jehová spisil-ora la skoltayon kʼalal la yil te maʼyukix kip ya xjilon sok te maʼyukix bin ya xjuʼ ya jpas ta swenta te kaʼtel, te kʼalal ya jkanantay te kal te ay ta chamel-ae sok yantikxan wokoliletik. Te 30 jaʼbil kʼaxix tale yakʼojbon smukʼul kʼinal kaʼiy te Jehová. Maʼyuk junuk kʼajkʼal te skomoj sba ta spasele. Bayal buelta la yakʼbon yip koʼtan ta swenta te tʼujbil kʼopetik yuʼun te hermanoetik, te yutsil yoʼtanik, te ya xkʼot ta yoʼtanik te jwokol sok te bin yaʼiyel ya kaʼiy jbae. ¡Bayal buelta la stikunbonik mensaje, notaetik o utsilkʼoptayel te kʼalal kʼaxtoxan ya xtuun kuʼun-ae!».

18. ¿Bin-utʼil ya xjuʼ ya kakʼbeytik smukʼul kʼinal yaʼiy te yantike?

¹⁸ Jaʼ jun majtanil te bitʼil ya xjuʼ ya jkʼayinbeytik stalel te Dios kuʼuntik, jich bitʼil te kʼalal ya kakʼbeytik smukʼul kʼinal yaʼiy te yantike. ¿Bin-utʼil ya xjuʼ ya jpastik? Jaʼ te kʼalal ya kaʼiytik te bin ya yalik sok slamalil koʼtantik, te ya kakʼbeytik smukʼul yoʼtanik sok te ya jkoltaytik ta swenta te bin ya xtuun yuʼunike (Prov. 3:27). Ma jaʼuknax ya jpastik ta stojol te kermanotaktike, jaʼnix jich ya jpastik ta stojol te ants winiketik te ya xkʼax swokolik manchukme mato jaʼuk j-abatetik yuʼun Jehová. Teme ayik ta kʼaxel ta jun tulan wokolil ta swenta jun chamel o te ay machʼa laj yuʼunike, ya kulaʼtaytik sok ya kaʼiybeytik te skʼopik soknix ya kakʼbeytik smukʼul yoʼtanik ta swenta te Biblia. Te kʼalal ya jkʼayintik «te Dios te ya yakʼ smukʼul kʼinal kaʼiytik», ma jaʼuknax ya xjuʼ ya jkoltaytik te kermanotaktik ta sitintayel te pruebaetik te ya sitintayike, jaʼnix jich ya xjuʼ te ay chaʼoxtul ants winiketik te maba jaʼuk j-abatetik yuʼun Jehová, ya xtijbot yoʼtanik ta snaʼbeyel sba te Diose (Mat. 5:16).

TE JEHOVÁ MAʼYUK BIN-ORA YA YIJKITAYOTIK

19. ¿Bin ya spas ta jtojoltik te Jehová sok bin-utʼil ya xjuʼ ya jkʼayintik?

¹⁹ Te Jehová ay skʼoplal ta yoʼtan spisil te machʼatik kʼux ya x-aʼiyot yuʼune sok maʼyuk bin-ora ya yijkitay te kʼalal ya sitintayik wokoliletik. Kʼuxotik ta yoʼtan sok ya skanantayotik jich te bin-utʼil jtul tatil ya skanantay te snichʼane. Ya stojobtesotik, ya yakʼbotik te bin ya xtuun kuʼuntik, ya skanantayotik sok ya yakʼbotik smukʼul kʼinal kaʼiytik. Jaʼnix jich, te joʼotik ya xjuʼ te ya jkʼayinbeytik te stalel te kʼalal ya jkoltaytik sok ya kakʼbeytik smukʼul yoʼtan te machʼatik yakik ta kʼaxel ta wokol. Chikan bin-a te wokolil ya jsitintaytik ta jkuxlejaltik, ya xjuʼ ya smukʼulin koʼtantik te spisil-ora ya sjokinotik te Jehová, melel jich jamal yalojbotik: «Ma me xiwat, como joquinejat» (Is. 41:10). ¡Ya yakʼ slamalil kʼinal kaʼiytik snaʼel te maʼyuk bin-ora ya yijkitayotik te Jehová!