Te Jehová «ya slecubtes te machʼa pichʼil yoʼtan»

1. ¿Bin yaʼiyel ya yaʼiy sba te Jehová ta stojol te j-abatetik yuʼune?

TE Jehová ya yil spisil te bin ya xkʼax ta jtojoltike melel ya snaʼ teme tseʼel koʼtantik o teme ayotik ta mel-oʼtan (Sal. 37:18). Te kʼalal ya yil te ya jpastik tulan te ban kʼalal ya xjuʼ kuʼuntik ta spasbeyel te skʼanojel yoʼtan manchukme ayotik ta mel-oʼtan ya x-akʼbot bayal stseʼelil yoʼtan. Pero ma jaʼuknax-abi, jaʼnix jich ya skoltayotik sok ya yakʼbotik smukʼul koʼtantik.

2. ¿Bin-utʼil ya skoltay Jehová te machʼatik ayik ta mel-oʼtan sok bin ya skʼan ya jpastik yuʼun ya jta jlekilaltik ta swenta te koltayel ya yakʼe?

² Te bitʼil la kalbeytikix skʼoplal ta swenta te machʼa ya smel yoʼtane, ta Salmo 147:3 te Jehová ya yal te «ya spotsbe yehchen» te machʼa ay ta mel-oʼtan. Te texto ini ya yalbey skʼoplal te bin-utʼil te Jehová ya skanantay sok skʼuxul yoʼtan te machʼatik ayik ta mel-oʼtan. ¿Bin ya skʼan ya jpastik yuʼun ya jta jlekilaltik ta swenta te koltayel ya yakʼe? Kalbeytik skʼoplal jun ejemplo, teme ay machʼa ya x-ejchenaj ya xjuʼ ya xbajt ta doctor, pero yuʼun ya xlekub ta ora-a te yejchene ya skʼan ya spas te bin ya x-albote. Ta artículo ini ya xbajt kiltik bin-utʼil te Jehová ya skoltay te machʼatik ayik ta mel-oʼtan sok te bin-utʼil ya xjuʼ ya spas ta skuxlejalik te mantalil ya yakʼe.

MUKʼ JKʼOPLALTIK TA SIT TE JEHOVÁ

3. ¿Bin yuʼun ay machʼatik ma lek ya yaʼiy sbaik?

³ Mel-oʼtantik sba te bitʼil maʼyukix te kʼuxul oʼtanil ta balumilal. Bayal ants winiketik ya yutsʼin te yantik sok jich ya yakʼbey snaik te maʼyuk skʼoplalike. Jtul hermana te Helena sbiil jich ya yal: «Chʼion ta jun familia te banti maʼyuk kʼuxul oʼtanil. Te jpapa chopol stalel sok jujun kʼajkʼal ya yalbotik te ma xtuunonkotik». ¿Aybal jich kʼaxem ta atojol-euk? Ayniwan la awichʼ utsʼinel, kontrainel o te jich ya awaʼiy te ma snujpʼuk te ay machʼa ya yakʼbat awil skʼuxul yoʼtan. Teme jiche, wokolniwan ya awaʼiy te ay machʼa kʼuxat ta yoʼtane.

4. ¿Bin ya yalbotik ta jamal te Jehová ta Salmo 34:18?

⁴ Manchukme ay la awichʼ utsʼinel yuʼun te yantik ants winiketik, ya xjuʼ ya schʼuun awoʼtan te Jehová kʼuxat ta yoʼtan sok ay akʼoplal ya yilat. «Te Jehová nopol ay ta stojol te machʼatic ayic ta mel-oʼtan» (kʼopona Salmo 34:18). Teme jich ya awaʼiy aba bitʼil «te machʼatic pichʼil yoʼtanique», ayukme ta awoʼtan te Jehová ay bin lek la yilbat ta awoʼtan sok la skʼan te ya x-ochat ta j-abat yuʼune (Juan 6:44). Spisil-ora ya skoltayat melel kʼuxat ta yoʼtan.

5. ¿Bin ya yakʼ jnoptik te bin yilel la yil Jesús te machʼatik ya yichʼik pʼajel yuʼun te yantike?

⁵ Te ejemplo yuʼun te Jesús ya skoltayotik ta snaʼbey sba te Jehová. Kʼalal xtaluk ta Balumilal, te Jesús la yil te wokoliletik ya xkʼax ta stojol te ants winiketik te ya yichʼik pʼajel sok la snaʼtiklanbey yoʼbolil sbaik (Mat. 9:​9-12). Kʼalal jtul ants te yak ta yilel swokol yuʼun te schamel la spikbey skʼuʼ te Jesús yuʼun ya xlekub-a, jich yuʼun te Jesús la yakʼbey smukʼul yoʼtan sok la yutsil kʼoptay ta swenta te schʼuunel yoʼtan (Mar. 5:​25-34). Te Jesús jaʼ la yakʼ ta ilel te stalel te sTate (Juan 14:9). Ya xjuʼ ya schʼuun awoʼtan te Jehová ay akʼoplal ta yoʼtan sok ya yil te tʼujbil taleliletik ay awuʼun, jich bitʼil te schʼuunel awoʼtan sok te skʼuxul awoʼtan ta stojole.

6. ¿Bin ya xjuʼ ya jpastik teme maʼyuk jkʼoplal ya kaʼiy jbatik?

⁶ ¿Bin ya xjuʼ ya apas teme ma xjuʼ awuʼun yijkitayel ta snopel te maʼyuk akʼoplale? Kʼopona textoetik te ay ta Biblia te ya yakʼbat awil te ay akʼoplal ta sit te Jehová sok nopilana ta awoʼtan (Sal. 94:19).b Teme ma juʼ awuʼun skʼotesel ta pasel te bin anopoj ya apas-a o te ma xjuʼ te bayal ya apas jich bitʼil te yantik, mame xchebaj awoʼtan sok mame xa awutsʼin aba. Te Jehová ya xkʼot ta yoʼtan te bin ma xjuʼ ya apase sok maba ya skʼanbat te ya apas te bin ma xjuʼ awuʼune (Sal. 103:​13, 14). Teme ay awichʼoj utsʼinel mame xa awal te jaʼat amul te ay bin la awichʼ pasbeyele, melel maba jaʼuk amul. Julukme ta awoʼtan te Jehová ya xbajt yichʼ ta kʼop te machʼatik ya spasik te bin chopole, ma jaʼuk ya yichʼ ta kʼop te machʼa ay bin pasbote (1 Ped. 3:12). Te Sandra te la yichʼ utsʼinel kʼalal chʼinto-a, jich ya yal: «Spisil-ora ya jkʼanbey te Jehová te yakuk skoltayon ta yilel te lekil taleliletik ay kuʼune».

7. ¿Bin-utʼil ya xjuʼ ya jtuuntestik te bin kʼaxem ta jkuxlejaltik yuʼun ya x-abatinotik ta stojol te Jehová?

⁷ Manchukme ma schʼuun awoʼtan, te Jehová ya xjuʼ ya stuuntesat yuʼun ya akoltay te yantik. Yakʼojbat te mukʼul majtanil yuʼun ya xlokʼ acholbey te skʼope (1 Cor. 3:9). Ta swenta te bintik kʼaxem ta akuxlejal, ta ora ini ya xjuʼ ya xkʼotix ta awoʼtan te bin yaʼiyel ya yaʼiy sba te yantik. Bayal ya xjuʼ ya akoltaylan. Te Helen te la kalbeytik skʼoplal ta párrafo 3, la yichʼ koltayel sok ta ora ini chapalix ta lek yuʼun ya xjuʼ ya skoltay te yantik, jich ya yal: «Ta nail jich ya kaʼiy te kʼax maʼyuk jkʼoplal, pero te Jehová la yakʼbon kil te kʼuxon ta yoʼtan sok te bayal ya xtuunon yuʼun». Ta ora ini, te Helen jaʼix precursora regular sok kʼax tseʼel yoʼtan.

AKʼA SCHʼUUN KOʼTANTIK TE YA SPASBOTIK PERDÓN TE JEHOVÁ

8. ¿Bin jamal ya yalbotik te Jehová ta Isaías 1:18?

⁸ Ay chaʼoxtul j-abatetik yuʼun Jehová maba lek ya yaʼiy sbaik ta swenta te bin maba lek la spasik ta namey te kʼalal mato yichʼojik jaʼ o te kʼalal yichʼojikix-ae. Pero ayuk ta koʼtantik te Jehová la yakʼ te stojol kolel yuʼun kʼuxotik ta yoʼtan. Ya skʼan te seguro ayotik te ya skʼan ya kichʼtik te majtanil-abi, melel te Jehová jich ya yalbotik: «Laʼic, xchi te Jehová, ya jchahpantic te cʼop ini».c Sok jamal ya yalbotik teme jich ya jpastike ya spasbotik perdón ta swenta te jmultike (kʼopona Isaías 1:18). Ya kaltik bayal wokol ta stojol te jTatik te kʼuxotik ta yoʼtan te ya xchʼay ta yoʼtan te bin maba lek jpasojtik ta namey tal, pero te maʼyuk bin-ora ya xchʼay ta yoʼtan te bin lek jpasojtike (Sal. 103:​9, 12; Heb. 6:10).

9. ¿Bin yuʼun jaʼ lek te jaʼuk ya xbajt ta koʼtantik te bin ya jpastik ta ora ini sok ta pajel chaʼbej, ma jaʼuk te bin jpasojtikixe?

⁹ ¿Bin ya skoltayat teme maba lek ya awaʼiy aba ta swenta te bin ma lek apasoje? Jaʼuk ya xbajt ta awoʼtan te bin ya apas ta ora ini sok ta pajel chaʼbeje. Nopa ta swenta te jpuk-kʼop Pablo. Maba lek la yaʼiy sba yuʼun ta swenta te la yutsʼin te jchʼuunjeletik, pero snaʼoj te pasbilix perdón yuʼun te Jehová (1 Tim. 1:​12-15). Maba ya snaʼulanix te bintik maba lek la spas sok maba ya xjulix ta yoʼtan te bin la sta kʼalal ay ta religión yuʼun te judioetik (Filip. 3:​4-8, 13-15). Te bin la spas jaʼ te la schol skʼop Dios sok stseʼelil yoʼtan sok jaʼ bajt ta yoʼtan te bin ya sta ta patil. Jich bitʼil te Pablo, ma xjuʼ ya ajeltay te bin la apas, pero ya xjuʼ ya awakʼ ta awoʼtan te ya awichʼ ta mukʼ te Jehová ta ora ini sok te bin tʼujbil ya xbajt yakʼbat ta pajel chaʼbej.

10. ¿Bin ya xjuʼ ya jpastik teme ay machʼa la sta swokol ta swenta te bin ma lek la jpastike?

¹⁰ Maniwan lek ya awaʼiy aba yuʼun te la awakʼbey swokol yantik ta skaj te bin ma lek la apase. ¿Bin ya xjuʼ ya apas? Kʼanbeya perdón sok pasa te bantito kʼalal ya xjuʼ awuʼun yuʼun lekuk ya yaʼiy sbaik (2 Cor. 7:11). Kʼanbeya te Jehová te yakuk skoltay te machʼatik la sta swokolik yuʼun te bin ma lek la apas. Te Jehová ya xjuʼ ya skoltayat sok te machʼatik la sta swokolike, yuʼun maba ya xchebaj awoʼtanik sok te yakuk ataik lamal kʼinal.

11. ¿Bin ya yakʼ jnoptik te ejemplo yuʼun te Jonás? (Jaʼnix jich ilawil te dibujo).

¹¹ Ayuk bin lek ya anop ta swenta te bin maba lek apasoj sok akʼa stuuntesat te Jehová te bin-utʼil ya skʼan stukele. Juluk ta awoʼtan te j-alwanej Jonás, te maba bajt ta Nínive jich bitʼil te albot ta mantal yuʼun te Diose sok te an bael ta yan lugar. Te Jehová la stojobtes te Jonás sok ay bin la snop ta swenta-abi (Jon. 1:​1-4, 15-17; 2:​7-10). Te Jehová ma la yijkitay ta stuuntesel te Jonás, melel la stikun bael yan buelta ta Nínive. Te Jonás la schʼuun te la yichʼ tikunel bael yuʼun te Jehová. Manchukme maba lek la yaʼiy sba yuʼun te bin la spas ta nailal ma la yakʼ te jaʼ ya xmakot yuʼun ya schʼuun te bin albot yuʼun te Jehová ta patil (Jon. 3:​1-3).

TE JEHOVÁ YA YAKʼ SMUKʼUL KʼINAL KAʼIYTIK

12. ¿Bin-utʼil ya yakʼbotik lamal kʼinal te Jehová kʼalal ya xkʼaxotik ta tulan wokolil? (Filipenses 4:​6, 7).

¹² Kʼalal ya xkʼax tulan wokolil ta jkuxlejaltik o ay bin ya xkʼax ta jtojoltik te ma xchʼay ta koʼtantike, te Jehová ya stuuntes te schʼul espíritu yuʼun ya yakʼbotik smukʼul kʼinal kaʼiytik. Jaʼ te bin kʼax ta stojolik te Ron sok te Carol te kʼalal la smil sba te skeremike, jich ya yalik: «Ma jaʼuk sbabial buelta te ay bin wokol ya xkʼax ta jtojoltike, pero te bin la spas te jkeremtik jaʼ te bin kʼax kʼux la kaʼiytike. Bayal buelta maba och jwayeltik, la jkʼopontik te Jehová sok la yakʼbotik te lamal kʼinal te ya yalbey skʼoplal te Filipenses 4:​6, 7» (kʼopona). Teme yak ta kʼaxel ta atojol tulan wokolil o tulan prueba sok te jich ya awaʼiy te ma xjuʼix awuʼune, albeya te Jehová te bin yaʼiyel ya awaʼiy aba. Ya xjuʼ ya akʼopon bayal buelta sok te jayeb tiempo ya akʼane (Sal. 86:3; 88:1). Mame xa akom aba ta skʼanbeyel te schʼul espíritu. Ayukme ta awoʼtan te ya yaʼiybat te akʼope (Luc. 11:​9-13).

13. ¿Bin-utʼil ya xjuʼ ya skoltayotik te chʼul espíritu yuʼun junuk koʼtantik ya x-abatinotik ta stojol te Jehová? (Efesios 3:16).

¹³ ¿Aybal kʼaxem jun tulan prueba ta atojol te jich ya awaʼiy te ma xjuʼix awuʼune? Te chʼul espíritu ya xjuʼ ya yakʼbat awip yuʼun junuk awoʼtan ya x-abatinat ta stojol te Jehová (kʼopona Efesios 3:16). Kiltik te bin kʼax ta stojol jtul hermana te Flora sbiil. Te hermana sok te smamalal jaʼik misioneroetik-a, pero loʼlayot yuʼun te smamalal sok la slajinbeyik te sjunal te snujpunelike. Te Flora, jich ya yal: «Te bitʼil la sloʼlayon te jmamalale, kʼax kʼux la kaʼiy sok bayal la kil jwokol ta jujun kʼajkʼal. Jaʼ yuʼun la jkʼanbey te Jehová te yakuk yakʼbon te schʼul espíritu yuʼun maba ya xchebaj koʼtan. Te Jehová la skoltayon yuʼun lek ya kaʼiy jba manchukme jnopoj-a te maʼyuk bin ya xjuʼix kuʼun spasel». Jich la yaʼiy te jaʼ koltayot yuʼun te Dios yuʼun ya stsakxan yip te smukʼul yoʼtan ta stojole sok schʼuunoj te jaʼ ya xkoltayot yuʼun chikan bin ya xkʼax ta skuxlejal. Sok jich la yalxan: «Te Jehová jaʼ la spas ta jtojol te bin ya yal te Salmo 119:32: ‹Ya xʼahnimajon ta be yuʼun te mandariletic awuʼun, como yac awaʼbon tseʼel coʼtan›».

14. ¿Bin ya skʼan ya jpastik yuʼun ya kichʼtik te chʼul espíritu yuʼun te Dios?

¹⁴ Te kʼalal akʼanojbeyix-a te schʼul espíritu te Jehová, ¿bin-a te ya skʼan ya apas? Jaʼ te ya apas aʼteliletik te banti ya xjuʼ ya awichʼ te chʼul espíritu, jich bitʼil te tsoblejetik, scholel skʼop Dios sok skʼoponel te Biblia ta jujun kʼajkʼal, jichme ya anaʼ te bin ya snop te Jehová (Filip. 4:​8, 9). Kʼalal ya akʼopon te Biblia ilawil te ay ants winiketik te jaʼnix jich kʼax bayal swokolik sok nopilana ta awoʼtan te bin-utʼil te Jehová la skoltaylan yuʼun ya xkujch yuʼunik te swokolik. Te Sandra te la kalbeytik skʼoplal ta párrafo 6, jaʼnix jich kʼax bayal swokol, jich ya yal: «Te relato yuʼun te José spisil-ora ya stijbon koʼtan. Manchukme ay kʼax tulan pruebaetik ta stojol maba la yakʼ te jaʼ ya x-utsʼinbot te bitʼil lek yiloj sba sok te Jehová» (Gén. 39:​21-23).

TE JEHOVÁ YA STUUNTES TE HERMANOETIK YUʼUN YA YAKʼ SMUKʼUL KʼINAL KAʼIYTIK

15. ¿Machʼatik ya xjuʼ ya yakʼbotik smukʼul kʼinal kaʼiytik, sok bin-utʼil ya spasik? (Jaʼnix jich ilawil te foto).

¹⁵ Kʼalal ya xkʼax jwokoltik, te hermanoetik ya xjuʼ te ya yakʼbotik «bayal smukʼul kʼinal» kaʼiytik (Col. 4:11). Te Jehová ya stuuntes te hermanoetik yuʼun ya yakʼ kiltik te bayal kʼuxotik ta yoʼtan. Ya xjuʼ ya yakʼbotik smukʼul kʼinal kaʼiytik te kʼalal ya schʼam yaʼiyik te bin ya kaltike o jaʼnax te bitʼil ya sjokinotike. Sok yaniwan stuuntesik jun texto yuʼun ya yakʼbotik smukʼul kʼinal kaʼiytik o yaniwan spasik jun oración sok te joʼotike (Rom. 15:4).d Ayniwan jtul hermano o jtul hermana te ya sjultes ta koʼtantik te bin yilel ya yil te Jehová te bintik ya xkʼax ta jtojoltike. Jaʼ-abi ya skoltayotik yuʼun maba ya xchebaj koʼtantik sok te ayuk lamal kʼinal ya kaʼiytik. Te hermanoetik ay bin yan ya xjuʼ ya spas ta jtojoltik, jaʼ te ayniwan ya yichʼbotik bael jweʼeltik.

16. ¿Binwan ya skʼan ya jpastik yuʼun ya kichʼtik koltayel yuʼun te yantike?

¹⁶ Yuʼun ya awichʼ koltayel yaniwan skʼan te ya akʼan koltayele. Te hermanoetik kʼuxat ta yoʼtanik sok ya skʼan ya skoltayat (Prov. 17:17). Pero ayniwan ma snaik te bin yaʼiyel ya awaʼiy aba sok te bin ya xtuun awuʼune (Prov. 14:10). Teme ya amel awoʼtan lea awamigotak te yijubenix te schʼuunel yoʼtanik yuʼun ya awalbey te bin yaʼiyel ya awaʼiy abae. Jaʼ lek te yakuk awal te bin ya xjuʼ ya spasik ta atojole. Ya xjuʼ ya xkʼopojat sok jtul o chaʼtul ancianoetik te ya anaʼbey sba ta lek. Ay chaʼoxtul hermanaetik te jaʼ lek ya yaʼiy sbaik te kʼalal ya xkʼopojik sok jtul hermana te tulan ay te schʼuunel yoʼtan.

17. ¿Bintik-a te ma xyakʼ kichʼtik yip koʼtantik sok bin-utʼil ya xjuʼ ya jtsaltik?

¹⁷ Mame xa atukeltay aba. Te kʼalal bayal ya amel awoʼtan maniwan ya akʼan te ya jokin yantik ants winiketik. Te hermanoetik ayniwan ma xkʼot ta yoʼtanik te bin yaʼiyel ya awaʼiy abae o ayniwan bin ya yalik te ma stojiluke (Sant. 3:2). Mame jaʼuk ya awakʼ ya schebajtesbat awoʼtan yuʼun ya akʼan te koltayel te ya awichʼ akʼbeyele. Jtul anciano te Gavin sbiil te yichʼoj tulan mel-oʼtan, jich la yal: «Bayal buelta ma jkʼan ya jokin te kamigotak». Manchukme jich-abi ya spas tulan yuʼun ya sjokin te yantik sok jaʼ ya xkoltayot yuʼun lek ya yaʼiy sba. Jtul hermana te Amy sbiil, jich ya yal: «Ta skaj te bintik kʼax ta jtojol wokol ya kaʼiy te ya kakʼ smukʼul koʼtan ta stojol te yantike. Pero yakon ta spasel tulan yuʼun kʼuxuk ta koʼtan te kermanotak sok te ya kakʼ smukʼul koʼtan ta stojol te yantik jich bitʼil ya spas te Jehová. Jaʼ te bin ya x-akʼbot stseʼelil yoʼtan sok ya yakʼbon stseʼelil koʼtan-euk».

YA YAKʼBOTIK SMUKʼUL KOʼTANTIK TE BINTIK SJAPOJ TE JEHOVÁ TE YA SPAS TA PAJEL CHABEJ

18. ¿Bin tʼujbil majtanil ya jtatik ta pajel chaʼbej, sok bin ya xjuʼ ya jpastik ta ora ini?

¹⁸ Ya yakʼbotik stseʼelil koʼtantik snaʼel te Jehová nopolix ya xbajt slekubtesotik sok ya xbajt slajinbey skʼoplal te bin ya yakʼ jwokoltik (Apoc. 21:​3, 4). Ta achʼ balumilal spisil te bin la yakʼ jwokoltik «jcʼaxel ma xnaʼotix» (Is. 65:17). Jich bitʼil la kiltikix, te Jehová ya skoltayotik. Bayal bintik yakʼojbotik sok skʼuxul yoʼtan yuʼun ya smukʼubtes kʼinal kaʼiytik sok yuʼun ya yakʼbotik lamalkʼinal. Akʼame schʼuun awoʼtan te ya smel yoʼtan ta atojol te Jehová (1 Ped. 5:7).