Te sbiil te Jehová: ¿Jayebto skʼoplal ta yoʼtan te Jesús?

1, 2. 1) ¿Bin la spas te Jesús kʼalal nopol ya xlajix-a? 2) ¿Bin jojkʼoyel ya kakʼbeytik sujtib ta artículo ini?

TA JAʼBIL 33 ta ajkʼabal yuʼun jueves ta 14 yuʼun nisán, kʼalal nopol ya yichʼix akʼel ta kʼabal-a te Jesús, te ya yichʼ ichʼel ta kʼop, te ya yichʼ lebeyel smul, te ya yichʼ majel sok milel. Stsoboj sba sok te jpuk-kʼopetik ta xchaʼkajal na. Kʼalal laj yoʼtanik ta weʼel uchʼel sok te jnopojeletik yuʼun, te Jesús la yaltiklanbey chaʼoxpʼal kʼopetik yuʼun ya yakʼbey smukʼul yoʼtan te jnopojeletike. Jaʼ yuʼun, kʼalal nopol ya xlokʼikix bael-a, te Jesús la spas jun oración te kʼax mukʼ skʼoplal. Te jpuk-kʼop Juan la stsʼibay jilel ta Juan capítulo 17.

² Ta artículo ini ya xbajt kilbeytik skʼoplal te bin ya yakʼ jnoptik te oración la spas te Jesús: ¿bintik-a te la smel yoʼtan yuʼun ta yorail-abi sok bin-a te mukʼ skʼoplal la yil ta skuxlejal te kʼalal kʼax ta Balumilal?

«LA KAKʼBEYIX SNAʼIK TE ABIIL»

3. ¿Bin la yal te Jesús ta swenta te sbiil te Jehová sok bin la skʼan la yal? (Juan 17:​6, 26).

³ Te oración te la spas te Jesús, jich la yalbey te Jehová: «La kakʼbeyix snaʼik te abiil». Chikan ta ilel te jaʼ te bin mukʼ skʼoplal la yil, melel cheb buelta la yal (kʼopona Juan 17:​6, 26). ¿Jabal ya skʼan ya yal-abi te la yakʼ ta naʼel te jaʼ Jehová te sbiil te Diose? Maʼuk. Te jnopojeletik snaʼojikix-a, melel jaʼ judioetik sok ya xchiknaj bayal buelta ta Escrituras Hebreas te sbiil te Diose. Kʼalal te Jesús la yal te la yakʼbeyix snaʼik te sbiil te Diose, jaʼ la skʼan la yal te la yakʼbeyix snaʼik te bin yilel stalel te Jehová, tey ochem skʼoplal-a te skʼanojel yoʼtan, te bintik ya spas sok te taleliletik yuʼune. Te Jesús ya snaʼbey sba ta lek te Jehová, jaʼ yuʼun jaʼnax stukel te ya yakʼ ta nopel ta lek ta swenta te Jehová.

4, 5. 1) ¿Bin-utʼil kʼax mukʼ skʼoplal ya xkʼot sbiil jtul ants winik? Chola sok jun ejemplo. 2) ¿Bin yuʼun te jpuk-kʼopetik mukʼ skʼoplal la yilik te sbiil te Jehová?

⁴ Kaltik jun ejemplo, nopa awaʼiy tey ta acongregacion ay jtul anciano te David sbiil te jaʼ doctor, ayniwanix bayal tiempo te ya anaʼbey sbae. Pero jnop kaʼiytik te la ata jun accidente sok te oranax ya awichʼ ikʼel bael ta hospital te banti ya x-aʼtej te hermano sok ya stuuntes te spʼijil yuʼun ya skoltaybat te akuxlejale. ¿Melel te kʼax kʼux-xan ya awaʼiy ta awoʼtan te hermanoe? Sok ta jujun buelta te ya awaʼiybey te sbiil ya xjul ta awoʼtan te bin la spas ta atojole. Te David ma jaʼuknax ya awil jich bitʼil jtul anciano ta acongregacion, jaʼnix jich ya awil bitʼil te machʼa la skoltaybat te akuxlejal. Te sbiil kʼax mukʼ skʼoplal ya xkʼot ta awoʼtan.

⁵ Jaʼnix jich kʼoem, manchukme te jnopojeletik yuʼun te Jesús snaʼojikix-a te sbiil te Jehová, la snaʼbeyikxan sba ta lek te machʼa yichʼoj te biilil-abi. Jaʼ yuʼun, te sbiil te Jehová kʼax mukʼ skʼoplal kʼot ta yoʼtanik. ¿Bin yuʼun? Jaʼ ta swenta te bitʼil la schol skʼop Dios te Jesús. Ta swenta te bintik la spas sok te bintik la yal la yakʼ ta ilel ta lek te taleliletik yuʼun te sTate. Kʼalal la yilik te jpuk-kʼopetik te bin-utʼil nojpteswan te Jesús sok te bin yilel la yil te ants winiketik jich la snaʼbeyikxan sba ta lek te Jehová (Juan 14:9; 17:3).

«TE ABIIL TE LA AWAKʼBON KICHʼE»

6. ¿Bin la skʼan la yal te Jesús kʼalal la yal te akʼbot yichʼ te sbiil te Diose? (Juan 17:​11, 12).

⁶ Kʼalal te Jesús la skʼopon Dios ta stojol te jpuk-kʼopetik yuʼune, jich la yalbey te Jehová: «Kanantaylana ta swenta te abiil te la awakʼbon kichʼe» (kʼopona Juan 17:​11, 12). ¿Yabal skʼan ya yal-abi te jaʼnix jich ya xjuʼ ya yichʼ biilintesel Jehová te Jesuse? Maʼuk. Kʼalal te Jesús la spas te oración la yalbey te sbiil te Jehová la yal «te abiil». Jaʼ ya skʼan ya yal-abi te maba la yichʼ biilintesel «Jehová» te Jesuse. Jaʼ yuʼun, ¿bin la skʼan la yal te Jesús kʼalal la yal te akʼbot yichʼ te sbiil te Diose? Sbabial, te Jesús jaʼ te jkʼasesej kʼop yuʼun te Jehová. La yichʼbey tal te sbiil te sTat te kʼalal xtaluk ta Balumilal sok bayal bintik la spas ta swenta sbiil te Jehová (Juan 5:43; 10:25). Jaʼnix jich, te sbiil te Jesús ya skʼan ya yal «te Jehová jaʼ Jkoltaywanej». Jich bitʼil la kiltikix, te bin ya skʼan ya yal te sbiil te Jesús tey ochem skʼoplal-a te sbiil te Jehová.

7. Chola sok jun ejemplo te bin yuʼun te Jesús ya xjuʼ ya xkʼopoj ta swenta te sbiil te Jehová.

⁷ Yuʼun ya kichʼbeytik ta lek swentail, kaltik jun ejemplo. Jtul ajwalil ya xjuʼ te ay machʼa ya stikun sok ya yakʼbey mukʼ yaʼtel yuʼun ya xkʼopoj ta swenta sbiil. Te bintik ya yal te machʼa tikunbile jich kʼoem te jaʼ yak ta kʼop te ajwalile. Pajal kʼoem sok, te Jehová la stikun tal te Jesús sok la yakʼbey mukʼ yaʼtel yuʼun ya xkʼopoj ta swenta te sbiil (Mat. 21:9; Luc. 13:35).

8. ¿Bin ya skʼan la yal te «yichʼojbey» sbiil Jehová te Jesús te kʼalal mato xtal ta Balumilal-a? (Éxodo 23:​20, 21).

⁸ Te Biblia ya yal te Jesús jaʼ te Kʼopil, melel te Jehová la stuuntes yuʼun ya skʼases kʼop sok ya yalbey mantal te chʼul-abatetik soknix te ants winiketike (Juan 1:​1-3). Te Jesús jaʼniwan te chʼul-abat te la stuuntes te Jehová yuʼun ya stojobtes sok ya skanantay te israeletik kʼalal ayik ta beel ta jochol takin kʼinal. ¿Bin yuʼun la skʼan te ya schʼuunbeyik skʼop te chʼul-abat-abi? Melel te Jehová jich la yal: «Jaʼ yichʼojbon te jbiile» (kʼopona Éxodo 23:​20, 21).a ¿Bin la skʼan la yal te «yichʼojbey» sbiil Jehová te Jesús? Jaʼ ta swenta te jaʼ tikunbil yuʼun sok jaʼ te machʼa sbabial la skoltaybey skʼoplal te Jehová sok te la schʼultesbey te sbiile.

«JTAT, AKʼA TA ICHʼEL TA MUKʼ TE ABIILE»

9. ¿Bin-utʼil ya jnaʼtik te mukʼ skʼoplal la yil Jesús te sbiil te Jehová?

⁹ Jich bitʼil la kiltikix, te kʼalal mato xtal ta Balumilal-a te Jesús kʼax mukʼ skʼoplal la yil te sbiil te Jehová sok jichnix la spas te kʼalal xtaluk ta Balumilal. Ta swenta te bintik la spas la yakʼ ta ilel te kʼax mukʼ skʼoplal la yil te sbiil te Jehová. Kʼalal nopol ya xlajix-a te Jesús, jich la yalbey te Jehová: «Jtat, akʼa ta ichʼel ta mukʼ te abiile». Kʼalalto ta chʼulchan te Jehová jich la yalbey ta tulan: «Kakʼojix ta ichʼel ta mukʼ sok ya kakʼxan ta ichʼel ta mukʼ» (Juan 12:28).

10, 11. 1) ¿Bin-utʼil te Jesús la yakʼ ta ichʼel ta mukʼ te sbiil te Jehová? (Jaʼnix jich ilawil te dibujo). 2) ¿Bin yuʼun te ya skʼan ya yichʼ chʼultesel sok te ya yichʼ koltaybeyel skʼoplal te sbiil te Jehová?

¹⁰ Te Jesús jaʼnix jich la yakʼ ta ichʼel ta mukʼ te sbiil te sTate. ¿Bin-utʼil la spas? Jaʼ te kʼalal la yalbey skʼoplal te tʼujbil taleliletik yuʼun te Jehová sok spisil te bintik tʼujbil spasoje. Pero, ma jaʼuknax te bin la spas yuʼun ya yakʼ ta ichʼel ta mukʼ te biilil-abi. Snaʼoj-a te ya skʼan ya yichʼ chʼultesbeyel te sbiil te Jehová sok te ya yichʼ koltaybeyel skʼoplal.b Te Jesús la yakʼ ta ilel te mukʼ skʼoplal-abi te kʼalal la snojptes te jnopojeletik yuʼun ta skʼoponel Dios, jich la yal: «Jtatik te ayat ta chʼulchan, akʼa yichʼ chʼultesel te abiile» (Mat. 6:9).

¹¹ ¿Bin yuʼun ya skʼan te ya yichʼ chʼultesbeyel sok te ya yichʼ koltaybeyel skʼoplal sbiil te Jehová? Melel ta tsʼunbil kʼinal Edén, te Satanás la sbolobtesbey skʼoplal te Jehová kʼalal la yal te yalaj spas lot sok te malaj ayuk bin lek ya spas ta stojol te Adán sok te Eva (Gén. 3:​1-5). Te pukuj jaʼnix jich la yal te malaj lek te bintik ya spas te Jehová, te lotiletik-abi la sbolobtesbey skʼoplal te sbiil te Jehová. Ta patil, ta skʼajkʼalel te Job, te Satanás la yal te spisil te machʼatik ya x-abatinik ta stojol te Jehová jaʼnaxlaj ta swenta slekilalik. Te jpas lot-abi, la yal te ants winiketik yalaj yijkitayik te abatinel ta stojol Jehová te kʼalal ya sitintayik pruebaetik (Job 1:​9-11; 2:4). Ya skʼan tiempo yuʼun ya xchiknaj ta ilel machʼanix-a te ya yal te smelelile: te Jehová o te Satanás.

«YA KAKʼ TE JKUXLEJAL»

12. ¿Bin la yakʼ ta yoʼtan spasel te Jesús ta swenta te kʼux ta yoʼtan te sbiil te Jehová?

¹² Te Jesús kʼax kʼux ta yoʼtan te sTate, jaʼ yuʼun la spas te ban kʼalal juʼ yuʼun ta schʼultesbeyel sok ta skoltaybeyel skʼoplal te sbiil te Jehová. Jaʼ yuʼun jich la yal: «Ya kakʼ te jkuxlejal» (Juan 10:​17, 18). La slokʼes sba ta yoʼtan yuʼun ya xlaj ta swenta sbiil te Jehová.c Te Adán sok te Eva —te sbabial tojil ants winiketik— maba la yichʼik ta mukʼ te Jehová sok la yakʼ sbaik ta stojol te Satanás. Manchukme jich-abi, te Jesús la slokʼes sba ta yoʼtan yuʼun ya xtal ta Balumilal sok la yakʼ ta ilel te kʼux ta yoʼtan te Jehová te kʼalal la schʼuun mantal te jayeb tiempo kuxin ta Balumilal (Heb. 4:15; 5:​7-10). Jun yoʼtan la yakʼ sba ta stojol te Jehová jaʼto te kʼalal la yichʼ jijpanel ta teʼ (Heb. 12:2). Jich la yakʼ ta ilel te skʼuxul yoʼtan te Jehová sok te sbiile.

13. ¿Bin yuʼun te Jesús jaʼnax te machʼa ya xjuʼ ya yal te jaʼ jpaslot te Satanase? (Jaʼnix jich ilawil te dibujo).

¹³ Ta spisil te bintik la spas ta skuxlejal te Jesús, la yakʼ ta ilel te jaʼ jpas lot te Satanás (Juan 8:44). Te Jesús jaʼ te machʼa kʼax leknax ya snaʼbey sba te Jehová. Te ayuk junuk smelelil te lotiletik te la yal te Satanás ta stojol te Jehová, te jichuke la snaʼ stojol te Jesuse. Pero, spisil-ora la yakʼ ta yoʼtan te ya skoltaybey skʼoplal sbiil te Jehová, jaʼ ya skʼan ya yal te maba la yakʼ ta bolobtesbeyel skʼoplal. Manchukme jich yilel te ijkitayot yuʼun te Jehová, te Jesús la yakʼ ta yoʼtan te maba ya yijkitay te stat te ay skʼuxul yoʼtan (Mat. 27:46).d

«JUʼIX TA PASEL KUʼUN TE AʼTELIL LA AWAKʼBON JPASE»

14. ¿Bin-utʼil te Jehová la smajtantes te Jesús te bitʼil jun yoʼtan la yakʼ sba ta stojole?

¹⁴ Te oración te la spas te Jesús te kʼalal junxanix ajkʼabal ya skʼan ya xlaj-ae, jich la yalbey te Jehová: «Juʼix ta pasel kuʼun te aʼtelil la awakʼbon jpase». Te Jesús smukʼulinoj yoʼtan-a te jaʼ ya xmajtantesot yuʼun te Jehová ta swenta te jun yoʼtan la yakʼ sba ta stojole (Juan 17:​4, 5). Jichnix kʼot ta pasel-a. Te Jehová maba la yakʼ te ya xjil ta mukenal (Hech. 2:​23, 24). La schaʼkuxajtes sok la yakʼbey mukʼ yaʼtel ta chʼulchan (Filip. 2:​8, 9). Bayal jaʼbil ta patil, te Jesús jajch ta wentainwanej jich bitʼil Ajwalil ta Wentainel yuʼun te Diose. ¿Bin ya xbajt spas te Wentainel yuʼun te Diose? Te Jesús la scholbey skʼoplal te kʼalal jich la snojptesotik ta skʼanbeyel te Jehová: «Akʼa taluk te Wentainel awuʼune. Akʼa yichʼ pasel te skʼanojel awoʼtan ta balumilal jich bin-utʼil yak ta pasel ta chʼulchan» (Mat. 6:10).

15. ¿Bintikxan ya xbajt spas te Jesús?

¹⁵ Te Jesús nopolix ya xbajt yakʼbey guerra te skontratak te Dios sok ya slajinlan ta Armagedón te machʼatik chopolik (Apoc. 16:​14, 16; 19:​11-16). Ta patil ya schʼoj ochel ta «xaab» te Satanás, te jaʼ jun lokʼombakʼop te banti ya yichʼ makel sok te maʼyukix bin ya xjuʼ ya spas tey-a (Apoc. 20:​1-3). Ta patil ya xjajch te Wentainel ta jmil jaʼbil, ta yorail-abi te Jesús ya yichʼ talel te lamal kʼinal ta Balumilal sok ya skoltay te ants winiketik yuʼun tojil ants winiketik ya xkʼotik. Jaʼnix jich ya schaʼkuxajtes te machʼatik lajemik sok ya spas ta nichimal kʼinal te Balumilal. ¡Ya sta yorail te ya xkʼot ta pasel te skʼanojel yoʼtan te Jehová! (Apoc. 21:​1-4).

16. ¿Bin yilel te kuxlejalil kʼalal kʼaxemix-a te Wentainel ta jmil jaʼbil?

¹⁶ ¿Bin yilel te kuxlejalil kʼalal kʼaxemix-a te Wentainel ta jmil jaʼbil? Te mulil lajemix skʼoplal-a sok tojil ants winikotikix-a. Te ants winiketik maba ya xtuunix yuʼunik-a te stojol kolel yuʼun ya yichʼik pasbeyel perdón ta swenta te smulik. Jaʼnix jich maba ya xtuunix yuʼunik-a te ay machʼa ya xkʼopoj ta swentaik ni jaʼuk te sacerdoteetik yuʼun ya xnoptsajik ta stojol te Jehová. Sok «te slajibal jkontratik [ . . . ] jaʼ te lajele» yichʼojix lajinel ta jkʼaxel-a. Te machʼatik lajemik chaʼkuxajemikix-a, spisil te machʼatik ya xkuxinik ta Balumilal jaʼikix tojil ants winiketik-a (1 Cor. 15:​25, 26).

17, 18. 1) ¿Bin ya xkʼot ta pasel te kʼalal tsʼakajemix-a te Wentainel ta jmil jaʼbil? 2) ¿Bin ya spas te Jesús kʼalal lajix-a te wentainel yuʼune? (1 Corintios 15:​24, 28; jaʼnix jich ilawil te dibujo).

¹⁷ ¿Binxan ya xkʼot ta pasel ta slajibal te Wentainel ta jmil jaʼbil? Ay bin mukʼ skʼoplal ya xkʼot ta pasel: ya yichʼ lajinbeyel skʼoplal te kʼop jajchem ta swenta schʼultesbeyel skʼoplal te sbiil te Jehová. Ta tsʼunbil kʼinal Edén te Satanás la yal te jaʼlaj jpaslot te Jehová, te malaj lek ya xwentainwan sok te malaj kʼux ta yoʼtan te ants winiketik. Jaʼto tal-abi, te jayebix tiempo kʼaxem talel, te j-abatetik yuʼun Jehová spasojik tulan ta schʼultesbeyel te sbiile. Kʼalal ya stsʼakaj te Wentainel ta jmil jaʼbil yichʼojbeyix koltaybeyel skʼoplal ta jkʼaxel-a te sbiile. Te jTatik te ay ta chʼulchan yakʼojix ta ilel-a te kʼuxotik ta yoʼtan ta smelelile.

¹⁸ Ta yorail-abi spisil te ants winiketik snaʼojikix-a te jaʼ lotil te bintik la yal te Satanás ta stojol te Jehová. ¿Binwan ya spas te Jesús kʼalal lajix-a te Wentainel yuʼune? ¿Yabal stʼun te ejemplo yuʼun te Satanás sok te ya skontrain te Jehová? ¡Ta melel, maʼuk! (Kʼopona 1 Corintios 15:​24, 28). Te Jesús maba pajaluk stalel sok te Satanás, melel ya yakʼbey ta skʼab te Wentainel yuʼun te sTat sok ya yakʼ sba ta wentainel-euk. Jich ya yakʼ ta yoʼtan spasel, melel kʼux ta yoʼtan te Jehová.

19. ¿Jayebto skʼoplal ta yoʼtan Jesús te sbiil te Jehová?

¹⁹ Jaʼniwan yuʼun te Jehová la yakʼ te ya x-ichʼbot te sbiil yuʼun te Jesús, yuʼun ya xkʼopoj ta swenta sbiil. Te Jesús leknax la skʼotes ta pasel te aʼtelil la yichʼ akʼbeyele. Jich yuʼun, ¿jayebto skʼoplal ta yoʼtan Jesús te sbiil te Jehová? Kʼax mukʼ skʼoplal la yil ta yoʼtan. La yakʼ ta yoʼtan te ya xlaj ta swenta te sbiil te sTate sok la yakʼ ta yoʼtan te ya sutbey te wentainel yuʼun te Jehová te kʼalal lajemix-a te Wentainel ta jmil jaʼbil. ¿Bin-utʼil ya xjuʼ ya jkʼayinbeytik te ejemplo yuʼune? Te sujtib ya kilbeytik skʼoplal ta yan artículo.