Jchʼiel hermanoetik, pasaik tulan yuʼun ya xyijubxan te schʼuunel awoʼtanik

1. ¿Bin ya skʼan ya spas te jchʼiel hermanoetik?

TE AJWALIL David jich la yalbey te Salomón: «Ayuc me yip awoʼtan, toj me xawacʼ aba» (1 Rey. 2:​1-3, TZOXCH). Spisil te jchʼiel hermanoetik lek te yakuk schʼuunik te consejo ini. Yuʼun lek ya xlokʼ te bin ya spasik ya skʼan ya schʼuunik spasel te mantaliletik yuʼun te Jehová sok te ya spas ta skuxlejalik te bin ya yal te Biblia (Luc. 2:52). ¿Bin yuʼun kʼax mukʼ skʼoplal te yakuk xyijub schʼuunel yoʼtanik te jchʼiel hermanoetik?

2, 3. ¿Bin yuʼun mukʼ skʼoplal te yakuk xyijub te schʼuunel yoʼtan te jchʼiel hermanoetik?

² Te hermanoetik kʼax bayal yaʼtelik ta congregación sok ta sfamiliaik. Teme jchʼiel hermanoat, ayniwan anopoj te bintik aʼtelil ya xjuʼ ya apas ta pajel chaʼbej. Yaniwan xjuʼ ya x-ochat ta precursor, ta siervo ministerial sok ta anciano. O yaniwan akʼan ya xnujpunat sok te ya ata awal anichʼnab (Efes. 6:4; 1 Tim. 3:1). Yuʼun ya ata te metaetik ini sok te lekuk ya xlokʼ ta pasele, ya skʼan te yijubenuk te schʼuunel awoʼtan.b

³ ¿Bin ya xjuʼ ya skoltayat yuʼun ya xyijub te schʼuunel awoʼtan? ¿Bintik ya skʼan ya anop spasel? ¿Bin-utʼil ya xjuʼ ya achajpan aba ta ora ini yuʼun lek ya xlokʼ ta pasel te aʼtelil te ya apas ta pajel chaʼbej? Akʼa kiltik.

TE BIN YA SKOLTAYAT YUʼUN YA XYIJUB TE SCHʼUUNEL AWOʼTAN

4. ¿Banti ya xjuʼ ya ata lekil ejemploetik? (Jaʼnix jich ilawil te fotoetik).

⁴ Tʼuna lekil ejemploetik. Ya xjuʼ ya akʼayinbey stalel te winiketik te ya yalbey skʼoplal te Biblia te kʼux la yaʼiyik te Dios sok te la skanantayik te lum yuʼun te Diose. Jaʼnix jich ta afamilia sok ta acongregacion ay hermanoetik te yijubenix te schʼuunel yoʼtanik te ya xjuʼ ya akʼayinbey stalel (Heb. 13:7). Jaʼnix jich, jaʼ jun lekil ejemplo te Jesucristo (1 Ped. 2:21). Kʼalal ya anop te ejemploetik ini, nopa bin taleliletik ya xjuʼ ya akʼayin (Heb. 12:​1, 2). Ta patil, nopa bin-utʼil ya atʼun te ejemploetik-abi.

5. ¿Bin ya skʼan ya apas yuʼun ayuk spʼijil awoʼtan, sok bin yuʼun te mukʼ skʼoplale? (Salmo 119:9).

⁵ Ayuk spʼijil awoʼtan (Prov. 3:21). Te hermanoetik te ay spʼijil yoʼtanik ya slokʼesik tiempo yuʼun ya snopik ta lek te bin ya spasik. Pasa tulan yuʼun ayuk spʼijil awoʼtan ta spisil-ora. ¿Bin yuʼun? Ay bayal jchʼieletik ta ora ini te jaʼ ya spasik te bin ya snopik sok te bin ya skʼan yoʼtanik (Prov. 7:7; 29:11). Jaʼnix jich, te bin ya xkʼax ta televisión, ta peliculaetik, ta Internet sok ta redes sociales ya xjuʼ ya yutsʼinat. Jaʼ yuʼun, ¿bin ya xjuʼ ya apas yuʼun ayuk spʼijil awoʼtan? Sbabial, nopa te bin ya yal te Biblia sok nopa bin yuʼun te jich ya yalbat te Jehová. Patil, pasa te bin la anopix yuʼun ay bin ya ata ta nopel spasel te lek ya yil te Jehová (kʼopona Salmo 119:9). Kʼax mukʼ skʼoplal te pʼijil oʼtanil yuʼun jich ya awakʼ ta ilel te yijubenix te schʼuunel awoʼtan (Prov. 2:​11, 12; Heb. 5:14). Ay cheb te bin-utʼil ya xjuʼ ya skoltayat te pʼijil oʼtanil: 1) te bin yilel ya awil te hermanaetik 2) te bin yilel ya achajpan aba.

6. Te pʼijil oʼtanil ya skoltayat yuʼun ya awichʼ ta mukʼ te antsetike, ¿bin-utʼil ya yakʼ ta ilel te ya yichʼ ta mukʼ te hermanaetik jtul jchʼiel kerem te ay spʼijil yoʼtan?

⁶ Teme ay spʼijil awoʼtan ya skoltayat ta yichʼel ta mukʼ te antsetike. Jich bitʼil teme ay jtul jchʼiel hermano te ya smulan jtul hermana sok ya skʼan snaʼbeyxan sba ta lek, jaʼ-abi ma chopoluk. Pero, te jchʼiel kerem te ay spʼijil yoʼtan maʼyuk bin ya yalbey te hermana sok ya maʼyuk bin ya stsʼibaybey bael o ay bin ya spas te ya yakʼbey snaʼ te ya smulan jaʼto teme yuʼunix ya skʼan ya xnujpun sok-a te hermanae (1 Tim. 5:​1, 2). Pero, teme ayix slekol te hermanoe, ya skanantay te hermana kʼalal ma stukeluk ya xjilik ya skʼan ya xkanantayotik yuʼun te machʼa yijubenix te schʼuunel yoʼtan (1 Cor. 6:18).

7. ¿Bin-utʼil ya skʼan ya schajpan sba jtul jchʼiel kerem te ay spʼijil yoʼtan?

⁷ Yanxan te bin-utʼil ya yakʼ ta ilel jtul jchʼiel kerem te yichʼojbey te spensar te Jehová jaʼ te bin-utʼil ya slap te skʼuʼ spakʼ sok te bitʼil ya stes te sjole. Te machʼatik ya spasik te kʼuʼul pakʼal sok te ya schonik maba ya yichʼik ta mukʼ te Jehová sok kʼax maba lek te skuxlejalike. Jaʼ yuʼun, te kʼuʼul pakʼal te ya spasik kʼax pitʼil o jich ya yakʼ ta ilel te skʼuʼ ants ya slapix te winike. Jtul jchʼiel kerem te yak ta spasel tulan yuʼun ya xyijub te schʼuunel yoʼtan ya yichʼ ta mukʼ te bin ya yal te Biblia sok ya stʼun te lekil ejemploetik ta congregación te kʼalal ya snop te bin-utʼil ya slap te skʼuʼ spakʼ sok te bitʼil ya schajpan sba. Ya xjuʼ ya sjojkʼoybey sba: «¿Chikanbal ta ilel te ya jnaʼ stsajtayel jba sok te ya kichʼ ta mukʼ te bin ya snop te yantike? ¿Yabal yakʼ ta ilel te jkʼuʼ jpakʼ te ya x-abatinon ta stojol te Diose?» (1 Cor. 10:​31-33; Tito 2:6). Te jchʼiel kerem te ay spʼijil yoʼtan maba jaʼnax ya x-ichʼot ta mukʼ yuʼun te hermanoetik, jaʼnix jich te jTatik te ay ta chʼulchan.

8. ¿Bin-utʼil jtul jchʼiel hermano ya xjuʼ ya yakʼ smukʼul yoʼtanik ta stojol?

⁸ Ayuk smukʼul yoʼtanik ta atojol. Yame skʼan ya apas tulan ta spasel te aʼteliletik ya awichʼ akʼbeyel (Luc. 16:10). Nopa ta swenta te ejemplo yuʼun te Jesús. Melel spisil-ora lek la spas te yaʼtel. La spas spisil te bin albot yuʼun te Jehová, manchukme wokol ta pasel. Kʼux ta yoʼtan-a te ants winiketik, kʼaxtoxan-a te jnopojeletik sok la yakʼ skuxlejal ta stojolik (Juan 13:1). Jich bitʼil te Jesús, pasa tulan yuʼun ya akʼotes ta pasel te bin ya x-akʼbotat apas. Teme ma xa anaʼ bin-utʼil ta pasel, ayuk spekʼelil awoʼtan sok kʼanbeya koltayel jtul hermano. Pasa ta lek te awaʼtele (Rom. 12:11). Kʼotesa ta pasel te aʼtelil ya awichʼ akʼbeyele; pasa «ta stojol te Jehová ma jaʼuk ta stojol te ants winiketike» (Col. 3:23). Te bitʼil maba tojate, akʼa ta ilel spekʼelil awoʼtan sok naʼa te aynix banti ya xchʼayate (Prov. 11:2).

NOPA SPASEL TE BIN YA XTUUN AWUʼUN

9. ¿Bin yuʼun ay bin ya skʼan ya snop spasel jtul jchʼiel hermano?

⁹ Yuʼun ya xyijub te schʼuunel awoʼtane, ay bintik ya skʼan ya anop spasel. Jaʼme ya skoltayat yuʼun ya xjuʼ ya apas te aʼteliletik ta congregación, ta stael awaʼtel yuʼun ya ata te bin ya xtuun awuʼun o te bin ya xtuun yuʼun te afamilia, sok te lekuk ya awil aba sok te yantike. Kiltik te bin ya xjuʼ ya apas.

10, 11. ¿Bin yuʼun lek te jtul jchʼiel hermano ya snop ta lek tsʼibajel sok skʼoponel jun? (Salmo 1:​1-3; jaʼnix jich ilawil te foto).

¹⁰ Nopa ta lek skʼoponel jun sok tsʼibajel. Te Biblia ya yal te machʼa ya skʼopon spisil-ora te Biblia sok te ya snopilan ta yoʼtan tseʼel yoʼtan sok lek ya xlokʼ te bin ya spas (kʼopona Salmo 1:​1-3). Te machʼa jich ya spase ya snopbey te spensar te Jehová sok jaʼ ya xkoltayot yuʼun ya snop ta lek te bin ya spase (Prov. 1:​3, 4). Te hermanoetik te jich stalelik bayal ya xtuun ta congregación. ¿Binwan yuʼun?

¹¹ Te hermanoetik sok te hermanaetik ya skʼanik koltayel yuʼun winiketik te ya xnojptesotik ta lek yuʼun sok te yakuk x-akʼbotik lekil consejo te ay ta Biblia (Tito 1:9). Teme ya anaʼ skʼoponel jun sok tsʼibajel, yame xjuʼ ya achajpan discursoetik sok comentarioetik te ya xjuʼ ya x-akʼbot yip schʼuunel yoʼtan te yantik. Jaʼnix jich, te kʼalal ya anop sok ya achʼam awaʼiy discursoetik ta tsoblejetik sok ta mukʼul tsoblejetik, yame xjuʼ ya atsʼibay te bin anop yuʼun jich ya awakʼbey yip te schʼuunel awoʼtan sok ya xjuʼ ya awakʼbey smukʼul yoʼtan te yantik.

12. ¿Bin ya skoltayat yuʼun lek ya akʼopon aba sok te yantike?

¹² Nopa bin-utʼil ya xkʼopojat sok te yantike. Jaʼ te bin ya skʼan ya snopik spasel spisil te hermanoetik. Ya skʼan ya snopik schʼamel yaʼiyik sok te yakuk xkʼot ta yoʼtanik te bin ya snopik sok te bin yaʼiyel ya yaʼiy sbaik te yantike (Prov. 20:5). Ya xjuʼ ya awil te bin ya yal jtul hermano o jtul hermana ta swenta te bitʼil ya xkʼopoj, te bin yilel te sit yelaw sok te bin ya spas. Yame jtatik ta ilel teme ya jlokʼestik tiempo yuʼun ya jokintik te yantike. Teme jaʼnax ya akʼopon te ants winiketik ta correo sok ta mensaje, ta patil wokol ya awaʼiy skʼoponel te kʼalal ya awil. Jaʼ yuʼun lea bin-utʼil ya awil aba sok te kʼalal ay machʼa ay bin ya akʼan ya awalbey (2 Juan 12).

13. ¿Binxan ya skʼan ya snop spasel jtul jchʼiel hermano? (1 Timoteo 5:8; jaʼnix jich ilawil te foto).

¹³ Nopa sleel atakʼin. Jtul j-abat te yijubenix te schʼuunel yoʼtan ya sle te bin ya xtuun yuʼun sok te bin ya xtuun yuʼun te sfamilia (kʼopona 1 Timoteo 5:8). Ta chaʼoxpam nacionetik te jchʼieletik ya xjuʼ ya snopbeyik yaʼtel te smeʼ statik o ta yantik sfamilia, ay yantik te ya snopik ta jun curso o ta escuela. Chikan bin-utʼil, lek te ya anop jun aʼtelil yuʼun ya ata atakʼin (Hech. 18:​2, 3; 20:34; Efes. 4:28). Pasa tulan ta spasel te awaʼtel sok mame xa achʼoj jilel. Jich lek ya awichʼ naʼbeyel aba, jich ya ata awaʼtel sok maba ya achʼay te aʼtelil abi. Te taleliletik sok te bintik ya skʼan ya apas te la kalbeytikix skʼoplal ya skoltayat yuʼun ya akʼotes ta pasel te aʼteliletik te ya awichʼ ta pajel chaʼbej. Kiltik cheʼoxebuk.

CHAJPANA ABA YUʼUN TE PAJEL CHAʼBEJ

14. ¿Bin ya xkoltayot jtul jchʼiel hermano yuʼun ya x-abatin ta tiempo completo?

¹⁴ Ya xjuʼ ya x-abatinat ta stojol te Jehová ta tiempo completo. Bayal hermanoetik te yijubenix te schʼuunel yoʼtanik jajchik ta aʼtel ta precursor te kʼalal jchʼielikto-a. Teme ya x-ochat ta precursor, ya anop aʼtel sok yantik ants winiketik, jaʼnix jich ya anop stuuntesel ta lek te atakʼin (Filip. 4:​11-13). Ya xjuʼ ya x-ochat ta precursor auxiliar. Jaʼ te bin bayal koltaybilik yuʼun te hermanoetik yuʼun ya x-ochik ta precursor regular. Ta patil ya xjuʼ ya apas yan aʼtelil ta tiempo completo, jich bitʼil siervo yuʼun construcción o betelita.

15, 16. ¿Bin ya skʼan ya spas jtul jchʼiel hermano te ya skʼan ya x-och ta siervo ministerial o anciano?

¹⁵ Ya xjuʼ x-ochat ta siervo ministerial o anciano. Spisil te hermanoetik ya skʼan ya spasik tulan yuʼun ya x-ochik ta anciano ta congregación. Te Biblia ya yal te machʼatik ya skʼan ya x-abatinik ta stojol te hermanoetik ya skʼan ya staik «lekil aʼtelil» (1 Tim. 3:1). Yuʼun ay machʼa ya xjuʼ ya x-och ta anciano, nail ya skʼan ya x-och ta siervo ministerial. Te siervo ministerialetik bayal bin-utʼil ya xjuʼ ya skoltayik te ancianoetik. Te ancianoetik sok te siervo ministerialetik sok spekʼelil yoʼtanik ya x-aʼtejik ta stojol te hermanoetik sok bujtsʼan yoʼtanik ya scholik skʼop Dios. Jtul jchʼiel kerem ya xjuʼ ya x-och ta siervo ministerial manchukme mato ayuk lek yaʼbilalik. Sok ya xjuʼ ya x-och ta anciano jtul siervo ministerial te pʼijubenix ta lek manchukme aytonax 20 yaʼbilal.

¹⁶ Te bintik ya skʼan ya spasik te siervo ministerialetik sok te ancianoetik ay ta Biblia sok yichʼoj yip ta swenta te kʼuxul oʼtanil ta stojol te Jehová, te afamilia sok te congregación (1 Tim. 3:​1-13; Tito 1:​6-9; 1 Ped. 5:​2, 3). Te bin ya skoltayat yuʼun ya apas te bin ya skʼan pasel, jaʼ te ya akʼanbey koltayel te Jehová yuʼun ya xkʼot ta awoʼtan te bin ya skʼan pasel.c

17. ¿Bin-utʼil ya xjuʼ ya schajpan sba jtul jchʼiel hermano yuʼun lekil mamalalil sok lekil jolal yuʼun na ya xkʼot? (Jaʼnix jich ilawil te foto).

¹⁷ Ya xjuʼ ya xnujpunat sok ya xkʼoat ta jolal yuʼun na. Jich bitʼil la yal te Jesús, ay machʼatik te ya snopik te maba ya xnujpunik (Mat. 19:12). Pero, teme ya anop te ya xnujpunate, ayme aʼtelil ya skʼan ya apas jich bitʼil mamalalil sok jolal ta yutil na (1 Cor. 11:3). Te Jehová ya skʼan te mamalalil kʼuxuk ta yoʼtan te yinam, te yakuk yakʼbey te bin ya xtuun yuʼun, te yakuk xkʼot ta yoʼtan te bin yaʼiyel ya yaʼiy sba sok te yakuk skoltay ta swenta te schʼuunel yoʼtan (Efes. 5:​28, 29). Te taleliletik sok te bintik ya skʼan ya apas te la kiltikix ta artículo ini —jich bitʼil te pʼijil oʼtanil, te yichʼel ta mukʼ te antsetik sok te yakuk yakʼ smukʼul yoʼtanik ta atojol— yame schajpanat yuʼun lekil mamalalil sok lekil jolal yuʼun na ya xkʼoat.

18. ¿Bin-utʼil ya xjuʼ ya schajpan sba jtul jchʼiel hermano yuʼun lekil tatil ta xkʼot?

¹⁸ Ya xjuʼ ya ata awal anichʼnab. Teme ya xnujpunat yame xjuʼ ya ata awal anichʼnab. Te ejemplo yuʼun te Jehová ya xjuʼ ya snojptesat bin-utʼil ya xkʼoat ta lekil tatil (Efes. 6:4). Te Jehová la yalbey te kʼux ta yoʼtan te Jesús sok te lek ya yile (Mar. 1:11). Teme ay bin-ora la ata awal anichʼnabik, ya skʼan ya awakʼtiklanbey snaʼik te kʼux ta awoʼtan sok te ya awutsilkʼoptay te kʼalal ay bin lek ya spasike. Te meʼil tatiletik te ya stʼunik te ejemplo yuʼun te Jehová ya skoltay te yal snichʼnabik yuʼun ya xyijub te schʼuunel yoʼtanik. ¿Bin-utʼil ya xjuʼ ya achajpan aba ta ora ini yuʼun lekil tatil ya xkʼoat? Jaʼ te kʼuxuk ta awoʼtan te afamilia, te hermanoetik ta congregación sok te ya anop yalbeyel te kʼux ta awoʼtan sok te mukʼ skʼoplal ya awil (Juan 15:9). Jaʼ ini maba jaʼnax ya skoltayat teme ay bin-ora nujpunat o la ata awal anichʼnab, jaʼnix jich ya skoltayat ta ora ini yuʼun mukʼuk akʼoplal ta sit te Jehová, ta stojol te afamilia sok te congregación.

KʼOTESA TA PASEL

19, 20. ¿Bin ya skʼan ya spas jtul jchʼiel hermano yuʼun ya xyijub te schʼuunel yoʼtan? (Ilawil te foto te ay ta yelaw te revista).

¹⁹ Teme jchʼiel hermanoat, naʼame te ma jichuknax ya xjuʼ xyijub te schʼuunel awoʼtan. Ya skʼan ya akʼayin lekil ejemploetik, te ayuk spʼijil awoʼtan, te yakuk yakʼ smukʼul yoʼtanik ta atojol te yantik, te ayuk bin ya anop spasel sok te yakuk achajpan aba yuʼun te pajel chaʼbej.

²⁰ Kʼalal ya anop spisil te bin ya skʼan ya apase, yaniwan awal te ma xjuʼ awuʼun spasel. Pero mame xchebaj awoʼtan, ¡yame xjuʼ awuʼun spasel! Te Jehová yame skʼan ya skoltayat (Is. 41:​10, 13). Jaʼnix jich yame skoltayat te hermanoetik sok te hermanaetik ta acongregacion. Teme ya apas te bin ya skʼanbat te Jehová, yame ata lamalkʼinal sok stseʼelil awoʼtan ta akuxlejal. Kʼax kʼuxat ta koʼtantik sok ya jkʼanbeytik te Jehová te yakuk yakʼbatxan bendición te bitʼil ya apas tulan yuʼun ya xyijub te schʼuunel awoʼtan (Prov. 22:4).