Jeremias

27 Kʼalal slikebal toʼox yochel ta ajvalil ta Juda li Jeoiakim ti jaʼ xnichʼon Josiase, xi kʼoponat tal yuʼun Jeova li Jeremiase: 2 «Xi laj yalbun li Jeovae: ‹Chukbo xchʼojonal jayteluk kʼatlom teʼetik, vaʼun kʼatano ta anukʼ. 3 Laje, takbo batel li ajvalil ta Edome,+ li ajvalil ta Moabe,+ li ajvalil yuʼun j-ammonetike,+ li ajvalil ta Tiroe+ xchiʼuk li ajvalil ta Sidone,+ jaʼ akʼo yichʼik batel li j-almantaletik ti talem skʼelik ta Jerusalen li Sedekias ti jaʼ ajvalil ta Judae. 4 Xi xavalbe batel j-almantaletik sventa xalbeik li yajvalike:

»›«Xi chal li Jeova ti jaʼ bankilal yuʼun soltaroetike,* li Dios yuʼun Israele, xi skʼan xavalbe li avajvalike: 5 ‹Voʼon la jpas li balumile, li krixchanoetike xchiʼuk li chonbolometik ti oy ta sba balumile, la jpas ta juʼel xchiʼuk ta jkʼob ti lek tsotse; jaʼ kakʼojbe ti buchʼu xal koʼonton chkakʼbee.*+ 6 Li avi une, li kajtunel Nabukodonosor+ ti jaʼ ajvalil ta Babiloniae laj kakʼbe ta skʼob li jteklumetik taje xchiʼuk kakʼojbe sventain li teʼtikal chonbolometik ta osiltike. 7 Skotol li mukʼtik lumetike chtunik ta stojolal, ta stojolal li xnichʼone xchiʼuk ta stojolal li smome jaʼ to mi kʼot yorail li slumale,+ jaʼ to mi kʼot ta mosoil yuʼun mukʼtik lumetik xchiʼuk mukʼtik ajvaliletike›.+

8 »›»Xi chal li Jeovae: ‹Mi oy junuk mukʼta lum o junuk ajvalilal* ti mu skʼan xtun ta stojolal li Nabukodonosor ti jaʼ ajvalil ta Babiloniae xchiʼuk ti mu skʼan skʼatan ta snukʼ li kʼatlom teʼ yuʼun li ajvalil ta Babiloniae, voʼon ta xkakʼbe kastigo ta espada li mukʼta lume,+ ta xkakʼbe kastigo ta tsatsal viʼnal xchiʼuk ta tsatsal chamel jaʼ to mi laj kakʼbe slajeb ta skʼob li ajvalile›.

9 »›»‹Jaʼ yuʼun, mu xachikintabeik li j-alkʼopetik avuʼunike, li jtʼunoletik* avuʼunike, li buchʼutik oy kʼusi chil ta xvayich avuʼunike, li buchʼutik tspasik majia avuʼunike xchiʼuk li j-akʼchameletik avuʼunike, ti xi chalboxuke: «Li voʼoxuke muʼyuk chatunik ta stojolal li ajvalil ta Babiloniae». 10 Yuʼun jecheʼ noʼox li albil kʼopetik chalike, mi chachikintabeike, nom chavichʼik ikʼel batel li ta alumalike xchiʼuk tanpuk chabatik kuʼun xchiʼuk te chachamik.

11 »›»›Pe li jteklum ti tskʼatan ta snukʼ li kʼatlom teʼ yuʼun li ajvalil ta Babiloniae xchiʼuk ti chtun ta stojolale, chkakʼ ti te oyuk-o* ta yosilal sventa xabtelan xchiʼuk ti te xnakie›, xi li Jeovae»›».

12 Jech xtok, jech laj kalbe li Sedekias+ ti jaʼ ajvalil ta Judae, xi laj kalbee: «Kʼatano ta anukʼik li kʼatlom teʼ yuʼun li ajvalil ta Babiloniae xchiʼuk tunanik ta stojolal xchiʼuk ta stojolal li steklumale, vaʼun kuxul chakomik.+ 13 ¿Kʼu yuʼun ti chalajik xchiʼuk ateklumal ta espada,+ ta tsatsal chamel+ xchiʼuk ta tsatsal viʼnal,+ ti jech yaloj Jeova ti chkʼot ta stojolal li mukʼta lum ti muʼyuk chtun ta stojolal li ajvalil ta Babiloniae? 14 Mu xachikintaik ti xi chalboxuk li j-alkʼopetike: ‹Li voʼoxuke muʼyuk chatunik ta stojolal li ajvalil ta Babiloniae›,+ yuʼun jecheʼ noʼox li albil kʼopetik chalboxuke.+

15 »Xi chal li Jeovae: ‹Yuʼun muʼyuk la jtakik talel, maʼuk melel li albil kʼopetik chalik ta jbie. Mi la achikintabeike, tanpuk chabatik kuʼun, vaʼun chachamik xchiʼuk chchamik li j-alkʼopetik ti chalboxuk jecheʼ albil kʼopetike›».+

16 Xi laj kalbe yaʼi li paleetike xchiʼuk sjunul li jteklume: «Xi chal li Jeovae: ‹Mu xachikintaik ti xi chalboxuk li j-alkʼopetike: «¡Kʼelavilik! ¡Poʼot xa skʼan xichʼik sutel tal ta Babilonia li kʼusitik chtun ta sna Jeovae!».+ Yuʼun jecheʼ li albil kʼopetik chalboxuke.+ 17 Mu xachikintabeik. Tunanik ta stojolal li ajvalil ta Babiloniae, vaʼun kuxul chakomik.+ ¿Mi yuʼun jaʼ lek ti lilijem chkom li jteklum liʼe? 18 Pe mi jaʼik j-alkʼopetike xchiʼuk mi jaʼ chalbeik li skʼop Jeovae, akʼo skʼanbeik vokol Jeova ti jaʼ bankilal yuʼun soltaroetik sventa mu xichʼik batel ta Babilonia li kʼusitik jtunelik ti te to oy ta sna Jeovae, li ta sna* ajvalil ta Judae xchiʼuk li ta Jerusalene›.

19 »Yuʼun li Jeova ti jaʼ bankilal yuʼun soltaroetike xi chal ta sventa li oyetike,+ li Nabe,*+ li karetiyaetike+ xchiʼuk li skomenal* kʼusitik jtunelik ti liʼ to komem li ta jteklum liʼe, 20 ti jaʼ li kʼusitik muʼyuk laj yichʼ batel li ajvalil Nabukodonosor kʼalal la xchuk batel li Jekonias ti jaʼ xnichʼon Jeoiakim xchiʼuk ti jaʼ ajvalil ta Judae, laj yikʼ lokʼel ta Jerusalen sventa xikʼ batel ta Babilonia xchiʼuk skotol li buchʼutik tsots skʼoplalik ta Juda xchiʼuk ta Jerusalene;+ 21 yuʼun li Jeova ti jaʼ bankilal yuʼun soltaroetike, li Dios yuʼun Israele, xi chal ta sventa li kʼusitik jtunelik ti te to oy ta sna Jeovae, li ta sna* ajvalil ta Judae xchiʼuk li ta Jerusalene: 22 ‹«Chichʼ ichʼel batel ta Babilonia,+ te chkom-o jaʼ to mi kʼot skʼakʼalil chkakʼ batel jsat ta stojolale. Vaʼun, chkichʼ sutel tal xchiʼuk liʼ chkakʼ yan velta ta yavile»›,+ xi li Jeovae».