Jeremias
42 Vaʼun, skotol li bankilal soltaroetike, li Joanan+ ti jaʼ xnichʼon Kareae, li Jesanias ti jaʼ xnichʼon Osayae xchiʼuk skotol li krixchanoetike, li buchʼutik tsots skʼoplalike xchiʼuk li buchʼutik muʼyuke, nopajik batel ta stojolal li j-alkʼop Jeremiase 2 xchiʼuk xi laj yalbeike: «Avokoluk, chikintao li kʼusi xivokoletkutik skʼanele, kʼopono ta jtojolalkutik li Jeova ti jaʼ Adiose, ta jtojolalkutik ti jayvoʼ liʼ to oyunkutike, yuʼun laj xa avil ti jutebunkutike akʼo mi epunkutik toʼox.+ 3 Akʼo yal kaʼikutik li Jeova ti jaʼ Adios ti bu beal skʼan xibatkutike xchiʼuk ti kʼusi skʼan jpaskutike».
4 Xi takʼbatik yuʼun li j-alkʼop Jeremiase: «Lek oy, ta jkʼopon li Jeova ti jaʼ Adiosike, jech ta jkʼanbe kʼuchaʼal la akʼanbeikune. Te chkalboxuk skotol ti kʼusi chalbun li Jeovae. Muʼyuk ta jmukboxuk jpʼeluk».
5 Xi la stakʼbeik li Jeremiase: «Kʼotuk ta tukʼil testigo kuʼunkutik li Jeovae xchiʼuk akʼo yakʼbunkutik kastigo mi muʼyuk ta jpaskutik skotol li kʼusi chavalbunkutik ti jaʼ yaloj li Jeova ti jaʼ Adiose. 6 Manchuk mi lek o mi chopol chkaʼikutik, ta jchʼunkutik li kʼusi chal Jeova ti jaʼ Jdioskutik ti ta jtakotkutik batel ta stojolale, yuʼun lek kʼusi chkʼot ta jtojolalkutik mi la jchʼunbekutik smantal li Jeova ti jaʼ Jdioskutike».
7 Vaʼun, kʼalal echʼ xa ox lajuneb kʼakʼale, kʼoponat tal yuʼun Jeova li Jeremiase. 8 Jaʼ yuʼun, la stak ta ikʼel li Joanan ti jaʼ xnichʼon Kareae, skotol li bankilaletik yuʼun soltaroetik ti te xchiʼinojane xchiʼuk skotol li krixchanoetike, ti tsots skʼoplalike xchiʼuk ti muʼyuk tsots skʼoplalike.+ 9 Xi laj yalbe yaʼiike: «Xi chal li Jeova ti jaʼ Dios yuʼun Israele, ti la atakikun batel ta stojolal sventa xbat jkʼanbe vokol ta aventaike: 10 ‹Mi jpʼel skʼoplal ti liʼ chkom naklanik-o ta jteklume, vaʼun bi, ta jvaʼanoxuk, pe muʼyuk ta jinesoxuk; ta jtsʼunoxuk, pe muʼyuk ta jbuloxuk lokʼel, yuʼun chopol chkaʼi jba* ta skoj li avokol laj kakʼboxuke.+ 11 Mu xaxiʼik yuʼun li ajvalil ta Babilonia ti xiʼemoxuk ta stojolale›.+
»Xi chal li Jeovae: ‹Mu xaxiʼik yuʼun, yuʼun liʼ jchiʼukoxuk sventa jkoltaoxuk xchiʼuk sventa jpojoxuk lokʼel tal ta skʼob. 12 Ta jkʼuxubinoxuk+ xchiʼuk ta xkʼuxubinoxuk li ajvalil eke, vaʼun chikʼoxuk sutel li ta alumalike.
13 »›Pe mi xi chavalike: «¡Moʼoj, muʼyuk liʼ chikomkutik-o li ta jteklume!» xchiʼuk mi muʼyuk chachʼunik li kʼusi chal li Jeova ti jaʼ Adiosike 14 xchiʼuk mi xi chavalike: «Muʼyuk chikomkutik liʼe, jaʼ lek chibatkutik ta yosilal Ejipto,+ tee muʼyuk chkilkutik paskʼop, muʼyuk chkaʼikutik chbakʼ kachu xchiʼuk mi jaʼuk chkilkutik viʼnal; jaʼ te chbat naklikunkutik» mi xachiike, 15 chikintaik li kʼusi chalboxuk Jeovae, voʼoxuk ti skomenaloxuk* Judae. Xi chal li Jeova ti jaʼ bankilal yuʼun soltaroetike,* li Dios yuʼun Israele: «Mi jpʼel avoʼontonik chabatik ta Ejiptoe xchiʼuk mi te chbat naklanike,* 16 vaʼun bi, li avajkontraik ti chaxiʼik yuʼune chbat smiloxuk ta espada kʼalal te oyoxuk ta Ejiptoe xchiʼuk li tsatsal viʼnal ti chaxiʼik yuʼune chkʼot te ta Ejipto xchiʼuk te chachamik.+ 17 Xchiʼuk skotol li buchʼutik jpʼel ta yoʼontonik chbat nakiikuk ta Ejiptoe te chlajik ta espada, ta tsatsal viʼnal xchiʼuk ta tsatsal chamel. Mi junuk buchʼu kuxul chkom yuʼunik xchiʼuk mi jaʼuk buchʼu xuʼ spoj sba li ta vokolil ti chkakʼ talel ta stojolalike»›.
18 »Yuʼun xi chal li Jeova ti jaʼ bankilal yuʼun soltaroetike, li Dios yuʼun Israele: ‹Jech kʼuchaʼal la jmal tal skʼakʼal koʼonton xchiʼuk skapemal jol ta stojolal li jnaklejetik ta Jerusalene,+ jaʼ jech ta jmal tal skapemal jol ta atojolalik mi labatik ta Ejiptoe. Jech xtok, chavichʼik chopol kʼoptael, ta xakʼ xiʼel li kʼusi chkʼot ta atojolalike, jaʼ skʼelobil chakʼotik ti chopol akʼoplalike, ta xavichʼik labanel+ xchiʼuk muʼyuk xa chtal akʼelik-o yan velta li jteklum liʼe›.
19 »Voʼoxuk ti skomenaloxuk* Judae, oy xa kʼusi yaloj ta atojolalik li Jeovae. Mu xabatik li ta Ejiptoe. Naʼik me lek ti yakal ta jpʼijubtasoxuk avi 20 ti chavakʼ-o akuxlejalik li kʼusi chopol chapasike. Yuʼun la atakikun batel ta stojolal li Jeova ti jaʼ Adiosike, xi laj avalbeikune: ‹Kʼopono ta jtojolalkutik li Jeova ti jaʼ Jdioskutike xchiʼuk albunkutik skotol li kʼusi chal li Jeova ti jaʼ Jdioskutike, vaʼun ta jpaskutik›.+ 21 Laj xa kalboxuk li avie, pe muʼyuk chachʼunik li kʼusi chal li Jeova ti jaʼ Adiosike xchiʼuk muʼyuk chapasik jsetʼuk* li kʼusi laj yalbun ti akʼo xkalboxuke.+ 22 Jaʼ yuʼun, naʼik me lek ti chalajik ta espada, ta tsatsal viʼnal xchiʼuk ta tsatsal chamel ti bu chakʼan chabatik ta nakleje».+