LAMENTASIONES
א [alef]*
1 Li Jerusalene xkoʼolaj xa kʼuchaʼal jun ants ti stuktuk te chotol kome, akʼo mi jaʼ toʼox jun jteklum ti noj toʼox ta krixchanoetike.+
¡Xkoʼolaj xa kʼuchaʼal jun ants ti chamem smalale, akʼo mi mas toʼox ep jnaklejetik te kʼuchaʼal li ta yan mukʼta lumetike!+
¡Kʼot xa ta kiarail li buchʼu meʼ ajvalil toʼox ta stojolal li yantik lumetike!+
ב [bet]
2 Li ta akʼobaltike solel tsmil sba ta okʼel+ xchiʼuk li yaʼlel sate xbein* noʼox yalel ta xokontak sat.
Li buchʼutik skʼanoj sba xchiʼuke mi junuk tal patbatuk yoʼonton.+
Iktaat xa komel yuʼun li xchiʼiltake;+ kʼot xa ta yajkontratak.
ג [guimel]
3 Laj xa yichʼ chukel batel li Judae,+ chil xa svokol xchiʼuk mosoinbil xa.+
Skʼan te xbat nakiuk li ta mukʼta lumetike;+ mu sta xkuxobil yoʼonton.
Kʼalal jaʼo oy svokole, taat ta tsakel yuʼun li buchʼutik tsnutsate.
ד [dalet]
4 Chat yoʼonton li sbeleltak Sione, yuʼun muʼyuk xa buchʼu chtal ta kʼin.+
Jinemik xa skotol li ochebaletik yuʼune;+ tsjikʼ yoʼontonik li paleetik yuʼune.
Chat yoʼonton li stojol tsebetake xchiʼuk chat tajek yoʼonton li stuk eke.
ה [e]
5 Kʼot xa ta yajval li yajkontratake; jun xa yoʼontonik li buchʼutik chopol ch-ilate.+
Yuʼun akʼbat xa yatel yoʼonton yuʼun Jeova ta skoj ti toj ep li smule.+
Ikʼbat xa batel li yalabe, jaʼ laj yikʼ batel li yajkontratake.+
ו [waw]
6 Chʼay xa skotol yutsilal li stseb Sione.+
Li bankilaletik yuʼune xkoʼolajik kʼuchaʼal teʼtikalchij ti mu sta sveʼele,
solel lubemik xa kʼalal yakal chjatavik ta stojolal li jnutsvaneje.
ז [sayin]
7 Kʼalal jaʼo oy svokol li Jerusalene xchiʼuk kʼalal muʼyuk sna kom li jnaklejetik tee,
chvul ta sjol skotol li kʼusitik ep sbalil ti oy toʼox yuʼun ta voʼnee.+
Kʼalal och ta skʼob jkontrainvanej li steklumale xchiʼuk kʼalal muʼyuk buchʼu xkoltaate,+
laj yil li jkontrainvanejetike xchiʼuk la stseʼintaik* kʼalal yal ta lume.+
ח [jet]
8 Ep tajek saʼoj smul li Jerusalene.+
Jech oxal, laj xa yichʼ pʼajel.
Skotol li buchʼutik chichʼik toʼox ta mukʼe chopol xa chilik, yuʼun laj xa yilik ti tʼanal kome.+
X-avet ta okʼel+ xchiʼuk chjoypʼij batel ta skoj ti chkʼexave.
ט [tet]
9 Ikʼubem skʼuʼ spokʼ ta skoj li smule.
Muʼyuk la snop ti kʼusi chkʼot ta stojolal ta tsʼakale.+
Toj labal sba ti kʼu yelan yal ta lume; muʼyuk buchʼu xpatbat yoʼonton.
Kajval Jeova, kʼelavil li jvokole, yuʼun xtoyet xa chaʼi sba li jkontrainvaneje.+
י [yod]
10 Li jkontrainvaneje laj xa yichʼbe batel li skʼulejale.+
Yuʼun li Jerusalene te skʼeloj ti ochik mukʼtik lumetik ti bu chʼul yuʼune,+
ochik li buchʼutik avaloj ti mu stakʼ stsob sbaik xchiʼuk li ateklumale.
כ [kaf]
11 Tsjikʼ yoʼontonik sjunul li steklumale; xjoyetik ta saʼel pan.+
Sventa sta kʼusi slajesike, jaʼ yakʼojik li kʼusitik ep sbalil yuʼunik yoʼ mu xchamik ta viʼnale.
Kajval Jeova, kʼelavil, kʼotemun kʼuchaʼal jun ants* ti muʼyuk kʼusi xtun-oe.
ל [lamed]
12 ¿Mi muʼyuk kʼusi aventaik-o voʼoxuk ti chajelavik li ta bee?
¡Kʼelavilik xchiʼuk chikintaik!
¿Mi oy buchʼu yan jech xkʼuxul svokol jech kʼuchaʼal vul ta jtojolale,
ti jaʼ laj yakʼ Jeova li ta yorail skʼakʼal yoʼonton ti xtiltune?+
מ [mem]
13 Te to ta vinajel la stak tal kʼokʼ sventa xchikʼ skotol li jbakile.+
Xlichʼanojbe syakobil kakan, vaʼun valopat lisut yuʼun.
Likʼot yuʼun kʼuchaʼal jun ants ti stuktuk kome.
Ipun skotol kʼakʼal.
נ [nun]
14 Chukbil kʼuchaʼal kʼatlom teʼ li jmule, jaʼ xchukoj ta skʼob stuk
xchiʼuk la skajan ta jnukʼ, muʼyuk xa kipal.
Li Jeovae laj xa yakʼun ta skʼob li buchʼutik mu stsal kuʼune.+
ס [samek]
15 Li Jeovae la sjip lokʼel li tsatsal viniketik ti liʼ toʼox oyik ta jtojolale.+
Stakoj tal ta ikʼel epal soltaroetik sventa tal xpechʼik ta tekʼel li jkeremtake.+
Li Jeovae la xpechʼilan ta tekʼel ta spitsʼobil uva li stojol tseb Judae.+
ע [ayin]
16 Chi-okʼ ta skoj li kʼusitik taje;+ li yaʼlel jsate xbein* noʼox yalel.
Yuʼun nom oy ta jtojolal li buchʼutik xuʼ spatbun koʼontone o ti chakʼbeikun yip koʼontone.
Tanpuk bat li kalabe, yuʼun tsalvan xa li jkontrainvaneje.
פ [pe]
17 Xyeʼet skʼob li Sione;+ muʼyuk buchʼu xpatbat yoʼonton.
Li Jeovae yaloj mantal ti akʼo tal tsakatuk ta kʼop yuʼun yajkontratak li Jakob ti te oy ta spat xokone.+
Solel chopol chilik li Jerusalene.+
צ [sade]
18 Tukʼ li Jeovae,+ pe li voʼone la jkontrainbe li smantale.+
Jteklumetik, chikintaik xchiʼuk kʼelavilik li jvokole.
Laj xa yichʼik chukel batel li jtojol tsebetake xchiʼuk li jkeremtake.+
ק [kof]
19 Jtakoj ta ikʼel li buchʼutik jkʼanoj jba jchiʼuke, pe jecheʼ la sloʼlaikun.+
Te chamik ta jteklum
li paleetik kuʼun xchiʼuk li moletik kuʼun kʼalal yakalik ta saʼel sveʼelik sventa xkuxiike.+
ר [rex]
20 Kajval Jeova, kʼelavil, chkat tajek koʼonton.
Mu xa aʼibaj kʼusi ta jpas.
Solel lilijem chkaʼi li koʼontone, yuʼun la jtoy jba ta j-echʼel.+
Te ta pana* laj ta milel ta espada+ li kalabe; li ta yut nae chcham li krixchanoetik xtoke.
ש [xin]
21 Yaʼioj krixchanoetik ti ta jikʼ koʼontone; muʼyuk buchʼu spatbun koʼonton.
Laj yaʼi skotol kajkontratak ti oy jvokole.
Xkuxet yoʼontonik, yuʼun voʼot laj avakʼ tal li jvokole.+
Pe chkʼot skʼakʼalil avuʼun+ ti jech chkʼot ta stojolalik jech kʼuchaʼal kʼotem ta jtojolale.+
ת [taw]
22 Akʼo kʼotuk ta yeloval asat skotol li kʼusitik chopol tspasike xchiʼuk akʼbo yaʼiik kastigo,+
jech kʼuchaʼal avakʼojbun kastigo ta skoj ti ep jsaʼoj jmule.
Yuʼun ta jikʼ tajek koʼonton xchiʼuk ip li koʼontone.
א [alef]
2 Li Jeovae ta skʼakʼal yoʼonton la xpix ta tok li stseb Sione.
Te to ta vinajel la sjip yalel tal ta balumil li yutsilal Israele.+
Li ta yorail skʼakʼal yoʼontone muʼyuk la svules ta sjol li skajleb yakane.+
ב [bet]
2 Li Jeovae muʼyuk xkʼuxul yoʼonton la sjinesbe skotol li sna Jakobe.
Ta skapemal sjol la slilin ti butik lek joyol ta muro yuʼun li stseb Judae.+
La sjip yalel ta lumtik xchiʼuk la sokesbe skʼoplal li jteklume+ xchiʼuk li bankilaletik yuʼune.+
ג [guimel]
3 Ta yipal skʼakʼal yoʼonton la slajesbe stsatsal li Israele.
Kʼalal nopaj tal li jkontrainvaneje, la slokʼes batel li sbatsʼikʼobe+
xchiʼuk li skʼakʼal yoʼonton ti xkoʼolaj kʼuchaʼal kʼokʼe te xtiltun-o ta stojolal Jakob, la xchikʼ skotol li kʼusitik te nopol oye.+
ד [dalet]
4 Slapʼunoj xa lek s-arko jech kʼuchaʼal tspas li jun jkontrainvaneje; chapal xa lek sbatsʼikʼob sventa stsakvan ta kʼop kʼuchaʼal jmilvanej;+
jech-o la smil batel skotol li buchʼutik lek ilbilike.+
Li skʼakʼal yoʼonton ti xkoʼolaj kʼuchaʼal kʼokʼe+ la smal talel li ta skarpana stseb Sione.+
ה [e]
5 Li Jeovae kʼotem kʼuchaʼal jun jkontrainvanej;+
la stupʼbe skʼoplal li Israele.
La sjinesbe skotol li tayal kʼelob osiletik yuʼune;
laj xa slilinbe skotol ti butik lek joyol ta muro yuʼune.
Laj yepajesbe yatel yoʼonton xchiʼuk yokʼel li stseb Judae.
ו [waw]
6 Laj xa slilin li axibalna+ yuʼun ti xkoʼolaj kʼuchaʼal jun vakaxna* ti te oy ta tsʼunobaltike.
Laj xa slajesbe skʼoplal li kʼin yuʼune.+
Li Jeovae laj xa yakʼ chʼayuk ta oʼontonal te ta Sion li kʼinetike xchiʼuk li savadoe
xchiʼuk ta skoj ti kapem ta jyalele, la spʼaj li ajvalile xchiʼuk li palee.+
ז [sayin]
7 Li Jeovae laj xa spʼaj li skajleb smotone,
solel la spʼaj ta jyalel ti bu chʼul yuʼune.+
Laj yakʼbe ta skʼob jkontrainvanejetik li tsatsal tayal kʼelob osiletik yuʼune.+
Xvochetik* noʼox ta sna Jeova+ jech kʼuchaʼal ta skʼakʼalil kʼine.
ח [jet]
8 Kʼot xa ta nopel yuʼun Jeova ti tslajesbe smuro li stseb Sione.+
Laj xa spʼis ta chʼojon li muroe.+
Muʼyuk la sjalan skʼob ta slajesel.
Chakʼbe yatel yoʼonton li muroe xchiʼuk li latsbil tone.
Jmoj xa laj yichʼik jinesel.
ט [tet]
9 Mukij xa yalel ta balumil li stiʼtake.+
Laj xa slilinbe xchiʼuk laj xa skʼasbe li stakʼinaltake.
Te xa oyik ta mukʼtik lumetik li ajvalil xchiʼuk li bankilaletik yuʼune.+
Muʼyuk buchʼu chchʼun li mantale;* mi jaʼuk oy kʼusi ch-akʼbat yilik yuʼun Jeova li j-alkʼopetik yuʼune.+
י [yod]
10 Li moletik yuʼun stseb Sione te noʼox tsʼijil chotajtik ta lumtik.+
Tsvij ta sjolik pukuk* xchiʼuk tslapik chʼixal kʼuʼil.*+
Li tojol tsebetik yuʼun Jerusalene nijajtik xa ta lumtik.
כ [kaf]
11 Lub xa ta okʼel li jsate.+
Mu xa aʼibaj kʼusi ta jpas.
Solel lilijem koʼonton ta skoj ti yal ta lum li stseb jteklumale,*+
ta skoj ti yalik xa ta lum li ololetik xchiʼuk li neneʼetik te ta skayealtak* jteklume.+
ל [lamed]
12 Xi chalbe li smeʼike: «Meʼ, ¡chiviʼnaj xchiʼuk takin tajek koʼonton!»,*+
jech chalik kʼalal chyalik xa ta lume, xkoʼolajik xchiʼuk li buchʼu chyal ta lum te ta skayealtak* jteklum ta skoj ti yayijeme,
te petbil yuʼun smeʼik kʼalal chchamike.
מ [mem]
13 Stseb Jerusalen, ¿mi oy van buchʼu jech chil svokol
jech kʼuchaʼal chavil avokole?
Tojol tseb yuʼun Sion, ¿kʼusi xuʼ jkoʼoltasot-o sventa jpatbot avoʼontone?
Yuʼun xkoʼolaj kʼuchaʼal mukʼta nab li smukʼul ayayijemale.+ ¿Buchʼu van xuʼ xpoxtaot?+
נ [nun]
14 Li kʼusi laj yichʼ akʼbel yilik li j-alkʼopetik avuʼune jecheʼ xchiʼuk muʼyuk sbalil,+
muʼyuk la svinajesik amul sventa mu xavichʼ chukel batel;+
jaʼ noʼox laj yalbeikot li kʼusi jecheʼ akʼbil yilike xchiʼuk ti loʼlaele.+
ס [samek]
15 Skotol li buchʼutik te ch-echʼik ta bee chtʼax skʼobik sventa tslabanikot.+
Xpilajetik* noʼox ta skoj ti labal sba chilike+ xchiʼuk sjim xa sjolik ta stojolal li stseb Jerusalene, xi chalike:
«¿Mi jaʼ li jteklum ti xi toʼox chalbeik skʼoplale: ‹Toj kʼupil sba xchiʼuk jaʼ xmuyubaj-o sjunul li balumile›?».+
פ [pe]
16 Skotol li avajkontratake xjachʼlajet noʼox yeik ta atojolal.
Xpilajetik* noʼox, xkʼuxet noʼox stanal yeik xchiʼuk xi chalike: «Laj xa kuʼuntik un.+
¡Kʼot xa li skʼakʼalil ti jmalaojtik xa onoʼoxe!+ ¡Kʼot xa ta pasel un xchiʼuk laj xa kil ta jsatik!».+
ע [ayin]
17 Li Jeovae kʼot xa ta pasel yuʼun li kʼusi snopoj xa onoʼox tspase;+ laj xa spas li kʼusi yaloje,+
jaʼ li kʼusi lokʼem ta ye ta voʼnee.+
Muʼyuk xkʼuxul yoʼonton la slilinot.+
Laj yakʼ ti akʼo stsalot li avajkontrae, vaʼun muyubaj; la stsatsubtasbe yip* li buchʼutik tsmilote.
צ [sade]
18 Smuroal jteklum Sion, li krixchanoetike ta sjunul yoʼonton x-avetik ta stojolal li Jeovae.
Ta kʼakʼal akʼobal malmunuk yaʼlel asat kʼuchaʼal ukʼum ti lek tsots yoke.
Mu xakux jlikeluk, mu me xkux ta okʼel li asate.
ק [kof]
19 ¡Likan! Avetan sjunul akʼobal.
Albo skotol kʼusi oy ta avoʼonton li Jeovae, malo lokʼel skotol jech kʼuchaʼal chichʼ malel li voʼe.
Yeʼo muyel akʼob ta stojolal sventa mu xcham li avalabe,
yuʼun yakal chyalik ta lum ta skoj viʼnal li ta jujujot xchikin kayeetike.+
ר [rex]
20 Kajval Jeova, kʼelavil xchiʼuk akʼo batel asat ta stojolal li buchʼu laj avakʼbe kastigoe.
¿Mi yuʼun lek ti jech-o tstiʼ yalab li antsetike, li yolik ti la svokʼesike?+
O ¿mi yuʼun lek ti te chichʼik milel li paleetik xchiʼuk j-alkʼopetik ti bu chʼul yuʼun Jeovae?+
ש [xin]
21 Te telajtik ta kayeetik li keremetik xchiʼuk moletik ti chamemik xae.+
Lajik xa ta espada li tojol tsebetik kuʼune xchiʼuk li jkeremtake.+
La amil li ta yorail skʼakʼal avoʼontone; muʼyuk xkʼuxul avoʼonton la amil.+
ת [taw]
22 Chatak tal ta ikʼel ta buyuk noʼox li kʼusi chixiʼo yuʼune, xkoʼolaj kʼuchaʼal skʼakʼalil kʼin+ ti kʼu yelan chtalike.
Li ta yorail skʼakʼal yoʼonton Jeovae muʼyuk buchʼu jatav xchiʼuk muʼyuk buchʼu kuxul kom;+
li buchʼutik la jvokʼes xchiʼuk la jtsʼitese lajik ta milel yuʼun li kajkontrae.+
א [alef]
3 Laj kil li vokolile, yuʼun ilinem tajek li Diose xchiʼuk laj yakʼbunkutik kastigo.
2 Laj yikʼun lokʼel xchiʼuk laj yakʼ xanavkun ta ikʼal osil, maʼuk ta sakil osil.+
3 Ta melel, skotol kʼakʼal jech-o tskontrainun.+
ב [bet]
4 Chkʼunib xa batel li jbekʼtale xchiʼuk chlaj xa batel li jnukulile;
laj xa slilinbun li jbakiltake.
5 La setuun; te joyol ta jpat jxokon yuʼun li chʼail venenoe+ xchiʼuk li vokolile.
6 La sujun sventa te xichoti ti butik ikʼmutsʼane,* jech kʼuchaʼal li buchʼutik voʼne xa chamemike.
ג [guimel]
7 La sjoyun lek ta muro, jaʼ yuʼun mu xa xuʼ xijatav lokʼel;
la xchukun ta alal kadena ti pasbil ta kovree.+
8 Jech xtok, kʼalal xivokolet ta skʼanel koltaele, mu skʼan xchikinta* li j-orasione.+
9 La smakbun jbe ta tonetik ti lek tuchʼbilike;
jaʼ yakʼoj ti vokoluk xkaʼi xixanav li ta jbee.+
ד [dalet]
10 Nakʼal* xa tsmalaun kʼuchaʼal jkot oso, kʼuchaʼal jkot leon ti te snakʼoj sbae.+
11 La skʼejpʼunun* lokʼel ta persa ti bu jtamoj batel jbee xchiʼuk laj xa slilinun;
jtuk xa tajek likom yuʼun.+
12 Laj xa slapʼun li s-arkoe xchiʼuk tukʼ xa skʼelojun tal sventa stʼiles tal li flechae.
ה [e]
13 Smatsʼanoj xa ta jrinyon li flechaetik ti te toʼox tikʼil yuʼun ta yavile.
14 Solel tseʼinemik ta jtojolal* skotol li jteklumetike, sjunul kʼakʼal jaʼ tskʼejintaik jkʼoplal.
15 Jaʼ chakʼbun-o jlajes li kʼusitik chʼae xchiʼuk jaʼ chakʼ-o kuchʼ li chʼail tsʼiʼlele.+
ו [waw]
17 Mu xavakʼ ti junuk koʼontone; chʼay xa ta jol li kʼusi leke.
18 Jaʼ yuʼun, xi chkale: «Laj xa skʼoplal li kutsilale xchiʼuk li spatobil koʼonton ta stojolal Jeovae».
ז [sayin]
19 Mu me xchʼay ta ajol ti oy jvokole xchiʼuk ti chʼabal jnae,+ vuleso ta ajol ti ta jlajes li chʼail tsʼiʼlel xchiʼuk li chʼail venenoe.+
20 Jpʼel skʼoplal chavulesun ta ajol xchiʼuk chtal akoltaun.+
21 Te oy-o ta koʼonton taje; jaʼ yuʼun chkakʼ ta ilel ti ta jmalaote.+
ח [jet]
22 Ta skoj ti oy tukʼil kʼanelal yuʼun li Jeovae, muʼyuk lajemutik-o,+
yuʼun muʼyuk spajeb ti chkʼuxubinvane.+
23 Jujun sob chakʼ ta ilel xkʼuxul yoʼonton;+ mu albajuk yepal li stukʼilale.+
24 Xi laj kale: «Jaʼ jparte kʼotem li Jeovae,+ jaʼ yuʼun chkakʼ ta ilel ti ta jmalae».+
ט [tet]
25 Li Jeovae lek yoʼonton ta stojolal li buchʼu spatoj yoʼonton ta stojolale,+ li jun krixchano* ti tsaʼate.+
26 Jaʼ lek ti tsʼijil noʼox xichʼ malael+ ti jaʼ xkoltavan li Jeovae.+
27 Jaʼ lek ti kʼataluk-o skʼatlom teʼal snukʼ ta skeremal li jun vinike.+
י [yod]
28 Akʼo chotiuk stuk xchiʼuk tsʼijiuk kʼalal chkajanbat yikats yuʼun li Diose.+
29 Akʼo spatan sba ta pukuktik;*+ xuʼ van sta to spatobil yoʼonton.+
30 Akʼo yakʼbe xokon sat li buchʼu chmajvane; akʼo chopol kʼoptaatuk jaʼ to ti bu kʼalal xkuch yuʼune.
כ [kaf]
31 Yuʼun li Jeovae muʼyuk tsjiputik-o komel ta sbatel osil.+
32 Akʼo mi yakʼoj at-oʼonton, chakʼ ta ilel xkʼuxul yoʼonton ta skoj ti mu albajuk yepal li tukʼil kʼanelal yuʼune.+
33 Yuʼun muʼyuk lek chil ti chakʼbe svokol o yatel yoʼonton li xnichʼnab krixchanoetike.+
ל [lamed]
34 Muʼyuk lek chil ti xpechʼ ta tekʼel skotol li jchukeletik ta balumile,+
35 ti mu xichʼ lek chapanel li jun vinik ta yeloval li Buchʼu toj toyol oye,+
36 ti mu tukʼuk xichʼ chapanel li jun vinike.
Muʼyuk lek chil Jeova li kʼusitik taje.
מ [mem]
37 Vaʼun chaʼa, ¿buchʼu oy kʼusi yaloj ti chkʼot ta pasel yuʼun mi muʼyuk jech yaloj mantal li Jeovae?
38 Mu jmojuk chlokʼ ta ye kʼusi lek xchiʼuk kʼusi chopol
li Buchʼu toj toyol oye.
39 ¿Kʼu yuʼun tskʼan parte li jun krixchano* kʼalal tsta svokol ta skoj li smule?+
נ [nun]
40 Jkʼeltik lek xchiʼuk jchajtik lek ta kʼelel li jbetike,+ vaʼun sutkutik ta stojolal li Jeovae.+
41 Ta sjunuluk koʼontontik jkʼanbetik vokol li Dios ti te oy ta vinajele xchiʼuk jtoy muyel jkʼobtik,+ xi xkaltike:
42 «Jsaʼoj jmulkutik xchiʼuk jtoybaunkutik,+ pe li voʼote muʼyuk achʼayoj li jmulkutike.+
ס [samek]
43 Ta skapemal ajol amakojunkutik ta be;+
muʼyuk xkʼuxul avoʼonton anutsojunkutik xchiʼuk amilojunkutik.+
44 Amakoj aba lek ta tok sventa mu xkʼot ta atojolal li j-orasionkutike.+
45 Likʼotkutik avuʼun kʼuchaʼal ikʼobal xchiʼuk kʼuchaʼal kʼaʼep ta sba sat li jteklumetike».
פ [pe]
46 Skotol li kajkontrakutike xjachʼlajet noʼox yeik ta jtojolalkutik.+
47 Skotol ora chixiʼkutik, yakbilunkutik ta petsʼ,+ iktabilunkutik xchiʼuk lajemunkutik ta j-echʼel.+
48 Xkoʼolaj kʼuchaʼal ukʼum li yaʼlel jsat ta skoj ti yal ta lum li stseb jteklumale.+
ע [ayin]
49 Mu xkux ta okʼel li jsate, mu xpaj jsetʼuk,*+
50 jaʼ to mi la skʼel yalel tal li Jeovae xchiʼuk mi laj yakʼ tal sat te to ta vinajele.+
51 Solel chkat tajek koʼonton kʼalal chkil li kʼusi kʼot ta stojolal li stsebetik jteklumale.+
צ [sade]
52 Li kajkontratake ta jech noʼox la syakikun kʼuchaʼal jkot mut.
53 Laj xa stikʼikun ta chʼen sventa smilikun; jech-o tsjipbeikun tal ton.
54 Mutʼij* xa ta voʼ li jole, vaʼun xi laj kale: «¡Lilaj xa maʼ taje!».
ק [kof]
55 Kajval Jeova, xivokolet ta abi kʼalal jaʼo te oyun ta yutil to chʼene.+
56 Chikintao li kʼusi chkale; mu xamak achikin kʼalal xivokolet ta jkʼanbot koltaele.
57 Kʼalal la jtaot ta kʼoponele, lanopaj talel ta jtojolal. Xi laj avale: «Mu xaxiʼ».
ר [rex]
58 Kajval Jeova, laj xa apakbun jkʼoplal xchiʼuk voʼot la apojun lokʼel li ta vokolile.+
59 Kajval Jeova, aviloj li kʼusi chopol laj kichʼ pasbele; avokoluk, chapanun lek.+
60 Aviloj ti nopem xaʼiik spakel sutele, skotol li kʼusitik chopol snopoj tspasbeikune.
ש [sin o xin]
61 Kajval Jeova, avaʼioj ti kʼu yelan tsaʼvanik ta kʼope xchiʼuk skotol li kʼusitik chopol snopoj tspasbeikune,+
62 avaʼioj li kʼusi chlokʼ ta yeik li kajkontratake xchiʼuk li kʼusi chalik ta mukul ta jtojolal skotol kʼakʼale.
63 ¡Kʼelavil! Manchuk mi chotolik o mi vaʼalik, tslabanikun li ta skʼejimolike.
ת [taw]
64 Kajval Jeova, tojbo sutel ta skoj li kʼusitik la spasike.
65 Voʼot chayijubtasbe li yoʼontonike, chopol chkom skʼoplalik avuʼun.
66 Jeova, ta skʼakʼaluk avoʼonton tijil xabat ta spatik xchiʼuk lajesbo skʼoplalik li ta balumile.
א [alef]
4 Muʼyuk xa stsʼayayet li oroe, li lekil oroe.+
¡Busul xa kom ta jujujot xchikin kaye+ li chʼul tonetike!+
ב [bet]
2 Ta sventa li yalab Sion ti ep toʼox sbalilik kʼuchaʼal li lekil oroe,
¡koʼol xa noʼox ch-ilatik kʼuchaʼal lumal pʼin
ti jaʼ yabtel skʼob li jpatpʼine!
ג [guimel]
3 Li teʼtikal tsʼiʼetike ta to xakʼbe xchuʼ li yalabike,
pe jaʼuk li stseb jteklumale chʼabal xa xkʼuxul yoʼonton+ kʼuchaʼal avestrus ta takixokol balumil.+
ד [dalet]
4 Li jchuʼnom ololetike laj xa spakʼ sba yokʼik ta spakʼovik* ta skoj ti takin yoʼontonike.
Li ololetike xvokoletik ta skʼanel pan,+ pe muʼyuk buchʼu x-akʼbatik.+
ה [e]
5 Li buchʼutik jun toʼox yutsil sveʼelike te xa telajtik ta kayeetik chlajik ta viʼnal.+
Li buchʼutik lekik tajek* skʼuʼ spokʼik chʼiik tale+ telajtik xa ta tantik.
ו [waw]
6 Mas to toj tsots laj yichʼ kastigo* li stseb jteklumale, jaʼ xkom to li kastigo laj yichʼ Sodoma ta skoj smule,+
ti ta anil noʼox laj yichʼ jinesel xchiʼuk ti muʼyuk laj yichʼ koltaele.+
ז [sayin]
7 Li jnasareoetik yuʼune+ mas toʼox sakik kʼuchaʼal taiv xchiʼuk mas toʼox sakik kʼuchaʼal li lechee.
Mas toʼox tsojik kʼuchaʼal li kʼupil sba tonetik ta nabe;* jechik toʼox kʼuchaʼal safiro ton ti lek chʼulbile.
ח [jet]
8 Pe li avie, mas to ikʼ xvinajik kʼuchaʼal li sibake,
mu xa x-ojtikinatik li ta kayeetike.
Jecheʼ xa sotʼajtik snukulilik li ta sbakilike;+ solel takin tajek kʼuchaʼal takin teʼ li snukulilike.
ט [tet]
9 Mas to xuʼ li buchʼutik laj yichʼik milel ta espadae, jaʼ mas to vokol li buchʼutik chamik ta viʼnale,+
li buchʼutik chlubtsajik xa ta skoj ti chʼabal veʼlile xkoʼolaj ti laj yichʼik pajbel espadae.
י [yod]
10 Li antsetik ti oy toʼox xkʼuxul yoʼontonike laj xa slakan li yalabike.+
Jaʼo la stiʼik kʼalal joyobtabil li stseb jteklumale.+
כ [kaf]
11 Li Jeovae laj xa yakʼ ta ilel li skapemal sjole;
laj xa smal talel li skʼakʼal yoʼonton ti xtiltune.+
Jech xtok, tstsanbe skʼakʼal Sion sventa xchikʼbe li snaklebtake.+
ל [lamed]
12 Li ajvaliletik ta balumile xchiʼuk skotol li jnaklejetik tee mu toʼox xchʼunik
ti ch-och ta stiʼtak Jerusalen li jmilvanej xchiʼuk li jkontrainvaneje.+
מ [mem]
13 Ti kʼusi kʼot ta pasele jaʼ ta smul li j-alkʼopetik yuʼune xchiʼuk jaʼ ta smul li paleetik yuʼune,+
yuʼun te la smalbeik xchʼichʼel li buchʼutik tukʼike.+
נ [nun]
14 Li j-alkʼopetik xchiʼuk li paleetike xkoʼolajik kʼuchaʼal maʼsat+ chanavik ta kayeetik.
Laj xa yikʼubtas sbaik ta chʼichʼ,+
jaʼ yuʼun muʼyuk buchʼu xuʼ xpikbat li skʼuʼ spokʼike.
ס [samek]
15 Xi x-avet yajvalike: «¡Lokʼanik batel! ¡Yuʼun toj ibal abaik!* ¡Lokʼanik batel! ¡Lokʼanik batel! ¡Mu xtal apikunkutik!».
Yuʼun chʼabal xa snaik, jaʼ noʼox ti bu xtal xbatike.
Xi chal li krixchanoetik ta mukʼta lumetike: «Mu xuʼ xkomik liʼe.*+
פ [pe]
16 Li Jeovae tanpuk xa batik yuʼun,+
muʼyuk xa lek ch-ilatik.
Li viniketike muʼyuk xa chichʼik ta mukʼ li paleetike+ xchiʼuk muʼyuk xa chakʼbe ta ilel slekil yoʼontonik li moletike».+
ע [ayin]
17 Solel lubem xa jsatkutik ta saʼel koltael, pe jecheʼ noʼox.+
Xijotetkutik ta saʼel koltael ta jun mukʼta lum, pe muʼyuk xuʼ yuʼun skoltaunkutik.+
צ [sade]
18 Solel snutsojunkutik li kajkontrakutike,+ jaʼ yuʼun mu stakʼ xixanavkutik li ta jkayekutike.*
Poʼot xa xvul li jlajebkutike, chlaj xa skʼoplal ti jayib kʼakʼal kuxulunkutike, kʼot xa yorail ti chilajkutike.
ק [kof]
19 Li buchʼutik tsnutsunkutike mas to anil xyoletik* kʼuchaʼal li aguilae.+
La snutsunkutik ta vitstikaltik; te nakʼalik* sventa smakunkutik ta be li ta takixokol balumile.
ר [rex]
20 Li buchʼu tʼujbil yuʼun Jeova ti jaʼ kʼotem ta yikʼal jniʼtike+ laj xa stikʼik ta mukʼta chʼen,+
ti jaʼ li buchʼu xi laj kalbetik skʼoplale: «Jaʼ ta yaxinal* chijkuxiutik kʼalal te oyutik li ta mukʼtik lumetike».
ש [xin]
21 Stseb Edom ti te nakalot ta yosilal Use, kuxetuk avoʼonton xchiʼuk muyubajan.+
Pe chavichʼ akʼbel ek li kopae,+ vaʼun chayakub xchiʼuk chatʼanan aba.+
ת [taw]
22 Stseb Sion, tsʼaki xa li kastigo laj avichʼ ta skoj li amule.
Muʼyuk xa buchʼu chikʼot batel ta yan lum.+
Pe jaʼuk li voʼote, stseb Edom, jaʼ xa te chakʼ talel sat Dios li ta amule.
Ta svinajesbot li amule.+
5 Kajval Jeova, teuk me ta ajol li kʼusi kʼot ta jtojolalkutike.
Akʼo tal asat xchiʼuk kʼelavil ti kʼu yelan likomkutik ta kʼexlale.+
2 Laj xa yichʼ akʼbel yan krixchanoetik li jrextokutike* xchiʼuk laj xa yichʼ akʼbel jyanlumetik li jnakutike.+
3 Xikoʼolajkutik xchiʼuk li buchʼu chamem stotike; li jmeʼkutike xkoʼolajik xa kʼuchaʼal antsetik ti chamem smalalike.+
4 Persa la jtoj li kaʼalkutike+ xchiʼuk li jsiʼkutike.
5 Jutuk xa skʼan staunkutik ta be li buchʼutik tsnutsunkutike;
lubemunkutik xa, mu xakʼik jkuxkutik.+
6 Xyeʼet jkʼobkutik ta stojolal Ejipto+ xchiʼuk Asiria+ yoʼ jta jpankutik sventa xnoj lek jchʼutkutike.
7 Chamemik xa li jmoltotakutik ti la spas smulike, pe voʼonkutik skʼan jkuchbekutik li smulike.
8 Li avie, jaʼ xa tsventainunkutik li jtuneletike; muʼyuk buchʼu xuʼ xtal spojunkutik lokʼel li ta skʼobike.
9 Chkakʼ ta vokol jkuxlejalkutik sventa jsaʼkutik pan,+ yuʼun oy buchʼutik te stsakoj s-espadaik li ta takixokol balumile.
10 Solel kʼokʼ tajek jnukulilkutik jech kʼuchaʼal jun orno ta skoj ti chkilkutik tsatsal viʼnale.+
11 Laj xa yichʼik akʼel ta kʼexlal* ta Sion li kajnilkutike xchiʼuk laj xa yichʼik akʼel ta kʼexlal ta jteklumetik ta Juda li tojol tsebetik kuʼunkutike.+
12 Li bankilaletik ta jteklume laj yichʼik jokʼanel ta skʼobik+ xchiʼuk muʼyuk ichʼatik ta mukʼ li moletike.+
13 Li keremetike xkuchojik batel li molinoe* xchiʼuk li kʼox keremetike xtamlajetik ta skoj ti ol tajek li siʼ xkuchojike.
14 Li moletike chʼabal xa te oyik li ta yochebal jteklume;+ li keremetike muʼyuk xa tstijik son.+
15 Muʼyuk xa xmuyubaj li koʼontonkutike; ti chi-akʼotajkutik toʼoxe kʼataj xa ta at-oʼonton.+
16 Pʼaj* xa yalel ta jolkutik li koronae. ¡Abol jbakutik, yuʼun laj xa jpas jmulkutik!
17 Ta skoj taje ipaj li koʼontonkutike+
xchiʼuk ta skoj li kʼusitik taje xmaklajet xa jsatkutik,+
18 ta skoj ti xokol xa kom li vits Sione,+ naka xa vetetik xyal xmuyik te.
19 Yan li voʼote, Kajval Jeova, te chotolot ta achotleb sventa ajvalil ta sbatel osil.
Li achotleb sventa ajvalile te chkom-o sbatel osil.+
20 ¿Kʼu yuʼun ti chachʼayunkutik-o ta ajole xchiʼuk ti jal tajek chajipunkutik komele?+
21 Kajval Jeova, ikʼunkutik
sutel tal ta atojolal, vaʼun ta anil chisutkutik tal ta atojolal.+
Akʼbunkutik tal yan velta jech kʼuchaʼal oyunkutik toʼox ta voʼnee.+
22 Yan li voʼote la apʼajunkutik-o ta j-echʼel.
Solel ilinemot-o tajek ta jtojolalkutik.+
Li kapitulo 1 kʼalal ta 4 jaʼ sonetik sventa at-oʼonton xchiʼuk ti kʼu yelan tsʼibabile jaʼ jech xcholet kʼuchaʼal xcholet li letraetik ta ebreo kʼope.
O «xchoret».
O «la slabanik».
Liʼe jaʼ skʼoplal li Jerusalene.
O «xchoret».
O «pat na».
O «oyalna».
O «X-avlajetik».
O «chanubtasele».
O «lum».
Kʼelo Glosario, chʼixal kʼuʼil.
Kʼalal ‹stseb jteklumal› xie, jaʼ jun nichimalkʼop ti chakʼ ta aʼiel xkʼuxul oʼontonal xchiʼuk slekil oʼontonale.
O «xchʼivitaltak; ti bu oy ep krixchanoetik ta».
Literal «¿Bu oy li sbekʼ tsʼunobile xchiʼuk li vinoe?».
O «xchʼivitaltak; ti bu oy ep krixchanoetik ta».
O «Xuxubajik».
O «Xuxubajik».
Literal «xulub».
O «ikʼpulane».
O «tsmak ta be; mu xakʼ jelavuk».
O «Mukul».
O «stsʼepʼunun».
O «xkʼexlaltasojikun».
Li ta ebreo kʼope jaʼ nefex. Kʼelo Glosario, nefex.
O «lumtik».
Literal «jun krixchano ti kuxul».
O «jutebuk».
O «Mukij; Butʼij».
O «yakʼol yeik».
Literal «kuxul tsoj».
Literal «toj tsots smul».
Koral sbi li kʼupil sba tonetik taje. Kʼelo Glosario, koral.
Kʼelo Glosario, ibal sba.
O «Mu xuʼ xkomik ta naklej kʼuchaʼal jyanlum».
O «li ta jchʼivitkutike; ti bu ep krixchanoetike».
O «xviletik».
O «mukulik».
O «skeoval».
O «jpukulalkutike; jpartekutike».
O «yichʼik tsakel».
Jaʼ jun kʼox molino ti ta kʼabal chichʼ tunesele. Kʼelo Glosario, stanal molino.
O «Tsʼuj».