SVENTA EBREOS

1 Voʼne xa onoʼox ti ep ta velta la skʼopon jmoltotaktik li Diose xchiʼuk ep ta tos kʼu yelan la skʼopon ti jaʼ la stunes li j-alkʼopetike.+ 2 Pe ta stojolal Xnichʼon+ skʼoponojutik li ta slajeb kʼakʼale, ti jaʼ la svaʼan sventa xuʼunin skotol li kʼusitike+ xchiʼuk ti jaʼ la stunes sventa spas skotol li kʼusitik oy ta balumile.*+ 3 Jaʼ slokʼol smukʼulal Dios+ xchiʼuk jaʼ slekil kʼelobil ti kʼu yelan li Diose,+ jech xtok, ta skoj li skʼop ti oy sjuʼele, jaʼ yikoj skotol li kʼusitik oye. Vaʼun, kʼalal laj xa ox sakubtas li jmultike,+ choti ta sbatsʼikʼob Dios te ta vinajel+ ta xokon li xchotleb sventa ajvalile. 4 Jech oxal, jaʼ mas mukʼ skʼoplal kʼot kʼuchaʼal li anjeletike,+ yuʼun jaʼ kʼot ta xrexto* ti labal sba kʼu yelan laj yichʼ albel lek skʼoplale, jaʼ mu sta li anjeletike.+

5 Jech kʼuchaʼal liʼe, ¿mi oy van junuk velta xi albat yuʼun Dios junuk anjele: «Voʼot jnichʼonot, avie likʼot xa ta atot»?+ ¿Mi oy van junuk velta xi yaloj xtoke: «Voʼon chikʼot ta stot, jaʼ chkʼot ta jnichʼon»?+ 6 Pe xi chal kʼalal tstak talel yan velta ta balumil li Sba Xnichʼone:+ «Akʼo ichʼatuk ta mukʼ yuʼun* skotol yaj-anjeltak li Diose».

7 Jech xtok, xi chal ta sventa li anjeletike: «Oy lek sjuʼel avuʼun li avaj-anjeltake, chapas ta leb kʼokʼ+ li avajtuneltake».*+ 8 Pe xi chal ta sventa li Nichʼonile: «Jaʼ chkʼot ta achotleb+ sventa ajvalil sbatel osil li Diose, li vaxton sventa Ajvalilal* avuʼune jaʼ li vaxton sventa tukʼilale. 9 La akʼan li tukʼilale, pe la apʼaj li choplejale. Jech oxal li Diose, li Adiose, la xjaxbot aseite+ xchiʼuk mas xkuxet avoʼonton yuʼun ti jaʼ mu sta li achiʼiltake».+ 10 Xi chal xtoke: «Kajval, voʼot laj avakʼbe snakleb balumil li ta slikebale xchiʼuk jaʼ yabtel akʼob li vinajele. 11 Chlajik li stukike, pe li voʼote jech-o kuxulot; yuʼun chlaj skotolik jech kʼuchaʼal chlaj li kʼuʼil pokʼile 12 xchiʼuk chapix jech kʼuchaʼal chpixvan jlik natil kʼuʼile, jech kʼuchaʼal jlik kʼuʼil pokʼil; vaʼun chichʼik jeltael. Pe li voʼote muʼyuk chajel xchiʼuk muʼyuk spajeb li ajabilale».+

13 Pe ¿mi oy van junuk velta xi yalojbe junuk anjele: «Chotlan ta jbatsʼikʼob jaʼ to mi laj kakʼ ta skajleb avakan li avajkontratake»?+ 14 ¿Mi mu jaʼuk sventa tspas chʼul abtelal* skotol li anjeletike+ xchiʼuk ti takbilik talel sventa chtunik ta stojolal li buchʼutik chuʼuninik li kolebale?

2 Jaʼ yuʼun, tsots skʼoplal ti xkakʼ mas ta koʼontontik xchikintael li kʼusitik nopem onoʼox xkaʼitik xchikintael+ sventa mu xijchʼay jsetʼuk* ta bee.+ 2 Yuʼun mi kʼot onoʼox ta pasel li kʼusitik laj yal anjeletik+ xchiʼuk mi laj onoʼox yichʼ kastigo skotol li jpasmulil xchiʼuk skotol li buchʼu mu xchʼun mantal jech kʼuchaʼal chal li tukʼilale,+ 3 ¿kʼuxi xuʼ xijkol mi muʼyuk jtsakojtik ta mukʼ li mukʼta kolebale?+ Yuʼun lik yalbe skʼoplal Kajvaltik+ xchiʼuk jech chalbutik ek li buchʼutik la xchikintabeike, 4 ti laj yalbe skʼoplal Dios ek kʼalal la stunes senyailtak, kʼusitik labalik sba, jeltos skʼelobiltak juʼelal+ xchiʼuk kʼalal la xchʼak chʼul espiritu jech kʼuchaʼal la skʼan yoʼontone.+

5 Li balumil chtal ti yakal chkalbekutik skʼoplale+ maʼuk laj yakʼbe ta yok skʼob anjeletik. 6 Pe oy bu xi laj yal jun testigoe: «¿Mi yuʼun tsots skʼoplal li vinik ti te oy ta ajole o mi yuʼun tsots skʼoplal li xnichʼon krixchano ti chachabie?+ 7 Mas bikʼit jutuk skʼoplal kʼot avuʼun kʼuchaʼal li anjeletike; laj avakʼbe skorona sventa smukʼulal xchiʼuk sventa yichʼel ta mukʼ xchiʼuk laj avakʼbe sbain li yabteltak akʼobe. 8 Laj avakʼbe ta yok skʼob skotol li kʼusitike».+ Kʼalal laj yakʼbe ta yok skʼob skotol li kʼusitike,+ muʼyuk xa jtosuk ti muʼyuk akʼbat ta yok skʼob yuʼun li Diose.+ Akʼo mi jech, li avie muʼyuk to bu chkiltik ti oy ta yok skʼob skotol li kʼusitike.+ 9 Akʼo mi jaʼ mas bikʼit jutuk skʼoplal kʼot Jesus kʼuchaʼal li anjeletike,+ chkiltik avi ti laj xa yichʼ skorona sventa smukʼulal xchiʼuk sventa yichʼel ta mukʼ ta skoj ti laj yil svokol ta lajelale,+ ta sventa slekil yutsil yoʼonton Dios la spas preva lajelal ta skoj li krixchanoetike.+

10 Skotol li kʼusitik oye jaʼ sventa yichʼobil ta mukʼ Dios xchiʼuk jaʼ ta skoj ti oy skotole. Jaʼ yuʼun chaʼa, sventa xichʼ toybel skʼoplal epal nichʼnabiletike,+ li Diose tsots skʼoplal chil ti stukʼibtas ta vokoliletik+ li Bankilal Jbeiltasvaneje. Jaʼ ta stojolal Bankilal Jbeiltasvanej tskolta+ nichʼnabiletik li Diose. 11 Jaʼ yuʼun, li buchʼu chchʼultajesvan xchiʼuk li buchʼutik yakal chichʼik chʼultajesele+ ta jun noʼox likemik tal skotolik,+ jech oxal muʼyuk bu chkʼexav kʼalal «kermanotak» xute,+ 12 xi chale: «Chkalbe skʼoplal abi ta stojolal li kermanotake; ta jkʼupil kʼoptaot ta kʼejimoletik ta stojolal tsobobbail».+ 13 Xi chal yan veltae: «Ta jpat koʼonton ta stojolal».+ Xi chal yan veltae: «¡Kʼelavilik! Voʼon xchiʼuk li uni nichʼnabiletik ti jaʼ laj yakʼbun li Jeovae».*+

14 Jech kʼuchaʼal oy xchʼichʼelik xchiʼuk oy sbekʼtalik li ‹uni nichʼnabiletike›, li stuk eke oy toʼox xchʼichʼel xchiʼuk oy toʼox sbekʼtal,+ jaʼ yuʼun ta skoj ti chame, xuʼ slajesbe skʼoplal ta jyalel li buchʼu xuʼ yuʼun chmilvane,+ jaʼ xkaltik, li Diabloe;+ 15 jech xtok, la skolta lokʼel skotol li buchʼutik oyik toʼox ta mosoil ti kʼu sjalil la xiʼtaik li lajelale.+ 16 Yuʼun ta melel maʼuk anjeletik ti buchʼu yakal tskoltae, jaʼ yakal tskolta li snitilulal Abraane.+ 17 Jaʼ yuʼun, jech kʼot jech kʼuchaʼal «yermanotak» ta kʼusiuk+ noʼox sventa oyuk xkʼuxul yoʼonton xchiʼuk jchʼunej mantaluk xtun ta mero bankilal pale ta spasbel li yabtel Diose. Vaʼun, xuʼ xakʼ matanal+ sventa smul krixchanoetik+ yoʼ lekuk xil sbaik xchiʼuk li Diose. 18 Ta skoj ti laj yil svokol kʼalal akʼat ta preva li stuke,+ xuʼ skolta li buchʼutik yakal ch-akʼatik ta prevae.+

3 Jaʼ yuʼun, chʼul ermanoetik, ti takbiloxuk ta ikʼel ta vinajele,+ tsakik me lek ta venta li jtakbol xchiʼuk li mero bankilal pale ti jamal chkalbekutik skʼoplal ti jaʼ li Jesuse.+ 2 Yuʼun tukʼ laj yakʼ sba ta stojolal li buchʼu vaʼanate+ jech kʼuchaʼal la spas Moises kʼalal la sventainbe spʼejel sna* li Diose.+ 3 Yuʼun li stuke* mas sta-o ti oy smukʼulal+ kʼuchaʼal li Moises jech kʼuchaʼal mas tsots skʼoplal li buchʼu la svaʼan li na ti jaʼ mu sta li nae. 4 Ta melel, oy buchʼu svaʼanoj li jujupʼej nae, pe jaʼ spasoj Dios skotol li kʼusitik oye. 5 Tukʼ laj yakʼ sba kʼalal la sventainbe spʼejel sna* Dios li Moisese ti jaʼ svinajeb li kʼusitik chichʼ albel skʼoplal ta mas jelavele, 6 pe li Kristoe tukʼ laj yakʼ sba kʼuchaʼal nichʼonil+ ta sna* li Diose. Jaʼ snautik+ mi tukʼ chkakʼ jbatik ta stojolal li kʼusi jamal chkaltik ta melele xchiʼuk li spatobil koʼontontik ti jaʼ xijmuyubaj-o yuʼun kʼalal to ta slajebe.

7 Jaʼ yuʼun, jech kʼuchaʼal xi chal li chʼul espiritue:+ «Mi chachikintabeik avi li kʼusi chale, 8 mu me xatsatsubtas avoʼontonik jech kʼuchaʼal toj echʼ xa noʼox la saʼik skʼakʼal oʼontonale xchiʼuk jech kʼuchaʼal la spasik li ta skʼakʼalil preva ta takixokol balumile,+ 9 jaʼ ti bu laj yakʼikun ta preva xchiʼuk kʼalal la skʼelbeikun koʼonton li amoltotakike manchuk mi laj yilik 40 jabil li kabteltake.+ 10 Jaʼ yuʼun, x-ibet koʼonton likom yuʼun li jkʼol kuxlejal taje xchiʼuk xi laj kale: ‹Skotol ora kʼejpʼujem* li yoʼontonike xchiʼuk muʼyuk to yojtikinojik li jbee›. 11 Jaʼ yuʼun, ta skʼakʼal koʼonton xi laj kakʼ kee: ‹Muʼyuk ch-ochik li ta xkuxobil koʼontone›».+

12 Kʼelo me abaik, ermanoetik, yuʼun xiʼel xlik chʼiuk ta avoʼontonik li kʼusi toj chopole xchiʼuk ti xanamajik ta stojolal kuxul Dios ta skoj ti chʼabal xchʼunel avoʼontonike;+ 13 pe jujun kʼakʼal jech-o me xapatbe aba avoʼontonik ta jujuntal yoʼ to «avi» xi chichʼ alele,+ taje jaʼ sventa mu stsatsub avoʼontonik yuʼun li sjuʼel mulil ti chloʼlavane. 14 Yuʼun ta melel jmoj te jkʼoplaltik xchiʼuk Kristo mi tukʼ ta jpat-o koʼontontik kʼalal to ta slajeb jech kʼuchaʼal la jpastik ta slikebale.+ 15 Jech kʼuchaʼal xi albile: «Mi chachikintabeik avi li kʼusi chale, mu me xatsatsubtas avoʼontonik jech kʼuchaʼal toj echʼ xa noʼox la saʼik skʼakʼal oʼontonale».+

16 ¿Buchʼutik ti laj yaʼiike, pe ti la saʼik skʼakʼal oʼontonal ta tsʼakale? ¿Mi mu jaʼikuk skotol li buchʼutik lokʼesatik yuʼun Moises ta Ejiptoe?+ 17 Jech xtok, ¿buchʼutik ta skoj ti x-ibet kom yoʼonton yuʼun Dios ti jalij 40 jabile?+ ¿Mi mu jaʼikuk li buchʼutik la saʼ smulik ti te telajtik kom sbekʼtalik ta takixokol balumile?+ 18 ¿Buchʼu skʼoplalik kʼalal laj yakʼ ye ti muʼyuk ch-ochik li ta xkuxobil yoʼontone? ¿Mi mu jaʼikuk li buchʼutik muʼyuk la xchʼunik mantal ta melele? 19 Jaʼ yuʼun, chkiltik ti muʼyuk bu x-ochik ta skoj ti chʼabal xchʼunel yoʼontonike.+

4 Jech oxal, ta skoj ti albil ti xuʼ to xij-och li ta xkuxobil yoʼontone, skʼan me jchabi jbatik,* yuʼun xiʼel sba mi oy buchʼu junuk avuʼunik ti muʼyuk ch-oche.+ 2 Yuʼun laj kichʼkutik albel ek li lekil aʼyejetik+ jech kʼuchaʼal laj yichʼik albele; pe muʼyuk bu la stabeik sbalil li kʼop laj yaʼiike, yuʼun mu parejouk xchʼunel yoʼontonik xchiʼuk li yantik ti la xchʼunik mantale. 3 Pe chij-och ta xkuxobil oʼontonal li voʼotik ti kakʼoj xchʼunel koʼontontik jech kʼuchaʼal xi onoʼox yaloje: «Jaʼ yuʼun, ta skʼakʼal koʼonton xi laj kakʼ kee: ‹Muʼyuk ch-ochik li ta xkuxobil koʼontone›»,+ akʼo mi tsutsem xa onoʼox li yabtel kʼalal lik tal stsʼunbal li krixchanoetike.+ 4 Yuʼun oy bu xi yaloj ta sventa li svukubal kʼakʼale: «Vaʼun, la xkux ta svukubal kʼakʼal ta skotol yabteltak li Diose»,+ 5 xi chal yan velta xtoke: «Muʼyuk ch-ochik li ta xkuxobil koʼontone».+

6 Jech oxal, ta skoj ti oy to junantik muʼyuk bu ochemike xchiʼuk li buchʼutik baʼyel laj yichʼik albel li lekil aʼyejetik ti muʼyuk bu x-ochik ta skoj ti muʼyuk bu la xchʼunik mantale,+ 7 chakʼbe to yan skʼakʼalil kʼalal xi laj yal ta mas jelavel li ta salmo yuʼun Davide: «Avi»; jech kʼuchaʼal xi onoʼox albile: «Mi chachikintabeik avi li kʼusi chale, mu me xatsatsubtas avoʼontonik».+ 8 Yuʼun ti ikʼatikuk batel ta jun kuxobil oʼontonal yuʼun li Josuee,+ muʼyuk xa bu laj yalbe skʼoplal yan kʼakʼal jechuk li Diose. 9 Jech oxal, oy to jun kuxob oʼontonal jech kʼuchaʼal jun savado sventa li steklumal Diose.+ 10 Yuʼun li vinik ti ochem ta xkuxobil yoʼonton Diose xkuxoj yoʼonton li ta yabtel stuk eke, jaʼ jech kʼuchaʼal spasoj li Diose.+

11 Jpastik me ti bu kʼalal xuʼ kuʼuntike sventa xij-och li ta kuxob oʼontonale sventa muʼyukuk buchʼu jech spas kuʼuntik jech kʼuchaʼal li buchʼutik muʼyuk la xchʼunik mantale.+ 12 Yuʼun kuxul li skʼop Diose, oy sjuʼel,+ jaʼ mas tsʼubtsʼub sniʼ kʼuchaʼal li espada ti chaʼjot yee,+ tsliʼ ochel jaʼ to mi chʼak yuʼun li jpat jxokontike xchiʼuk li yut koʼontontike, tsliʼ ochel jaʼ to mi chʼak yuʼun li jbakiltik* xchiʼuk xchinabile, jech xtok, xuʼ yuʼun chchaj ta kʼelel li jnopbentik xchiʼuk li kʼusi oy ta koʼontontike. 13 Jech xtok, muʼyuk bu nakʼal* ta sat jtosuk li kʼusitik pasbile,+ moʼoj, lek chajal ta sat. Xil skotol li buchʼu ta persa ta jchapbetik li kʼusi ta jpastike.+

14 Jech oxal, ta skoj ti oy jun mero lekil bankilal pale kuʼuntik ti batem xa ta vinajele ti jaʼ li Jesus Xnichʼon Diose,+ jechuk-o me xkaltik batel li xchʼunel koʼontontik ta stojolale.+ 15 Mu yuʼunuk chʼabal jun mero bankilal pale kuʼuntik ti mu xijkʼuxubaj ta yoʼonton ta skoj ti kʼunutike,+ moʼoj, oy jun mero bankilal pale kuʼuntik ti laj yichʼ akʼel ta preva ta skotol jech kʼuchaʼal voʼotike, jaʼ noʼox ti muʼyuk smule.+ 16 Jaʼ yuʼun, nopajkutik ta stojolal xchotleb Dios ti jaʼ chakʼ slekil yutsil oʼontonale, jamal kʼopojkutik+ sventa jtatik kʼuxubinel xchiʼuk slekil yutsil oʼontonal sventa skoltautik kʼalal jaʼo yoraile.

5 Yuʼun skotol li mero bankilal palee laj yichʼ vaʼanel sventa spasbe yabtel Dios,+ jaʼ tskolta li krixchanoetike sventa xakʼ matanal xchiʼuk milbil matanaletik ta skoj li mulile.+ 2 Xuʼ xkʼuxubin* li buchʼutik mu kʼusi snaʼike xchiʼuk li buchʼutik muʼyuk kʼusi lek batem ta pasel yuʼunike,* yuʼun kʼun li stuk eke, 3 jaʼ yuʼun skʼan xakʼ matanaletik ek ta skoj li smultak jech kʼuchaʼal tspas ta stojolal li jteklume.+

4 Muʼyuk buchʼu tsvaʼan sba stuk ta sventa li abtelal ti ichʼbil ta mukʼe, jaʼ noʼox xuʼ xichʼ vaʼanel yuʼun Dios jech kʼuchaʼal kʼot ta stojolal li Aarone.+ 5 Jaʼ jech kʼot ta stojolal li Kristo eke, yuʼun muʼyuk bu la saʼ yichʼel ta mukʼ stuk+ kʼalal kʼot ta mero bankilal palee, jaʼ noʼox laj yichʼ ichʼel ta mukʼ ta stojolal li buchʼu xi laj yale: «Voʼot jnichʼonot, avie likʼot xa ta atot».+ 6 Oy bu xi chal xtoke: «Paleot jech kʼuchaʼal li Melkisedeke, sbatel osil chakom ta paleal».+

7 Kʼalal kuxul toʼox ta sba balumil li Kristoe, la skʼan vokol xchiʼuk xvokolet ta stojolal li buchʼu xuʼ xpojat ta lajelale, tsots x-avet xchiʼuk la smal yaʼlel sat,+ jaʼ yuʼun chikintabat lek ta skoj ti xiʼtaoj* Diose. 8 Akʼo mi jaʼ nichʼonil, la xchan xchʼunel mantal ta skoj ti laj yil svokole.+ 9 Pe kʼalal laj xa ox yichʼ tukʼibtasele,+ jaʼ ta stojolal xuʼ staik kuxlejal sbatel osil skotol li buchʼutik chchʼunbat smantale,+ 10 yuʼun laj xa yichʼ vaʼanel yuʼun Dios ta mero bankilal pale jech kʼuchaʼal li Melkisedeke.+

11 Ep kʼusi skʼan xkalkutik ta sventa li Kristoe, pe vokol ta albel smelolal ta skoj ti amakoj achikinike. 12 Yuʼun akʼo mi jchanubtasvanejoxuk xa jechuk li avie, skʼan ti oyuk buchʼu xakʼ achanik yan velta ta slikebal li kʼunil chanubtaseletik+ ta sventa li lekil chʼul mantaletik yuʼun Diose, yuʼun yaʼlel chuʼil to chakʼanik yan velta, maʼuk chakʼanik li tsatsal veʼlile. 13 Mu xojtikin tukʼil kʼop li buchʼu jech-o chchuʼun ta yaʼlel chuʼile, yuʼun olol to.+ 14 Pe jaʼ sventa yijil krixchanoetik li tsatsal veʼlile, yuʼun lek chchanubtas snopbenik kʼalal tstunesike, taje jaʼ sventa xkʼel yuʼunik li kʼusi tukʼe xchiʼuk li kʼusi muʼyuk tukʼe.

6 Jaʼ yuʼun, ta skoj ti mas xa jchanojtik li kʼusitik kʼun ta chanel+ ta sventa li Kristoe, yijubkutik batel ta mantal+ xchiʼuk mu xa xkakʼbetik yan velta snakleb, jaʼ xkaltik, ti jaʼ to ta jchantik batel ta sventa li sutesel oʼontonal ti chamem yabtelale xchiʼuk li xchʼunel oʼontonal ta stojolal Diose, 2 li chanubtaseletik ta sventa ichʼvoʼe, ti chakʼ skʼobike,+ li chaʼkuxesele+ xchiʼuk li chapanel sbatel osile. 3 Jech chijyijub batel ta mantal mi jech tskʼan yoʼonton Diose.

4 Yuʼun li buchʼutik laj xa yilik li sakil osile+ xchiʼuk ti laj xa spasik preva li matanal ti muʼyuk tojbil ti te likem talel ta vinajele xchiʼuk ti staojik xa ek li chʼul espiritue 5 xchiʼuk ti laj xa spasik preva li skʼop Dios ti lek tajeke xchiʼuk li sjuʼel skotol li kʼusitik ta balumil* ti jaʼ to chtale, 6 pe ti namajemik xtoke,+ mu xa xuʼ sutes yoʼontonik yan velta, yuʼun tsbajik ta jtel teʼ yan velta stukik li Xnichʼon Diose, vaʼun chakʼik ta kʼexlal ta sat krixchanoetik.+ 7 Yuʼun chuchʼ voʼ li osil kʼalal nopajtik noʼox chakʼ voʼe, vaʼun chchʼi talel kʼusi slajes li buchʼu oy kʼusi la stsʼune. Vaʼun, li osile tsta bendision ta stojolal Dios. 8 Pe mi jaʼ chchʼi talel yuʼun chʼix xchiʼuk tomalchʼixe,* chichʼ pʼajel xchiʼuk poʼot xa chichʼ chopol kʼoptael, mi laje, chichʼ chikʼel.

9 Pe li voʼoxuke, kuni kʼanbil chiʼiltak, jchʼunojkutik lek li kʼusitik mas lekike ti te tsakal skʼoplal li kolebale manchuk mi jech yakal chikʼopojkutik. 10 Yuʼun tukʼ li Diose, jaʼ yuʼun mu xchʼay ta sjol li avabtelike xchiʼuk li kʼanelal laj avakʼik ta ilel ta sventa li sbie+ xchiʼuk ti chatunik ta stojolal li buchʼutik chʼulike xchiʼuk ti jech-o chatunik batel ta stojolalike. 11 Pe ta jkʼankutik ti jech baxbolukoxuk ta jujuntal xtok sventa jechuk-o lek xapat avoʼontonik kʼalal to ta slajeb+ ta sventa li kʼusi amalaojike+ 12 sventa mu xachʼajubik,+ moʼoj, jaʼ chanbeik li buchʼutik jaʼ chrextoinik* li kʼusi albil xa onoʼox ta skoj ti oy xchʼunel yoʼontonik xchiʼuk ti oy smalael yuʼunike.

13 Yuʼun ta stojolal stuk laj yakʼ ye Dios kʼalal oy kʼusi laj yalbe li Abraane, yuʼun muʼyuk buchʼu mas mukʼ skʼoplal ti xuʼ xakʼ ye ta stojolale,+ 14 xi laj yalbee: «Ta melel, chkakʼbot bendision xchiʼuk ta melel chkepajes li anitilulale».+ 15 Jaʼ yuʼun, kʼalal laj xa ox yakʼ ta ilel Abraan ti oy smalael yuʼune, la sta li kʼusi albile. 16 Yuʼun li krixchanoetike chakʼ yeik ta stojolal li buchʼu mas mukʼ skʼoplale, kʼalal chakʼ yeike, chchapaj yuʼunik li kʼusi mu koʼoluk tsnopike, yuʼun jaʼ xa mantal yuʼunik ti jech chakʼ yeike.+ 17 Jaʼ jech ek, kʼalal la snop Dios ti jamal chakʼ ta ilel li kʼusi tskʼan tspas*+ ti mu snaʼ xjele, ti laj yakʼ ta ilel ta stojolal li buchʼutik chrextoinik* li kʼusi albil xa onoʼoxe, te jamal laj yal kʼalal laj yakʼ yee 18 sventa oyuk stsatsal koʼontontik yoʼ jchʼuntik ta melel li spatobil koʼontontik ti te oy ta kelovaltik li voʼotik ti ochemutik xa ti bu xuʼ jpoj jbatike, taje jaʼ ta sventa li kʼusi chaʼtos ti mu snaʼ xjel ta skoj ti mu snaʼ sjut kʼop* li Diose.+ 19 Xkoʼolaj kʼuchaʼal s-anklail jkuxlejaltik li spatobil koʼontontike,+ yuʼun lek tukʼ xchiʼuk staoj lek yav, jech xtok, li spatobil koʼontontik taje ch-ikʼvan batel kʼalal to ta yut kortina+ 20 ti jaʼ te ochem batel jun jbabe ti jaʼ sventa jlekilaltik ti jaʼ li Jesuse,+ ti kʼotem kʼuchaʼal mero bankilal pale sbatel osil jech kʼuchaʼal li Melkisedeke.+

7 Yuʼun li ajvalil Melkisedek ta Salem xchiʼuk ti jaʼ yajpale li Dios ti toj toyol oye bat snup talel ta be Abraan kʼalal ay smil li ajvaliletike xchiʼuk laj yakʼbe bendision,+ 2 vaʼun akʼbat yuʼun Abraan jun ta lajlajuneb ta skotol li kʼusitike. Baʼyel xi chichʼ jelubtasbel li sbie: «Ajvalil yuʼun tukʼilal», jech xtok, jaʼ ajvalil ta Salem, jaʼ xkaltik, «ajvalil yuʼun jun oʼontonal». 3 Mu nabiluk buchʼu stot smeʼ, buchʼu yutsʼ yalal, kʼusi ora vokʼ, kʼusi ora cham, pe pale-o ta j-echʼel ta skoj ti xkoʼolaj kʼuchaʼal Xnichʼon Diose.+

4 Kʼelavilik ti toj tsots skʼoplal li Melkisedeke, yuʼun li Abraan ti jaʼ jolil* ta utsʼ alalile laj yakʼbe Melkisedek jun ta lajlajuneb ta skotol li kʼusi la sta talel ta paskʼope, jaʼ laj yakʼbe li bu mas lekike.+ 5 Melel onoʼox, li xnichʼnabtak Levi+ ti vaʼanbilik ta paleale chal Mantal ti xuʼ skʼanbeik diesmo li jteklume,+ jaʼ xkaltik, li yermanotakike manchuk mi jaʼik snitilulal Abraan. 6 Pe li vinik ti mu teuk likem talel ta snitilulal Levie la stsak li diesmo akʼbat yuʼun Abraane xchiʼuk laj yakʼbe bendision li buchʼu oy onoʼox kʼusi albile.+ 7 Li buchʼu chakʼ bendisione jnaʼojtik ti jaʼ mas mukʼ skʼoplal kʼuchaʼal li buchʼu chichʼe. 8 Li jlevietik laj yichʼik diesmoe jaʼik krixchanoetik ti chchamike, pe li yan vinik laj yichʼ diesmoe chichʼ albel skʼoplal ta Tsʼibetik ti kuxule.+ 9 Ti kʼalal laj yakʼ diesmo li Abraane, xuʼ xichʼ alel ti la stoj diesmo li Levi eke akʼo mi chichʼ akʼbel diesmo ek, 10 yuʼun li Levie muʼyuk toʼox bu vokʼem ta snitilulal Abraan ti jaʼ li smoltot ti ay nupatuk ta be yuʼun Melkisedeke.+

11 Jaʼ yuʼun, mi laj yichʼ tael tukʼilal ta skoj li paleal sventa Levie+ (yuʼun jaʼ jtos svinajeb li Mantal ti laj yichʼ akʼbel li jteklume), ¿mi persa to van chichʼ vaʼanel yan pale ti laj yichʼ alel ti xkoʼolaj kʼuchaʼal Melkisedeke,+ ti mu xkoʼolaj kʼuchaʼal Aarone? 12 Ta skoj ti yakal xa chjel li paleale, persa skʼan xjel li Mantal+ eke. 13 Yuʼun ta yan-o nitilulal tal li vinik ti jech chichʼ albel skʼoplale, jech oxal muʼyuk buchʼu yakal tspas yuʼunik li kʼusi skʼan pasel ta skajleb matanale.+ 14 Yuʼun jamal xvinaj ti ta Juda likem talel li Kajvaltike,+ pe muʼyuk kʼusi laj yal jsetʼuk* Moises ta sventa li paleal ti te chlik talel li ta nitilulal taje.

15 Pe mas to jamal xvinaj kʼalal chlik talel yan pale+ ti xkoʼolaj kʼuchaʼal Melkisedeke,+ 16 ti jech kʼotem ta melele maʼuk jech kʼuchaʼal chal mantal ti ta nitilulal noʼox likem tale, moʼoj, ta juʼelal likem talel ti ch-akʼbat xkuxlejal ti mu stakʼ lajesele.+ 17 Yuʼun xi chichʼ alel ta stojolale: «Paleot jech kʼuchaʼal li Melkisedeke, sbatel osil chakom ta paleal».+

18 Jech oxal, parte laj yichʼ akʼel batel li voʼne mantale, yuʼun kʼun xchiʼuk chʼabal sbalil.+ 19 Yuʼun li Mantale muʼyuk pas yuʼun skotol li kʼusi tskʼan Diose,+ yan li spatobil oʼontonal ch-och tal ti mas leke+ jaʼ chakʼ li tukʼilale xchiʼuk jaʼ ta sventa ti yakal chijnopaj ta stojolal Diose.+ 20 Jech xtok, ta sventa ti jamal laj yakʼ ye Diose 21 (yuʼun ta melel oy viniketik ochemik ta paleal akʼo mi muʼyuk bu jamal laj yakʼ ye li Diose, pe oy jun vinik ti och ta paleal ti xi laj yakʼ ye Dios ta stojolale: «Yakʼoj ye li Jeovae* xchiʼuk muʼyuk bu tsjel li kʼusi tsnope:* ‹Paleot sbatel osil›»),+ 22 kʼot ta tojolil* li Jesus ta sventa li jun trato ti jaʼ mas leke.+ 23 Jech xtok, ep buchʼutik ochik ta paleal kʼuchaʼal kʼexoliletik,+ yuʼun mu xa xuʼ spas batel yabtelik ta paleal ta skoj ti chamike, 24 pe li stuke chʼabal buchʼu chkʼextaat ta paleal ta skoj ti kuxul-o sbatel osile.+ 25 Jech oxal, xuʼ lek tsʼakal skolta xtok li buchʼutik yakal chnopajik ta stojolal Dios ta sbie, yuʼun kuxul-o sbatel osil sventa chkʼopoj ta stojolalik.+

26 Yuʼun toj lek ti oy jun mero bankilal pale kuʼuntik kʼuchaʼal taje: ti tukʼe, ti muʼyuk la spas li kʼusi chopole, ti muʼyuk yikʼobale,+ ti jelel kʼuchaʼal li jpasmuliletike xchiʼuk ti toybil skʼoplal ta vinajele.+ 27 Jelel kʼuchaʼal li mero bankilal paleetike, yuʼun li stuke mu persauk xakʼ milbil matanal jujun kʼakʼal,+ ti chakʼ ta sventa smule xchiʼuk ta sventa li jteklum xtoke,+ yuʼun jun noʼox velta ta j-echʼel laj yakʼ kʼalal laj yakʼ sba stuke.+ 28 Yuʼun li Mantale jaʼ tsvaʼan ta mero bankilal pale li viniketik ti kʼunike,+ pe li kʼusi albil ta jamal+ ti chkʼot ta pasele jaʼ la svaʼan li jun Nichʼonil ti tukʼ-o+ sbatel osile, li kʼusi albil taje jaʼ to vul kʼalal lokʼem xa ox li Mantale.

8 Li kʼusi mas tsots skʼoplal ta sventa li kʼusi yakal chkalbetik skʼoplale jaʼ liʼe: jaʼ mero bankilal pale kuʼuntik taje+ xchiʼuk choti xa ta sbatsʼikʼob Dios te ta vinajel+ ta xokon li xchotleb sventa ajvalile, 2 jaʼ te chtun ti bu chʼule+ xchiʼuk li ta melel karpana ti jaʼ la svaʼan Jeovae,* ti maʼuk la svaʼan li krixchanoetike. 3 Yuʼun chakʼ matanaletik xchiʼuk milbil matanaletik skotol li buchʼu chichʼ vaʼanel ta mero bankilal palee; jaʼ yuʼun tsots skʼoplal ti oyuk kʼusi xakʼ eke.+ 4 Maʼuk pale+ jechuk ti liʼuk oy ta sba balumile, yuʼun oy xa viniketik chakʼik matanaletik jech kʼuchaʼal chal li Mantale. 5 Li viniketik taje tspasik chʼul abtelal ti jaʼ noʼox senyail xchiʼuk snakʼobal+ li kʼusitik oy ta vinajele;+ jech kʼuchaʼal xi albat mantal yuʼun Dios li Moises kʼalal poʼot xa ox skʼan spas li karpanae, yuʼun xi chale: «Kʼelo me lek ti jechuk xapas skotol jech kʼuchaʼal li skʼelobil la-akʼbat avil ta vitse».+ 6 Pe mas xa kʼupil sba staoj yabtel Jesus li avie, yuʼun jaʼ jkʼopojel+ xtok ta sventa jun trato ti mas leke+ ti laj yichʼ chotanbel lek skʼoplal ta sventa li kʼusi albil xa onoʼox ti mas leke.+

7 Muʼyuk bu chtun jsetʼuk* yan trato jechuk ti muʼyukuk spaltail* li baʼyel tratoe.+ 8 Yuʼun tstabe spaltail* jteklum kʼalal xi chale: «‹¡Kʼelavil!, chkʼot skʼakʼalil ti ta jpas jun achʼ trato xchiʼuk li jteklum Israele xchiʼuk li jteklum Judae —xi li Jeovae—.* 9 Mu xkoʼolaj xchiʼuk li trato la jpas xchiʼuk li smoltotakik kʼalal la jnitbe lokʼel tal skʼobik li ta yosilal Ejiptoe,+ yuʼun muʼyuk la stsakik ta mukʼ li jtratoe, jaʼ yuʼun muʼyukik xa ta koʼonton›, xi li Jeovae.*

10 »‹Yuʼun kʼalal mi echʼ xa ox li skʼakʼalil taje, xi yelan ta jpas trato xchiʼuk li jteklum Israele —xi li Jeovae—.* Ta xkakʼbe ta snopbenik li jmantale xchiʼuk ta jtsʼibabe ta yoʼontonik.+ Vaʼun voʼon chikʼot ta Sdiosik xchiʼuk chkʼotik ta jteklumal.+

11 »›Jech xtok, muʼyuk xa bu chchanubtas mi junuk xchiʼilik xchiʼuk mi junuk yermanoik, mu xa bu xi chalike: «¡Ojtikinik li Jeovae!».* Yuʼun skotolik ta xojtikinikun, kʼalal ta bikʼit ta mukʼ. 12 Ta jkʼuxubinik akʼo mi muʼyuk tukʼ li kʼusitik spasojike xchiʼuk muʼyuk xa bu ta jvules ta jol li smulike›».+

13 Kʼalal laj yal ‹jun achʼ tratoe›, muʼyuk xa stu kʼot yuʼun li baʼyel tratoe.+ Jaʼ yuʼun, poʼot xa xlaj skʼoplal li kʼusi muʼyuk xa stue xchiʼuk ti mol xae.+

9 Yan li baʼyel tratoe yichʼoj mantaletik sventa chʼul abtelal xchiʼuk oy xchʼul avil+ liʼ ta sba balumile. 2 Yuʼun li sbakʼolal karpana laj yichʼ vaʼanele jaʼ ti bu oy li kandeleroe,+ li mexae xchiʼuk li pan ti akʼbil ta stojolal Diose;+ taje Chʼul Kuarto chalbeik.+ 3 Pe li ta spat xchaʼkʼolal kortina+ li ta karpanae, Batsʼi Lekil Chʼul Kuarto chalbeik.+ 4 Tee oy jun xchikʼobil pom ti pasbil ta oroe+ xchiʼuk te oy li xkaxail mantal+ ti pixil lek ta oroe+ ti te tikʼil li jarra pasbil ta oro ti yichʼoj manae,+ li ta kaxae te tikʼil xtok li snamteʼ Aaron ti laj yakʼ xnichimale+ xchiʼuk li chaʼpech ton+ sventa tratoe; 5 te oy chaʼvoʼ keruvin ti jun yutsilik li ta sba kaxa ti te smakoj ta snakʼobalik li smak* kaxae.+ Pe li avie, maʼuk yorail ti bikʼitik xa chkalbe skʼoplal skotol taje.

6 Kʼalal jech laj yichʼ vaʼanele, skotol ora ch-ochik batel ta sbakʼolal karpana li paleetik sventa tspasik li chʼul abtelale;+ 7 yan li mero bankilal palee stuk ch-och batel jkoj ta jabil li ta xchaʼkʼolale,+ chichʼ ochel chʼichʼ+ ti chakʼ sventa smul stuk+ xchiʼuk sventa smul jteklum+ ti la spasik ta skoj ti mu snaʼike. 8 Vaʼun, jamal laj yal chʼul espiritu ti muʼyuk to akʼbil ta ilel li sbelel Batsʼi Lekil Chʼul Kuarto kʼalal te toʼox li baʼyel karpanae.+ 9 Li karpana taje jaʼ noʼox senyail sventa li jkʼakʼaliltike,+ jech oxal chichʼ akʼel matanal xchiʼuk milbil matanal ti kʼu yelan chapanbile.+ Akʼo mi jech, li kʼusitik chichʼ akʼele mu slekubtasbe sjol yoʼonton li vinik ti chichʼ ta mukʼ Diose.+ 10 Jaʼ noʼox tskʼelbe skʼoplal veʼlil, uchʼbolajel xchiʼuk jeltos kʼu yelan tspok sbaik* kʼuchaʼal chal li Mantale.+ Jech xtok, jaʼ li kʼusi skʼan pasel chal Smantal Moises ta sventa bekʼtalil+ xchiʼuk ti laj yichʼ akʼbel yorail ti albil onoʼox sventa stukʼibtas li kʼusitike.

11 Pe kʼalal tal Kristo kʼuchaʼal mero bankilal pale sventa li kʼusitik lek kʼotemik ta pasele, jelav batel ta karpana ti mas mukʼ xchiʼuk ti mas tukʼ ti mu ta skʼobuk krixchano laj yichʼ pasele, jaʼ xkaltik, ti maʼuk ta skʼob li kʼusitik pasbil ta balumile. 12 Jun noʼox velta och batel ti bu chʼule, pe maʼuk ta xchʼichʼel tot tentsun xchiʼuk chʼiom tot vakax, moʼoj, jaʼ ta xchʼichʼel stuk,+ vaʼun la jta-o jkolebaltik yuʼun* sbatel osil.+ 13 Mi yuʼun ta xchʼichʼel tot tentsun, ta xchʼichʼel tot vakax+ xchiʼuk ta stanil chʼiom meʼ vakax ti te vijbil ta stojolal li buchʼu ibal sba* ti xuʼ xchʼultajes sventa sakuk li sbekʼtale,+ 14 jaʼ mas to tsots skʼoplal li xchʼichʼel Kristoe.+ Ta skoj li yabtel chʼul espiritu sbatel osile, laj yakʼ sba stuk Kristo ta stojolal Dios kʼuchaʼal matanal ti chʼabal spaltaile.* Ta sakubtas jol koʼontontik li xchʼichʼele, ta skoj taje, muʼyuk xa ta jpastik li kʼusi muʼyuk stue.+ Vaʼun, xuʼ xa jpastik chʼul abtelal ta stojolal li kuxul Diose.+

15 Jech oxal, ti kʼotem ta jkʼopojel sventa achʼ tratoe+ jaʼ sventa akʼo sta xrextoik* sbatel osil+ ti albil xa onoʼox li buchʼutik takbilik ta ikʼele. Taje jaʼ jech kʼot ta pasel ta skoj ti chame+ sventa sta skolebalik ta skoj ti la sta smulik li ta baʼyel tratoe. 16 Yuʼun li buchʼu tspas tratoe persa skʼan xcham sventa oyuk sbalil li tratoe, 17 yuʼun li tratoe jaʼ noʼox oy sbalil kʼalal chamem xa li krixchanoe, yuʼun chʼabal sbalil mi kuxul to li krixchano ti la spas tratoe. 18 Jech oxal, maʼuk ti muʼyuk bu laj yichʼ tunesel chʼichʼ kʼalal och ta abtel li baʼyel tratoe. 19 Yuʼun kʼalal laj xa ox yalbe sjunul jteklum Moises skotol li kʼusitik chal Mantale, la stsakbe li xchʼichʼel chʼiom tot vakax xchiʼuk li xchʼichʼel tot tentsune, vaʼun la skap ta voʼ. La stunes tsots* ti lek kuxul stsajale xchiʼuk isopo,* vaʼun la svijbe li livroe* xchiʼuk la svijbe sjunul li jteklume, 20 laje xi laj yale: «Li chʼichʼ liʼe jaʼ sventa li trato ti laj yalboxuk mantal Dios ti akʼo xachʼunike».+ 21 Jaʼ jech la svijbe chʼichʼ li karpana eke xchiʼuk skotol li kʼusitik chichʼ tunesel sventa chʼul abtelale.*+ 22 Jech, jutuk mu skotoluk jaʼ to xuʼ sak xkom li kʼusitik mi chichʼ akʼbel chʼichʼ+ jech kʼuchaʼal chal Mantale, jech xtok, muʼyuk me perton mi muʼyuk bu laj yichʼ malel chʼichʼe.+

23 Jaʼ yuʼun, li kʼusitik taje jaʼ laj yichʼ-o sakubtasel+ li senyail+ kʼusitik oy ta vinajele, pe mas to lek milbil matanaletik skʼan ta sventa li kʼusitik ta vinajele. 24 Yuʼun li Kristoe muʼyuk bu och ta Batsʼi Lekil Chʼul Kuarto ti pasbil ta skʼob krixchanoetik+ ti jaʼ svinajeb li kʼusi melele,+ moʼoj, yuʼun och batel ta vinajel+ sventa svaʼan sba ta stojolal* Dios yoʼ skʼan vokol ta jtojolaltik.+ 25 Taje maʼuk sventa chakʼ sba jayibuk velta jech kʼuchaʼal tspas li mero bankilal pale ti maʼuk xchʼichʼel stuk chichʼ ochel ti bu chʼul kʼalal ch-och jujukoj ta jabile.+ 26 Ti jechuke, ep ta velta skʼan xil svokol ti kʼuxi lik tal stsʼunbal li krixchanoetike. Pe li avie, jun noʼox velta ta j-echʼel laj yakʼ sba ta ilel li ta slajebtik skotol li kʼusitik oy ta balumile* sventa slajesbe skʼoplal li mulil ta sventa ti laj yakʼ sba stuk ta milbil matanale.+ 27 Jech kʼuchaʼal li krixchano ti jun noʼox velta ta j-echʼel chchame, ti chichʼ chapanel mi kʼot xa ox ta pasel taje, 28 jaʼ jech ek li Kristoe jun noʼox velta ta j-echʼel laj yakʼ sba sventa xkuchbe batel smul li epal krixchanoetike;+ vaʼun li ta xchibal velta chakʼ sba ta ilele, maʼuk xa chtal slokʼes li mulile,* moʼoj, jaʼ xa chtal skolta li buchʼutik ta sjunul tajek yoʼonton smalaojike.+

10 Ta skoj ti jaʼ snakʼobal+ Mantal li kʼusitik lek chtale, pe ti maʼuk sbatsʼi kʼoplal li kʼusitik lek chtale,+ li Mantale* mi jaʼuk onoʼox xtukʼib yuʼun li buchʼutik chnopajik ta stojolal Dios+ kʼalal chakʼilanik milbil matanaletik jujun jabile. 2 ¿Mi mu lajemuk xa skʼoplal jechuk li yakʼel milbil matanal ti sakuk xa komik ta jun noʼox velta li buchʼutik tspasik chʼul abtelal ti chʼabaluk xa smul chaʼi ta sjol yoʼontonike? 3 Moʼoj, li milbil matanal taje jaʼ sventa tsvules ta jolil jujun jabil li mulile,+ 4 yuʼun mu xchʼay yuʼun mulil li xchʼichʼel tot vakax xchiʼuk li xchʼichʼel tot tentsune.

5 Jech oxal, xi chal kʼalal ch-och talel ta balumile: «‹Muʼyuk xakʼan milbil chonbolometik sventa matanal xchiʼuk li yantik matanale, pe la achapanbun jbekʼtal. 6 Muʼyuk bu lek laj avil chikʼbil matanaletik mi jaʼuk matanaletik sventa mulil›.+ 7 Jaʼ yuʼun xi laj kale: ‹¡Kʼelavil! Lital (te tsʼibabil jkʼoplal li ta balbalvune) sventa jpas li kʼusi tskʼan avoʼontone Dios›».+ 8 Xi baʼyel laj yale: «Muʼyuk bu la akʼan xchiʼuk muʼyuk bu lek laj avil li milbil chonbolometik sventa matanal xchiʼuk li yantik matanale, li chikʼbil matanaletike xchiʼuk mi jaʼuk li matanaletik sventa mulile» —milbil matanaletik ti chichʼ akʼel jech kʼuchaʼal chal li Mantale—. 9 Vaʼun xi to chale: «¡Kʼelavil! Lital sventa jpas li kʼusi tskʼan avoʼontone».+ Sventa slikesbe skʼoplal li xchibale, tslajesbe skʼoplal li baʼyele. 10 Ta sventa ‹li kʼusi tskʼan yoʼonton›+ taje, laj kichʼtik chʼultajesel ta sventa ti laj yakʼ sbekʼtal ta jun noʼox velta ta j-echʼel li Jesukristoe.+

11 Jech xtok, te chtunik jujun kʼakʼal skotol li paleetik sventa spasik li xchʼul abtelike*+ xchiʼuk sventa xakʼik li milbil matanal ti chichʼ onoʼox akʼele,+ akʼo mi jech, mu xtupʼ yuʼun ta j-echʼel li muliletike.+ 12 Pe li Kristoe sventa sbatel osil laj yakʼ milbil matanal ta skoj muliletik xchiʼuk te choti ta sbatsʼikʼob Dios,+ 13 vaʼun te smalaoj sventa x-akʼbat ta skajleb yakan li yajkontratake.+ 14 Yuʼun ta jun noʼox milbil matanal laj xa stukʼibtas sbatel osil li buchʼutik yakal chichʼik chʼultajesele.+ 15 Jech xtok, jamal chalbutik li chʼul espiritu eke, yuʼun xi baʼyel laj yale: 16 «Yuʼun kʼalal mi echʼ xa ox li skʼakʼalil taje, xi yelan ta jpas trato xchiʼukike —xi li Jeovae—.* Ta xkakʼbe ta yoʼontonik li jmantaltake xchiʼuk te ta jtsʼibabe ta snopbenik».+ 17 Vaʼun xi to chale: «Muʼyuk xa bu ta jvules ta jol li smulike xchiʼuk li xchopolalike».+ 18 Jaʼ yuʼun, mi pasbil xa ta perton li smulik taje, muʼyuk xa chichʼ akʼel yan matanal sventa mulil.

19 Jaʼ yuʼun, kermanotak, ta skoj ti oy stsatsal koʼontontik* sventa xij-och ta sbelel li Batsʼi Lekil Chʼul Kuarto+ ta skoj li xchʼichʼel Jesus 20 ti jaʼ la sjambutik jun achʼ be sventa kuxlejal ta skoj li kortinae,+ jaʼ xkaltik, li sbekʼtale 21 xchiʼuk ti oy mero lekil pale kuʼuntik ti jaʼ sbainojbe li steklumal Diose,+ 22 nopajkutik ta sjunul koʼontontik xchiʼuk ta skotol xchʼunel koʼontontik, yuʼun sak xa koʼontontik, lek xa jol koʼontontik+ xchiʼuk sakubtasbil xa ta sakil voʼ li jbekʼtaltike.+ 23 Skʼan me lek jamal xkaltik batel ta stojolal krixchanoetik li spatobil koʼontontike, mu me xchibetuk koʼonton jpastik,+ yuʼun tukʼ li buchʼu jamal laj yale. 24 Jech xtok, skʼan me oyuk ta koʼonton jbatik ta jujuntal yoʼ jtijbe jba koʼontontik sventa jkʼan jbatik xchiʼuk jpastik li kʼusitik toj leke,+ 25 jech xtok, mu me xkiktatik ti ta jtsob jbatik*+ jech kʼuchaʼal oy nopem xaʼiik spasel junantike, jaʼ lek jpatbe jba koʼontontik ta jujuntal,+ mas to skʼan jech jpastik ta skoj ti chnopaj xa talel li skʼakʼalil chavilike.+

26 Yuʼun mi yolbaj xa ta jpas jmultik kʼalal xkojtikintik xa lek li kʼusi melele,+ muʼyuk xa me yan milbil matanal xuʼ xkakʼtik ta sventa li jmultike,+ 27 muʼyuk xa, yuʼun malabil xiʼel sba chapanel xchiʼuk skʼakʼal oʼontonal ti xtiltun tajek ti tslajes li buchʼutik chkontrainvanike.+ 28 Mi oy laj yal chaʼvoʼ o mi oxvoʼ testigo+ ti oy buchʼu muʼyuk tspas li kʼusi chal Smantal Moisese, chʼabal me xkʼuxul oʼontonal chichʼ milel un bi. 29 ¿Mi mu van masuk to chichʼ kastigo xanaʼik li jun krixchano ta skoj ti la xpechʼilan ta tekʼel li Xnichʼon Diose xchiʼuk ti batsʼi chʼabal sbalil chil xtok li chʼichʼ sventa trato+ ti jaʼ laj yichʼ-o chʼultajesele, ti chopol chalbe skʼoplal xtok li xchʼul espiritu Dios ti jaʼ tstunes sventa xakʼ ta ilel li slekil yutsil yoʼontone?+ 30 Yuʼun xkojtikintik li buchʼu xi yaloje: «Voʼon oy ta jba ta jpak; voʼon chkakʼbe stojol». Xi laj yal yan veltae: «Jaʼ chchapan steklumal li Jeovae».*+ 31 Toj xibal me sba kʼalal chij-och ta skʼob li kuxul Diose.

32 Pe vuleso-o me ta ajolik li kʼusi komem xa ta patile, yuʼun kuch avuʼunik xchiʼuk laj avil avokolik ta tsatsal prevaetik kʼalal ta sakil osil xa ox oyoxuke.+ 33 Oy bateltik ti ta sat krixchanoetik laj avichʼik chopol kʼoptaele xchiʼuk ti la-akʼbat tsots avokolike, jech xtok, oy bateltik ti te achiʼukik li buchʼutik jech la snuptanik kʼuchaʼal taje. 34 Yuʼun kʼuxubaj ta avoʼontonik li buchʼutik ochik ta chukele xchiʼuk xkuxet tajek avoʼontonik laj avaʼiik kʼalal lapojbatik li kʼusitik oy avuʼunike,+ yuʼun anaʼojik ti oy kʼusitik mas lek avuʼunike xchiʼuk ti mu snaʼ xlaje.+

35 Jech oxal, jechuk-o me tsots avoʼontonik,* yuʼun ep tajek chata amotonik mi jech chapasike.+ 36 Yuʼun skʼan xkuch avuʼunik,+ yuʼun chavichʼik li kʼusi albil onoʼox skʼoplal chkʼot ta pasel mi laj xa ox apasbeik li yabtel Diose. 37 Yuʼun «jutuk xa yorail»,+ vaʼun «chvul onoʼox li buchʼu chtale, muʼyuk bu chjalij».+ 38 «Pe chkuxi ta skoj xchʼunel yoʼonton li tukʼil kajtunele»,+ pe «muʼyuk me bu xkuxet koʼonton yuʼun mi tsut ta valopate».+ 39 Yan li voʼotike mu xijkoʼolaj kʼuchaʼal li krixchano ti tsut ta valopat sventa xbat ta lajelale,+ moʼoj, yuʼun jaʼ xijkoʼolaj kʼuchaʼal li krixchano ti oy xchʼunel yoʼonton sventa kuxuluk-oe.

11 Li xchʼunel oʼontonale jaʼ ti oy kʼusi malabil chkʼot onoʼox ta pasel+ ta persae, jaʼ slekil vinajeb li kʼusitik onoʼox jaʼe akʼo mi mu xvinaj ta kʼelel. 2 Yuʼun ta skoj xchʼunel oʼontonal, lek albat skʼoplalik li krixchanoetik ta voʼnee.*

3 Ta skoj xchʼunel koʼontontik chkiltik ti lek xchapet yuʼun skʼop Dios skotol li kʼusitik oy ta balumile,* jaʼ yuʼun li kʼusitik xkiltike ayan ta skoj li kʼusitik mu xkiltike.

4 Ta skoj xchʼunel yoʼonton Abel laj yakʼ milbil matanal ti mas oy sbalil ta stojolal Dios kʼuchaʼal li matanal yuʼun Kaine.+ Ta skoj xchʼunel yoʼonton laj yichʼ albel skʼoplal ti tukʼ li Abele, yuʼun tsakbat ta mukʼ yuʼun Dios* li matanaletik laj yakʼe.+ Akʼo mi chamem xa, chkʼopoj to+ ta skoj li xchʼunel yoʼontone.

5 Ta skoj xchʼunel yoʼonton Enok+ laj yichʼ ikʼel batel sventa mu xil lajelal jech kʼuchaʼal chlaj li krixchanoetike, vaʼun muʼyuk bu laj yichʼ tael ta bu jotukal, yuʼun ikʼat batel yuʼun Dios;+ pe kʼalal muʼyuk toʼox bu ikʼbil batele, laj yichʼ albel skʼoplal ti lek ilat yuʼun li Diose. 6 Jech xtok, muʼyuk lek chilutik Dios mi chʼabal xchʼunel koʼontontike, yuʼun li buchʼu chnopaj ta stojolal Diose skʼan xchʼun ti oye xchiʼuk ti ch-akʼbat smotonik li buchʼutik ta sjunul yoʼonton tsaʼike.+

7 Kʼalal laj xa ox yichʼ pʼijubtasel yuʼun Dios li Noe+ ta sventa li kʼusitik chtal ti mu to xvinaje,+ ta skoj xchʼunel yoʼonton laj yakʼ ta ilel ti xiʼtaoj* Diose, vaʼun la spas jun arka+ sventa xkol li yutsʼ yalale; ta skoj xchʼunel yoʼonton vinaj ti oy smul li krixchanoetike,+ jech oxal la xrextoin* li tukʼilal ta sventa li xchʼunel oʼontonale.

8 Kʼalal takat ta ikʼel li Abraane,+ ta skoj xchʼunel yoʼonton la xchʼun mantal, yuʼun lokʼ batel sventa oy bu chbat ti jaʼ ch-akʼbat kʼuchaʼal xrextoe;* akʼo mi mu snaʼ ti bu chbate, bat onoʼox.+ 9 Ta skoj xchʼunel yoʼonton naki kʼuchaʼal jyanlum ta jun lum+ ti jaʼ onoʼox li balumil albil skʼoplale, naki ta karpanaetik+ xchiʼuk Isaak xchiʼuk Jakob ti jaʼik li buchʼutik chrextoinik* ek li kʼusi albil skʼoplale.+ 10 Yuʼun jaʼ smalaoj li jteklum ti oy lek sbatsʼi nakleb ti jaʼ tspas* xchiʼuk ti jaʼ tsvaʼan li Diose.+

11 Ta skoj xchʼunel yoʼonton li Sara eke, akʼbat yip sventa xuʼ xchiʼin yol akʼo mi echʼem xa ox tajek sjabilal,+ yuʼun li Sarae tukʼ* laj yil li buchʼu laj yale. 12 Jaʼ yuʼun, ta skoj noʼox jun vinik ti chamem yaʼeluke,+ ep tajek vokʼ xnichʼnab+ jech kʼuchaʼal li epal kʼanaletik ta vinajele, jech xtok, mu stakʼ chapel jech kʼuchaʼal li jiʼ* oy ta tiʼ nabe.+

13 Oy xchʼunel yoʼonton chamik skotol li buchʼutik taje. Akʼo mi muʼyuk bu kʼot ta pasel ta skʼakʼalilik li kʼusi onoʼox albil skʼoplal chkʼot ta pasele,+ laj yilik ta nom+ xchiʼuk lek la xchʼamik, jech oxal jamal laj yalik ti jaʼik yan krixchanoetike xchiʼuk ti j-echʼelbeik noʼox liʼ ta balumile. 14 Yuʼun li buchʼutik jech chkʼopojike jamal chakʼik ta ilel ti ta sjunul yoʼonton tsaʼik ti bu chnakiike. 15 Akʼo mi jech, ti jechuk-o la svules ta sjolik ti bu lokʼik tale,+ xuʼ van sutik batel ti jechuke. 16 Pe li avie, tskʼan tstaik ti bu mas leke, jaʼ xkaltik, ti teuk tsakal skʼoplal ta sventa li vinajele. Jech oxal, muʼyuk bu chkʼexav Dios kʼalal ch-albat ti jaʼ Sdiosik kʼalal chtaat ta kʼoponele,+ yuʼun xchapanoj xa jun jteklum sventa xuʼuninik.+

17 Kʼalal akʼat ta preva li Abraane,+ ta skoj xchʼunel yoʼonton laj yakʼ xkaltik li Isaake, li buchʼu ta sjunul yoʼonton la xchʼam li kʼusitik albil onoʼox skʼoplale oy ta yoʼonton laj yakʼ li jun noʼox xnichʼone+ 18 akʼo mi xi onoʼox albile: «Yuʼun li anitilulal albil skʼoplale te chlik talel ta stojolal li Isaake».+ 19 Pe la snop ti xuʼ chchaʼkuxes li Diose, kʼalal jech kʼot ta pasele, kʼot jech kʼuchaʼal jun skʼelobil.+

20 Ta skoj xchʼunel yoʼonton ek li Isaake, laj yakʼbe bendision li Jakob+ xchiʼuk Esau+ ta sventa li kʼusitik chtal ta jelavele.

21 Kʼalal jutuk xa ox skʼan xcham+ li Jakobe, ta skoj xchʼunel yoʼonton laj yakʼbe bendision ta jujuntal li xnichʼnab Josee+ xchiʼuk laj yichʼ ta mukʼ Dios kʼalal stsakoj snamteʼe.+

22 Kʼalal jutuk xa ox skʼan xcham li Josee, ta skoj xchʼunel yoʼonton laj yalbe skʼoplal ti chlokʼik batel li j-israeletike xchiʼuk laj yal mantal ta sventa ti kʼu yelan chichʼ mukele.*+

23 Ta skoj ti oy xchʼunel yoʼonton stot smeʼ li Moisese, la snakʼik* oxib u kʼalal vokʼe,+ yuʼun laj yilik ti toj kʼupil sba li olole+ xchiʼuk muʼyuk la xiʼtaik li smantal ajvalile.+ 24 Kʼalal chʼi xa ox+ li Moisese, ta skoj xchʼunel yoʼonton muʼyuk bu la skʼan albel ti jaʼ yol li stseb faraone,+ 25 jaʼ la stʼuj ti akʼo yichʼ ilbajinel xchiʼuk li steklumal Diose, jaʼ muʼyuk la stʼuj ti akʼo skʼupin kʼuk sjalil li mulile, 26 yuʼun jaʼ mas mukʼta kʼulejal laj yil li chopol kʼoptael ta sventa Kristoe ti jaʼ mu sta li skʼulejal Ejiptoe; yuʼun jaʼ skʼeloj batel lek li matanale. 27 Ta skoj xchʼunel yoʼonton laj yikta li Ejiptoe,+ pe muʼyuk bu xiʼo li ta skʼakʼal yoʼonton ajvalile,+ yuʼun xkoʼolaj kʼuchaʼal te skʼeloj-o yilel li buchʼu mu xvinaj ta kʼelele.+ 28 Ta skoj xchʼunel yoʼonton la spas Kʼin Koltael xchiʼuk la sbon chʼichʼ ta smarkoal tiʼ na sventa jech mu xmilbatik* li sba xnichʼonik yuʼun li jmilvaneje.+

29 Ta skoj xchʼunel yoʼontonik la xtuchʼik Tsajal nab jech kʼuchaʼal takin balumil,+ pe li j-ejiptoetike laj yichʼik bikʼel ochel kʼalal jech la spasike.+

30 Ta skoj xchʼunel yoʼonton krixchanoetik jin yalel smuroaltak lum Jeriko kʼalal laj xa ox sjoyibtaik ta xanbal vukub kʼakʼale.+ 31 Ta skoj xchʼunel yoʼonton Raab ti jaʼ jchonbail antse muʼyuk koʼol cham xchiʼuk li buchʼutik muʼyuk la xchʼunik mantal ta melele, yuʼun ta slekil yoʼonton la xchʼam li jpaʼivanejetike.*+

32 ¿Buchʼu van mas chkalbe skʼoplal? Yuʼun mu xlokʼ-o yorail kuʼun ti xkalbe skʼoplal li Jedeone,+ li Barake,+ li Sansone,+ li Jeftee,+ li Davide,+ jech xtok, mu xlokʼ-o yorail kuʼun ti xkalbe skʼoplal li Samuel+ xchiʼuk li yan j-alkʼopetike. 33 Ta skoj xchʼunel yoʼontonik la stsalik ajvaliletik,+ la spasik li kʼusi tukʼe, oy kʼusi albat ch-akʼbatik,+ la smakbeik ye leonetik,+ 34 la xyochbeik yip kʼokʼ,+ jatavik lokʼel ta ye espada,+ tsatsubtasatik akʼo mi kʼunik toʼox,+ tsatsubik ta paskʼop+ xchiʼuk jatav yuʼunik jkontrainvanej soltaroetik.+ 35 Oy antsetik ti laj yilik chaʼkuxiik talel li yanimaike,+ pe oy yan viniketik ti tsots tajek akʼbat svokolik ta skoj ti muʼyuk la xchʼamik li kolebal ta skoj pojelale sventa staik li chaʼkuxesel ti mas leke. 36 Jech, akʼatik ta preva kʼalal labanatik xchiʼuk kʼalal laj yichʼik tsitsel* li yantike, ta melel maʼuk noʼox taje, akʼatik ta preva ta kadena+ xtok xchiʼuk tikʼatik ta chukel.+ 37 Akʼbatik ton,+ akʼatik ta preva, laj yichʼik tuchʼel ta oʼlol ta sierra, laj yichʼik milel ta espada,+ la stunes ta skʼuʼ spokʼik nukulil chij xchiʼuk nukulil tentsun+ kʼalal jaʼo bu xtal xbatike, solel muʼyuk kʼusi oy yuʼunik, laj yil tsots svokolik+ xchiʼuk laj yichʼik ilbajinel;+ 38 li krixchanoetike mu staik-o ti te echʼ ta stojolalik li buchʼutik taje. Xanavik ta takixokol balumil, ta vitstik, ta chʼentik+ xchiʼuk ta nail chʼentik.

39 Akʼo mi lek laj yichʼ albel skʼoplalik ta skoj xchʼunel yoʼonton skotolik taje, muʼyuk bu kʼot ta pasel ta skʼakʼalilik li kʼusi albil onoʼox skʼoplal chkʼot ta pasele, 40 yuʼun baʼyel xa onoʼox la snop Dios ti oy kʼusi mas lek ta jventatike+ sventa mu baʼyeluk xichʼik tukʼibtasel ti jaʼ tsʼakal to li voʼotike.

12 Jaʼ yuʼun, ta sventa ti oy epal testigo kuʼuntik ti sjoyibtaojutike, jlokʼestik ek skotol li kʼusi ole xchiʼuk li mulil ti ta anil chchukutike,+ jech xtok, kuchuk me kuʼuntik li anilajel jtamojtike,+ 2 jkʼeltik batel lek li Bankilal Jbeiltasvaneje xchiʼuk li Jtukʼibtasvanej yuʼun xchʼunel koʼontontike, li Jesuse.+ Kuch yuʼun milel ta jtel teʼ sventa vokolil* xchiʼuk kuch yuʼun kʼexlaltasel ta sventa li xkuxetel oʼontonal tsta ta tsʼakale, jech xtok, choti xa ta sbatsʼikʼob+ Dios ta xokon xchotleb sventa ajvalil. 3 Jech, kʼelik lek li buchʼu kuch yuʼun skotol xchopol kʼopojel li buchʼutik tskontrain sba stukike+ sventa mu xalubtsajik xchiʼuk sventa mu xchibaj avoʼontonik.+

4 Pe li voʼoxuke muʼyuk to bu chmal achʼichʼelik ta spasel kʼop sventa xatsalik li mulile 5 xchiʼuk jpʼel chʼayem ta ajolik ti xi laj avichʼik albel mantal kʼuchaʼal nichʼnabiletike: «Kuni nichʼon, tsako me lek ta mukʼ li tukʼibtasel chakʼ Jeovae* xchiʼuk mu me xchibaj avoʼonton kʼalal tstukʼibtasote; 6 yuʼun li Jeovae* tstukʼibtas li buchʼu skʼanoje, ta onoʼox stsits* skotol li buchʼu chchʼam kʼuchaʼal xnichʼone».+

7 Skʼan xkuch avuʼunik, yuʼun jaʼ te tsakal skʼoplal li tukʼibtasele.* Jech chiloxuk kʼuchaʼal xnichʼnab li Diose.+ ¿Mi oy van junuk nichʼonil ti muʼyuk bu chtukʼibtasat yuʼun li stote chaʼa?+ 8 Maʼuk mero nichʼnabiloxuk jechuk ti muʼyukuk laj avichʼik tukʼibtasel akotolike. 9 Jech, nopem xaʼi tstukʼibtasutik li jtotik liʼ ta balumile, pe kichʼojtik ta mukʼ. ¿Mi mu masuk to van skʼan jchʼunbetik smantal li Jtotik sventa jkuxlejaltik ti la stʼujutik ta xchʼul juʼel ti jaʼ sventa xijkuxi yuʼune?+ 10 Yuʼun li jtotike oy noʼox kʼuk sjalil la stukʼibtasutik jaʼ ti kʼu yelan lek laj yil stukike, pe li Diose jech tspas sventa jtabetik sbalil yoʼ chʼuluk xijkʼot jech kʼuchaʼal li stuke.+ 11 Melel onoʼox ti mu jtosuk tukʼibtasel xijmuyubaj xa yuʼun li avie, moʼoj, yuʼun toj kʼux;* pe ta tsʼakale, chakʼbutik jun oʼontonal xchiʼuk tukʼilal mi laj kichʼtik tukʼibtasele.

12 Jaʼ yuʼun, tsatsubtaso li akʼobik ti jecheʼ te jokʼole xchiʼuk tukʼibtaso li sjol avakanik ti kʼunibeme+ 13 xchiʼuk jechuk-o me tukʼ xatam batel abeik+ sventa mu xpitkʼuj lokʼel sbakil avakanik ti bu koxoe, moʼoj, jaʼ mas lek ti sta yave. 14 Jaʼ xapasik batel li kʼusi jun-o avoʼonton akotolike+ xchiʼuk chʼulukoxuk me,+ yuʼun mi moʼoje, muʼyuk buchʼu xuʼ xil li Kajvaltike. 15 Kʼelik me lek ti mu me xavikta abaik ta stael li slekil yutsil yoʼonton Diose sventa mu kʼusi xchʼi talel yibel ta atojolalik ti oy svenenoal ti xuʼ xlik-o kʼope xchiʼuk ti ep buchʼutik xuʼ xikʼubtas sbaik-oe;+ 16 jech xtok, mu me buchʼu junukal xmulivaj* avuʼunik xchiʼuk ti mu xichʼ ta kʼux li kʼusitik chʼul jech kʼuchaʼal la spas Esaue, ti ta jlech noʼox veʼlil laj yakʼ ta moton li sderecho sventa sba nichʼonile.+ 17 Yuʼun anaʼojik lek ti kʼalal tskʼan xa chrextoin* ta tsʼakal li bendisione, laj yichʼ pʼajel. Manchuk mi x-okʼolet tajek la skʼan ti akʼo to jeluk snopbene,*+ muʼyuk xa la sta.

18 Yuʼun li voʼoxuke maʼuk nopajemoxuk ta stojolal li kʼusi stakʼ pikel+ ti laj yichʼ tsanbel skʼakʼale,+ maʼuk nopajemoxuk ta stojolal li ikʼal toke, mi jaʼuk li ta ikʼal osile, mi jaʼuk li ta tsatsal ikʼaloʼe,+ 19 mi jaʼuk li ta yechʼomal okʼese,+ mi jaʼuk li ta yechʼomal eil+ ti jaʼ ta skoj la skʼanik vokol ti mu xa xkʼoponatik li jteklum kʼalal laj yaʼiike.+ 20 Yuʼun mu stsʼik yuʼunik li mantal liʼe: «Skʼan xichʼ akʼbel ton kʼalal chpechʼ ta tekʼel vits li chonbolom eke».+ 21 Xi laj yal Moises ek ta skoj ti solel xibal sba li kʼusi yakal chkʼot ta pasele: «Solel chixiʼ xchiʼuk xitʼeltʼun».*+ 22 Pe li voʼoxuke nopajemoxuk ta stojolal jun vits Sion+ xchiʼuk ta jun steklumal kuxul Dios ti jaʼ li Jerusalen ta vinajele,+ ta stojolal li sjaylajunebal xa noʼox mil anjeletike, 23 ta stojolal komon tsobajel, ta stojolal stsobobbail+ li sba nichʼoniletik ti laj yichʼ tsakbel sbiik ta vinajele, ta stojolal Dios ti jaʼ Jchapanvanej yuʼun skotol krixchanoetike,+ ta stojolal tukʼil kuxlejaletik ti vokʼemik ta chʼul espiritu+ ti yichʼojik xa tukʼibtasele,+ 24 ta stojolal Jesus ti jaʼ jkʼopojel+ ta sventa li achʼ tratoe+ xchiʼuk li chʼichʼ laj yichʼ vijel ti jaʼ mas lek kʼuchaʼal li xchʼichʼel Abele.+

25 Kʼelik me lek ti mu me xavikta abaik ta xchikintabel* li buchʼu yakal chkʼopoje. Yuʼun mi muʼyuk bu kolik li buchʼutik laj yikta sbaik ta xchikintabel li buchʼu pʼijubtasvan ta sventa Dios liʼ ta sba balumile, ¡mu voʼotikuk xa chijkolutik mi la jchʼak jbatik ta stojolal li buchʼu chkʼopoj talel ta vinajele!+ 26 Yuʼun ta yechʼomal ye la slilin balumil+ li vaʼ kʼakʼale, pe xi to jamal yaloj li avie: «Ta yan veltae, maʼuk noʼox ta jnikes li balumile, yuʼun ta jnikes li vinajel xtoke».+ 27 Vaʼun chaʼa, kʼalal «ta yan veltae» xie, jaʼ skʼan xal ti chichʼ lokʼesel li kʼusitik chichʼ nikesele, li kʼusitik laj yichʼ pasele* sventa te xkom li kʼusitik muʼyuk bu chichʼ nikesele. 28 Jaʼ yuʼun, ta skoj ti chkichʼtik jun Ajvalilal* ti mu stakʼ xichʼ nikesele, jechuk-o me jchʼamtik li slekil yutsil oʼontonal ti jaʼ tskoltautik ta spasel li chʼul abtelal ta stojolal Dios sventa lekuk chʼambile, ta xiʼtaeluk* Dios xchiʼuk ta ichʼeluk ta mukʼ ta sjunul oʼontonal jpastik. 29 Yuʼun li Jdiostike jaʼ jun kʼokʼ ti chchikʼvan xtoke.+

13 Jechuk-o xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele.+ 2 Mu me xchʼay xavaʼiik ti lek xachʼamvanike,*+ yuʼun oy buchʼutik jech la spasik, pe muʼyuk laj yakʼik venta ti anjeletik la xchʼamike.+ 3 Vuleso me ta ajolik li buchʼutik tikʼajtik ta chukele,*+ te xa oyoxuk ta chukel xavaʼi abaik ek,+ vuleso me ta ajolik xtok li buchʼutik chichʼik ilbajinele, yuʼun liʼ oyoxuk ta balumil eke.* 4 Ichʼbiluk me ta mukʼ avuʼun akotolik li nupunele, mu me sokes sbaik li buchʼutik nupunemike,+ yuʼun chchapan jmulivajeletik* li Diose xchiʼuk li buchʼutik tsloʼla snup xchiʼilike.+ 5 Maʼukuk me batem ta avoʼontonik skʼanel takʼin+ ti kʼu yelan kuxuloxuke, muyubajanik noʼox me ta skoj ti kʼusi oy avuʼunik avie.+ Yuʼun xi yaloje: «Muʼyuk chkiktaot jutebuk xchiʼuk muʼyuk ta jkomtsanot jutebuk».+ 6 Jaʼ yuʼun, lek tsots koʼontontik xi chkaltike: «Jaʼ jkoltavanej kuʼun li Jeovae;* muʼyuk chixiʼ. ¿Kʼusi xuʼ spasbun li jun krixchanoe?».+

7 Vuleso me ta ajolik li buchʼutik jbabe avuʼunik+ ti jaʼ laj yakʼ achanik li skʼop Diose. Chanbeik me xchʼunel yoʼontonik kʼalal chakʼelbeik li kʼusi chkʼot ta pasel yuʼun li stalelalike.+

8 Mu snaʼ xjel-o li Jesukristoe, jaʼ jech-o li voljee, li avie xchiʼuk sbatel osil.

9 Mu me xalajik ta loʼlael yuʼun li yantik chanubtasele xchiʼuk li chanubtaseletik ti mu xavojtikinike; yuʼun mas lek mi chichʼ tsatsubtasel ta slekil yutsil oʼontonal li avoʼontonike, ti maʼuk li ta veʼliletike,* yuʼun muʼyuk la stabeik sbalil li buchʼutik jaʼ bat ta yoʼontonike.+

10 Oy jun skajleb matanal kuʼuntik ti mu stakʼ slajesik li kʼusitik te oy ta sba li buchʼu sbainojik ta spasel chʼul abtelal ta karpanae.+ 11 Yuʼun chichʼ chikʼel ta spat karpanaetik+ li sbekʼtal chonbolometike, pe li xchʼichʼele chichʼ ichʼel ochel ta Batsʼi Lekil Chʼul Kuarto jech kʼuchaʼal matanal sventa mulil, jaʼ chichʼ ochel li mero bankilal palee. 12 Jech oxal, ta spat stiʼ jteklum+ laj yil svokol ek li Jesuse sventa xchʼultajes ta xchʼichʼel li jteklume.+ 13 Jaʼ yuʼun, te xijbat ti bu oye, li ta spat karpanaetike, kuchuk kuʼuntik li chopol kʼoptael jech kʼuchaʼal kuch yuʼune,+ 14 yuʼun muʼyuk kuʼuntik junuk jteklum ti liʼ oy-oe, jaʼ ta jsaʼtik ta sjunul koʼontontik li jteklum ti jaʼ to chtale.+ 15 Ta sventa Jesus jech-o me kakʼtik milbil matanaletik ti jaʼ skʼupil kʼoptael li Diose,+ jaʼ xkaltik, jaʼ li kʼusi chlokʼ ta ketik+ ti jamal chalbe skʼoplal ta stojolal krixchanoetik li sbie.+ 16 Jech xtok, mu me xchʼay ta ajolik spasel li kʼusi leke xchiʼuk ti xavakʼbeik yantik li kʼusi oy avuʼunike,+ yuʼun lek tajek chil Dios li milbil matanaletik taje.+

17 Chʼunbeik me smantal li buchʼutik jbabe avuʼunike+ xchiʼuk akʼo me abaik ta ventainel ta stojolalik,+ yuʼun yakal chchabioxuk xchiʼuk chichʼik chapanel ti kʼu yelan chchabioxuke.+ Vaʼun, xmuyubaj noʼox tspas yabtelik, mu ta jikʼ oʼontonuk, yuʼun mi tsjikʼ yoʼonton avuʼunike, yikʼaluk me oy kʼusi chopol xkʼot ta atojolalik un bi.

18 Pasik-o me orasion ta jtojolalkutik, yuʼun jpatoj koʼontonkutik ti sak* jol koʼontonkutike, yuʼun oy ta koʼontonkutik ti sakuk jtalelalkutik ta skotole.+ 19 Pe li kʼusi mas ta jkʼane jaʼ ti xapasik orasion sventa xbat noʼox jkʼeloxuk ta orae.

20 Jaʼ yuʼun, li Dios ti chakʼ jun oʼontonal ti la xchaʼkuxes li mukʼta jchabichij+ ti jaʼ li Kajvaltik Jesus ti laj yakʼ xchʼichʼel sventa li trato sbatel osile 21 akʼo yakʼboxuk skotol kʼusitik lek sventa xapasbeik li kʼusi tskʼan yoʼontone. Ta stojolal Jesukristo tstij koʼontontik ta spasel li kʼusi lek tajek chil ta sate, jaʼuk noʼox stuk akʼo yichʼ ichʼel-o ta mukʼ sbatel osil. Jechuk.

22 Jaʼ yuʼun, ta jtij avoʼontonik, kermanotak, oyuk me smalael avuʼunik kʼalal chachikintaik li spatobil oʼontonal liʼe, yuʼun jutuk noʼox kʼusitik la jtsʼibaboxuk li ta jkartae. 23 Ta jkʼan chanaʼik ti la skoltaik xa lokʼel li kermanotik Timoteoe. Mi tal noʼox ta orae, ta jchiʼin talel sventa xtal jkʼeloxuk.

24 Chabanuk xavalbeik skotol li buchʼutik jaʼ jbabe avuʼunike xchiʼuk skotol li buchʼutik chʼule. Chabanukoxuk la chalik ek li buchʼutik te oyik ta Italiae.+

25 Teuk me oy ta atojolalik li slekil yutsil oʼontonale.