Chakʼbe Slajeb
Ta smiyonal xa noʼox krixchanoetik yakʼoj ta xkuxlejalik li beiltaseletik ta Vivliae, jaʼ yuʼun muʼyuk xa kʼusi chopol tsnopik ta stojolal li yantike. Pe melel onoʼox ti mu xuʼ kuʼun ta jtuktik ti jlokʼes ta koʼontontik ti mu xa jnoptik kʼusitik chopol ta stojolal li yantike. Vaʼun chaʼa, ¿mi oy van kʼusi stakʼ pasel?
Jun tukʼil ajvalil
Li kʼusi kʼotem ta pasele chakʼ ta ilel ti ajvaliletike muʼyuk chʼayem skʼoplal yuʼunik ti chopol kʼusi chichʼ nopel ta stojolal li yantike. ¿Mi jaʼ van skʼan xal ti muʼyuk buchʼu spas yuʼun taje?
Sventa xichʼ chʼaybel skʼoplal ti chopol kʼusi chichʼ nopel ta stojolal li yantike, xi skʼan spas li jun ajvalile:
1. Ti stijbe yoʼonton krixchanoetik sventa sjel li kʼusi tsnopike xchiʼuk ti kʼu yelan chaʼi sbaik ta stojolal li yantike.
2. Ti xchʼaybe ta sjol li kʼusi chopol pasbatik yuʼun li yantike.
3. Ti oyuk yuʼun jnitvanejetik ti muʼyukuk kʼusi chopol tsnopik ta stojolal li yantike.
4. Ti jmojuk tsobol yuʼun skotol krixchanoetik ta spʼejel balumile.
Li Vivliae chal ti Diose svaʼanoj jun ajvalil ti jech tspas skotol taje, taje jaʼ li Ajvalilal yuʼun Diose (Lukas 4:43).
Akʼo venta kʼusi chakʼbutik li Ajvalil taje.
1. Chchanubtasvan lek
«Li jnaklejetik ta balumile ta xchanik ta sventa li tukʼilale» (ISAIAS 26:9).
«Li sbalil chichʼ tabel li melel tukʼilale jaʼ li jun oʼontonale, li kʼusi chakʼ kʼotuk ta pasel li melel tukʼilale jaʼ ti muʼyuk kʼusi jnaʼtik xchiʼuk ti jun koʼontontik ta sbatel osile» (ISAIAS 32:17).
¿Kʼusi skʼan xal? Li Ajvalilal yuʼun Diose chakʼbe krixchanoetik li kʼusi leke. Kʼalal jnaʼojtik kʼusi lek xchiʼuk li kʼusi chopole o jnaʼojtik li kʼusi tukʼ xchiʼuk li kʼusi muʼyuk tukʼe, chjel ti kʼusi ta jnoptik ta stojolal li yantike. Vaʼun, chakʼik venta skotol krixchanoetik ti mas lek ti skʼanik li jeltos krixchanoetike.
2. Chakʼbe slajeb li vokoliletike
«Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe» (APOKALIPSIS 21:4).
¿Kʼusi skʼan xal? Li Ajvalilal yuʼun Diose chakʼbe slajeb li kʼusi chakʼ jvokoltike. Li buchʼutik laj yichʼik ilbajinele muʼyuk xa me srasonal yuʼunik ti kʼux chaʼiik li kʼusitik laj yichʼik pasbele.
3. Lek chbeiltasvan
«Maʼuk noʼox jech chchapanvan ti kʼu yelan chil ta sate xchiʼuk maʼuk jech chtukʼibtasvan ti kʼu yelan chaʼi ta xchikine. Tukʼ ta xchapan li buchʼutik abol sbaike xchiʼuk lek ta stukʼibtas li manxoetik ta balumile» (ISAIAS 11:3, 4).
¿Kʼusi skʼan xal? Li Jesukristo ti jaʼ li Ajvalilal yuʼun Diose ta sventain tal ta vinajel li balumile. Jech xtok, tukʼ kʼusitik tspas xchiʼuk muʼyuk ta stʼuj li krixchanoetike. Li Jesuse muʼyuk junuk jteklum ti mas lek chile xchiʼuk xuʼ xakʼ ti xchʼunik li stukʼil mantaltak ta spʼejel balumile.
4. Tstsob krixchanoetik
Li Ajvalilal yuʼun Diose chakʼ «ti koʼol anopbenike, ti koʼol akʼanoj abaike, ti koʼol lek oyoxuke xchiʼuk ti koʼol kʼusi chanopike» (FILIPENSES 2:2).
¿Kʼusi skʼan xal? Li buchʼutik chventainatik yuʼun li Ajvalilal yuʼun Diose jmoj oyik ta melel, maʼuk noʼox me tsmakik satil. Ta skoj ti skʼanoj sbaik ta melele, koʼol oyik.