¿Mi achʼunoj ta melel li spatobil oʼontonal ta sventa li chaʼkuxesele?
«Ta xchaʼcuxiic.» (HECHOS 24:15.)
1. ¿Kʼu yuʼun ti persa chkʼot ta pasel yaʼeluk li lajelale?
«LI KʼUSI persa chkʼot ta pasel liʼ ta balumile jaʼ li lajelale xchiʼuk li stojel patane.» Li loʼil taje, ti la stsʼiba ta sjabilal 1789 li jpolitiko ta Estados Unidos ti Benjamín Franklin sbie, labal to chaʼiik li jlom krixchanoetik ti jech jpʼel skʼoplal laj yale. Akʼo mi jech, ep ta xloʼlavanik xchiʼuk muʼyuk ta stojik li patane. Li lajelale jelel, yaʼeluke persa chkʼot ta pasel, yuʼun mu buchʼu xuʼ tskolta sba ta skʼob; mi kʼot yoraile chi j-och ta skʼob jtekeltik. Ta skoj ti chviʼnaj tajmek ti mu noʼox xnoj li yavil animaetike —jaʼ xkaltik, li mukinal ta komon yuʼun krixchanoetike— tsbikʼ skotol li kutsʼ kalaltike (Proverbios 27:20). Manchuk mi jech, oy spatobil koʼontontik.
2, 3. 1) ¿Kʼu yuʼun chkaltik ti mu persauk chkʼot ta jtojolaltik li lajelal kʼuchaʼal chal yantike? 2) ¿Kʼusi ta jkʼeltik li ta xchanobil liʼe?
2 Li sKʼop Diose chakʼ lek spatobil koʼontontik ta sventa li chaʼkuxesele, jaʼ xkaltik, ti chkichʼtik totsel yan velta sventa chi jkuxi ta achʼe. Maʼuk jun vaychil, jech noxtok muʼyuk kʼusi xchiʼuk muʼyuk buchʼu oy ta vinajel-balumil ti tsmakik ta be sventa mu xkʼot ta pasel yuʼun Jeova taje. Jlom ti buchʼutik kuxulik avie, maʼuk ti persa ta xlajik jech kʼuchaʼal chalik yan krixchanoetike. ¿Kʼu yuʼun jech taje? Yuʼun kuxul ta xkom «epal cristianoetic» li ta «tsots [vocol]» ti nopol xa xtale (Apocalipsis 7:9, 10, 14, Ch). Mi echʼ taje jaʼ xa noʼox me skʼelojik batel li kuxlejal sbatel osile. Jaʼ yuʼun chaʼa, ta sventa li krixchanoetik taje mu me persauk chkʼot ta stojolalik li lajelale. Jech noxtok, chichʼ «[ulesel] li lajele» (1 Corintios 15:26).
3 Li avie, skʼan jchʼuntik lek li chaʼkuxesel jech kʼuchaʼal li jtakbol Pablo ti xi laj yale: «Ta xchaʼcuxiic li bochʼotic lequique xchiʼuc li bochʼotic chopolique», xi (Hechos 24:15). Jchanbetik batel skʼoplal oxib sjakʼobil ti ch-ayan ta sventa taje. Baʼyel, ¿kʼusitik chakʼ jchʼuntik ta melel li spatobil oʼontonal taje? Xchibal, ¿kʼu yelan xuʼ spat koʼontontik ta jujuntal? Li yoxibale, ¿kʼu yelan xuʼ ch-abtej ta jkuxlejaltik li avie?
Li chaʼkuxesele chkʼot ta pasel ta melel
4. Li chaʼkuxesele, ¿kʼu yuʼun ti jaʼ te smakojbe batel skʼoplal skʼoteb ta pasel li kʼusi tskʼan tspas Jeovae?
4 Oy jayibuk kʼusitik chakʼ jchʼuntik ti chkʼot ta pasel li chaʼkuxesele. Jtos ti kʼusi mas toj tsots skʼoplale, jaʼ ti te smakojbe batel skʼoplal skʼoteb ta pasel li kʼusi tskʼan tspas Jeovae. Jvules ta joltik ti jaʼ laj yakʼ akʼo xmulav krixchanoetik li Satanase, ti kʼusi jpʼel kʼot-o ta pasel ta skoje jaʼ li lajelale. Jaʼ yuʼun xi laj yalbe skʼoplal Diablo li Jesuse: «Yuʼun li stuque jmilvanej onoʼox ta sliquebal», xi (Juan 8:44). Pe li Jeovae laj yal ti «antse» —li s-organisasion ta vinajel ti koʼoltasbil kʼuchaʼal yajnile— ch-ayan la jun «snitilul» ti jaʼ chpechʼbe ta tekʼel sjol «li chon ta voʼonee», taje jaʼ skʼan xal ti tslajes li Satanase (Génesis 3:1-6, 15,Ch; Apocalipsis 12:9, 10; 20:10). Ti ta kʼunkʼun laj yakʼ tal ta naʼel Jeova li kʼusi tspas ta sventa li Nitilulal ti jaʼ li Mesiase, laj yichʼ aʼibel lek smelolal ti maʼuk noʼox tslajes li Satanase. Li Vivliae xi chale: «Jaʼ sventa tal Xnichʼon ti Diose yoʼ jech ta slilinbe yabtel ti pucuje», xi (1 Juan 3:8, Ch). Li lajelal ti jkuchojtik ta skoj smul Adane jaʼ li yabtel Satanás ti baʼyel oy ta lista ti tskʼan Jeova akʼo slilin o tslajes li Jesuse. Ta sventa taje, li pojelal laj yakʼ Jesús xchiʼuk li chaʼkuxesele toj tsots me skʼoplal (Hechos 2:22-24; Romanos 6:23).
5. ¿Kʼu yelan tsmukʼibtasbe sbi Jeova li chaʼkuxesele?
5 Li Jeovae oy tajmek ta yoʼonton tsmukʼibtas li xchʼul bie. Li Diabloe yikʼubtasojbe sbi Dios kʼalal chal jutbil kʼopetike. La sjut kʼop kʼalal laj yal ta melel ti muʼyuk la chchamik li Adán xchiʼuk Eva mi la sloʼik li sat teʼ ti mu stakʼ loʼele (Génesis 2:16, 17; 3:4). Yakal-o tsjut kʼop kʼuchaʼal taje, chal ti oy la jchʼuleltik ti kuxul chkom kʼalal mi cham li jbekʼtaltike. Pe ta sventa li chaʼkuxesele, jamal chakʼ ta ilel Jeova ti naka jutbil kʼop li kʼusi chale. Lek jamal chakʼ ta ilel ta j-echʼel ti jaʼ noʼox stuk ta xchabi xchiʼuk ta xchaʼakʼ li kuxlejale.
6, 7. ¿Kʼu yelan chaʼi sba Jeova ta sventa li chaʼkuxesele, xchiʼuk kʼuxi jnaʼojtik?
6 Li Jeovae oy ta yoʼonton chchaʼkuxes li animaetike. Li Vivliae lek jamal chal ti kʼuyelan chaʼi Dios taje. Jech kʼuchaʼal liʼe, jkʼeltik li kʼusi laj yal li tukʼil Jobe: «Mi chcham li jun vinik ti staoj xa lek svaʼleje, ¿mi xuʼ to van xchaʼkuxi? Ta jmala skotol kʼakʼal li ta kabtel ti persa skʼan ta jpase, jaʼ to mi vul li jkʼexole. Voʼot cha ikʼvan, voʼon ta jtakʼbot. Oy ta avoʼonton cha chaʼkʼel li yabtel akʼobe», xi (Job 14:14, 15, NM). ¿Kʼusi skʼan xal taje?
7 Li Jobe snaʼoj lek ti kʼalal mi chame, te vayal chkom kʼuuk sjalil li ta lajelale; jaʼ «[y]abtel ti persa skʼan ta [spas]» laj yaʼie, persa skʼan smala, jaʼ to mi laj yichʼ pojel lokʼele. Ti chaʼie, li pojelal taje o li xkʼexole, xchʼunoj lek ti persa chkʼot ta pasele. ¿Kʼu yuʼun ti xchʼunoj leke? Yuʼun snaʼoj ti kʼuyelan chaʼi sba Jeovae, snaʼoj ta melel ti tskʼan tskʼel yan velta li tukʼil yajtunele. Jech, li Diose oy tajmek ta yoʼonton chchaʼakʼbe xkuxlejal li buchʼutik tukʼe. Xchiʼuk noxtok chakʼbe to yorail yan krixchanoetik sventa xkuxiik sbatel osil ta Paraiso liʼ ta Balumile (Salmo 37:29; Juan 5:28, 29). ¿Buchʼu van xuʼ tspajtsan Dios mi yuʼun oy ta yoʼonton tspase?
8. ¿Kʼu yelan yakʼoj ta ilel Jeova ti persa chkʼot ta pasel li spatobil koʼontontik ta jelavele?
8 Jaʼ svinajeb spatobil koʼontontik ta jelavel ti ichaʼkuxi li Jesuse. Ta jun mantal ti laj yal ta Atenas li Pabloe, xi chale: «Li Diose saʼojbe xa jun scʼacʼalil cʼusi ora ta xichʼic chapanel scotol li cristianoetic ta banamile. Tucʼ ta xchapanatic ta sventa ti cʼu xʼelan la spasic jujunique. Acʼbil xa ta ilel li bochʼo ta xchapanvane, yuʼun ichaʼcuxesat xa loqʼuel ta smuquinal yuʼun li Diose», xi (Hechos 17:31). Oy krixchanoetik ti la snaʼleik Pablo kʼalal laj yaʼiik ta sventa li chaʼkuxesele, pe oy jayibuk ipasik ta jchʼunolajel, yikʼaluk jaʼ itijbat-o yoʼontonik ti oy svinajeb ti persa chkʼot ta pasel li chaʼkuxesele. Kʼalal la xchaʼkuxes Jesús li Jeovae, la spas li smukʼta kʼelobil juʼelal ti muʼyuk ilbil-o jeche: la spoj lokʼel ta skʼob lajelal xchiʼuk laj yakʼbe xkuxlejal ta espiritu ti oy sjuʼele (1 Pedro 3:18). Li chaʼkuxesbil Jesuse la sta jun lekilal ti mas tsots skʼoplale, jaʼ mu sta kʼalal muʼyuk toʼox talem ta Balumile. Mu snaʼ xcham, jech noxtok jaʼ xa noʼox mu sta jech sjuʼel kʼuchaʼal li Jeovae, jech oxal oy sderecho sventa spas kʼusiuk kʼupil sba abtelal ch-akʼbat spas yuʼun li sTote. Li Jesuse jaʼ chtunesat yuʼun Jeova sventa tspas skotol li yan chaʼkuxeseletike, ta sventa li buchʼutik chkuxiik ta vinajele xchiʼuk li buchʼutik chkuxiik ta Balumile. Li Jesuse xi laj yale: «Vuʼun jchaʼcuxesvanejun, xchiʼuc vuʼun jʼacʼcuxlejalun», xi (Juan 5:25; 11:25). Kʼalal la xchaʼkuxes xNichʼon li Jeovae, jaʼ jech laj yakʼ ta ilel ti spatobil yoʼonton stekel li tukʼil yajtuneltake jpʼel skʼoplal chkʼot ta pasel.
9. ¿Kʼu yelan chakʼ ta ilel Vivlia ti melel li chaʼkuxesele?
9 Li chaʼkuxesele oy lek sprevail yuʼun oy ep buchʼutik laj yilik xchiʼuk tsʼibabil komel ta sKʼop Dios. Li ta Vivliae lek chalbe skʼoplal jujutos ti kʼuyelan ichaʼkuxi vaxakib krixchano sventa xkuxiik to echʼel ta Balumile, li skʼelobiltak juʼelal taje muʼyuk mukul ikom, moʼoj, yuʼun oy krixchanoetik laj yilik ti ikʼot ta pasele. Li Jesuse la xchaʼkuxes Lázaro —ti chanib xaʼox kʼakʼal slajele— ta sat epal krixchanoetik ti ch-okʼike, ta melel oy van te yutsʼ yalaltak, yamigotak xchiʼuk slakʼnatak. Li sprevail ti jaʼ takbil talel yuʼun Dios li Jesuse lek ivinaj, yuʼun li yajkontratak ta relijione muʼyuk laj yalik ti mu jechuke; ti kʼusie, la snop ta smilik li Jesús xchiʼuk Lazaroe (Juan 11:17-44, 53; 12:9-11). Jaʼ jech, xuʼ jchʼuntik ta melel ti chkʼot ta pasel li chaʼkuxesele. Li Diose la stsʼiba komel ta sKʼop li chaʼkuxeseletik taje sventa tspat koʼontontik xchiʼuk tstsatsubtas xchʼunel koʼontontik.
Jta me spatobil koʼontontik li ta chaʼkuxesele
10. ¿Kʼusi stakʼ jpastik sventa jta spatobil koʼontontik li ta loʼiletik ta Vivlia ti chalbe skʼoplal chaʼkuxeseletike?
10 Kʼalal ta jnuptik xa yilel li lajelale, ¿mi mu meleluk ti ta jkʼan spatobil koʼontontike? Xuʼ te jtatik li ta loʼiletik ta Vivlia ti bu chal chaʼkuxeseletike. Kʼalal ta jkʼeltik, ta jnoptik xchiʼuk chkiltik xa yileluke xuʼ xi skoltautik sventa lek tsotsuk ta koʼontontik li spatobil oʼontonal sventa chaʼkuxesele (Romanos 15:4). Maʼuk jecheʼ loʼiletik. Yuʼun li buchʼutik laj yichʼik chaʼkuxesele echʼik ta melel ta Balumil jech kʼuchaʼal voʼotike, ti te van bu kʼakʼal ikuxiike xchiʼuk ti te van bu jotukal osile. Kani kʼelbetik junuk skʼelobil: li baʼyel chaʼkuxesel chal Vivliae.
11, 12. 1) ¿Kʼusi vokolal la snuptan li meʼonal ants ta Sareptae, xchiʼuk kʼu yelan laj yaʼi sba ta slikebal? 2) ¿Kʼusi la spas Jeova ta sventa li meʼonal ants ta stojolal li j-alkʼop Eliase?
11 Jkʼeltik avil ti kʼuyelan ikʼot ta pasele. Oy xa sjayibal xemana ti te xchʼamunoj snail ta sna meʼonal ants ta Sarepta li j-alkʼop Eliase, te chvay ta xchaʼkojal na. Jaʼo chopol kʼakʼal. Li ta osil taje solel chʼabal xa chakʼ voʼ, vaʼun yan x-elan viʼnal. Ep chchamik. Li Jeovae stunesoj xa Elías ta spasel jun skʼelobil juʼelal ti jaʼ kʼot kʼuchaʼal smoton ta skoj li xchʼunel yoʼonton li meʼonal ants ti bikʼit yakʼoj sbae. Li ants xchiʼuk li skereme ta xaʼox xchamik ta viʼnal; kʼajomal xa noʼox sventa jkoj veʼlil chlokʼ ti kʼuyepal oy yuʼunik li arina xchiʼuk li aseitee, vaʼun li j-alkʼope ta sjuʼel Dios la spas ti mu xlaje. Pe tal to yan svokol li antse. Ta anil noʼox ipaj li skereme xchiʼuk ta anil noʼox icham. Chlaj xa chaʼi li antse. Vokol xa onoʼox tajmek li xkuxlejal ta skoj ti chamem smalale, mas to un ti cham li jun noʼox skereme. Chukbil ta at-oʼonton, la yakʼbe smulin Elías xchiʼuk sDios ti kʼusi kʼot ta stojolale. ¿Kʼusi van tspas li j-alkʼope?
12 Li Eliase muʼyuk bu laj yut-o, yuʼun xi laj yalbee: «Icʼbun tal li avole», xut. Laj yikʼ batel ta kuarto ta akʼol li uni kereme, vaʼun ep ta velta la skʼanbe Dios ti akʼo yakʼbe yan velta xkuxlejal li kereme. ¡Kʼelavil, li Jeovae laj yaʼi li kʼusi tskʼane! ¡Nopo xa noʼox avaʼi kʼuyelan la spas sat Elías kʼalal laj yil ti lik nikuk yoʼonton ta yichʼel ikʼ li uni kʼox kereme xchiʼuk ti kʼalal xkuxet la svikʼ talel yuni sate! Li j-alkʼope laj yakʼbe smeʼ li kʼox kereme, jech laj yalbe: «¡Qʼuelavil, cuxul xa li avole!», xut. Li ants ti xmuyubaj ta jyalele, xi laj yale: «Liʼ ta orae laj xa jnaʼ ti voʼot yajʼalcʼopot Dios ta melele, xchiʼuc ti jaʼ chaval cʼusi melel yaloj stuc li Mucʼul Diose», xi (1 Reyes 17:8-24). Li xchʼunel yoʼonton ta stojolal Jeova xchiʼuk li ta yaj-alkʼope mas itsatsub.
13. ¿Kʼu yuʼun tspat koʼontontik li loʼil ti ichaʼkuxi li skerem meʼonal ants ta Sareptae?
13 Ta melel tspat koʼontontik kʼalal ta jnoptik lek li loʼil taje. Jamal chkaʼitik ta jyalel ti Jeovae ta slajes li jkontratike, li lajelale. Jnoptik xa noʼox kʼalal mi kʼot ta pasel li kʼusi tskʼane xchiʼuk kʼalal mi laj yalbe xNichʼon ti akʼo chaʼkuxesvanuk ta spʼejel Balumile. Ta smiyonal noʼox krixchanoetik ta xmuyubajik kʼuchaʼal li meʼonal antse, jech li ta vinajel eke oy me ep muyubajel (Juan 5:28, 29). ¿Mi oy chamem junuk avutsʼ avalal? ¡Jaʼ jun muyubajel ti jnaʼtik ti Jeovae chakʼbe yan velta xkuxlejal li buchʼutik chamemike!
Li spatobil avoʼonton xchiʼuk li akuxlejal avie
14. ¿Kʼu yelan ch-abtej ta akuxlejal li spatobil oʼontonal ta sventa li chaʼkuxesele?
14 ¿Kʼu yelan ch-abtej ta akuxlejal avi li spatobil oʼontonal ta sventa li chaʼkuxesele? Xuʼ me tspat koʼontontik kʼalal chkil jvokoltik ta skoj ti chʼabal lek kʼusi oy kuʼuntike, kʼalal oy kʼusi tsots ta jtatike, kʼalal chkiltik nutsele o li kʼusitik xibal sba ta jnuptantike. Li Satanase tskʼan ti xa xiʼta ta jyalel li lajelale, ti xa jel li atukʼilal ta stojolal Jeova ta kʼusiuk spatobil oʼontonal ti jecheʼike. Jvules ta joltik, li Diabloe xi laj yalbe li Jeovae: «Li cristianoe xuʼ chacʼ scotol cʼusi oy yuʼun, jaʼ noʼox venta me cuxul chcom stuque», xi (Job 2:4). Kʼalal jech laj yale, la sabe smul skotol li krixchanoetike, te tsakal akʼoplal ek. ¿Mi melel van ti muʼyuk xa bu cha tun ta stojolal Dios kʼalal cha nup kʼusitik xibal sbae? Mi cha nopbe skʼoplal li spatobil oʼontonal sventa chaʼkuxesele, mas to me oy ta avoʼonton cha pasbe li kʼusi tskʼan yoʼonton jTotik ta vinajele.
15. ¿Kʼuxi tspat koʼontontik li kʼusi laj yal Jesús ta Mateo 10:28 kʼalal ta jnuptantik kʼusitik xibal sbae?
15 Li Jesuse xi pʼijubtasvane: «Mu me xaxiʼic yuʼun li bochʼo ta smil abecʼtalique, yuʼun li achʼulelique mu xuʼ ta smil. Jaʼ lec jaʼ xaxiʼic yuʼun li Bochʼo xuʼ yuʼun ta smil abecʼtalic xchiʼuc achʼulelic ta mucʼta cʼoqʼue [Gehena, NM]», xi (Mateo 10:28). Muʼyuk srasonal ta jxiʼtatik li Satanase o li krixchanoetik tstunese. Melel onoʼox ti jlome oy sjuʼelik sventa chilbajinutik, xchiʼuk xuʼ tsmilutik; pe ti kʼusie, li vokolal chakʼe oy noʼox kʼu sjalil. Li Jeovae ta xpoxtabe kʼusiuk vokolal ti chilik li tukʼil yajtuneltake, yuʼun manchuk mi chchamik ta xchaʼkuxesan. Jaʼ noʼox stuk ti skʼan jxiʼtatike xchiʼuk ti ta sjunul koʼontontik xkichʼtik ta mukʼe. Jaʼ noʼox stuk oy sjuʼel sventa tslajes li jkuxlejaltik avie xchiʼuk skotol li spatobil koʼontontik ta jelavele. Jech noxtok, jaʼ noʼox stuk xuʼ tslajes li jbekʼtaltik xchiʼuk li jkuxlejaltik ta Gehenae. Jaʼ jun muyubajel, yuʼun li Jeovae mu skʼan ti jtatik taje (2 Pedro 3:9). Koliyal li spatobil koʼontontik ta chaʼkuxesele, li yajtunelutik Diose xuʼ jun koʼontontik. Smalaojik kuxlejal ta sbatel osil li buchʼutik tukʼe, jech noxtok li Satanás xchiʼuk li buchʼutik tstunese mi jsetʼuk kʼusi stakʼ spasik sventa tspajesik taje (Salmo 118:6; Hebreos 13:6).
16. Li spatobil oʼontonal ta sventa li chaʼkuxesele, ¿kʼuxi tskoltautik ta skʼelel ti kʼusi baʼyel skʼan xkakʼ ta jkuxlejaltike?
16 Mi jpʼel koʼontontik ta sventa li chaʼkuxesele, tsmeltsan me batel jtalelaltik ta jkuxlejaltik. Yuʼun jnaʼojtik «me cuxulutic, o me chijchamutique, yuʼunutic o li Cajvaltique [li Jeovae]» (Romanos 14:7, 8). Vaʼun chaʼa, chkakʼ ta jkuxlejaltik li tojobtasel laj yal Pablo ti kʼusi baʼyel skʼan jpastike: «Mu me xachanbeic stalel li cristianoetic liʼ ta banamile. Jaʼ tscʼan chjel batel atalelic li voʼoxuque, jech ch-achʼub batel li cʼusi chanopique, jech chlic avotquinic batel cʼusi tscʼan li Diose, jaʼ li cʼusitic lec chile, li cʼusitic tuqʼue» (Romanos 12:2). Ep krixchanoetike yakʼojbeik yipal ta saʼel ta xkuxlejalik li kʼusi tskʼan tskʼupinike, li kʼusi oy tajmek ta yoʼontonike xchiʼuk ti tskʼan mukʼ skʼoplalike. Ta sventa ti toj komkom chilik li kuxlejale, mu xa malabaj chaʼiik li kʼusi tskʼan tskʼupinike, manchuk mi oy srelijionik, ta melel muʼyuk bu tspasik batel li «cʼusi tscʼan li Diose».
17, 18. 1) ¿Kʼuxi chal sKʼop Dios ti mu jaluk li kuxlejale, pe kʼusi oy ta yoʼonton ta jtojolaltik li Diose? 2) ¿Kʼu yuʼun oy ta koʼontontik ta jkʼupil kʼoptatik skotol kʼakʼal li Jeovae?
17 Melel onoʼox, li kuxlejale mu jaluk. «Ta anil noʼox chjelov, jech echʼel [chi jbatutik].» Mi toj jale jaʼ noʼox 70 o 80 jabil (Salmo 90:10). Li krixchanoutike xi jkoʼolaj kʼuchaʼal tsʼiʼlel, kʼuchaʼal jun yaxinaltik, kʼuchaʼal ikʼ: liʼ oyutik li avie, li okʼome chʼabalutik xa (Salmo 103:15; 144:3, 4). Li Diose maʼuk oy ta yoʼonton liʼe: ti x-echʼ batel jayibuk jabiletik sventa chi jchʼiutike, xkojtikintik kʼusitik xchiʼuk ti jchan jpʼijiltike, vaʼun ti bikʼitik chi jmalub echʼele, ti chi j-ipajutike xchiʼuk ti jaʼuk xa noʼox jkʼelojbetik batel sbelel li lajelale. Kʼalal la spas krixchano li Jeovae laj yakʼbe ta yoʼonton ti tskʼan chkuxiik sbatel osile. «Laj yacʼbe ta yoʼnton cristianoetic ti muʼyuc spajeb cʼusiti[k]e», xi chalbutik li Vivliae (Eclesiastés 3:11). ¿Mi yuʼun toj chopol li Dios ti jech laj yakʼ ta koʼontontik taje xchiʼuk ti mu xakʼ kʼotuk ta pasele? Mu jechuk ta melel, yuʼun «li Diose jaʼ stalel ta xcʼanvan o» (1 Juan 4:8). Li stuke ta stunes li chaʼkuxesele sventa chakʼbe to yorail sventa sta xkuxlejalik ta sbatel osil li buchʼutik chamemike.
18 Koliyal li spatobil oʼontonal ta sventa li chaʼkuxesele, toj lek kʼusi jmalaojtik. Muʼyuk srasonal ti ta jnutstik kʼusiuk noʼox ta jkuxlejaltike ti ta jtunes skotol kipaltike. Muʼyuk srasonal ti ta jtunestik bu kʼalal xuʼ kuʼuntik li balumil ti jutuk xa kuxule (1 Corintios 7:29-31; 1 Juan 2:17). Jelel li buchʼutik muʼyuk spatobil yoʼontonike, li voʼotike oy jun mukʼta matanal kuʼuntik: jnaʼojtik mi tukʼ oyutik-o ta stojolal Jeovae, chi jkuxi-o sbatel osil sventa ta jmuyubtatik xchiʼuk ta jkʼupintik li kuxlejale. Jaʼ yuʼun chaʼa, jkʼupil kʼoptatik me skotol kʼakʼal li Jeovae, yuʼun jaʼ ti buchʼu jpʼel chakʼ spatobil koʼontontik ta sventa li chaʼkuxesele.
¿Kʼuxi cha takʼ?
• ¿Kʼu yelan skʼan xkaʼi jbatik ta sventa li chaʼkuxesele?
• ¿Kʼusitik chakʼ jchʼuntik ta melel li spatobil oʼontonal ta sventa li chaʼkuxesele?
• ¿Kʼu yelan xuʼ xa taʼo spatobil avoʼonton ta sventa li chaʼkuxesele?
• ¿Kʼu yelan xuʼ ch-abtej ta jkuxlejaltik avi li spatobil oʼontonal ta sventa li chaʼkuxesele?
[Lokʼol ta pajina 19]
«¡Qʼuelavil, cuxul xa li avole!»
[Lokʼol ta pajina 20]
Li Jobe snaʼoj onoʼox ti Jeovae oy ta yoʼonton chchaʼkuxes li buchʼutik tukʼe