Jechuk jkuxlejaltik kʼuchaʼal tskʼan Diose

«Icham [li Cristo] ta jventatic jcotoltique, jech muc xa cuxuluc ta sventa stuc li bochʼotic cuxulique.» (2 CORINTIOS 5:15.)

1. ¿Kʼusi kʼot ta stojolal jun misionero ti bu chchol mantale?

«LI JKAROKUTIKE jaʼ li baʼyel karo ti och li ta namal bikʼit lum ta Africae, taje jaʼo kʼalal mu toʼox jaluk yechʼel li pas kʼop yuʼun krixchanoetike —jech chvul ta sjol jun misionero ti Aarón sbie—.a Muʼyuk xaʼox bu jtaojkutik ta kʼoponel li ermanoetik tee, jech noxtok ta jkʼan ta jnaʼkutik kʼusitik koltael skʼanik. La jkuchkutik batel veʼlil, kʼuʼil pokʼiletik xchiʼuk vunetik ti chalbe skʼoplal Vivliae, pe maʼuk noʼox taje, yuʼun laj kichʼkutik batel xtok li video ti jaʼ sbi: Los testigos de Jehová... la organización tras el nombre.b Xkoʼolaj kʼuchaʼal ta sine echʼ kuʼunkutik li ta bikʼit lum taje —ta jpʼej mukʼta na ti pasbil ta jobele, te oy jpʼej television xchiʼuk jun stijobil video—, chib to velta laj kakʼkutik ta ilel yuʼun ep tajmek krixchanoetik ay skʼelik. Ta slajeb li jujukoj pelikulae, ep buchʼutik la xchʼamik jun chanubtasel ta Vivlia. Ta melel, mu jecheʼuk echʼ jvokolkutik.»

2. 1) ¿Kʼu yuʼun la snop chakʼ xkuxlejalik ta spasbel yabtel Dios li yajtsʼaklomtak Cristoe? 2) ¿Kʼusi sjakʼobiltak chichʼ takʼel tana?

² ¿Kʼu yuʼun la spasik li tsatsal abtel li Aarón xchiʼuk xchiʼiltake? Yuʼun oy ta yoʼontonik stojel ta vokol li pojelal laj yakʼ Jesucristoe, jech oxal laj yakʼ xkuxlejalik ta stojolal Dios xchiʼuk tskʼan tstunesik jech kʼuchaʼal tskʼan Diose. Jech kʼuchaʼal la spasik taje, jkotoltik li yajtsʼaklomutik Cristo ti kakʼoj jkuxlejaltik ta stojolal Diose, mu xa me jaʼuk kuxulutik ta jventatik, moʼoj, yuʼun jaʼ xa kuxulutik «ta sventa li Lequil Aʼyeje» (2 Corintios 5:15; 1 Corintios 9:23). Jnaʼojtik ti kʼalal mi laj skʼoplal li kʼusitik liʼ ta balumile, mi jsetʼuk me sbalil chkom li takʼine, xchiʼuk li ojtikinel liʼ ta balumile. Jech oxal chaʼa, ti bu kʼalal xuʼ chkaʼitik ta jkuxlejaltike, ta me jkʼan jechuk jkuxlejaltik kʼuchaʼal tskʼan Diose (Eclesiastés 12:1). ¿Kʼuxi xuʼ spas kuʼuntik? ¿Bu ta jta kipaltik xchiʼuk stsatsal koʼontontik sventa chi jtun ta stojolal li Diose? ¿Xchiʼuk kʼusitik abtelal ta stojolal Dios spas kuʼuntik?

Ep kʼusitik skʼan jpastik batel

3. Alo kaʼitik kʼusitik skʼan jpastik batel sventa jpastik li kʼusi tskʼan yoʼonton Diose.

³ Li yajtsʼaklomutik Cristoe jnaʼojtik ti spasbel li kʼusi tskʼan yoʼonton Diose, jaʼ jtos ti kʼusi skʼan jpastik ti kʼu sjalil kuxulutike. Ti kʼusitik baʼyel onoʼox skʼan pasele jaʼ liʼe: xchanel skotol kʼakʼal li Vivliae, jtsak jbitik ta Chanob vun sventa Kabteltik yuʼun Dios, jcholtik mantal xchiʼuk chʼikutik batel ta mantal sventa xkichʼtik voʼ. Ti jech yantik xi jchʼi batele, te me oy-o ta joltik li kʼusi xi laj yal jtakbol Pabloe: «Scotol leʼe jaʼ me te oyuc o avoʼnton yuʼun; jaʼ me acʼo o ta avoʼnton, yuʼun jech chil scotolic ti lec chbat avuʼune», xi (1 Timoteo 4:15). Ti jech yantik xlekub batel kuʼuntik ti kʼusi ta jpastike, maʼuk me sventa ta jpuk jkʼoplal jtuktik, moʼoj, yuʼun me jaʼ svinajeb ti ta jkʼan ta jpasbetik li kʼusi tskʼan yoʼonton Diose manchuk mi xkil jvokoltik. Ti kʼuyelan chi jchʼi batel ta mantale, jaʼ me jech chkakʼtik ta ilel ti ta jkʼan tsbeiltasutik ta skotol jkuxlejaltik li Diose. Jech, muʼyuk buchʼu xuʼ chal ti mu spas yuʼune, yuʼun jaʼ ti Buchʼu toj lek xtojob ta sbeiltaselutike (Salmo 32:8).

4. ¿Kʼuxi xuʼ jlokʼestik li xiʼel chkaʼitike?

⁴ Pe mi xi jchibet noʼox o mi ta jvul tajmek koʼontontik ta jtuktike xuʼ me smakutik ta be spasel li kʼusi tskʼan yoʼonton Diose (Eclesiastés 11:4). Jaʼ yuʼun chaʼa, sventa xi jmuyubaj ta melel kʼalal chi jtun ta stojolal Dios xchiʼuk ta stojolal jchiʼiltaktike, skʼan me jtsaltik baʼyuk ti kʼusi ta jxiʼtatike. Jech kʼuchaʼal Erik, la snop chtun ta jun tsobobbail ta yan kʼop. Pe xi tsjakʼbe sba tajmeke: «¿Mi xi nop van? ¿Mi lek van chkil jba xchiʼuk li ermanoetike? ¿Kʼu van yelanil chi yilik?», xi. Xi chvul ta sjole: «Laj kakʼ venta ti jaʼ mas skʼan jnop ta stojolal li ermanoetike, ti mu jaʼuk mas jnop ta jtojolale. La jnop ti muʼyuk xa bu ta jvul tajmek koʼontone, ti jaʼ lek jaʼ ta jnopbe mas skʼoplal skoltael bu kʼalal xuʼ kuʼun li yantike. La jkʼanbe Dios ti xi skoltaune xchiʼuk la jpas batel li kʼusi la jnope. Toj lek li kʼusi kʼot ta nopel kuʼune. Li avie xi muyubaj tajmek ti te chi tune», xi (Romanos 4:20). Jaʼ jech chaʼa, mi chkakʼbetik yipal ta sjunul koʼontontik chi jtun ta stojolal Dios xchiʼuk ta stojolal jchiʼiltaktike, mas me xpatet noʼox koʼontontik xchiʼuk xi jmuyubaj.

5. ¿Kʼu yuʼun skʼan jchapantik lek li kʼusitik ta jpastik mi ta jkʼan jechuk jkuxlejaltik kʼuchaʼal tskʼan Diose? Albo kaʼitik junuk skʼelobil.

⁵ Sventa jechuk jkuxlejaltik kʼuchaʼal tskʼan Diose, skʼan me jchapantik lek xtok li kʼusitik ta jpastike. Mu me lekuk ti jtsob ep kiltike, yuʼun mi jeche ta me xchukutik li kʼusitik liʼ ta balumile, vaʼun jaʼ me toj jutuk xa chi jtun ta stojolal li Diose. Li Vivliae xi tspʼijubtasutike: «Li jqʼuextaqʼuinetique mozoinbilic chcʼot yuʼun bochʼo chacʼ ta qʼuexel staqʼuine», xi (Proverbios 22:7). Sventa jechuk jpastik kʼuchaʼal skʼan pasele, skʼan me jpat koʼontontik ta stojolal Jeova xchiʼuk jaʼuk baʼyel xkakʼ ta jkuxlejaltik li kʼusitik ta mantale. Jkʼelbetik skʼoplal Guoming. Li stuke nakal xchiʼuk smeʼ, jun xvix xchiʼuk jun yixlel, nakalik ta jun lum ti bu toyol ta chʼamunel o ta kʼelel li nae xchiʼuk ti mu toj kʼunuk ta tael ti jun-o kabteltike. Manchuk mi chʼabal yabtelik bakʼintik, pe juʼem yuʼun ta skʼelel sbaik, koʼol tstunes li yuni takʼinike xchiʼuk pʼij tstunesik li kʼusitik oy yuʼunike. «Bakʼintike toj jutuk jtakʼinkutik —xi chal Guoming—, manchuk mi jech, pasem batel kuʼunkutik li prekursorale xchiʼuk ta skʼelel batel xtok li kʼusitik chtun yuʼun jmeʼkutike. Muʼyuk bu tskʼanbunkutik li kʼusitik mu xa persauk jtunele, yuʼun jaʼ mu skʼan ti xkiktakutik ta spasel li kʼusitik ta mantale, jaʼ yuʼun ta jtojbekutik tajmek ta vokol», xi (2 Corintios 12:14; Hebreos 13:5.)

6. ¿Kʼusi kʼotem ta pasel ti chakʼ kiltik kʼusi skʼan jpastik sventa jechuk jkuxlejaltik kʼuchaʼal tskʼan Diose?

⁶ Mi jaʼ batem tajmek ta koʼontontik li kʼusitik liʼ ta balumile —jech kʼuchaʼal chonolajel, manolajel o yantik kʼusitik—, yikʼaluk van ep kʼusitik skʼan jel ta jkuxlejaltik unbi, sventa jaʼ baʼyel xkakʼ ta jkuxlejaltik li kʼusi tskʼan Diose. Taje mu me spas kuʼuntik leʼ okʼom chaʼeje, kʼalal chkiltik ti mu spas kuʼuntik ta baʼyel veltae maʼuk me skʼan xal ti mu xa spas-o kuʼuntike. Jech kʼuchaʼal Koichi, staoj tsots svokol: toj jal chchʼay yoʼonton ta kʼusitik. Kʼalal chex toʼox tale, laj toʼox xchan li Vivliae, pe ep jabiletik chʼaybat-o skʼakʼal li videojuegoetike. Pe xi la sjakʼbe sba jun veltae: «¿Kʼusi jpasoj li ta jkuxlejale? Oy xa mas ta 30 jabilal, pe muʼyuk kʼusi jpasoj ti oyuk sbalile», xi. Lik xchan yan velta li Vivliae xchiʼuk la xchʼam li koltael laj yakʼ ermanoetik ta tsobobbaile. Jalij sventa tsjel li xkuxlejale, pe muʼyuk bu xlubtsaj. Koliyal li orasion tspase xchiʼuk li koltael laj yichʼe, tsal yuʼun li kʼusi chopol nopem xaʼie (Lucas 11:9). Xmuyubaj tajmek li avie, yuʼun chtun ta yajkoltaobba mol ta stsobobbail.

Parejouk jtsaktik ta mukʼ

7. ¿Kʼu yuʼun skʼan ti oyuk noʼox smelolal jpastik li kʼusi tskʼan yoʼonton Diose?

⁷ Staʼo ti xi jtun ta stojolal Jeova ti bu kʼalal xuʼ kuʼuntike. Sventa spas kuʼuntik li kʼusi tskʼan yoʼontone, mu me jutukajes kipaltik xchiʼuk mu me chʼajukutik (Hebreos 6:11, 12). Akʼo mi jech, li Jeovae mu skʼan ti jmil jbatik tajmek ta lubele, mi ta kok-jkʼobtik, ta jnopbentik o mi jaʼ li lubel chkaʼi ta koʼontontike. Kʼalal bikʼit chkakʼ jbatik ta stsakel ta mukʼ ti mu spas kuʼuntik ta kip jtuktik li kʼusi tskʼan yoʼonton Diose, ta me xkakʼtik ta ilel ti parejo ta jpastik batel ti kʼusi skʼan pasele, vaʼun jaʼ jech ta xkalbetik smukʼulal li Jeovae (1 Pedro 4:11). Melel onoʼox ti chakʼ kiptik Jeova sventa jpastik li kʼusi tskʼane, pe mu me jmil jbatik ta jyalel ta spasel li kʼusitik muʼyuk tskʼanbutike (2 Corintios 4:7). Sventa xi jtun batel ta stojolal Dios ti muʼyuk ta jmil jbatik ta jyalele, skʼan me pʼijukutik ta stunesel li kipaltike.

8. ¿Kʼusi kʼot ta stojolal jun ermana ti laj yakʼbe yipal ta yakʼbel Jeova li kʼusi mas lek yuʼune xchiʼuk ta yakʼbel li balumil xtoke, xchiʼuk kʼusitik la sjel ta xkuxlejal?

⁸ Jech kʼuchaʼal liʼe, jun prekursora ta Asia oriental ti Ji Hye sbie, solel ep chakʼ lubel li yabtel la stae, chib jabil abtej jech. «Laj kakʼbe yipal ta yakʼbel Jeova li kʼusi mas lek kuʼune, jech la jpas ta stojolal li balumil eke —xi chal—, pe kʼajomal noʼox voʼob ora chi vay jujun akʼobal. Kʼot skʼakʼalil ti lub ta jyalel laj kaʼi li jnopbene. Toj jutuk xa kip laj kaʼi spasel li kʼusitik ta mantale, muʼyuk bu la jkʼupin laj kaʼi li kabtel ta stojolal Jeovae», xi. Sventa xtun ta stojolal Jeova ta sjunul yoʼonton, ta sjunul xkuxlejal, ta sjunul snopben xchiʼuk ta skotol yipale, li Ji Hye la saʼ yan yabtel ti mu jechuk kʼuchaʼal staoj toʼoxe (Marcos 12:30). «Li kutsʼ kalale chalbeikun tajmek ti akʼo la jkʼel ti kʼusi stakʼ jpas sventa lekuk oyun ta takʼine, pe jaʼ laj kakʼ baʼyel ta jkuxlejal li Diose xchiʼuk li kʼusi tskʼane —xi to chal—. Lek to ta jpas kanal sventa xi kuxi echʼel xchiʼuk jman alakʼik sba jkʼuʼ jpokʼtak. ¡Toj lek yaʼel ti mas xa jal chi vaye! Li avie toj kʼupil chkaʼi spasbel li yabtel Diose xchiʼuk mas tsotsun ta mantal. Taje jaʼ ta skoj ti muʼyuk xa kʼusi mas ta jchʼay-o koʼontone xchiʼuk mu xa jaʼuk batem ta koʼonton li kʼusitik kʼupil sba ta kʼelel liʼ ta balumile», xi (Eclesiastés 4:6; Mateo 6:24, 28-30.)

9. ¿Kʼusi xuʼ xkʼot ta pasel ta stojolal li krixchanoetik ta skoj li chol mantal ta jpastike?

⁹ Mu jkotoltikuk xuʼ kuʼuntik spasbel li yabtel Dios ta tsʼakal orae. Mi oy xa ajabilal, mi ip noʼox chavaʼi xchiʼuk mi oy yantik avokol ti xuʼ tsjutukajes li avabtel ta stojolal Diose, mu me xa chibaj. Ta me xkʼuxubin Jeova li atukʼilale xchiʼuk li kʼusi ta sjunul avoʼonton xuʼ xavakʼbee (Lucas 21:2, 3). Jech noxtok, skʼan me teuk ta joltik ti kʼuxi xuʼ chtun batel yuʼun yantik li chol mantal ta jpastike, manchuk mi toj jutuk yilel. Jnoptik avaʼi ti lek xaʼox jlikel la jcholtik mantale xchiʼuk ti muʼyuk buchʼu jtaojtik ti lek chaʼi li mantale. Pe kʼalal echʼ xaʼox van jayibuk ora o jayibuk kʼakʼale, xuʼ van xlik yalbeik skʼoplal krixchanoetik ti li j-ay ta vulaʼale, yikʼaluk van chalbeik skʼoplal ek li buchʼutik muʼyuk la sjam stiʼ snaike. Melel onoʼox ti mu skotolikuk lek chaʼiik li lekil aʼyej chkaltike, pe oy bu jlom ti ta xchʼamike (Mateo 13:19-23). Xuʼ van ta mas to tsʼakal skʼanik li yan krixchanoetike, xuʼ jaʼ xtijbat-o yoʼontonik ti jel xkuxlejalike o li kʼusitik chkʼot ta pasel chilik ta balumile. Kʼusiuk yelan, yuʼun me jaʼ ta jpasbetik li kʼusi tskʼan yoʼonton Dios mi chkakʼbetik yipal xcholel li mantale. Li kʼusi mas tsots skʼoplale, jaʼ ti «ta jchiʼin[tik] ta abtel li Diose» (1 Corintios 3:9).

10. ¿Kʼusi xuʼ jpastik jkotoltik li ta tsobobbaile?

¹⁰ Jech noxtok, jkotoltik xuʼ ta jkoltatik li kutsʼ kalaltike xchiʼuk li kermanotaktik ta tsobobbaile (Gálatas 6:10). Jech onoʼox, xuʼ toj tsots x-abtej ta sjunul xkuxlejalik li jtalelaltike (Eclesiastés 11:1, 6). Ta sventa li moletik xchiʼuk li yajkoltaobbatake, li lekil abtel tspasike jaʼ me tstsatsubtasik-o li tsobobbaile, vaʼun jaʼ jech ta x-epaj li yabtel tspas yajtsʼaklomtak Cristoe. Li Vivliae chal kaʼitik ta melel mi jech-o chi «[j-abtej] ta sventa yabtel ti Cajvaltique, [...] mu jecheʼuc noʼox ta xʼechʼ [jvokoltik] ta abtel» (1 Corintios 15:58, Ch).

Kakʼ me ta jkuxlejaltik li kʼusi tskʼan Diose

11. ¿Kʼusi yan xuʼ jpastik, ti mu jaʼuk noʼox xi jkoltavan li ta jtsobobbailtike?

¹¹ Li yajtsʼaklomutik Cristoe jkʼuxubinojtik li kuxlejale xchiʼuk ta jkʼantik ti akʼo skʼupil kʼopta Dios ti kʼuyelan kuxulutike (1 Corintios 10:31). Mi jaʼ chkakʼbetik yipal xcholel li lekil aʼyej sventa Ajvalilal yuʼun Diose xchiʼuk ta xchanubtasel li krixchanoetik ti akʼo xchʼunik skotol li kʼusitik laj yal komel Jesuse, ta to me jtatik yan kʼusitik sventa ch-epaj li kabteltike (Mateo 24:14; 28:19, 20). Maʼuk noʼox ta jkoltatik li jtsobobbailtike, yuʼun xuʼ chbat tunkutik ti bu skʼanik mas koltaele: ta yan osil bu ta jcholtik mantal, ta yan kʼop o ta yan balumil. Li moletik xchiʼuk li yajkoltaobbatak ti chʼabal yajnilike xuʼ xbatik ta Chanob vun sventa Xchanubtasel Jtuneletik (Escuela de Entrenamiento Ministerial) xchiʼuk xtunik ta jun tsobobbail ti bu chtun ermanoetik ti lek yijik ta mantale, xuʼ mi ta slumalik noʼox o ta yan. Li nupul tsʼakaletik ti ta tsʼakal ora ch-abtejike xuʼ xbatik ta Chanob vun sventa Vivlia ta Galaad, vaʼun chtunik ta misioneroal. Ta onoʼox xtun jkoltavanejetik xtok sventa xichʼ pasel jeltos abtelaletik, ta Betel o ta svaʼanel salonetik xchiʼuk skʼelel sventa lekuk oy li beteletike xchiʼuk li salonetike.

12, 13. 1) ¿Kʼusi xuʼ skoltaot ta stʼujel jtosuk abtelal ta stojolal Dios? 2) Alo kaʼitik kʼuxi xuʼ jtunestik ta yan abtelal li kʼusi jchanojtik ta baʼyel abtelale.

¹² ¿Kʼusi jtosukal abtelal cha tʼuj li voʼote? Kʼuchaʼal yajtunelot Jeovae, jaʼ onoʼox me xa saʼ li beiltasel chakʼ stuke xchiʼuk li s-organisasione. Li «[slekil] bijil» Diose jaʼ me tskoltaot ta snopel li kʼusi mas leke (Nehemías 9:20). Li jun abtelale xuʼ chakʼ yan abtelal xtok, jechtik onoʼox, li kʼusi la jchantik xchiʼuk li tojobtasel laj kichʼtik ta bu jotukale xuʼ ta jtunestik ta yan abtelal.

¹³ Jkʼeltikik kʼusi kʼot ta stojolalik Dennis xchiʼuk Jenny, jun nupul tsʼakal ti koltavanik ta svaʼanel Salonetik sventa Tsobobbaile. Kʼalal echʼem xaʼox li tsatsal ikʼal voʼ Katrina ta sur ta Estados Unidose, laj yalik ti tskʼan chkoltavanike. Xi chal li Dennise: «Koliyal ti kʼusi la jchankutik ta svaʼanel salonetike, tojobemunkutik ta skoltael li kermanotaktike, jaʼ yuʼun jun tajmek koʼontonkutik. Xkuxet tajmek koʼonton laj kaʼikutik ti la stojik ta vokol li ermanoetike. Ta sventa li xchaʼvaʼanel naetike, li yantik jkoltavanejetike oy noʼox spajeb ti kʼuyelan spas yuʼunike. Pe li yajrextikounkutik Jeovae, laj xa jmeltsankutik xchiʼuk laj xa jvaʼankutik mas ta 5,300 ta pʼej naetik xchiʼuk epal Salonetik sventa Tsobobbail. Kʼalal jech chil krixchanoetike, mas oy ta yoʼonton chchikintaik li mantal chkalkutike», xi.

14. ¿Kʼusi skʼan xa pas mi cha kʼan cha chol mantal ta tsʼakal orae?

¹⁴ ¿Kʼu yuʼun mu xlik achol mantal ta tsʼakal ora, ti jaʼ jtos li kʼusi tskʼan Dios noxtoke? Ep me bendision cha ta mi jech cha pase. Mi oy kʼusi tsmakot chavil ta orae, yikʼaluk van oy kʼusi xuʼ xa pas sventa mu smakot. Kʼopono Jeova jech kʼuchaʼal la spas Nehemías kʼalal la skʼan tspas jun abtelal ti tsots skʼoplale: «Mucʼul Dios [...] ta jcʼanbot vocol ti lec cʼusi acʼo cʼotuc ta pasel ta jtojol, vuʼun li avajtunelune», xut li Jeovae (Nehemías 1:11). Vaʼun, tsotsuk apatoj avoʼonton ta stojolal li Buchʼu chaʼi jkʼoptike xchiʼuk jechuk xa pas ti kʼuyelan laj aval ta aorasione (Salmo 65:2). Vuleso ta ajol: mi cha kʼan cha yakʼbot sbendision li Jeova ti cha tun ta stojolale, skʼan me baʼyuk tsots xavakʼbe yipal. Mi la nop xa ti cha chol mantal ta tsʼakal orae, mu me kʼusi xavakʼ smakot ta be. Kʼunkʼun me cha chan batel, vaʼun jech me yantik xa muyubaj batel xtok.

Jun kuxlejal ti xtoj-o jvokoltike

15. 1) ¿Kʼuxi tskoltautik li kʼusi kʼotem ta stojolalik ermanoetik ti jal xa tunemik ta stojolal Diose? 2) Albo skʼoplal junuk sloʼil xkuxlejal ermano ti la spat avoʼontone.

¹⁵ ¿Kʼusi xuʼ xa pat-o avoʼonton mi jech kuxulot kʼuchaʼal tskʼan Diose? Chiʼino ta loʼil ermanoetik ti jal xa tunemik ta stojolal Jeovae, pe jaʼ chiʼino mas ta loʼil li buchʼutik ep xa jabil tunemik ta tsʼakal orae. ¡Toj echʼ noʼox lek ta aʼibel skʼoplal li xkuxlejalike xchiʼuk toj echʼem sbalil! (Proverbios 10:22.) Li kʼusi jamal chalboxuk ta melele, jaʼ ti ta onoʼox xkoltaatik yuʼun Jeova ta saʼel li kʼusitik chtun yuʼunike xchiʼuk ta mas noʼox staojik, manchuk mi tsots li kuxlejal bateltike (Filipenses 4:11-13). Li ta sjabilal 1955 kʼalal ta 1962, li revista La Atalaya laj yalbe skʼoplal xkuxlejal tukʼil ermanoetik, xi sbi li loʼiletik taje: «Siguiendo tras mi propósito en la vida». Jaʼ te lik yichʼ lokʼesel tal li sloʼil xkuxlejal ermanoetik kʼuchaʼal chkiltik avie. Ta skotol taje, te chvinaj ti laj yichʼik ta mukʼ Dios xchiʼuk ti xmuyubajik noʼox jech kʼuchaʼal chal slivroal Hechos ta Vivliae. Ta melel, kʼalal cha kʼel li kʼupil sba loʼiletik taje, xi van yelan cha nope: «¡Jaʼ jech ta jkʼan jkuxlejal ek li voʼone!», xuʼ van xa chi.

16. ¿Kʼusi xuʼ spas jun yajtsʼaklom Cristo sventa xmuyubaj noʼox xchiʼuk ti oyuk lek sbalil li xkuxlejale?

¹⁶ Aarón, ti laj xa kalbetik skʼoplal ta slikebal loʼile, xi chale: «Ep kerem-tsebetik laj kojtikin ta África ti chanavik ta sjunul lum sventa tsabeik sbalil li xkuxlejalike, pe jutuk mu skotolikuk ti muʼyuk bu la staike. Pe li voʼonkutik ti chkalkutik batel li lekil aʼyej ta sventa Ajvalilal yuʼun Dios ti jmoj skʼoplal xchiʼuk li kʼusi tskʼan Jeovae, toj lek ta aʼibel skʼoplal li jkuxlejalkutike xchiʼuk oy lek sbalil. Jech oxal, xuʼ xkalkutik ti mas xi jmuyubaj kʼalal chkakʼtike, yuʼun jech laj kil jtukkutik», xi (Hechos 20:35).

17. ¿Kʼu yuʼun skʼan jech xi jkuxi kʼuchaʼal tskʼan Diose?

¹⁷ Li voʼote, ¿kʼusi ti cha kʼan cha pas ta akuxlejale? Mi muʼyuk anopoj lek kʼusi cha kʼan cha ta sventa mantale, yan-o me kʼusi chuʼunin li akuxlejale. ¿Kʼu yuʼun jecheʼ chavixtolan ti jaʼ cha saʼ batel li kʼusitik ta slumal Satanase? Kʼalal mi tal li «tsots vocole», li kʼulejal xchiʼuk mi lek ojtikinbilutike mu me kʼusi chtun-o. Li kʼusi mas tsots skʼoplale jaʼ me ti kʼuyelan oyutik ta stojolal Jeovae. ¡Ta me jtojtik tajmek ta vokol ti li jtun ta stojolal Jeova, ta stojolal jchiʼiltaktik xchiʼuk ti jech li jkuxi ta jyalel kʼuchaʼal tskʼan Diose! (Mateo 24:21; Apocalipsis 7:14, 15.)

[Tsʼibetik ta yok vun]

¿Mi xa naʼ yalbel smelolal?

• ¿Kʼu yelan chil Jeova li abtelal ta jpastik ta stojolale?

• ¿Kʼuxi tskoltautik sventa chi jtun ta stojolal Dios xchiʼuk jchiʼiltaktik mi lek ta jnoptik li kʼusi ta jpastike xchiʼuk ti parejouk noʼox ta jpastik batele?

• ¿Kʼusitik abtelal ta stojolal Dios oy ta kok-jkʼobtik spasel?

• ¿Kʼuxi chkutik sventa oyuk lek stu li jkuxlejaltike?

[Lokʼol ta pajina 24]

Ep kʼusitik smakoj li chʼul abtelale

[Lokʼol ta pajina 25]

Sventa ta sjunul koʼonton xi jtunutik ta stojolal li Jeovae, skʼan me parejouk jpastik li kʼusitike