Li sabel smelel tu kuxlejale
«Scotol li cʼusitic chichʼic iqʼue acʼo yichʼic ta mucʼ li Mucʼul Diose.» (SALMO 150:6.)
1. ¿Kʼusi la spas jun vinik sventa tstabe smelel tu li xkuxlejale?
«LA JCHAN poxtavanej, yuʼun ta jkʼan ta jkolta li jchiʼiltake —jech chal Seung Jin ti ta Corea chʼie—.a Jech noxtok jnopoj ti jaʼ chakʼ jmuyubajel ti lek ojtikinbilun xchiʼuk li takʼin ta jpas kanal ta sventa li kʼusi la jchane. Pe kʼalal laj kakʼ venta ta melel ti toj jutuk kʼusi xuʼ jpas ta stojolal li kajchameltake, te li chibaj yuʼun. Jaʼ yuʼun lik jpas li kʼusitik alakʼ sba ta kʼelele (arte), pe jaʼ noʼox ta jkʼan jba jtuk laj kaʼi, yuʼun li kʼusitik ta jpase mu toj epuk tstabeik sbalil laj kil li yantike. Vaʼun lik abtejkun ta maestroal, pe ta anil noʼox laj kakʼ venta ti jaʼ noʼox ta jnojesbe sjolik ta kʼusitikuk li kajchanununtake; mu xi tojob ta xchanubtaselik sventa staik-o melel muyubajel.» Jech kʼuchaʼal tsnop epal krixchanoetike, li Seung Jine la sabe lek smelel tu li xkuxlejale.
2. 1) ¿Kʼusi skʼan xal ti oy smelel tu li kuxlejale? 2) ¿Kʼuxi jnaʼojtik ti oy stu laj yakʼ ta Balumil krixchano li Jpasvaneje?
2 Kʼalal chkaltik ti oy smelel tu li kuxlejale jaʼ ti kʼalal oy lek srasonal sventa chi jkuxie, oy kʼusi lek jamal ta jkʼan ta jtatik xchiʼuk ti oy kʼusi chkakʼ-o jvokoltike. Pe ¿mi stakʼ van jtatik? Stakʼ kʼuxi un. Ta sventa ti akʼbil jpʼijiltik, jnopbentik xchiʼuk jrasontike, chakʼ ta ilel ti oy onoʼox kʼusi snopoj ta jtojolaltik li Jpasvaneje: oy kʼusi stu ti laj yakʼutik ta Balumile. Jaʼ yuʼun chaʼa, jaʼ noʼox ti buchʼutik jech ta xkuxiik ti kʼuyelan tskʼan Diose ta stabeik smelel tu li kuxlejale.
3. ¿Kʼusi te smakoj li kʼusi tskʼan Dios ta stojolal krixchanoe?
3 Li Vivliae chal kaʼitik ti ep tajmek kʼusi smakoj li kʼusi tskʼan Dios ta sventa krixchanoe. Jech kʼuchaʼal liʼe, jnaʼojtik ti skʼanojutik ta melel li Diose, yuʼun labal sba ta jyalel pasbil li sbekʼtal krixchanoe (Salmo 40:5; 139:14). Jaʼ yuʼun chaʼa, mi ta jkʼan chi jkuxiutik ti kʼuyelan tskʼan Diose skʼan me jchanbetik li stalelale xchiʼuk ti jkʼantik ta melel li yantike (1 Juan 4:7-11). Yan ti kʼusi skʼan jpastik xtoke jaʼ ti jchʼunbetik li smantaltake (Eclesiastés 12:13; 1 Juan 5:3).
4. 1) ¿Kʼusi jaʼ chakʼbe smelel tu li jkuxlejaltike? 2) ¿Kʼusi ti mas tsots skʼoplal skʼan jpas ta jkuxlejaltike?
4 Jech noxtok, li Diose ta slikebal onoʼox la skʼan ti akʼo xmuyubaj li krixchanoetike, ti lekuk oyik ta jujuntale xchiʼuk li kʼusitik yan pasbile (Génesis 1:26; 2:15). Pe ¿kʼusi skʼan kuʼuntik sventa xi jmuyubaj noʼoxe, ti junuk koʼontontike xchiʼuk ti muʼyukuk kʼop kuʼuntike? Jaʼ jech kʼuchaʼal jun olol ti tskʼan teuk kʼelbil yuʼun stot sventa xmuyubaj xchiʼuk ti chabibil chaʼie, li voʼotik eke skʼan me lekuk oyutik ta stojolal li jTotik ta vinajele. Kʼalal lek oyutik ta stojolale jaʼ chakʼ ti oyuk smelel tu xchiʼuk sbalil li jkuxlejaltike (Hebreos 12:9). Li Diose tskoltautik sventa lekuk oyutik ta stojolal, chakʼ nopajkutik ta stojolal xchiʼuk chaʼi j-orasiontik (Santiago 4:8; 1 Juan 5:14, 15). Mi jech ta koʼontontik ti lek tukʼ xkil jbatik xchiʼuk Diose xchiʼuk ti xkʼot ta kamigotike, xuʼ me jlekil kʼoptatik xchiʼuk jlekubtasbetik yoʼonton (Génesis 6:9; Proverbios 23:15, 16; Santiago 2:23). Muʼyuk kʼusi yan mas tsots skʼoplal ta jkuxlejaltik. Li jtsʼibajom yuʼun Salmoe xi laj yale: «Scotol li cʼusitic chichʼic iqʼue acʼo yichʼic ta mucʼ li Mucʼul Diose», xi (Salmo 150:6).
¿Kʼusi cha kʼan cha ta ta akuxlejal li voʼote?
5. ¿Kʼu yuʼun mu lekuk ti jaʼ baʼyel ta jsaʼtik li kʼulejale?
5 Jkʼeltik to batel mas kʼusi smakoj li kʼusi tskʼan Dios ta sventa li krixchanoe. Li stuke tskʼan ti jchabi jbatik lek jtuktike xchiʼuk li kutsʼ kalaltike, ta jbekʼtaltik xchiʼuk ta mantal. Pe taje, skʼan ti lekuk noʼox smelolal ti kʼuyelan oy ta koʼontontik li kʼusitik chtun kuʼuntike, sventa mu jaʼuk smakutik spasel li kʼusitik sventa mantale, yuʼun jaʼ mas toj tsots skʼoplal (Mateo 4:4; 6:33). Kʼux ta alel, pe ep krixchanoetike jaʼ chakʼ tajmek ta yoʼontonik li saʼel kʼulejale. Pe mu me lekuk ti jnoptik ti jaʼ chakʼ stekel kʼusitik chtun kuʼuntik li saʼel kʼulejale. Li kʼusi jaʼtik to laj yichʼ jakʼbel jkʼulejetik ta Asiae, chakʼ ta ilel ti «ta at-oʼonton kuxulike xchiʼuk noxtok, mu junuk yoʼontonik ta sventa ti kʼuyelan oyik ta xkuxlejalike xchiʼuk ti muʼyuk bu xmuyubajik yuʼun li skʼulejalike» (Eclesiastés 5:11).
6. ¿Kʼusi tojobtasel laj yal Jesús ta sventa li saʼel kʼulejale?
6 Li Jesuse laj yal ti tsloʼla oʼontonal «li cʼulejalile» (Marcos 4:19). ¿Kʼu yelan ti chloʼlavane? Yuʼun chakʼ muyubajel yileluk, pe altik. «Li bochʼo tscʼupin ep taqʼuine mu spas ta jun yoʼnton o», xi li ajvalil Salomone (Eclesiastés 5:10). Vaʼun chaʼa, ¿mi stakʼ van ti jnutstik batel li saʼel kʼulejal xchiʼuk ti jaʼo xi jtun ta stojolal Dios ta sjunul koʼontontik noxtoke? Moʼoj, mu stakʼ. Li Jesuse xi laj yale: «Muʼyuc bochʼo xuʼ yuʼun me tsaʼ chib yajval. Yuʼun xuʼ tsbaj li june, xuʼ jaʼ lec tscʼan li yane; xuʼ jaʼ lec chil li june, xuʼ tslaban li yane. Jaʼ noʼox jech mu xuʼ chatunic yuʼun Dios me jaʼ batem avoʼntonic yuʼun acʼulejalique», xi. Jaʼ yuʼun chaʼa, laj yalbe yajtsʼaklomtak ti akʼo mu stsob skʼulejalik liʼ ta Balumile, moʼoj, yuʼun xi laj yale: «Jaʼ lec tsobo acʼulejalic te ta vinajel», xi. Ta yan kʼope jaʼ ti lekuk skʼoplalik ta stojolal Diose. Li Jesuse xi laj yale: «Li Jtotique snaʼoj xa onoʼox cʼusitic chtun avuʼunic ti cʼalal muʼyuc toʼox chacʼanbeique», xi (Mateo 6:8, 19-25).
7. ¿Kʼu yelan xuʼ jtsaktik lek ta mukʼ li «achʼ cuxlejal[e]»?
7 Li jtakbol Pabloe laj yal jun tsatsal mantal ta sventa li kʼulejal kʼalal la stakbe echʼel karta li Timoteo ti jaʼ yajkoltaobbae: «Li jcʼulejetic liʼ ta banamile, albo mantal ti [...] mu me jaʼuc spat yoʼnton yuʼun li scʼulejalique. [...] Jaʼ acʼo spat yoʼntonic ta stojol li Diose, yuʼun jaʼ chiyacʼbutic scotol li cʼusitic ta xtun cuʼuntique, yuʼun jech xcuxet noʼox coʼntontic. [...] Mu me xlaj chaʼay chacʼ, mu me chlaj chaʼay tsqʼuelan li cʼusitic oy yuʼunique. Jech cac tstsobic batel li scʼulejalic tstaic ta tsʼacale; jech ta xcʼot yichʼic li mero xcuxlejalique», o «achʼ cuxlejal» kʼuchaʼal chal Ti Achʼ Rextomento yuʼun ti Jesucristoe, ta skʼop Chamula (1 Timoteo 6:17-19).
¿Kʼusi li «achʼ cuxlejal[e]»?
8. 1) ¿Kʼu yuʼun ep krixchanoetik chakʼ yipik ta saʼel skʼulejalik xchiʼuk ti lekuk xkuxlejalike? 2) ¿Kʼusi ti mu xakʼik ventae?
8 Li «achʼ cuxlejal» xie, xuʼ van tsnopik yantik ti jaʼ li kʼusitik stakʼ kʼupinele xchiʼuk li yan kʼusitik ti mu xa persauke, jech kʼuchaʼal xi chalike: ¡Jaʼ me batsʼi kuxlejal chkaʼi maʼ liʼi!, ti xiike. Jun revista ta Asia ti chal notisiae, xi chale: «Li buchʼutik tskʼelik pelikula o kʼusitik ch-echʼ ta televisione jaʼ te chchanik skʼanel li kʼusi te chilike, chvaychintaik li kʼusitik tskʼan tstaike». Ep krixchanoetike jaʼ noʼox kuxulik sventa tskʼan tsta skʼulejalik, lekuk xkuxlejalik, manchuk mi chixtolan skeremalik, sbekʼtalik, tsten komel yutsʼ yalalik xchiʼuk li kʼusitik sventa mantale. Muʼyuk bu tsnopik ti lekil kuxlejal chalik ta radio o ta televisione jaʼ noʼox li «espíritu liʼ ta banamile», ti jaʼ jun nopbenalil ti tstijbe yoʼonton jutuk mu skotoluk krixchanoetik sventa skontrainik li kʼusi tskʼan Diose (1 Corintios 2:12; Efesios 2:2). ¡Jaʼ yuʼun ep krixchanoetik ti muʼyuk xmuyubajike chaʼa! (Proverbios 18:11; 23:4, 5.)
9. ¿Kʼusi ti mu onoʼox spas yuʼun li krixchanoetike, xchiʼuk kʼu yuʼun?
9 Pe ¿kʼusi xuʼ xkaltik ta stojolal li krixchanoetik ti oy kʼusi chakʼ-o svokolik spasel sventa tsta slekilalik li yantike, ti tskʼan tsjutukajesik li viʼnale, li chamele xchiʼuk li chʼabal tukʼilale? Li slekil yoʼontonik xchiʼuk ti ep chil svokolik ta skoje ep me kʼusi xuʼ lek xkʼot ta pasel yuʼunik. Pe akʼo mi tsots tajmek chakʼ yipalik, mi jaʼuk onoʼox xjel yuʼunik ta lekilal xchiʼuk ta tukʼilal li kʼusitik chkʼotanuk ta pasel liʼ ta balumile. ¿Kʼu yuʼun? Yuʼun «oyic ta scʼob pucuj scotol li yan cristianoetic liʼ ta banamile», li Satanase, xchiʼuk mu skʼan ti akʼo xjel li balumil liʼe (1 Juan 5:19).
10. ¿Bakʼin ti tskʼupinik «achʼ cuxlejal» li tukʼil krixchanoetike?
10 ¡Kʼux ta alel ti jaʼuk noʼox jpatoj-o koʼontontik ta jkuxlejaltik li sbalumil Satanase! Li jtakbol Pabloe xi la stsʼibae: «Me jaʼ noʼox jpatoj coʼntontic ta stojol Cristo ti jayib cʼacʼal cuxulutic liʼ ta banamile, vuʼutic xʼech to toj abul jbatic jech chac cʼu chaʼal yantic cristianoetic ti jechuque», xi. Li buchʼutik jech chalike: «Laʼ xa noʼox veʼcutic, cuchʼtic lec voʼ, yuʼun ocʼom chaʼej xuʼ chijchamutic» ti xiike, jaʼ jech chakʼik ta ilel ti jaʼ noʼox kuxlejal chilik li kuxlejal avie (1 Corintios 15:19, 32). Ta melel oy to kʼusi yan: oy «achʼ vinajel xchiʼuc achʼ banamil ti yaloj onoʼox Dios ta xacʼbutique, ti bu puru tucʼ xa cʼusitic te oye» (2 Pedro 3:13). Mi kʼot skʼakʼalil taje, li yajtsʼaklomtak Cristoe xuʼ me skʼupinik li «achʼ cuxlejal[e]», li «cuxlejal sbatel [osil]» ta tukʼilale, mi ta vinajel o ta Balumil ti jaʼ oy ta skʼob li jkʼanvanej Ajvalilal yuʼun Diose (1 Timoteo 6:12).
11. ¿Kʼu yuʼun mu xkoʼolaj-o ta yan abtelal ta jkuxlejaltik li yalbel skʼoplal Ajvalilal yuʼun Diose?
11 Li Ajvalilal yuʼun Diose jaʼ noʼox stuk ti xuʼ xchapan ta jyalel skotol li kʼopetike. Jaʼ yuʼun chaʼa, muʼyuk kʼusi yan abtelal ti mas tsots skʼoplale, jaʼ noʼox li yalbel skʼoplal Ajvalilal yuʼun Diose (Juan 4:34). Kʼalal ta jpastike, jech lek tajmek oyutik ta stojolal li jTotik te ta vinajele xchiʼuk jaʼ jech jmoj chi j-abtej xchiʼuk li smiyonal noʼox kermanotaktik ta mantale, ti jaʼ jech ta spasik ti kʼuchaʼal ta jpastik eke.
Li kʼusi chkakʼ-o jvokoltik ti oy sbalile
12. ¿Kʼusi jelel-o li kuxlejal liʼe xchiʼuk li «achʼ cuxlejal[e]»?
12 «Li banamile xchiʼuc li cʼusi chacʼ batuc coʼntontic yuʼune, ta onoʼox xlaj», xi li Vivliae. Ta yan kʼop xkaltike, stekel li kʼusi chakʼ slumal Satanase —ti te tsakal skʼoplal ti chkichʼtik ojtikinel ta buyuk noʼoxe xchiʼuk li kʼulejale— ta xchʼay echʼel. «Yan li bochʼo jaʼ tspasilan cʼusi tscʼan yoʼnton Diose jaʼ ta xcuxi sbatel osil» xi chal xtok li Vivliae (1 Juan 2:15-17). Li kʼulejale, li ichʼel ta mukʼe xchiʼuk li kʼusitik chakʼ jkʼupintik li kuxlejal liʼe, j-echʼ be noʼox, yan li «achʼ cuxlejal[e]» —li kuxlejal sbatel osil ti jaʼ tsventain li Ajvalilal yuʼun Diose— te-o sbatel osil xchiʼuk staʼo ti xkakʼ jvokoltik ta stojolale. Xtoj-o jvokoltik.
13. ¿Kʼusi ti laj yiktaik komel jun nupul tsʼakale?
13 Jkʼelbetik skʼoplal li Henry xchiʼuk Suzanne. Li nupul tsʼakal taje spatoj yoʼontonik ta stojolal Dios ti tskolta skotol li buchʼutik chakʼ baʼyel ta xkuxlejalik li Ajvalilal yuʼune (Mateo 6:33). Jaʼ yuʼun la snop chnakiik ta jpʼej na ti abol noʼox sbae, kʼalal jech taje jaʼ muʼyuk bu chbat ta abtel xchibalik, vaʼun jaʼ jech xuʼ ch-abtejik mas ta sventa mantal xchiʼuk li chaʼvoʼ stsebike (Hebreos 13:15, 16). Jun yamigaik ti lek kʼusi tspas yaloje, ti mu xaʼibe smelolal kʼu yuʼun jech tspasike, la xchiʼin ta loʼil li Suzanne, xi laj yale: «Kuni Suzanne, mi oy junuk kʼakʼal ti cha kʼan cha naki ta jpʼej na ti bu mas leke, ta onoʼox me xavakʼ avokol ta yiktael kʼusiuk», xi. Pe li Henry xchiʼuk Suzanne snaʼojik ti kʼalal jaʼ chakʼik ta baʼyel li Jeovae «oy cʼusi ta [staik] ta sventa [xkuxlejalik] liʼ ta ora xchiʼuc ta sventa sbatel osil[e]» (1 Timoteo 4:8; Tito 2:12). Ta mas tsʼakale, li stsebetakike lik spasik ta sjunul yoʼontonik li abtelal ta tsʼakal orae. Kʼalal tskʼel sutel svalapatike, chakʼik venta ti oy sbalil ti jech la stenik komel li kʼusitike, yuʼun ti kʼusi melele jaʼ ti muʼyuk kʼusi chʼayem yuʼunike. ¡Mi jaʼuk! Yuʼun chakʼik venta ti oy kʼusi la spasik kanal kʼalal jaʼ la spas echʼel ta xkuxlejalik stael li «achʼ cuxlejal[e]» (Filipenses 3:8; 1 Timoteo 6:6-8).
Mu me oyuk «ep cʼusitic [kuʼuntik] liʼ ta banamile»
14. ¿Kʼusi xuʼ xkʼot ta jtojolaltik mi ta jchʼay ta jsatik li smelel tu jkuxlejaltike?
14 Vaʼun chaʼa, mi ta jchʼay ta jsatik li melel stu jkuxlejaltike xchiʼuk ti mu xa jtsaktik ta venta li «achʼ kuxlejal[e]», toj xibal me sba kʼusi xuʼ jnuptantik. Yikʼaluk van jaʼ xbat ta koʼontontik li kʼulejale, li kʼusitik oy liʼ ta balumile xchiʼuk li kʼusitik tskʼan koʼontontike (Lucas 8:14). Mi mu stsal kuʼuntik li «scʼop oʼntonal ti cʼu xʼelan [chi jkuxiutike]» xchiʼuk li kʼulejale, xuʼ van jaʼ chchʼay-o tajmek koʼontontik li kʼusitik ta sventa balumile (Lucas 21:34). Kʼux ta alel, ta skoj ti yakʼoj sbaik ta jochel batel ti tskʼan tspasik ta jkʼuleje, li yantike la «scomtsanic xchʼunel Cajvaltic. Jech la staic ep svocolic» xchiʼuk batsʼi chʼayem yuʼunik ti kʼuyelan lek toʼox xil sbaik xchiʼuk Jeovae. ¡Toj tsots stojojik ti muʼyuk laj yakʼ ta yoʼonton chuʼuninik li kuxlejal sbatel osile! (1 Timoteo 6:9, 10, 12; Proverbios 28:20.)
15. ¿Kʼusi la staik jun utsʼ-alalil ta sventa ti «muʼyucuc cʼusi oy yuʼun chaʼay» sbaik ta balumile?
15 Li Pabloe la stijbe yoʼonton ti akʼo «muʼyucuc cʼusi oy yuʼun chaʼay» li «bochʼo oy ep cʼusitic oy yuʼun liʼ ta banamile» (1 Corintios 7:31). Li Keith xchiʼuk Bonnie la stsakik ta mukʼ li tojobtasel taje. Li Bonnie xi chale: «Li och ta yajrextiko Jeova kʼalal yakal xaʼox stsuts echʼel li jchanun ta sventa lokʼesej tanal eale. Xuʼ ox ep ta jta jtakʼin mi ta jpoxta ep jchameletike, pe ta skoj ti jaʼ chi sjutukajesbun jkʼakʼal sventa li abtelal ta mantale, la jnop ti oy noʼox kʼuyepal krixchanoetik ta jpoxtae. Jaʼ jech mas xokolun ta sventa slekilal ta mantal xchiʼuk li kʼusi oy ta yoʼonton kajnil xchiʼuk ta sventa li voʼob jtseb laj kilkutike. Manchuk mi bakʼintik la spas sovra li kuni takʼinkutike, pe la jchankutik stsʼinel xchiʼuk muʼyuk bu spas palta ti kʼusi mas tsots skʼoplal chtun kuʼunkutike. Jaʼunkutik jun utsʼ-alalil ti jmoj tsobolunkutike, ti lek jkʼanoj jbakutike xchiʼuk ti xi muyubajkutik tajmeke. Kʼalal echʼ jabiletike, jkotolkutik li ochkutik spasel li abtelal ta tsʼakal orae. Li jtsebetakutike malijemik xa (li oxvoʼe oy xa yalabik), koliyal ti jaʼ baʼyel chakʼ ta xkuxlejalik li kʼusi tskʼan Jeovae, li yutsʼ yalalik eke xmuyubajik», xi.
Baʼyel onoʼox me jsaʼtik li kʼusi tskʼan Diose
16, 17. ¿Buchʼutik chalbe skʼoplal Vivlia ti oy kʼusi xchanojik spasele, pe kʼusi ti mas la spas ta xkuxlejalike?
16 Li ta Vivliae te ta jtabetik skʼoplalik li buchʼutik laj yakʼ ta xkuxlejalik li kʼusi tskʼan Diose xchiʼuk te chalbe skʼoplal xtok li buchʼutik muʼyuk jech la spasike. Li kʼusitik la spasike jtunel me sventa skotol krixchanoetik, manchuk mi jelel sjabilalik, stalelal xkuxlejalik xchiʼuk ti kʼusi oy ta stojolalike (Romanos 15:4; 1 Corintios 10:6, 11). Li Nimrode la svaʼan mukʼtikil lumetik, pe la skontrain li Jeovae (Génesis 10:8-12, NM). Pe akʼo mi jech, oy yan krixchanoetik ti la spasik li kʼusi tskʼan Diose. Jech kʼuchaʼal liʼe, li Moisese maʼuk baʼyel laj yakʼ ta xkuxlejal ti te tsakal skʼoplal ta pasobmantal ta Egiptoe. Moʼoj, li kʼusi akʼbil sbainoj yuʼun Diose jaʼ «epal cʼulejalil chcʼot [...] ti jaʼ mu sta jech yepal chcʼot li scʼulejal egiptoetique» (Hebreos 11:26). Li doktor Lucase yikʼaluk van la xpoxtabe xchamel jtakbol Pablo xchiʼuk li yantik krixchanoetike, pe li yabtel ti mas tsots skʼoplal ta xkuxlejale jaʼ ti la xchol mantale xchiʼuk ti la stsʼiba jlomuk slivroal Vivliae. Li Pablo eke maʼuk ojtikinbil-o ti chanem lek ta sMantal ajvaliletike, moʼoj, yuʼun jaʼ ti echʼ ta misioneroale. Xi laj yale: «Yajtacbolalun Dios ta stojol li yanlum cristianoetique», xi (Romanos 11:13).
17 Li Davide jaʼ ikʼot ta jpas mantal yuʼun soltaroetik, jtij son xchiʼuk la stsʼibabe sletrail, pe ti kʼusi mas lek xvinaje jaʼ ti jaʼ jun «vinic ti bu lec [chil]» Jeovae (1 Samuel 13:14). Li Daniele muʼyuk ojtikinbil kuʼuntik ti jaʼ toʼox j-abtel li ta ajvalilal yuʼun Babiloniae, moʼoj, yuʼun jaʼ ti tukʼ itun ta j-alkʼop ta stojolal Jeovae. Li Estere maʼuk ojtikinbil ta skoj ti jaʼ meʼ ajvalilaj ta Persiae, yuʼun jaʼ li ta xchʼunel xchiʼuk stsatsal yoʼontone. Li Pedro, Andrés xchiʼuk Juane jaʼ chanem jtsak choyetik, pe jaʼ mas jnaʼojtik ti jaʼ yajtakboltak Jesuse. Li buchʼu mas lek xuʼ jchanbetik ta skotolale jaʼ li Jesuse, yuʼun maʼuk jun «carpintero» chkiltik, yuʼun jaʼ li Cristoe (Marcos 6:3; Mateo 16:16). Skotol li yajtuneltak Dios taje laj yakʼik lek venta ti maʼuk xakʼ ta xkuxlejalik li kʼusitik xtojobik spasele, li kʼusitik lek yuʼunike o ti lek oy xkuxlejalike, moʼoj, yuʼun jaʼ la spasik li kʼusi tskʼan Diose. Yuʼun snaʼojik li kʼusitik mas lek xchiʼuk ti mas chakʼ kuxetel oʼontonale, jaʼ ti xi jtun ta stojolal Diose.
18. ¿Kʼu yelan la snop tstunes xkuxlejal jun yajtsʼaklom Cristo, xchiʼuk kʼusi te laj yakʼ venta?
18 Seung Jin, ti laj xa kalbetik skʼoplal ta slikebal loʼile laj yakʼ venta ek ti skʼan baʼyel spas li yabtel Diose. Xi chal kaʼitike: «La jnop lek ti mu jaʼuk chkakʼ skotol kipal ta poxtavaneje, li ta spasel kʼusitik labal sba ta kʼelele xchiʼuk li ta maestroale, moʼoj, yuʼun skʼan xkakʼ kipal ti kʼuyelan onoʼox skʼan spas jun yajtunel Jeovae. Li avie yakal chi tun ti bu skʼanik tajmek koltael ta jchanubtasvanej ta Vivliae, xchiʼuk ta jkolta li krixchanoetik sventa stamik echʼel li sbelel kuxlejal sbatel osile. Ep ta velta jnopoj ti mu kʼusi vokol chkaʼi li abtelal ta tsʼakal orae. Pe kʼelavil, li jkuxlejal avie mas ep vokoliletik ta snuptan: jujun kʼakʼal ta jkʼan ta jlekubtas jtalelal xchiʼuk ti jchan batel mas xchanubtasel li krixchanoetik ti yan-o yelan xkuxlejalike. Kakʼoj lek venta ti sventa oyuk lek stu li jkuxlejaltike jaʼ ti oyuk lek ta koʼontontik spasel li kʼusi tskʼan Jeovae», xi.
19. ¿Kʼuxi xuʼ jtatik li smelel tu jkuxlejaltike?
19 Li yajtsʼaklomutik Cristoe jtaojtik jun bendision, jaʼ ti xkojtikintik xa li sKʼop Dios ti chakʼ kolebale xchiʼuk ti jaʼ jech jtaoj spatobil koʼontontik ta sventa li kuxlejal sbatel osile (Juan 17:3). Jkʼuxubintik-o me li «slequil yoʼnton ta [jtojolaltik] li Diose [«xchiʼuk mu me xkiktatik ta spasel li kʼusi tskʼane», NM]» (2 Corintios 6:1). ¡Moʼoj! Jaʼ lek jmuyubtatik ta jkuxlejaltik jujun kʼakʼal li Jeovae. Kaltik echʼel li yojtikinel ti chakʼ jmuyubajeltik jujun kʼakʼale xchiʼuk ti jaʼ chakʼ jtatik li kuxlejal sbatel osile. Kʼalal jech ta jpastike te me chkakʼtik venta ti melel li kʼusi xi laj yal Jesuse: «Toj echʼem xcuxet yoʼnton li bochʼo ta xaqʼue; jaʼ mu sta jech li bochʼo ta xichʼe», xi (Hechos 20:35). Vaʼun jaʼ me jech ta jtatik li smelel tu jkuxlejaltike.
[Tsʼibetik ta yok vun]
a Jlom biiletike jelbil.
¿Mi xa naʼ yalbel smelolal?
• ¿Kʼusi ti mas tsots skʼoplal skʼan jpas ta jkuxlejaltike?
• ¿Kʼu yuʼun maʼuk pʼijilal mi jaʼ noʼox kuxulutik sventa ta jsaʼtik li kʼulejale?
• ¿Kʼusi jaʼ li «achʼ cuxlejal» ti yaloj chakʼ Diose?
• ¿Kʼu yelan xuʼ xkakʼ ta jkuxlejaltik li kʼusi tskʼan Diose?
[Lokʼol ta pajina 18]
Kakʼtik me lek venta ti oyuk lek sbalil li kʼusi chkakʼ-o jvokoltike