Jechuk jkʼantik ti kʼuchaʼal la jkʼantik ta slikebale

«Junuc me avoʼnton tsaquic o li cʼusi ataojique.» (APO. 3:11.)

1, 2. ¿Kʼu yelan la avaʼi aba kʼalal la avakʼ venta ti jaʼ melel skotol li kʼusitik yakal cha chan ta sventa Jeovae?

¿MI XVUL ta ajol kʼusi ora la avaʼi ta sba velta li labal sba spatobil oʼontonal akʼbilik yuʼun Jeova li buchʼutik chchʼunbeik smantale? Mi oy xaʼox arelijione, ¿kʼu yelan la avaʼi aba kʼalal la chapbat lek ta Vivlia ta sventa li kʼusitik tskʼan Diose, o li chanubtaseletik ti tsots toʼox tajmek ta aʼibel smelolal chavaʼie? Yikʼaluk van laj avakʼ venta ti lajemot toʼox ta loʼlaele. ¡Pe solel xa muyubaj li avi une yuʼun avil xa li sakilal osil ta mantale! Mi yajtsʼaklom xa onoʼox Cristo li atot ameʼ kʼalal la chʼi tale, ¿mi xvul ta ajol kʼu yelan la avaʼi aba kʼalal la avakʼ venta ti jaʼ melel li kʼusi yakal cha chan ta sventa Jeovae xchiʼuk ti la avakʼ ta akuxlejal li smantaltake? (Rom. 12:2.)

² Ep li avermanotake chalik ti xmuyubajik tajmeke, ti nopol oy chaʼiik ta stojolal li Jeovae xchiʼuk ti oy ta yoʼontonik ta yalbel koliyal ta skoj ti ikʼatik tal ta steklumale (Juan 6:44). Li muyubajel chaʼiike jaʼ itijbat-o yoʼontonik ta spasel li abtelal sventa yajtsʼaklomtak Cristoe xchiʼuk ta yalbel skotol krixchanoetik li kʼusitik achʼ xchʼunojike. ¿Mi jaʼ jech kʼot ta atojolal ek?

3. ¿Kʼusi yakal chkʼot ta pasel ta tsobobbail ta Éfeso kʼalal la stak echʼel yaʼyej li Jesuse?

³ Li ta aʼyej laj yal Jesús ta sventa li tsobobbail ta Efesoe, te laj yal ti ep buchʼutik toj lek stalelalike, pe te laj yal xtok un ti yantik sikub li kʼanelal yuʼunik ta stojolal Diose. Xi laj yale: «Vuʼune xcotquin li avabtelique; jnaʼoj ti tsots chaʼabtejic ta jtojole, xchiʼuc ti tstsʼic avuʼunic vocole, xchiʼuc ti mu xacʼan xachiʼinic li bochʼotic chopolique. Jech noxtoc laj xa aqʼuelbeic lec yabtelic li bochʼotic jcholcʼopetic scuyoj sbaique; laj avilic ti jaʼ noʼox ch-epalcʼopojique. Laj atsʼiquic vocol; tsots laʼabtejic ta jventa; muc xchibaj avoʼntonic. Pero oy to cʼusi mu lecuc chquil, yuʼun mu xa xacʼanicun lec jech chac cʼu chaʼal ta sliqueb[e]», xi (Apo. 2:2-4).

4. ¿Kʼu yuʼun toj jtunel avi li aʼyej albatik yuʼun Jesús li j-efesoetike?

⁴ Li tojobtaseletik albatik yuʼun Jesús li tsobobbail taje xchiʼuk li yan tsobobbailetik ta baʼyel sigloe toj lek itun yuʼunik li tʼujbil yajtsʼaklomtak Cristo ta jkʼakʼaliltike, ta skoj ti kʼusi la snuptanik ti lik tal ta sjabilal 1914 (Apo. 1:10). Pe li yajtsʼaklomtak Cristo avi eke yikʼaluk van «mu xa [jechuk tskʼanik Jeova xchiʼuk smantal] jech chac cʼu chaʼal ta sliqueb[e]». Ta skoj taje, ¿kʼuxi xuʼ xkachʼubtastik xchiʼuk jtsatsubtastik li kʼanelal kuʼuntik ta stojolal Jeovae xchiʼuk ti oyuk tajmek ta koʼontontik spasbel yabtele? Jvules ta joltik li kʼusitik kiloj ta jkuxlejaltike xchiʼuk jnopbetik lek smelolal jech kʼuchaʼal ta jchantik batel tanae.

¿Kʼusi laj yakʼ achʼun ti jaʼ melel li kʼusi liʼe?

5, 6. 1) ¿Kʼusi skʼan xkakʼ lek ta koʼontontik ta jujuntal? 2) ¿Kʼusi laj yakʼ achʼun ti melel kʼusi chakʼik ta chanel li yajrextikotak Jeovae? 3) ¿Kʼusi xuʼ chkoltaun jun krixchano sventa jechuk skʼan-o li kʼusi melel kʼuchaʼal la skʼan ta slikebale?

⁵ Kʼalal mu to chkakʼ jbatik ta stojolal Jeovae, skʼan jnaʼtik baʼyuk «cʼusi tscʼan li Diose, [ti] cʼusitic lec chile, li cʼusitic tuqʼue» (Rom. 12:1, 2). Taje te smakoj batel ti ta jchantik li kʼusitik melel ta Vivliae. Mu me parejouk li kʼusi chkʼot-o ta yoʼonton jun krixchano ti jaʼ melel li kʼusi chakʼik ta chanel li yajrextikotak Jeovae. Yantike jaʼ kʼot-o ta yoʼontonik ti kʼalal laj yilbeik sbi Dios ta Vivliae o ti kʼalal laj yaʼibeik smelolal kʼuyelan oy li animaetike (Éxo.3:14 ta XChʼul Cʼop ti Jtotic Diose, ta batsʼi kʼop yuʼun Chamula, tsʼib ta yok vun; Ecl. 9:5, 10). Yantike jaʼ ti kʼuyelan skʼanoj sbaik li steklumal Dios laj yilike (Juan 13:34, 35). Pe li yantike jaʼ ti laj yilik ti muʼyuk tskap sbaik ta kʼusitik sventa balumil li melel jchʼunolajeletike, jaʼ xkaltik, ti muʼyuk tstikʼ sbaik ta pas kʼop ta sventa politika xchiʼuk ti muʼyuk tstikʼ sbaik ta pas kʼop ta sventa junuk lume (Isa. 2:4; Juan 6:15; 17:14-16).

⁶ Jaʼ ta skoj taje xchiʼuk yantik kʼusitik ti lik skʼanik-o Dios li yajtsʼaklomtak Cristoe. Chʼakbo yorail ta svulesel ta ajol kʼusi ti kʼot-o ta avoʼonton voʼot ti jaʼ melel li kʼusi ataoje. Yikʼaluk me jelel ti kʼusi cha kʼan-o Jeova li voʼote xchiʼuk ti apatoj avoʼonton yuʼun li kʼusitik tspase, ta skoj ti jelel jkuxlejaltik ta jujuntale. Ta melel, ti kʼusi la akʼan-o Jeovae toj tsots skʼoplal chavaʼi jech kʼuchaʼal ta slikebale, yuʼun muʼyuk chjel li melel mantale. Jaʼ yuʼun chaʼa, vuleso ta ajol kʼusi kʼot-o ta avoʼonton xchiʼuk kʼuyelan la avaʼi aba, yuʼun me jaʼ tskoltaot sventa jech akʼanoj-o li kʼusi melele (kʼelo Salmo 119:151, 152; 143:5).

Chʼiuk ti kʼuyelan lik jkʼantik tal ta slikebale

7. ¿Kʼu yuʼun skʼan stsatsubtas ti kʼuyelan skʼanoj kʼusi melel ta slikebal li jun yajtsʼaklom Cristoe, xchiʼuk kʼusi chkoltaun-o ta spasel?

⁷ Ta melel, toj ep xa van kʼusitik jelem ta jkuxlejaltik ti kʼu xa sjalil kakʼoj jbatik tal ta stojolal Jeovae. Jtsatsubtasojtik tal ti kʼuyelan lik jkʼantik tal li mantale sventa xkuch kuʼuntik li kʼusitik achʼ ta jnuptantik ti chakʼ ta preva li xchʼunel koʼontontike. Ta skotol taje, kilojtik kʼuxi tskoltautik li Jeovae (1 Cor. 10:13). Jujun jabil ti ch-echʼ batele yakal ch-epaj batel li kʼusitik chkʼot ta pasel ta jtojolaltik ti toj ep sbalile. ¿Kʼu yuʼun? Yuʼun jaʼ chchʼi-o ti kʼu toʼox yelan jkʼanojtik ta slikebale. Jech xtok, chakʼ jnaʼtik lek kʼusi ti toj lek tskʼan yoʼonton Diose (Jos. 23:14; Sal. 34:8).

8. ¿Kʼuxi la skʼopon Moisés li Jeovae, xchiʼuk kʼuxi laj yojtikinik lek Jeova li j-israeletike?

⁸ Jlokʼolkʼoptatik, jnoptik avaʼi kʼalal laj yakʼ ta ojtikinel ti tskʼan tskolta lokʼel ta stsatsal vokol ta Egipto j-israeletik li Jeovae. Xi la skʼopon Moisés li Jeovae: «Vuʼun ti te onoʼox oyun oe», xut (Éxo. 3:7, 8, 13, 14). Ti kʼusi smelolal li kʼusi laj yale, jaʼ ti xuʼ tspas ti kʼusiuk chtun sventa tspoj lokʼel ta mosoil li steklumale. Li kʼusitik kʼot ta pasel une, jaʼ laj yilik-o j-israeletik ti skotol xuʼ yuʼun li Jeovae, ti jaʼ jun Jchapanvaneje, ti jaʼ Jbabee, Jkoltavanej, Mukʼta Jpas kʼop xchiʼuk J-akʼ veʼlil, jaʼ ti kʼusi chtun ta xkuxlejalike (Éxo. 12:12; 13:21; 14:24-31; 16:4; Neh. 9:9-15).

9, 10. ¿Kʼusi ti chakʼ kojtikintik-o mas li Diose, xchiʼuk kʼu yuʼun lek ti jvules ta joltike?

⁹ Jech ta melel, mu xkoʼolaj akuxlejal xchiʼuk li j-israeletike. Pe li kʼusitik kʼotemik ta pasel ta akuxlejale xchiʼuk ti stsatsubtasoj li xchʼunel avoʼontone xuʼ van chakʼ achʼun ti oyot ta yoʼonton li Diose. Yikʼaluk kʼotem ta J-akʼ veʼlil avuʼun li Jeovae, ta Jpat oʼontonal o ta Jchanubtasvanej (kʼelo Isaías 30:20 xchaʼvokʼal, 21). Yikʼaluk van aviloj kʼuxi jamal laj yichʼ takʼel junuk aorasion. O xuʼ van toj tsots kʼusi la anuptan, vaʼun la skoltaot jun ermano o la ta junuk loʼil ta Vivlia kʼalal cha chanunaj ti jaʼ la skoltaot ta avokole.

¹⁰ Ti xa chap li kʼusitik kʼotem ta akuxlejale, yikʼaluk van muʼyuk mas toj labal sba chaʼiik li yantike. Jech ta melel, muʼyuk van toj labalik sba. Pe toj ep sbalil chavil maʼ voʼote, yuʼun tsvules ta ajol ti laj yakʼbot Jeova ti kʼusi chtun tajmek avuʼune. Vuleso ta ajol ti jayib xa jabil ochemot ta mantale. ¿Mi xvul ta ajol kʼusitik ora la avaʼi ti kʼuyelan la xchabiot Jeovae? Mi jaʼ jeche, vuleso ta ajol taje xchiʼuk ti kʼusi la avaʼi ta avoʼontone. Vaʼun jaʼ me jech chavaʼi yan velta ti kʼuyelan la akʼan Jeova ti vaʼ ora taje. Kʼuxubino ti kʼusi kʼotemik ta pasel ta akuxlejale xchiʼuk nopbo lek skʼoplal, yuʼun me jaʼ chakʼ lek ta avoʼonton ti oyot ta yoʼonton li Jeovae. Muʼyuk me buchʼu xuʼ tspojbot ti jech apatoj tajmek avoʼontone.

Tsots skʼoplal ti jkʼel kʼu kelantike

11, 12. Mi sikubem kʼanel yuʼun ta stojolal Dios li jun yajtsʼaklom Cristoe, ¿kʼu van yuʼun, xchiʼuk kʼusi tojobtasel laj yakʼ li Jesuse?

¹¹ Mi sikubem li kʼanel avuʼun ta stojolal Dios xchiʼuk ta sventa li smantale, maʼuk me ta skoj ti yuʼun la sjel stalelale. Yuʼun muʼyuk bu tsjel yoʼonton maʼ Jeovae (Mal. 3:6; Sant. 1:17). Oyot-o ta yoʼonton. Vaʼun chaʼa, ¿kʼu van yuʼun ti jelel xa ti kʼu yelan chavil aba xchiʼuk Jeovae? Yikʼaluk van mu xa ta sjunuluk avoʼonton cha pas orasion ta skoj li vokolil xchiʼuk li at-oʼontone, muʼyuk xa van mas jal cha chan aVivlia xchiʼuk ti cha nopbe smelolale. Xuʼ van mu xa ta sjunuluk avoʼonton cha chol mantal, o mu xa bu cha kʼot ta tsobajel bakʼintik (2 Cor. 13:5).

¹² Xuʼ van mu jechuk ta atojolal, pe mi jeche, ¿kʼu yuʼun ti jech kʼotem ta pasele? Yikʼaluk van li vokoliletik ti staʼo xavat-o avoʼontone, jech kʼuchaʼal, mi ip noʼox chavaʼi o ta skoj smakʼlinel avutsʼ avalal ti xchʼayoj ta avoʼonton ti poʼot xa ta jyalel li slajebal kʼusitike. Xi laj yalbe yajtakboltak li Jesuse: «Qʼuelo me aba atuquic. Mu me stsatsub avoʼntonic ta scoj li cʼusitic tscʼan abecʼtalique, ta sventa li yacubele, xchiʼuc ta sventa scʼop oʼntonal ti cʼu xʼelan chacuxiique. Yuʼun jech mu chʼayemuc avoʼntonic cʼalal chcʼot ta pasel jech chac cʼu chaʼal li cʼusi ch-och ta yoquile. Yuʼun jaʼ jech chcʼot ta stojol scotol li cristianoetic ta sbejel banamile. Viqʼuiluc me asatic chaʼe; cʼanbeic vocol Dios scotol cʼacʼal ti acʼo cuchuc avuʼunic scotol cʼalal chcʼot ta pasel jech chac leʼe», xi (Luc. 21:34-36).

13. ¿Kʼusi la skoʼoltas-o sKʼop Dios li Santiagoe?

¹³ Oy kʼusi akʼbat snaʼ yuʼun Dios li Santiago sventa chalbe li yermanotake, sventa skʼel sbaik lek ta sKʼop Dios ti kʼuyelan oyike. Xi laj yale: «Pasic me li cʼusi chavaʼyic ta scʼop Diose. Mu me jaʼuc noʼox chavaʼyilanic, yuʼun jech mu jaʼuc noʼox chaloʼla abaic. Li bochʼo jaʼ noʼox chaʼyilan scʼop Diose, me mu spase, jaʼ jech chac cʼu chaʼal jun vinic ti ta sqʼuel sat ta nene. Acʼo me laj yil cʼu xʼelan li sate, pero ichʼay ta yoʼnton; lec noʼox chaʼay sba ti cʼalal chanov batele. Yan li bochʼo mu xchʼay ta yoʼnton cʼusi chaʼye, ti jaʼ te oy o ta yoʼnton li lequil mantal ti jaʼ chacʼ colcutique, xchiʼuc ti chchʼun o li cʼusi chale, xcuxet noʼox yoʼnton yuʼun li cʼusi ta spase», xi (Sant. 1:22-25).

14, 15. 1) ¿Kʼuxi xuʼ tskoltautik Vivlia sventa xi jlekub ta mantal? 2) ¿Kʼusitik van skʼan jnopbetik skʼoplal?

¹⁴ Xuʼ tstunes junuk nen sventa tskʼel sat li jun krixchanoe, mi jech tskʼan chile, tsmeltsan sba. Jech kʼuchaʼal liʼe, mi xotxot skorbata chil li jun vinike, xuʼ tstukʼibtas, mi muʼyuk lek stusoj sjol chil li antse, xuʼ tstus lek. Jaʼ jech li Vivlia eke, chakʼ kiltik ti kʼu kelantik ta melele. Kʼalal chkiltik ti kʼuyelan skʼan jpastik kʼuchaʼal chalbutik tee, yakal me chtun ta jnentik. ¿Pe kʼu van yuʼun ta jkʼel jbatik ta nen mi muʼyuk ta jmeltsantik ti kʼusi skʼan meltsanel une? Skʼan jkʼeltik ti kʼusi skʼan pasel chkiltik li ta «lequil mantal» yuʼun Diose, skʼan xkakʼ ta jkuxlejaltik. Mi chkiltik ti tsikub ti kʼu toʼox yelan jkʼanojtik li Jeova xchiʼuk smantale, xi jakʼbe jbatike: «¿Kʼusi vokolal yakal ta jnuptan, xchiʼuk kʼu yelan chkil taje? ¿Kʼusi ta jpas kʼalal oy onoʼox jech ta jnuptane? ¿Kʼusi ti jelem xae?». Mi oy kʼusi chopol chavile, tsako me lek ta mukʼ. Jelo me ta anil atalelal mi jech skʼan pasel chavile (Heb. 12:12, 13).

¹⁵ Li kʼusitik la jnoptik taje, jaʼ me tskoltautik ta stael kʼusitik xtok ti lek noʼox sba ti jaʼ chi jchʼi-o ta mantale. Li jtakbol Pabloe akʼbat snaʼ yuʼun Dios li tojobtasel laj yalbe li skerem chiʼil ti Timoteo sbie sventa xtojob mas li ta yabtel Diose: «Taje, batuc avoʼnton yuʼun ta snopilanel ta yaʼyiel yoʼ jech ta xilic scotolic ti avacʼojbe yipal ti cʼu sʼelan bu atamoj batele», xut. Li voʼotik eke, skʼan me jnopbetik skʼoplal li sKʼop Diose sventa jnaʼtik bu skʼan xi jtojobaj batel (1 Tim. 4:15, Ch).

16. ¿Kʼusi ti muʼyuk lek ta pasel kʼalal ta jkʼel kʼu kelantik ta skoltaobba Vivliae?

¹⁶ Kʼalal ta sjunul avoʼonton cha kʼel ti kʼu avelane, oy me kʼusi chopol cha ta ta ilel, pe mu me xa chibaj. Naʼo me ti kʼalal cha kʼel aba lek ti kʼu avelane jaʼ me sventa cha tukʼibtas li kʼusi chopol chavile. Li Satanase jaʼ tskʼan ti xchibajesutik li jchopoliltike, ti xakʼ ta koʼontontik ti mu kʼusi xi jtun-oe. Li ta voʼnee oy buchʼu laj yal ta melel ti muʼyuk chkʼuxubin Dios li kipal chkakʼtik ta spasbel yabtele (Job 15:15, 16; 22:3). Pe taje loʼlael, tsots laj yal Jesús ti mu jechuke. Kʼux chaʼi Dios ta jujuntal li yajtuneltake (kʼelo Mateo 10:29-31). Ti jech anaʼoj li achopolile, skʼan me stij avoʼonton ta yakʼbel yipal ta slekubtasel atalelal ta skoltaobba Jeova, jaʼ noʼox ti bikʼit xavakʼ abae (2 Cor. 12:7-10). Mi jaʼ chmakvan chavaʼi li ajabilal o mi ip noʼox chavaʼie, mu me xa chibaj, mu me sikub avuʼun skʼanel li mantale; akʼo ta avoʼonton stael li kʼusitik ta mantale.

Ep kʼusi skʼan jtojtik ta vokol

17, 18. ¿Kʼusitik bendision ta staik li buchʼutik tstsatsubtasik li kʼanel yuʼunik ta slikebale?

¹⁷ Mi cha tsatsubtas li kʼanel avuʼun kʼuchaʼal ta slikebale, ep me mukʼtik bendisionetik cha ta. Ta me xavojtikin lek li Diose xchiʼuk mas me oy ta avoʼonton ta yalbel koliyal ta skoj li beiltasel chakʼ ta slekil yoʼontone (kʼelo Proverbios 2:1-9; 3:5, 6). Li slivroal Salmoe, chakʼ ta ilel ti buchʼutik tstsakbeik ta mukʼ smantaltake «toj lec [chbat]» xchiʼuk «li taqʼuiel [mantal] yuʼun Mucʼul Diose mu xjel o» xchiʼuk «chbijub [lek yuʼun] li bochʼo mu cʼusi snaʼe». Xi chal xtoke: «Xcuxet noʼox yoʼntonic li bochʼotic tucʼ cʼusitic tspasique, ti jaʼ noʼox tspasilanic o cʼusi chal li smantaltac Mucʼul Diose», xi (Sal. 19:7, 11; 119:1).

¹⁸ Jech van chaval ek ti ep kʼusitik skʼan jtojtik ta vokole. Jech kʼuchaʼal liʼe, xkaʼibetik smelolal ti kʼu yuʼun toj echʼem kʼopetik ta balumile xchiʼuk ti chabibilutik ta mantal yuʼun Jeova ti jech chchabi li steklumale. Jech xtok, yikʼojutik tal ta stsobobbail ta spʼejel balumil xchiʼuk yakʼoj jun kʼupil sba jmotontik xtok, jaʼ ti yajRextikoutike. Jaʼ yuʼun, nopbo skʼoplal skotol li bendisionetik yakʼojbote. Ti xlik achap skotole, ep cha ta ta chapel. Jech xa pas bakʼintik; vaʼun jaʼ jech cha chʼun li tojobtasel liʼe: «Junuc me avoʼnton tsaquic o li cʼusi ataojique» (Apo. 3:11).

19. ¿Kʼusi yan skʼan jpastik sventa lekuk oyutik ta mantal ti maʼuk noʼox skʼan jnoptik ti kʼu yelan oyutik ta stojolal Diose?

¹⁹ Mi cha nop kʼuxi yijubem tal li xchʼunel avoʼontone jaʼ me jtos ti kʼusi tskoltaot ti akʼo «junuc me avoʼnton [xa tsak-o] li cʼusi ataoj[e]». Pe maʼuk noʼox maʼ taje. Li revista liʼe ep ta velta yaloj kʼusitik skʼan pasel sventa lekuk oyutik ta mantal, jech kʼuchaʼal li orasione, xcholel ta sjunul koʼontontik li lekil aʼyeje xchiʼuk ti xi jkʼot ta tsobajeletik xchiʼuk ti xkal kuni loʼiltik tee. Mi cha pas skotol taje, ta me x-achʼub xchiʼuk ta me stsatsub li kʼanel avuʼun ta sventa li mantal jech kʼuchaʼal ta slikebale (Efe. 5:10; 1 Ped. 3:15; Jud. 20, 21).

¿Kʼusi cha takʼ?

• ¿Kʼusitik bendision ta jtatik mi ta jnoptik ti kʼu yuʼun skʼan jkʼantik li Jeovae?

• ¿Kʼusi chakʼ lek ta koʼontontik mi ta jnoptik li kʼusitik kiloj ta jkuxlejaltik ti echʼem tal jabiletike?

• ¿Kʼusi chvinaj mi ta sjunul koʼontontik ta jkʼel kʼu kelantik ta sventa li skʼanel kuʼuntik Diose?

[Lokʼol ta pajina 23]

¿Kʼusi ti laj yakʼ ta avoʼonton voʼot ti jaʼ melel li mantal ataoje?

[Lokʼol ta pajina 25]

¿Mi oy kʼusi skʼan xa tukʼibtas chavil?

[Lokʼol ta pajina 26]