Li yabtel akʼbat María sventa chkʼot ta pasel li kʼusi tskʼan yoʼonton Diose

LI Jesuse yakal ta xcholbe mantal epal krixchanoetik, vaʼun jun ants ti te oy eke, tsots avan, jech laj yalbe li Jesuse: «Toj xcuxet noʼox yoʼnton li ameʼ ti la svoqʼuesote, xchiʼuc ti la xchuʼuntasote», xi. Ti tskʼanuk xichʼ muyubtabel li smeʼe, taje jaʼ me yorail jechuk sventa xalbe yajtsʼaklomtak li Cristoe. Pe xi takʼave: «Jaʼ toj xcuxet yoʼntonic ta melel li bochʼotic chaʼyic li scʼop Diose, ti ta xchʼunique», xi (Lucas 11:27, 28).

Ta melel, li Jesuse muʼyuk laj yakʼbe yabtel ti stuk xa noʼox jeche o ti xichʼ muyubtael li smeʼe, xchiʼuk muʼyuk la skʼan ti akʼo spasik jech li yajtsʼaklomtak eke. Vaʼun chaʼa, ¿kʼu yuʼun ep buchʼutik tsmuyubtaik o chichʼik ta mukʼ li Mariae? Jkʼeltik kʼusi chal Vivlia ta sventa li junantik kʼusi nopem xaʼiik spasel ta sventa li smeʼ Jesuse.

Ichʼbilot ta mukʼ xchiʼuk toj lek akʼoplal ta skotolal li antsetike

Kʼalal muʼyuk toʼox albil kʼusi yabtel tspas María sventa xkʼot ta pasel li kʼusi tskʼan yoʼonton Diose, li anjel Gabriele xi kʼot yalbee: «¿Mi liʼote, ti cʼuxubinbilot yuʼun ti Diose, ti chiʼinbilot yuʼun ti Cajvaltique?», xut (Lucas 1:28, Ch). Yan Vivliaetike xi tsjelubtasik li kʼusi kʼot yale: «Dios cha spojot, ichʼbilot ta mukʼ, li Kajvaltike te oy ta atojolal». Ta yan velta xtoke, li Mariae bat svulaʼan li Isabele (Elisabet), ti kʼalal ilvan li Isabele, xi laj yale: «Voʼot noʼox toj lec acʼoplal ta scotol li antsetique, xchiʼuc toj lec scʼoplal ec li olol achiʼuque», xut (Lucas 1:42). ¿Mi chakʼ ta aʼyel ti skʼan xichʼ muyubtael María li kʼusi laj yal Gabriel xchiʼuk Isabele?

Ta melel moʼoj. Akʼo mi te chalbeik skʼoplal li kʼusi laj yal Gabriel xchiʼuk Isabel kʼalal tskʼoponik María li jkatolikoetike, li Vivliae ta melel muʼyuk chchanubtasvan ti skʼan xichʼ kʼoponele. Ti vaʼ kʼusi laj yalike jaʼ noʼox itun sventa xichʼ naʼel ti jaʼ mukʼta matanal akʼbat María ta skoj ti tsvokʼes li Mesiase, pe mi jaʼuk chakʼ ta aʼyel ti skʼan kʼoponele. Li kʼusi chʼunbil taje mu jechuk ta xal li Vivliae. Jech noxtok, kʼalal la xchanubtas ta spasel orasion li yajtsʼaklomtake, jamal laj yakʼ komel ta ilel buchʼu ti xuʼ jkʼopontik li ta j-orasiontike, yuʼun xi lik yale: «Jtotic Dios, te oyot ta vinajel» (Mateo 6:9).

Ch-ajvalilaj ta vinajel

Yan kʼusitik chʼunbil ti epajeme, jaʼ ti Mariae jaʼ la «Meʼ ajvalil ta vinajel (Reina del cielo)» li avie. Pe li ta Vivliae muʼyuk bu jotukal jech chalbe sbi. Li kʼusi noʼox chale jaʼ ti tsots skʼoplal yabtel yichʼoj li ta vinajele, li ta s-organisasion Diose. ¿Kʼusi li abtelal taje?

Li Jesuse laj yal ti ch-ajvalilaj xchiʼuk jlom tukʼil yajtsʼaklomtak li ta Ajvalilal yuʼune (Lucas 22:28-30). Li buchʼutik tʼujbilik taje chanubtasbilik yuʼun Jesús sventa chtunik «ta paleal ta stojol Dios, [xchiʼuk] tspasic mantal ta banamil» (Apocalipsis 5:10). Li Vivliae ta xakʼ kaʼitik ti Mariae jaʼ jun li ta epal krixchanoetik ti tʼujbilik sventa li mukʼta matanal taje. ¿Kʼu yuʼun jech chkaltik taje?

Li ta pajina 3 kʼalal ta 8 laj kiltik ti kʼalal cham xaʼox li Cristoe, «solel batsʼi coʼol yoʼnton la stsob sbaic scotol ora ta scʼanbel vocol [Dios]» li Mariae, li xchiʼiltak ta vokʼel Jesuse xchiʼuk li yajtsʼaklomtake. Te van 120 krixchanoetik xchiʼuk «jayibuc antsetic» la stsob sbaik sventa tskʼoponik Dios (Hechos 1:12-15). Li Vivliae chal ti kʼalal la sta yorail Pentecostese, «te jmoj tsobol scotolic ta jun na», li Diose jaʼo laj yakʼ talel xchʼul espiritu ta stojolalik xchiʼuk koltaatik sventa xkʼopojik ta jeltos kʼopetik (Hechos 2:1-4).

Ta skoj ti te kapal skʼoplal María xchiʼuk li buchʼutik laj yichʼik li matanal taje chakʼ ta ilel ti laj yichʼ tʼujel —jech kʼuchaʼal li yan antsetik ti laj yichʼik li chʼul espiritue— ti tsta yabtel ta vinajel li bu ch-ajvalilaj Jesuse. Ja yuʼun, chakʼ ta ilel ti Mariae te xa oy xchiʼuk Jesús ta vinajel (Romanos 8:14-17). ¿Kʼusi yabtel tspas María xchiʼuk li buchʼutik yan tʼujbilik sventa xkʼot ta pasel li kʼusi tskʼan yoʼonton Diose?

Chkoltavan sventa chichʼ tael mukʼta bendisionetik

Li Vivliae chal ti 144,000 krixchanoetike ta xchaʼkuxiik sventa chbatik ta vinajel sventa jmoj ch-abtejik xchiʼuk Jesús ta paleal, ta jchapanvanej xchiʼuk sventa tspasik mantal (Apocalipsis 14:1, 4; 20:4, 6). Ta skoj ti chtunik ta paleale, chkoltavanik sventa skotoluk noʼox krixchanoetik ti tukʼ yoʼontonike stabeik sbalil li slajel Jesuse xchiʼuk sventa staik li tukʼilal ta mantale, ta stalelalike xchiʼuk li ta sbekʼtalike (Apocalipsis 21:1-4). ¡Kʼuto noʼox yelan oy ta yoʼontonik li tukʼil yajtuneltak Jeova ti akʼo xkʼot ta pasel taje!a

Li Mariae tsots skʼoplal akʼbat yabtel ta voʼne sventa chkʼot ta pasel li kʼusi tskʼan yoʼonton Jeovae, pe li avie yokel-o jech tsots yabtel xtok. Jaʼ jun slekil kʼelobil sventa jkotoltik ti jaʼ jun meʼil ti lek chkʼanvane, ti bikʼit laj yakʼ sbae, ti tukʼ laj yakʼ sbae xchiʼuk ti la xchʼun mantale; xchiʼuk noxtok toj lek ta chanbel ti kʼuyelan kuch yuʼun li vokoliletike. Pe li Mariae maʼuk noʼox sta-o ti ta jchanbetike; ta skoj ti la svokʼes li Mesiase xchiʼuk ti ta skolta sba sventa chichʼ akʼbel bendisionetik sbatel osil li krixchanoetike, sta-o ti jtsaktik ta ventae.

Akʼo mi jech, li kʼusi mas tsots skʼoplal xuʼ jchantik ta sventa li Mariae jaʼ ti jaʼ noʼox chichʼ ta mukʼ stuk li Jeovae, jech kʼuchaʼal tspasik skotol li tukʼil yajtuneltak Diose. Te xa kapal ta xkʼejin xchiʼuk li buchʼutik tʼujbilik ti tspasik mantal xchiʼuk Cristo ta vinajele, xi chalike: «Li Bochʼo te chotol ta chotlebale [Jeova Dios] xchiʼuc li Chʼium Chije [Jesucristo] acʼo albatuc slequilal yutsilal, acʼo ichʼatuc ta mucʼ, acʼo yichʼ svuʼelic o sbatel osil», xiik (Apocalipsis 5:13; 19:10).

[Tsʼib ta yok vun]

[Lokʼol ta pajina 10]

Jchanbetik ti bikʼit laj yakʼ sbae, li xchʼunel yoʼontone xchiʼuk ti la xchʼun mantal li Mariae