Chanubtaseletik yuʼun Jesús

Kʼuxi xuʼ xi jmuyubaj li ta kutsʼ kalaltike

¿Kʼu yelan skʼan xil snupunelik li buchʼu nupultsʼakalike?

Li nupunele toj tsots skʼoplal ta sat Dios. Kʼalal la sjakʼbeik Jesús mi lek ti chtuchʼ snupunel li krixchanoetike, xi la stakʼe: «¿Me muʼyuc aqʼuelojic ta scʼop Dios ti jun vinic xchiʼuc jun ants la spas Dios cʼalal la spas cristiano ta sliquebe? Jech chal: “Jaʼ yuʼun li vinique ta scomtsan stot smeʼ; yuʼun ta xicʼ yajnil. Li chibic toʼoxe jun noʼox sbecʼtal ta xcʼotic”. Jech muc xa chibicuc, jun xa noʼox icʼotic. Jaʼ yuʼun li bochʼotic laj xa spas ta jun li Diose, muʼyuc bochʼo xuʼ ta svocʼ». Xi to laj yal xtoke: «Li bochʼo ta xicta yajnile, me muc ta scojuc yuʼun imulivaje, me ta xicʼ yan ants, jaʼ noʼox ta xmulivaj xchiʼuc» (Mateo 19:4-6, 9). Kʼalal chchʼunik li mantal laj yal Jesús li nupultsʼakaletike xchiʼuk ti muʼyuk tsmukul sati sbaike, tstabeik sbalil skotol li utsʼ-alalile.

¿Kʼu yuʼun tsots skʼoplal xichʼ kʼanel Dios sventa oyuk muyubajel li ta utsʼ-alalile?

Li Jesuse xi laj yale: «“Cʼano me ta scotol avoʼnton li Dios avuʼune, xchiʼuc ta scotol achʼulel, xchiʼuc ta scotol ajol”, xi li mantale. Jaʼ sba mantal ti batsʼi tsots scʼoplale». Ta tsʼakale laj yalbe skʼoplal li xchibal mantal ti tsots skʼoplale: «Cʼano me achiʼil jech chac cʼu chaʼal cʼux ta avoʼnton abecʼtal atuc» (Mateo 22:37-39). Jech un chaʼa, sventa oyuk muyubajel li ta kutsʼ kalaltike skʼan jkʼantik li Jeovae, yuʼun mi jech ta jkʼantike, jaʼ jech ta jkʼantik ek li jchiʼiltaktike. Jech kʼuchaʼal jnaʼojtike li jchiʼiltaktik mas nopol ta jtojolaltike jaʼ li kutsʼ kalaltike.

¿Kʼu yelan skʼan xichʼ sbaik ta mukʼ li nupultsʼakaletike?

Li Jesuse jaʼ jun slekil kʼelobil yuʼun li malaliletike. Li stuke jaʼ baʼyel laj yakʼ ta xkuxlejal li tsobobbaile, jaʼ li yajnil ta alele (Efesios 5:25). Yuʼun xi onoʼox laj yale: «Muc bu tal pasvancon ta mantal. Ti litale, yuʼun tal tunicon yuʼun scotol crixchanoetic» (Mateo 20:28, Scʼop Riox, ta skʼop Zinacantán). Mi jaʼuk jpʼel xa xal, mi jaʼuk tsots la spas ta mantal li yajtsʼaklomtake. Moʼoj, yuʼun laj yakʼbe yipal ti akʼo lek xaʼi sbaik ta stojolale (Mateo 11:28). Li malalile skʼan jaʼ chchanbe ti kʼuyelan lek noʼox tspasvan ta mantale.

Li ajnilal eke xuʼ oy ep kʼusi chchan ta stojolal li Jesuse. Li Vivliae chal ti «Cristoe jaʼ sjol li Diose» xchiʼuk ti «antsetique jaʼ sjolic li viniquetique» (1 Corintios 11:3). Li Jesuse mu chopoluk laj yaʼi ti chchʼunbe smantal li sTote, yuʼun oy tajek ta yoʼonton chichʼ ta mukʼ. Li Jesuse xi laj yale: «Yuʼun jaʼ ta jpasbe scotol cʼacʼal li cʼusi lec chile» (Juan 8:29). Li ajnilal ti skʼanoj xchiʼuk chichʼ ta mukʼ Diose ta slekil yoʼonton chchʼunbe smantal li smalal eke.

¿Kʼusi xuʼ xchanbeik Jesús li totil-meʼiletike?

Li Jesuse maʼuk noʼox la xchʼak skʼakʼal ta stojolal li ololetike, moʼoj, yuʼun la skʼan la snaʼ li kʼusi tsnopike xchiʼuk ti kʼuyelan chaʼi sbaike. Jun veltae, kʼalal tskʼan ox ta spajesik ololetik li yajtsʼaklomtak sventa mu xnopajik batel ta stojolale, li Jesuse xi laj yale: «Acʼo talicuc ta jtojol li ololetique» (Lucas 18:15, 16). Muʼyuk la spajtsan sba xtok ta skʼupil kʼoptael li chex kerem-tsebetike. Kʼalal oy junantik krixchanoetik chopol laj yilik kʼalal jamal laj yakʼik ta ilel xchʼunel yoʼontonik ta stojolal Jesús li ololetike, xi laj yalbe mantal li krixchanoetike: «¿Me muʼyuc aqʼuelojic ti jech tsʼibabil ta scʼop Diose?: “Ta scʼop bicʼtal ololetic xchiʼuc bochʼo ta to xchuʼunic chcʼot ta tsʼaquiel li avichʼel ta muqʼue”» (Mateo 21:15, 16).

¿Kʼusi xuʼ xchanbeik Jesús li alab-nichʼnabiletike?

Li Jesuse jaʼ noʼox yakʼoj tajek ta yoʼonton li mantale. Kʼalal lajcheb toʼox jabil yichʼoje, li stot smeʼe «te la staic ta chʼulna ta Jerusalén; te chotol ta oʼlol yuʼunic li bochʼotic lec xchanojic smantal Diose. Te chaʼay cʼusi chalic, xchiʼuc oy cʼusi te tsjaqʼuilan ec». Li jchanubtasvanejetik taje «toj chʼayel icʼot yoʼntonic ta sventa ti oy lec sbijile xchiʼuc ti cʼu xʼelan itacʼove» (Lucas 2:42, 46, 47). Manchuk mi toj ep spʼijil li Jesuse muʼyuk la stoy sba, moʼoj, li stuke la yichʼ ta mukʼ li stot smeʼe, yuʼun li Vivliae chal ti «lec la xchʼunbe smantal li stot smeʼe» (Lucas 2:51).

Mi cha kʼanbe to mas yaʼyejale, kʼelo li kapitulo 14 ta livro ¿Kʼusi chchanubtasvan ta melel li Vivliae?a

[Tsʼib ta yok vun]