Chanubtaseletik yuʼun Jesús
Li melel relijione
¿Mi lek chil Dios skotol li relijionetike?
▪ Li Jesuse toj kʼux tajek laj yil kʼuyelan tsloʼlaik yantik li jnitvanejetik ta relijione. Jech oxal la spʼijubtas yajtsʼaklomtak ta sventa li «jloʼlavanej jʼalcʼopetique. Yuʼun xcoʼlaj xchiʼuc chijetic yilel [...], pero li yut yoʼntonique jaʼ jech chac cʼu chaʼal jtiʼvanej bolom» (Mateo 7:15). Jnaʼojtik lek ti oy kʼotem ta pasel kʼopetik ta skoj li relijione.
Jun velta kʼalal la skʼopon Dios li Jesuse, xi laj yale: «Li acʼope jaʼ melel» (Juan 17:17). Lek xvinaj ti mu lekuk chil Dios li relijionetik ti mu jechuk chchanubtasvanik kʼuchaʼal chal li Vivliae. Jech oxal li Jesuse, la xchaʼal li kʼusi yaloj xa onoʼox Dios sventa jaʼ chalbe li jnitvanejetik ta relijion ti chloʼlavanike: «Altic ti chiyichʼicun ta mucʼ yilele, smantal noʼox cristiano ta xchanubtasvanic o», xi (Mateo 15:9).
¿Mi oy jun melel relijion?
▪ Kʼalal la xchiʼin ta loʼil jun jsamaria ants li Jesuse, xi laj yalbee: «Li voʼoxuque mu xavotquinic li bochʼo chavichʼic ta muqʼue», xut. Ta skoj ti loʼlabil yuʼun srelijionik laj yil li jsamaria krixchanoetike, li Jesuse xi laj yalbe li antse: «Ti melel j-ichʼvanejetik ta mukʼe chichʼik ta mukʼ ta espiritu xchiʼuk ta melel li Totile, yuʼun ta melel, li Totile jaʼ tsaʼ li buchʼutik jechik kʼuchaʼal taje sventa akʼo x-ichʼat ta mukʼ» (Juan 4:22; 4:23, NM). Jech oxal, mi oy melel jchʼunolajeletike jaʼ skʼan xal ti oy jun melel relijion o melel yichʼel ta mukʼ Diose.
Li melel yichʼel ta mukʼ Dios taje jaʼ li la xcholbe komel skʼoplal li Jesuse. Xi laj yale: «Muʼyuc cʼusi ta jpas ta jventa jtu[k], [...] jaʼ noʼox ta jpas jech chac cʼu chaʼal xchanubtasojun li Jtot ti la stacun tale» (Juan 8:28). Jech oxal xi laj yale: «Vuʼun li beune, vuʼun li melelune, vuʼun li cuxlejalune. Muʼyuc bochʼo xuʼ chbat ta stojol Jtot ti me mu xtal ta jtojole» (Juan 14:6). Jaʼ yuʼun, mi jaʼ noʼox oy jun be sventa chi jkʼot ta stojolal li Totile jaʼ noʼox oy jun melel relijion xtok.
¿Kʼuxi xuʼ jnaʼtik bu junukal li melel relijione?
▪ Jkʼeltik noʼox chantosuk kʼusitik chchanbeik Jesús li melel yajtsʼaklomtake.
1. «Li voʼone kakʼojbeik yojtikin li abie» xut Jeova li Jesucristoe (Juan 17:26, NM). Li melel yajtsʼaklomtak Cristoe tstunesik ek li sbi Diose.
2. Li Jesuse laj yalbe skʼoplal li Ajvalilal yuʼun Diose xchiʼuk laj yalbe yajtsʼaklomtak ek ti akʼo jech xcholik ta jujupʼej nae. Xi laj yale: «Buyuc noʼox chaʼochic, me ta lumetic, me ta tsobtsobnaetic, qʼuelic li bochʼo lec yoʼntone» o ti sta-o xichʼ cholbel mantale. Ta mas tsʼakale xi laj yal xtoke: «Batanic me; bat pasic ta jchʼunolajel cuʼun li cristianoetic ta jujun banamile» (Mateo 10:7, 11; 28:19). Li avie, li melel yajtsʼaklomtak Cristoe chichʼik ojtikinel ta skoj ti jech tspasik eke.
3. Mi jaʼuk la stikʼ sba ta politika li Jesuse. Taje, jech tspasik ek li yajtsʼaklomtake, yuʼun xi laj yale: «Ti stuquique muʼyuquic xa ta sventa banamil, jech chac cʼu chaʼal vuʼun ti muʼyucun ta sventa banamile» (Juan 17:14). Jech oxal, li melel yajtsʼaklomtak Cristoe mu stikʼ sbaik li ta politikae.
4. Li Jesuse tsots skʼoplal laj yil li krixchanoetike, yuʼun toj echʼem skʼanojan. Xi la svulesbe ta sjol li yajtsʼaklomtak eke: «Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:35). Jaʼ xkaltik, li melel yajtsʼaklomtak Cristoe skʼanoj sbaik xchiʼuk mu stikʼ sbaik ta pas kʼop.
¿Kʼusi sbalil tstabeik melel relijion li krixchanoetike?
▪ Sventa ta jkuxlebintik li melel relijione, skʼan xkojtikintik lek li Diose. Li yojtikinobil taje tslekubtasbe xkuxlejal krixchanoetik xchiʼuk chakʼ akʼo mas skʼanik li Jeovae. Li matanal yaloj Dios tstaik li buchʼutik skʼanojike jaʼ jun kuxlejal ti muʼyuk spajebe. Jech oxal xi laj yal li Jesuse: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote» (Juan 17:3).
Mi cha kʼanbe to mas yaʼyejale, kʼelo li kapitulo 15 li ta livro liʼe ¿KʼUSI CHCHANUBTASVAN ta melel LI VIVLIAE? ti pasbil yuʼun yajrextikotak Jeovae.
[Lokʼol ta pajina 16]
«Qʼuelo me abaic ta sventa li jloʼlavanej jʼalcʼopetique. Yuʼun xcoʼlaj xchiʼuc chijetic yilel ti cʼalal te chtal ta atojolique, pero li yut yoʼntonique jaʼ jech chac cʼu chaʼal jtiʼvanej bolom.» (Mateo 7:15)