Nopajan ta stojolal Dios
«Jaʼ ta jqʼuelbe cʼu xʼelan yut yoʼnton»
EP BUCHʼUTIK chalik ti chloʼlavan li jpat jxokontike. Jech onoʼox, yuʼun li spat xokon jun krixchanoe maʼuk chakʼ ta ilel ta melel ti kʼu yelane. Li krixchanoe ep kʼusitik ta snop ta stojolal yan krixchano ta sventa li kʼusi chil ta sate, yan li Jeova Diose maʼuk tskʼel li jpat jxokontike. Jech chakʼ ta ilel li loʼil ta 1 Samuel 16:1-12.
Nopo li kʼusi kʼot ta pasel liʼe. Li Diose ta xa stʼuj buchʼu ch-och ta achʼ ajvalil li ta jteklum Israele. Jech oxal xi laj yalbe li j-alkʼop Samuele: «Batan ta sna Isaí (Jesé) te ta Belén, yuʼun jtʼujojbe xa jun xnichʼon sventa ch-och ta ajvalilal» (versikulo 1). Labal sba ti muʼyuk laj yalbe kʼusi sbi li buchʼu la stʼuje, jaʼ noʼox laj yal ti jaʼ xnichʼnabtak li Isaie. Kʼalal bat ta Belén li Samuele, xuʼ van xi la sjakʼbe sbae: «¿Kʼuxi ta jnaʼ buchʼu junukal xnichʼon Isaí la stʼuj li Jeovae?».
Kʼalal kʼot li Samuele la xchapan jun milbil matanal xchiʼuk la skʼanbe Isaí xchiʼuk xnichʼnabtak ti akʼo xbatik eke. Kʼalal laj yil li Eliabe, li bankilal nichʼonile, labal to kʼot, yuʼun lek xkʼot-o ta ajvalil laj yil. Ta anil la snop ti jaʼ li buchʼu tʼujbil yuʼun li Jeovae (versikulo 6).
Pe li Jeovae mu jechuk ta snop. «Mu me ta sbauc noʼox xaqʼuel cʼu xʼelan, xchiʼuc mu me ta snatiluc xaqʼuel —xut li Samuele—. Leʼe maʼuc tʼujbil cuʼun.» (Versikulo 7.) Li stuke maʼuk labal sba chilbe li spat xokon Eliabe, yuʼun li Diose jaʼ tskʼelbe li kʼusi mas kʼupil-o sba ta melele.
¿Kʼuxi xuʼ jnaʼtik taje? Xi laj yalbe li Samuele: «Yuʼun li vuʼune mu jaʼuc jech ta jqʼuel jech chac cʼu chaʼal chaqʼuelique. Yuʼun li cristianoetique jaʼ noʼox tsqʼuel ti bu lec chilique, pero li vuʼune jaʼ ta jqʼuelbe cʼu xʼelan yut yoʼnton» (versikulo 7). Jech, li kʼusi tskʼel Diose jaʼ li koʼontontike: jaʼ ti bu chlokʼ tal li kʼusitik ta jnoptike, li jtalelaltike xchiʼuk li kʼusi oy ta jol ta koʼontontike, jaʼ xkaltik, ti kʼu kelantike. Jech oxal li Vivliae, chal ti «yoʼnton cristianoe jaʼ tsqʼuel stuc li Mucʼul Diose» (Proverbios 17:3). Jech oxal, laj yal ti maʼuk la stʼuj li Eliabe xchiʼuk li yan vakib xnichʼnabtak Isaie.
Pe li Isaie oy to mas bikʼit xnichʼon, «ta xchabi [chij]», jaʼ li Davide (versikulo 11). Jech oxal laj stak ta ikʼel, kʼalal kʼote, xi albat yuʼun Jeova li Samuele: «Lican me, bat jaxbo aceite ta sjol sventa ch-och ta ajvalilal» (versikulo 12). Akʼo mi «toj cʼupil sba [xchiʼuk] chacvoxan lec yutsil» li Davide, li Diose jaʼ la stʼuj ta skoj li slekil yoʼontone (1 Samuel 13:14).
Li avie, oy ep krixchanoetik ti jaʼ batem tajek ta yoʼontonik ti alakʼuk sba xvinajike. ¡Pe toj lek ti maʼuk skʼeloj Jeova Dios li jpat jxokontike! Li stuke jaʼ tskʼel li koʼontontike, mu sventa mi komkomutik o mi natutik, mi alakʼ jbatik o mi moʼoj. Li taje, ¿mi mu tauk stij koʼontontik sventa jtsʼites jlekil talelaltik yoʼ lekuk xilutik li Diose?