«Li sderecho ololetik sventa xichʼ chanubtasel ta smantal Diose»

JAʼ JECH sbi li chanubtasel laj yakʼ li jtsop krixchanoetik ti koltabil yuʼun li Academia Sueca sventa Derechos del Niño. Li tsobajel taje laj yichʼ pasel ta 9 yuʼun disiembre ta 2008, ep ayik jbabeetik ta Relijion ta Suecia xchiʼuk yantik relijionetik yuʼun li buchʼutik tskuy sbaik ta yajtsʼaklom Cristoe, jech kʼuchaʼal Islam xchiʼuk Movimiento Humanista.

Xi laj yal jun palee: «Mu xa noʼox x-al kuʼuntik kʼu to stsatsal skʼoplal li loʼiletik ta Vivlia sventa xichʼik chanubtasel ta smantal Dios li ololetike». ¿Kʼuxi chtun li loʼiletik sventa xichʼik chanubtasel ta smantal Dios li ololetike?

Xi chalbe kaʼitik smelolal stuke: «Toj jtunel sventa snopbeik skʼoplal stukik ololetik li loʼiletik ta Vivliae». Chal ti toj jtunel la yuʼunik li «sloʼilal xkuxlejal Adán xchiʼuk Eva, Caín xchiʼuk Abel, David xchiʼuk Goliat, li xkuxlejal ta sbikʼtal li Jesuse, Zaqueo —ti jtsobpatan echʼe—, li jtoyba nichʼonile xchiʼuk li jsamaria vinik ti lek yoʼontone», yuʼun chtun sventa «kʼuyelan skʼan stalelalik ta sventa li kuxlejale, jech kʼuchaʼal li loʼlaele, li pertone, li stojbel ta vokol yantike, li pʼajbaile, li sokesele, li xchapanel kʼope, li kʼanbaile xchiʼuk ti kʼusi smelolal ti yermano sbaik li krixchanoetike». Xi to chale: «Xuʼ te xchanik ti kʼuyelan xuʼ spasike, ti xakʼ ta xkuxlejalike, ti chil ta xkuxlejalike».

Ta batsʼi melel, toj jtunel ti jkʼeltik li Tsʼibetike. Veno, pe ¿mi tukʼ van chkʼot ta nopel yuʼunik kʼalal «[t]snopbeik skʼoplal stukik» ololetik li kʼusi chchanike?

Jamal chakʼ ta ilel Vivlia ti kʼalal ta mukʼta krixchanoetik skʼanik koltael sventa xaʼibeik smelolal li kʼusi chchanike. Chalbe skʼoplal jun j-etiopía vinik ti muʼyuk bu laj yaʼibe smelolal mantal kʼalal la «[snopbe] skʼoplal stuk[e]». Li Vivliae chal kaʼitik ti yakal tskʼelbe skʼoplal jun albil kʼop ta slivroal Isaiase, pe mu xaʼibe smelolal, jaʼ yuʼun xmuyubaj xa ti koltavan ta xchapbel smelolal li yajtsʼaklom Cristo ti Felipe sbie (Hech. 8:26-40). Pe maʼuk noʼox stuk maʼ taje. Jkotoltik onoʼox —mas to me li ololetike— ta me xtun kuʼuntik ti oy buchʼu xchapbe kaʼitik smelolal li sKʼop Diose.

Xi chpʼijubtasvan li Vivliae: «Jaʼ stalel oy sbolil yoʼntonic li ololetique» (Pro. 22:15). Jaʼ yuʼun toj tsots skʼoplal ti xichʼ chanubtasel ta smantal Dios li ololetike xchiʼuk ta sventa li stalelalike. ¿Buchʼu oy ta sba taje? Jaʼ li totil-meʼiletike, xuʼ stunesik li kʼusi chakʼ ta chanel Vivlia xchiʼuk stsobobbail yajtsʼaklom Cristo sventa xchanubtas li yalab xnichʼnabike. Ta melel, oy me sderecho li ololetik sventa xichʼik chanubtasel ta smantal Diose. Skʼan me ta sbikʼtalik noʼox xichʼik chanubtasel li ta smantal Dios ti lokʼem ta Vivliae. Sventa spasik ta «mucʼtic cristiano, jaʼ li bochʼotic xchanojic xa lec, ti cʼun xa ta tʼujel chaʼyic li cʼusi leque xchiʼuc li cʼusi chopole» (Heb. 5:14).