¿Kʼusi chtun yuʼun ta stojolal stot smeʼik li alab-nichʼnabiletike?

SKOTOL totil-meʼil tskolta sba ta sventa kʼusi chkʼot ta pasel ti mu xaʼibeik smelolal li krixchanoetike: oy kʼusi chakʼik ta jujuntal sventa chchʼi jun kuxlejal ta yut xchʼut meʼil jaʼ to mi la sta lek xchʼiele. Jech un chaʼa, muʼyuk bu labal chichʼ aʼyel ti chalik ti «jaʼ jun skʼelobil juʼelal li achʼ kuxlejal» kʼalal ch-ayan jun neneʼe.

Veno, li yakʼbel xkuxlejal jun olole jaʼ to noʼox slikebal li kʼusitik tsbainik li totil-meʼiletike. Ta slikebale, li totil-meʼiletike jaʼ chakʼbeik skotol li kʼusitik chtun yuʼunik li uni neneʼetike, pe jech kʼuchaʼal chchʼiik batele, mas ta skʼanik kʼelel. Tskʼanik koltael sventa chchʼiik ta snopbenik, kʼusi chaʼi ta yoʼontonik, sventa stalelalik xchiʼuk ta sventa smantal Dios.

Sventa akʼo lek xchʼiik batel li alab-nichʼnabiletike tsots skʼoplal ti akʼo xkʼanatik yuʼun li stot smeʼike. Manchuk mi tsots skʼoplal chalbeik ti skʼanojike, liʼ xtoke skʼan chakʼbeik ta ilel. Jech, li totil-meʼiletike skʼan ta xakʼbeik ta ilel slekil talelalik. Li ololetike chtun yuʼunik lekil mantaletik sventa chbeiltasatik, kʼalal bikʼitik to tajmeke chtun xa onoʼox tal yuʼunik. Kʼalal muʼyuk bu chichʼik albel ta ora li mantale, kʼux ta aʼyel li kʼusitik chkʼot ta stojolalik ta tsʼakale.

Li mantaletik ti mas leke te ta xichʼ tael ta Vivlia. Li chanubtaseletik yuʼun li Vivliae oy lek sbalil xchiʼuk mu kʼusi xkoʼolajik-o. Kʼalal ta xchanik Vivlia li ololetike, ta xakʼik venta ti maʼuk skʼop krixchanoetik li kʼusitik ta xchanike, moʼoj, yuʼun jaʼ skʼop li Jpasvanej yuʼunike, li sTotik ta vinajele. Li mantaletike oy lek stsatsal ti mu kʼusi xkoʼolaj-oe.

Li Vivliae ta xalbe li totil-meʼiletik ti akʼo xakʼbeik yipal ta stikʼbel ta sjol yoʼontonik yalab xnichʼnabik li lekil mantaletike. Pe, jech kʼuchaʼal chchʼiik batele, li totil-meʼiletike mas to tsots chaʼiik ti chloʼilajik xchiʼuk yalab xnichʼnabik ta sventa li kʼusitik mas tsots skʼoplale. Li livro liʼe, JCHANBETIK LI MUKʼTA JCHANUBTASVANEJE, pasbil sventa mu xkʼot ta pasel jech kʼuchaʼal taje. Cha yakʼboxuk xchiʼuk avalab anichʼnabik aʼyejetik ta sventa Dios ti xuʼ cha kʼelik ta jmoje. Pe maʼuk noʼox taje, yuʼun tstsʼitesbe ta yoʼontonik ti akʼo xloʼilajik li uni ololetike xchiʼuk li buchʼutik tskʼelik xchiʼukik li livroe.

Jech kʼuchaʼal chavile li livroe ta xalbe ti akʼo stakʼik li uni ololetike. Ta sjunul li livroe oy ep sjakʼobiltak ti lek nopbil bu akʼbile. Te une, li ta jujun sjakʼobile te cha ta oxib puntoetik (...), ti jaʼ chtun sventa tsvules ta joltik ti te chi jpaj jlikeluk xchiʼuk ta jakʼbetik kʼusi tsnop li uni olole. Li ololetike lek chaʼiik ti chichʼik ichʼel ta ventae. Mi mu xkakʼtik akʼo stakʼik xchiʼuk akʼo yalik li kʼusi tsnopik li ololetike, mu xa skʼanik-o.

Pe, li kʼusi mas tsots skʼoplal ti yichʼoj li sjakʼobiltake jaʼ ti yuʼun xuʼ xa yakʼbot anaʼ kʼusi tsnop li akerem o atsebe. Oyikʼal van mu jechuk tstakʼ li olole. Pe li kʼusi te tsʼibabil kʼalal chlaj li jujun sjakʼobile, nopbil sventa tskolta li olol ti lekuk chchʼi batel li snopbenale.

Jtos ti kʼusi tsots skʼoplal yichʼoj li livroe jaʼ li mas to ta 230 lokʼoletike. Ta jutuk mu skotoluk te ta yolon li jujun lokʼole, oy sjakʼobiltak ti tstijbe yoʼonton ta stakʼel li olole, ti te lokʼesbil smelolal li ta lokʼole xchiʼuk li kʼusi naka to la xchane. Jech oxal chaʼa, kʼelo lek xchiʼuk anichʼon li lokʼoletike. Jaʼ jun lekil abtejebal ti chtun sventa chichʼ alel lek li kʼusitik chichʼ chanele.

Kʼalal mi la xchan skʼelel vun li avuni kerem o avuni tsebe, albo ti akʼo skʼelbot li livroe xchiʼuk ti akʼo skʼel stuk eke. Mi jech ta spase mas to ta xkom ta sjol xchiʼuk ta yoʼonton li mantaletik te ta livroe. Pe, sventa ta stsatsub batel li kʼanel, li ichʼel ta mukʼ avuʼun xchiʼuk anichʼone, skʼan mu xavikta abaik ta xchanel ta jmoj li livroe.

Ta jkʼakʼaliltike, li ololetike oy kʼusitik ta xilik ti muʼyuk toʼox nopbil mi jech chkʼot ta pasel ti oy xa sjabilal tale, ti xuʼ ta xilbeik yaʼyejal chopol lutsʼbail, espiritismo xchiʼuk yantik kʼusitikuk ti toj chopolik ta pasele. Jaʼ yuʼun skʼanik chabiel, ti xuʼ ch-akʼbatik li livro liʼe, ti ch-ichʼvan ta mukʼ kʼalal chale xchiʼuk ti lek jamal chale. Pe li kʼusi mas tsots skʼoplal ta skotole, jaʼ ti ololetike skʼanik beiltasel ta stojolal li Slikeb skotol pʼijilale, li jTotik ta vinajele, ti jaʼ li Jeova Diose. Taje jaʼ li kʼusi onoʼox la spas li Mukʼta Jchanubtasvanej Jesuse. Oy ta koʼontonkutik ta melel ti akʼo xa skoltaoxuk xchiʼuk avutsʼ avalal li livro liʼe, sventa tslekubtasbe yoʼonton Jeova li akuxlejalike xchiʼuk akʼo xa tabeik sbendision ta sbatel osil.