Li kʼopojel ta yantik kʼope: ¿mi jaʼ van matanal chakʼ Dios?
«TA MELEL mu jnaʼ kʼu yuʼun —xi chal Devon—. Kʼalal chi bat ta jtemploe, ep krixchanoetik ti chichʼik chʼul espiritu yilele xchiʼuk chkʼopojik ta yantik kʼop. Junantik li krixchanoetik taje chopol li xkuxlejalike, pe li voʼone ta jpas persa ti lekuk li jkuxlejale. Akʼo mi ta jkʼanilan ta orasion li matanal chakʼ espiritue, muʼyuk bu jta-o. ¿Kʼuxi xa noʼox jech taje?»
Li Gabriel eke jechtik chkʼot ta pasel chil kʼalal chbat ta stemploe. Xi chal kaʼitike: «Li kʼusi mas chopol chkaʼie, jaʼ ti kʼalal yakalun spasel orasione, junantik li buchʼutik te oyike chlik avanikuk, pe mu xaʼibe sbaik li kʼusi chalike. Ta jnope muʼyuk sbalil li kʼusitik tspasik taje. Ti jaʼuk matanal chakʼ Diose, oy sbalil ti jechuke».
Ta skoj li kʼusitik chkʼot ta pasel taje, xuʼ van jakʼbe jbatik mi ta melel jaʼ chakʼ Dios avi kʼakʼal li matanaletik taje. Sventa jnaʼtike, jkʼeltik kʼusi itun-o ta baʼyel siglo li matanal la staik ti ikʼopojik ta yantik kʼope.
«Lic cʼopojicuc ta yantic cʼopetic»
Li vaʼ kʼakʼal taje, li Vivliae chal ti Diose laj yakʼ kʼopojuk ta yantik kʼopetik junantik viniketik xchiʼuk antsetik ti mu toʼox snaʼike. Li sba velta kʼot ta pasel taje, jaʼo yakal li kʼin Pentecostés ta sjabilal 33 te ta Jerusalene, kʼalal jun-chib toʼox xemana xchamel li Jesuse. Li vaʼ kʼakʼale, te van 120 yajtsʼaklomtak Jesús «inoj ta yoʼntonic li Chʼul Espiritue, jech lic cʼopojicuc ta yantic cʼopetic». Li jvulaʼaletik ti likemik tal ta yantik namal balumile chʼayal to kʼot yoʼontonik, yuʼun «laj yaʼyic ti laj yichʼic cʼopanel ta scʼop stuquic ta jujuchopique» (Hechos 1:15; 2:1-6).
Jech xtok, li sKʼop Diose chal ti oy to yan yajtsʼaklomtak Jesús ti laj yichʼik li matanal taje. June jaʼ li jtakbol Pabloe, ta skoj ti yichʼoj chʼul espiritue, kʼopoj ta yantik kʼopetik (Hechos 19:6; 1 Corintios 12:10, 28; 14:18). Jaʼ yuʼun, li matanal laj yakʼ xchʼul espiritu Diose xuʼ xkaltik ti oy kʼusi lek itun-oe. Vaʼun chaʼa, ¿kʼusi itun-o li ta skʼakʼalil Vivlia li matanal taje?
Jaʼ senyail ti koltabilik yuʼun Diose
Kʼalal la stsʼiba batel karta sventa jchʼunolajeletik ta Corinto li Pabloe —ti te skʼoplal junantik krixchanoetik ti chkʼopojik ta alel ta yantik kʼopetike—, laj yal ti matanal taje «jaʼ senyail ta sventa li bochʼotic muʼyuc [kʼusi] xchʼunojique», jaʼ xkaltik, li buchʼutik maʼukik yajtsʼaklomtak Cristoe (1 Corintios 14:22). Jaʼ yuʼun, li kʼopojel ta yantik kʼope, jech kʼuchaʼal li yantik matanal chakʼ li chʼul espiritue, jaʼ senyail ti koltabilik yuʼun Dios li jchʼunolajeletik ta achʼ tsobobbaile. Li matanaletik chakʼ espiritue xkoʼolaj kʼuchaʼal senyailtak ta tiʼkareteraetik ti chal bu jotukal chbat li bee, jaʼ yuʼun li buchʼutik tskʼan chojtikinik Diose jaʼ chkoltaatik-o sventa xakʼik venta bu junukal li steklumal stʼujoj Diose.
Ta yan xtoke, li Vivliae muʼyuk chal mi kʼopojik ta yantik kʼopetik li Jesuse o li j-alkʼopetik kʼalal skʼan toʼox xvul li Jesuse. Jamal xkiltik ti oy to yan kʼusi itun-o ta sventa li yajtsʼaklomtak Cristo li matanal taje.
Tun sventa laj yichʼ cholel-o li lekil aʼyeje
Kʼalal jaʼ toʼox lik ta chol mantal li Jesuse, laj yalbe yajtsʼaklomtak ti jaʼ noʼox akʼo xcholbeik judioetik li aʼyej sventa Ajvalilal yuʼun Diose (Mateo 10:6; 15:24). Jaʼ yuʼun, li yajtsʼaklomtak Jesuse bakʼintik to tajek bat xcholbeik mantal li yan lumetik ti chʼabal mas judioetik te nakajtike. Pe taje muʼyuk mas jalij.
Ta sjabilal 33 kʼalal muʼyuk toʼox jal xchamel xchiʼuk xchaʼkuxiel li Jesuse, laj yalbe yajtsʼaklomtak ti akʼo xbat spasik «ta jchʼunolajel [...] li cristianoetic ta jujun banamile». Jech xtok, laj yalanbe ti chbat yalik «ta sbejel banamil[e]» (Mateo 28:19; Hechos 1:8). Sventa chbat yalik ta spʼejel Balumil li lekil aʼyeje skʼan xkʼopojik ta yantik kʼop, maʼuk noʼox li ta hebreo kʼope.
Pe li baʼyel yajtsʼaklomtak Jesuse ep «ti muʼyuc chanubtasbilic, xchiʼuc ti muʼyuc yabtelique» (Hechos 4:13). ¿Kʼuxi van chutik sventa chbat xcholbeik mantal li krixchanoetik ta namal lumetik xchiʼuk ti yan-o skʼopike? Jaʼ koliyal li chʼul espiritue, junantik jcholmantaletik ti xmuyubajik noʼoxe ikʼopojik lek ta yantik kʼop ti mu toʼox snaʼike.
Jech kʼuchaʼal laj xa kiltike, li kʼopojel ta yantik kʼope chaʼtos kʼusi itun-o ti toj tsotsik skʼoplale. Baʼyel, jaʼ senyail ti koltabilik yuʼun Dios li baʼyel jchʼunolajeletike. Xchibal, tun sventa laj yichʼ cholbel lekil aʼyej li krixchanoetik ta yantik lume. Pe ¿kʼusi xuʼ xkaltik ta sventa li kʼopojel ta yantik kʼop avi kʼakʼale? ¿Mi koʼol van stu kʼuchaʼal ta voʼnee?
Li kʼopojel ta yantik kʼop avie: ¿mi jaʼ van senyail ti chkoltavan li Diose?
Ti oyuk avuʼun jlik mukʼta vun ti te atsʼibaoj junuk aʼyej ti cha kʼan akʼo snaʼik skotol li krixchanoetike, ¿bu van cha pakʼ o cha jokʼan? Ta melel, maʼuk te chbat avakʼ ta yut jpʼejuk bikʼit na. Moʼoj, jaʼ te chavakʼ ti bu xil skotol krixchanoetike. Jech kʼuchaʼal chal li Vivliae, ep krixchanoetik laj yilik ti yakal chkʼopojik ta yantik kʼop li yajtsʼaklomtak Jesús li ta kʼin Pentecostese. Ta skoj taje, «oxmil (3,000) la xchʼunic ta jun noʼox cʼacʼal» li krixchanoetike, jaʼ xkaltik, kʼotik ta yajtsʼaklom Cristo (Hechos 2:5, 6, 41). Pe li krixchanoetik ti chalik chkʼopojik ta yantik kʼop avi kʼakʼale, te noʼox chkʼopojik ta yut xchʼulnaik. ¿Kʼuxi xuʼ xtun ta senyail sventa snaʼik skotol krixchanoetik bu junukal li melel relijione?
Jech xtok, li lutsʼbail ti tspasik li buchʼutik muʼyuk nupunemike xchiʼuk li yan «yabtel jbecʼtaltique», li Vivliae chal ti jaʼ tsmak ta be sventa mu x-abtej lek ta jtojolaltik li chʼul espiritue. Jech xtok, «li bochʼotic jech tspasic chac leʼe», chal ti «mu xuʼ chventainatic o yuʼun li Diose» (Gálatas 5:17-21). Jaʼ yuʼun, ta skoj ti muʼyuk lek ta kʼelel xkuxlejalik li buchʼutik chal ti chkʼopojik ta yantik kʼope, mu labaluk ta aʼyel ti chopol ch-ilatik yuʼun epal krixchanoetike. Jech oxal, li Diose muʼyuk chakʼbe xchʼul espiritu li buchʼutik tspasik li kʼusitik chopol chal ta Vivliae. Ti ch-akʼbatikuke, xkoʼolaj kʼuchaʼal chkakʼbetik senyail junuk be ta karetera ti jot-o bu ch-ikʼvan batele.
Li kʼopojel ta yantik kʼop avie: ¿mi jaʼ sventa chichʼ cholel-o li lekil aʼyeje?
Jech kʼuchaʼal laj xa kiltike, li buchʼutik kʼopojik ta yantik kʼop ta baʼyel sigloe, itun sventa xcholbeik batel lekil aʼyej li krixchanoetik ti yan-o skʼopike. ¿Mi koʼol van stu li avi kʼakʼale? Teuk me ta joltik ti jeltos slumalik bu likemik li buchʼutik chkʼotik toʼox ta kʼin Pentecostés ta Jerusalene. Kʼalal koltaatik yuʼun chʼul espiritu li yajtsʼaklomtak Cristo sventa skʼoponik li krixchanoetik ta jujuvokʼ skʼopike, lek laj yaʼibeik smelolal li krixchanoetike. Yan li avie, li buchʼutik chalik ti chkʼopojik ta yantik kʼop ta alele, solel mu xkaʼibetik smelolal li kʼusi chalike.
Li buchʼutik chkʼopojik ta yantik kʼop avi kʼakʼale xchiʼuk li buchʼutik laj yichʼik li matanal ti ikʼopojik ta yantik kʼop ta baʼyel sigloe, lek jamal xvinaj ti mu xkoʼolaj ta jyalele. Maʼuk noʼox taje, kʼalal cham li jtakboletike chʼabal sprevailtak mi oy to buchʼu laj yichʼ li matanal chakʼ espiritue, jaʼ xkaltik, li kʼopojel ta yantik kʼope. Li buchʼutik chchanik Vivliae mu labaluk chaʼiik maʼ taje, yuʼun li Pabloe xi onoʼox laj yal ta sventa li matanaletik chakʼ espiritue: «Li cʼopojel ta yantic cʼope chlaj scʼoplal» (1 Corintios 13:8). Vaʼun chaʼa, ¿kʼuxi xuʼ jnaʼtik buchʼutik chakʼbe xchʼul espiritu avi li Diose?
¿Kʼuxi xuʼ jnaʼtik buchʼutik yichʼoj li chʼul espiritue?
Li Jesuse snaʼoj onoʼox ti chlaj skʼoplal li kʼopojel ta yantik kʼop kʼalal mi oy xaʼox kʼu sjalil slikel li stsobobbail yajtsʼaklomtake. Jaʼ yuʼun, kʼalal jutuk xaʼox skʼan xchame laj yal kʼusi ch-ojtikinatik-o li melel yajtsʼaklomtak Cristoe, xi laj yale: «Jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Maʼuk noʼox taje, li 1 Corintios 13:8 —ti bu chal ti chlaj skʼoplal li matanaletik chakʼ espiritue— xi chal xtoke: «Li cʼanvaneje mu xlaj o scʼoplal».
Jech onoʼox, li kʼanelale jaʼ li talelal ti baʼyel oy ta sbalunebal «yabtel Chʼul Espiritue» (Gálatas 5:22, 23). Jaʼ yuʼun, li buchʼutik yichʼojik chʼul espiritue —xchiʼuk ti koltabilik yuʼun Diose— jaʼik li buchʼutik skʼanoj sbaik ta melele. Jech xtok, li yoxibal talelal ti jaʼ yabtel chʼul espiritue, jaʼ li lekilale. Jech oxal, li melel yajtuneltak Diose tspasik persa ti oyuk lekilal yuʼunike, tslokʼesik li kʼusitik chopol ti yakʼoj lek yibel ta yoʼontonike, li toyobbail ta skoj ti yan-o stsʼunbalike xchiʼuk li majbaile.
Jech xtok, skʼan teuk ta joltik li kʼusi laj yal Jesús ta Hechos 1:8. Laj yal ti chichʼ svuʼel stsatsalik li yajtsʼaklomtake xchiʼuk ti chbat xcholik «ta sbejel banamil» li lekil aʼyeje. Laj yal xtok ti tspasik «cʼalal to ta slajebal cʼacʼal[e]» (Mateo 28:20). Jech oxal, li buchʼutik chcholik li lekil aʼyej ta spʼejel Balumil avie jaʼ svinajeb ti yichʼojik li chʼul espiritue.
¿Kʼusi cha nop li voʼote? ¿Buchʼutik xvinaj ti yichʼojik li xchʼul espiritu Diose? ¿Buchʼutik ti chakʼik ta ilel li yabtel chʼul espiritue —mas to li kʼanelal xchiʼuk li lekilale— xchiʼuk ti muʼyuk chbatik ta pas kʼop, manchuk mi chichʼik nutsel yuʼun junantik ajvaliletik ta skoj taje? (Isaías 2:4.) ¿Buchʼutik ti chakʼbeik yipal spʼajel li kʼusitik chopole, jech kʼuchaʼal li mulivajele xchiʼuk ti tslokʼes ta stsobobbailik li buchʼutik jech tspasik mi mu sutes yoʼontonike? (1 Corintios 5:11-13.) Jech xtok, ¿buchʼutik ti yakal chalik echʼel ta spʼejel Balumil ti jaʼ noʼox spatobil yoʼonton krixchanoetik li Ajvalilal yuʼun Diose? (Mateo 24:14.)
Li jtsʼibajometik yuʼun li revista liʼe xchʼunojik lek ti jaʼ noʼox li yajrextikotak Jeova xvinaj ti yichʼojik chʼul espiritu jech kʼuchaʼal chal Vivliae. ¿Kʼu yuʼun mu xbat avojtikinan lek sventa xavakʼ venta mi ta melel yichʼojik li chʼul espiritue?