Utsʼ-alaliletik, «chapalucoxuc me»
«Chapalucoxuc me. Yuʼun cʼalal muʼyuc chanopic chital vuʼun ti Xnichʼon cristiano licʼote, jaʼo chivul ta loqʼuel.» (LUC. 12:40)
1, 2. ¿Kʼu yuʼun skʼan jtsaktik lek ta mukʼ li mantal laj yal Jesús ti «chapalucoxuc me», xie?
XI LAJ yal li Jesuse: «Cʼalal chital jchiʼuc jxojobal, vuʼun ti Xnichʼon cristiano licʼote, [...] scotol li cristianoetic ta sbejel banamile [...] ta xlic jvocʼan». ¿Kʼusi van chkʼot ta pasel ta atojolal xchiʼuk avutsʼ avalal kʼalal mi kʼot taje? (Mat. 25:31, 32.) Ta skoj ti mu jnaʼtik kʼusi ora chvul li Jesuse, toj tsots me skʼoplal ti jtsaktik lek ta mukʼ li mantal liʼe: «Chapalucoxuc me» (Luc. 12:40).
2 Li ta yan xchanobil i-echʼe te laj kiltik ti xuʼ vikʼil satik ta mantal li utsʼ-alaliletik mi lek tspasik li kʼusi sbainojik ta jujuntale. Li avi une ta jkʼelbetik skʼoplal kʼusi to xuʼ spasik ta jujuntal sventa lekuk oyik ta mantal skotolik.
Lekuk me li jsatike
3, 4. 1) ¿Kʼusi petsʼal xuʼ xloʼlaat li utsʼ-alaliletik yajtsʼaklomtak Cristoe? 2) ¿Kʼusi skʼan xal kʼalal lekuk asatik, xie?
3 Skʼan me mu kʼusi xchʼay koʼontontik ta spasbel yabtel li Jeovae, jech oxal skʼan me lekuk vikʼil satik li kutsʼ kalaltik mi ta jkʼantik lek chtaatik yuʼun Cristoe. Li saʼel kʼulejale ep sloʼlaoj utsʼ-alaliletik. Jech oxal toj tsots me skʼoplal ti lekuk li jsatik kʼuchaʼal laj yal Jesuse (kʼelo Mateo 6:22, 23). Jech kʼuchaʼal jun joko ti chakʼ xojobal bu ta jtekʼan batel koktike xchiʼuk ti jaʼ tskoltautik sventa mu xijlome, li jsatik ta babakʼop chkalbetik skʼoplal eke, chakʼbe xojobal jbetik xchiʼuk tskoltautik sventa mu jpʼosi koktik ta jkuxlejaltik (Efe. 1:18).
4 Jech kʼuchaʼal skʼan lekuk oy xchiʼuk lekuk ch-abtej li sbekʼ jsatik sventa xkiltik lek li kʼusitik ta jkʼeltike, li jsatik ta babakʼop eke skʼan lekuk oy. Kʼalal lek noʼox li jsatike jaʼ skʼan xal ti jtos noʼox li kʼusi chkakʼ ta koʼontontik staele. Jaʼ skʼan xal ti jaʼ ta jkʼeltik batel lek li kʼusitik sventa mantale, ti maʼuk chbat ta koʼontontik li saʼel kʼulejale o ti maʼuk xa noʼox jaʼ chbat-o koʼontontik li kʼusi chkakʼbe kutsʼ kalaltike (Mat. 6:33). Taje jaʼ skʼan xal ti xijmuyubaj noʼox akʼo mi jsetʼ-juteb li kʼusi oy kuʼuntike, ti jaʼ baʼyel xkakʼ ta jkuxlejaltik li spasbel yabtel Diose (Heb. 13:5).
5. ¿Kʼuxi laj yakʼ ta ilel jun tseb ti yakʼoj lek ta yoʼonton li spasbel yabtel Diose?
5 Toj lek kʼusitik chkʼot ta pasel kʼalal ta sbikʼtalik noʼox chichʼ chanubtasel ti akʼo lekuk noʼox satik li alab-nichʼnabiletike. Jkʼeltik avil li kʼusi ikʼot ta pasel liʼe. Kʼalal itsuts yuʼun xchanun jun tseb ti likem ta Etiopiae lek tajek skalifikasion la slokʼes, jech oxal albat ti ch-akʼbat sbeka sventa xchanunaj batel mase. Pe muʼyuk la stsak, yuʼun jaʼ te yakʼoj lek sat ti ch-abtej ta tsʼakal orae. Ta mas jelavel une laj yichʼ albel mi tskʼan ch-abtej, ti 3,000 euro chichʼ tojel jujun ue. Toyol xa tajek li tojolile, yuʼun mu jechuk stojol skotol krixchanoetik li ta lum taje. Pe jaʼ noʼox jech xtok un, jaʼ yakʼoj-o ta yoʼonton abtelal ta prekursor li tsebe. Muʼyuk bu xbat sjakʼbe stot smeʼ ti mu skʼan xchʼam li abtelale. ¿Kʼu yelan laj yaʼiik li kʼusi ikʼot ta nopel yuʼun stsebike? Imuyubajik tajek xchiʼuk laj yalbeik ti jun yoʼontonik ta skoj taje.
6, 7. ¿Kʼu yuʼun skʼan pʼijukutik?
6 Li kʼusi laj yal Jesús te ta Mateo 6:22, 23 te chalbutik jun pʼijubtasel ta sventa li pichʼ-oʼontonale, yuʼun kʼalal «muʼyuc lec li asatique», ti xie, jaʼ skʼan xal ti «toj chopole» o ti «j-itʼixale», ti jaʼ li pichʼ-oʼontonale o li skʼanel tajek jtosuk kʼusie. ¿Kʼusi tsnop Jeova ta sventa li skʼanel tajek kʼusitike xchiʼuk li pichʼ-oʼontonale? Xi tstakʼ li Vivliae: «Mu xa me xavalbeic scʼoplal li mulivajele, li cʼusitic yan chopole, xchiʼuc li xpichʼetel avoʼntonique» (Efe. 5:3).
7 Lek xvinaj kʼalal oy kʼusi chpichʼ-oʼonta li yan krixchanoetike, pe mu xkakʼtik venta kʼalal voʼotik jech chkʼot ta jtojolaltike. Jaʼ yuʼun toj lek me ti jchʼuntik li mantal laj yal Jesús liʼe: «Bijanic me, qʼuelo me abaic ta sventa li xpichʼetel avoʼntonique» (Luc. 12:15). Sventa xkakʼtik ventae skʼan jkʼel jbatik lek xchiʼuk ti xkakʼtik venta ti kʼusi oy ta koʼontontike. Stekel li yajtsʼaklomtak Cristoe skʼan me skʼelik lek kʼuyepal chlaj takʼin xchiʼuk kʼuyepal kʼakʼal chchʼay yuʼunik ta sventa li chʼayob oʼontonale xchiʼuk ta sventa li kʼusitik mukʼtik tsmanike.
8. ¿Kʼu yuʼun skʼan pʼijukutik kʼalal oy kʼusi ta jmantike?
8 Skʼan me jkʼeltik lek mi xtoj kuʼuntik kʼalal skʼan toʼox jmantik jtosuk kʼusie. Pe maʼuk noʼox taje, yuʼun oy to kʼusitik skʼan jtsaktik ta venta xtok. Xi jakʼbe jbatike: «¿Mi xokolun van sventa ta jtunes li kʼusi ta jkʼan ta jmane xchiʼuk mi xkʼel van kuʼun? ¿Mi jal van yichʼoj sventa jchan spikel?». Xi me skʼan sjakʼbe sbaik ek li kerem-tsebetike: «¿Mi xkichʼ noʼox jmelol o mi jaʼ tspasun ta mantal li kʼusitik chkil ta television o ta yan kʼusitike xchiʼuk mi te xa xi-iʼun ta stojolal jtot jmeʼ sventa smanbeikun kʼuʼil pakʼaletik o yan kʼusitik ti toyolik stojole?». Ta melel, stekelik me skʼan xi sjakʼbe sbaike: «¿Mi jaʼ sventa ta jkolta-o kutsʼ kalal yoʼ chapalik kʼalal chtal li “Xnichʼon cristiano[e]”?». Mu me xchʼay ta joltik li kʼusi yaloj tspas ta melel Jeova liʼe: «Muʼyuc chaquictaot, muʼyuc chajcomtsanot» (Heb. 13:5).
Kakʼ ta koʼontontik stael li kʼusitik sventa mantale
9. ¿Kʼuxi tstabeik sbalil utsʼ-alaliletik kʼalal chakʼ ta yoʼontonik stael li kʼusitik sventa mantale?
9 Jtos ti kʼusi xuʼ spasik xtok li utsʼ-alaliletik sventa tsotsuk lek li xchʼunel yoʼontonike xchiʼuk ti lek noʼox oyik ta mantale jaʼ ti xakʼ ta yoʼontonik stael li kʼusi xtoj-o jvokoltike xchiʼuk ti akʼo xakʼbeik yipal ta stael une. Kʼalal jech tspasike jaʼ me te chakʼik venta kʼu xa yelan chʼiemik ta mantal xchiʼuk ti xakʼik venta kʼusi abtelal skʼan spasik batel mase (kʼelo Filipenses 1:10).
10, 11. ¿Kʼusi yakʼoj ta yoʼonton tsta li avutsʼ avalale, xchiʼuk kʼusi xuʼ xavakʼ ta avoʼontonik stael ta mas tsʼakal?
10 Kʼalal jaʼ chkakʼ ta koʼontontik stael li kʼusi spas kuʼuntik akʼo mi mu toj masuk tsots skʼoplal yilele xchiʼuk ti chkoltavan jayvoʼikuk o skotolik li ta utsʼ-alalile, toj ep me sbalil ta jtatik. Jtos kʼusi xuʼ jpastike jaʼ ti xnop xkaʼitik skʼelel jujun kʼakʼal li foyeto Jkʼeltik skotol kʼakʼal li sKʼop Diose. Jaʼ me te chakʼ venta li jolil ta utsʼ-alalil ti kʼu xa yelan chʼiemik ta mantal ta jujuntal li yutsʼ yalal kʼalal chakʼ sloʼilike. Toj ep me sbalil xtok ti jmojuk jkʼeltik li sKʼop Diose, yuʼun me jaʼ te xuʼ xchanik skʼelel mas vun li ololetike xchiʼuk ti xaʼibeik mas smelolal li Vivliae (Sal. 1:1, 2). Jech xtok, toj lek me ti xkakʼ kipaltik sventa xlekub batel mas ti kʼuyelan ta jpastik orasione. ¿Kʼu yuʼun mu xkakʼ ta koʼontontik xtok ti akʼo jchʼiestik batel mas li yabtel chʼul espiritue? (Gál. 5:22, 23.) Yan kʼusi xuʼ jpastike jaʼ ti xkaʼibetik smelolal ti kʼuyelan chaʼi sbaik li krixchanoetik ta jtatik ta chol mantale. Jaʼ me jech chkakʼbetik yil kalab jnichʼnabtik ti skʼan oyuk slekil yoʼontonike, vaʼun yikʼaluk jech jtijbetik yoʼontonik ti xtunik ta prekursor regular o ta misioneroale.
11 ¿Kʼusi yan xuʼ xavakʼ ta avoʼontonik spasel xchiʼuk li avutsʼ avalale? ¿Mi xuʼ mas jal xalokʼik ta chol mantal? ¿Ti muʼyuk xa chaxiʼ kʼalal chacholik mantal ta telefono, ta kaye o ta pʼolmajebaletike? ¿Kʼusi chanopik xtok ti xbat acholik mantal ti bu skʼan mas jcholmantaletike? ¿Mi oy van buchʼu xuʼ xchan yan kʼop ta avutsʼ avalal sventa xcholbeik mantal li jyanlum krixchanoetike?
12. ¿Kʼuxi xuʼ stsatsubtas ta mantal yutsʼ yalal li jolile?
12 Li totile skʼan sjakʼbe sba kʼusitik skʼan to slekubtasik ta xkuxlejalik li yutsʼ yalale, ta tsʼakal une skʼan skʼel kʼusitik xuʼ xakʼbe spas ta jujuntal sventa spas yuʼunik, sventa taje skʼan stsak ta venta li kʼusi xtojobik ta spasele xchiʼuk ti kʼuyelan li xkuxlejalike (Pro. 13:12). Melel onoʼox chaʼa, ep kʼakʼal chichʼ li kʼusi lek ta jkʼan ta jtatike. Jech oxal yikʼaluk van skʼan jaʼ jutuk xa jchʼay koʼontontik ta skʼelel li televisione, vaʼun jaʼ jech ta jchʼakbetik skʼakʼalil li kʼusitik sventa mantale (Efe. 5:15, 16). Kʼalal tsots chkakʼbetik yipale jaʼ me tskolta kutsʼ kalaltik sventa jtatik li kʼusi jnopojtik ta jpastike (Gál. 6:9). Vaʼun jaʼ me «jech chil scotolic» ti chʼiem xa ta mantal avutsʼ avalale (1 Tim. 4:15).
Skʼan mu xkiktatik li Akʼobal sventa Yichʼel ta Mukʼ Jeova ta Kutsʼ Kalaltike
13. ¿Kʼusi laj yichʼ jelel li ta tsobajeletik jujun xemanae, xchiʼuk kʼusitik skʼan jakʼbe jbatik?
13 Li ta 1 yuʼun enero ta 2009 ijel li tsobajeletik jujun xemanae, taje skoltaoj ep utsʼ-alaliletik sventa chapalikuk lek kʼalal chvul li «Xnichʼon cristiano[e]». Li tsobajel ti jaʼ toʼox sbi Xchanel Livro yuʼun Tsobobbail ti parte toʼox chichʼ pasele, pasem xa ta jmoj xchiʼuk li Chanob vun sventa Kabteltik yuʼun Diose xchiʼuk li Tsobajel sventa Tunelale. Li utsʼ-alaliletik yajtsʼaklomtak Cristo une xuʼ me stsatsubik ta mantal kʼalal jmoj chichʼik ta mukʼ Jeova jun akʼobal ta jujun xemanae. Ta skoj ti oy xa mas ta chib jabil slikel taje, lek me ti xi jakʼbe jbatike: «¿Mi yakal ta jtunes xchiʼuk kutsʼ kalal li akʼobal taje, o mi yakal ta jchan jVivlia mi jtuk oyune? ¿Mi yakal tstsatsubtasunkutik ta mantal li koltael taje?».
14. 1) ¿Kʼusi chtun-o li Akʼobal sventa Yichʼel ta Mukʼ Jeova ta Kutsʼ Kalaltik xchiʼuk li xchanel jVivlia jtuktike? 2) ¿Kʼu yuʼun tsots skʼoplal ti xijchanunaj jun akʼobal ta jujun xemanae?
14 Li kʼusi mas tsots skʼoplal ti chijchanunaj xchiʼuk kutsʼ kalaltik o ti chijchanunaj jtuktike jaʼ ti masuk nopol oyutik ta stojolal Diose (Sant. 4:8). Mas me tstsatsub ti kʼuyelan xkil jbatik xchiʼuk Jeova mi chkojtikintik mas jujun xemanae xchiʼuk mi chkojtikinbetik mas li sKʼope. Kʼalal mas nopol oyutik ta stojolal une jaʼ me mas tstij koʼontontik sventa jkʼantik ta sjunul koʼontontik, jchʼuleltik, skotol joltik xchiʼuk ta skotol jtsatsaltik (Mar. 12:30). Jaʼ me jech mas ta jkʼan ta jchʼunbetik smantal xtok xchiʼuk ti ta jkʼan ta jchanbetik stalelale (Efe. 5:1). Kʼuchaʼal chkiltike, toj tsots me skʼoplal ti xketʼestik jujun xemana li Akʼobal sventa Yichʼel ta Mukʼ Jeova ta Kutsʼ Kalaltike, yoʼ jech lek chapalutik jkotoltik kʼalal mi tal «li tsots [vokol]» ti albil xa onoʼox skʼoplale (Mat. 24:21). Jaʼ jech, toj tsots me skʼoplal sventa kuxul xijkom.
15. ¿Kʼuxi chkoltavan sventa masuk jkʼan jbatik xchiʼuk kutsʼ kalaltik li akʼobal sventa yichʼel ta mukʼ Jeovae?
15 Li Akʼobal sventa Yichʼel ta Mukʼ Jeova ta Kutsʼ Kalaltike oy to kʼusi chtun-o: jaʼ ti masuk lek xkil jbatik xchiʼuk li kutsʼ kalaltike. Ta melel, kʼalal jmoj ta jkʼelbetik echʼel skʼoplal jujun xemana li kʼusitik sventa mantale jaʼ me tskoltautik sventa masuk jkʼan jbatik li ta kutsʼ kalaltike. Kʼalal jmoj kʼusitik chchanik ta Vivlia li nupultsʼakaletike, mas to me jun yoʼontonik (kʼelo Eclesiastés 4:12). Jech xtok, kʼalal chichʼ ta mukʼ Jeova li totil-meʼiletik xchiʼuk yalab xnichʼnabike jaʼ mas tskʼan-o sbaik, yuʼun jaʼ «mero jpasvanej ta jun» li kʼanelale (Col. 3:14).
16. ¿Kʼusi sbalil staojik oxvoʼ ermanaetik ti jmoj chchanik Vivlia jun akʼobal ta xemanae?
16 Jkʼelbetik skʼoplal oxvoʼ meʼon ermanaetik ti oy xa sjabilalike, ti staojbeik lek sbalil li Akʼobal sventa Yichʼel ta Mukʼ Jeova ta Kutsʼ Kalaltike. Li ermanaetik taje maʼuk yutsʼ yalal sbaik, pe voʼne xa onoʼox tajek ti yamiga sbaike. Maʼuk noʼox jmoj chchʼay yoʼontonik ta skoj ti jmoj slumalike, moʼoj, jmoj tspasik xtok li kʼusitik sventa mantale. Jaʼ yuʼun la snopik ti jmoj chchanik Vivlia jun akʼobal ta xemanae. Jaʼ lik skʼelik li livro “Testimonio cabal” del Reino de Dios sbie. Xi laj yal li jun ermanae: «Kʼupil tajek chkaʼikutik xchanel, jaʼ yuʼun nopajtik noʼox ti mas ta jun ora chichanunajkutike. Te xa jkʼelojkutik yilel kʼusi la snuptanik li ermanoetik ta baʼyel sigloe xchiʼuk chkalkutik ta jujuntal ti kʼusi van ta jpaskutik ti jaʼuk jech jnuptankutike. Vaʼun chkakʼbekutik yipal sventa jtuneskutik ta chol mantal li kʼusi ta jchankutike. Jech oxal, mas xa xitojobkutik ta chol mantal xchiʼuk ta chanubtasvanej xchiʼuk mas xa lek kʼusitik chkʼot ta pasel kuʼunkutik». Pe maʼuk noʼox tsatsubemik ta mantal, yuʼun mas xa toj lek xil sbaik xtok. Xi chal yoxvoʼalike: «Toj ep sbalil chkilkutik ti vaʼ yelan ta jtsob jbakutike».
17. ¿Kʼusitik chkoltavan sventa lek x-echʼ li Akʼobal sventa Yichʼel ta Mukʼ Jeova ta Kutsʼ Kalaltike?
17 ¿Kʼuxi jtaojbetik sbalil ek li Akʼobal sventa Yichʼel ta Mukʼ Jeova ta Kutsʼ Kalaltik xchiʼuk li xchanel Vivlia mi jtuktike? Yikʼaluk me muʼyuk bu ta jtabetik sbalil mi muʼyuk bu ta jchʼakbetik lek yoraile. Mu me stakʼ xkakʼtik smakutik ta be xtok li kʼusitik muʼyuk tsots skʼoplale. Skʼan me chapalik xa lek li utsʼ-alalil mi sta yoraile. Jech xtok, jaʼ me skʼan jtʼujtik jun mantal ti lek jtunel yuʼun li kutsʼ kalaltike. ¿Kʼusi van skʼan xapas sventa junuk noʼox avoʼontonik kʼalal chachanunajike? Jaʼ mi oy lek smelolal kʼuyelan chachanubtasvane, mi chavichʼ abaik ta mukʼe xchiʼuk mi jun noʼox yoʼonton avuʼun li avutsʼ avalale (Sant. 3:18).a
«Viqʼuiluc me jsatic» xchiʼuk «chapalu[kutik] me»
18, 19. ¿Kʼusi skʼan xapasik ta avutsʼ avalalik ta skoj ti toj poʼot xa xtal li «Xnichʼon cristiano[e]»?
18 Li kʼusi toj chopol chkʼot ta pasel ta balumil ti leʼ xa slikel tal ta 1914, jaʼ me chakʼ ta ilel ti poʼot xa xlaj li kʼusitik toj chopol yuʼun Satanase. Taje jaʼ svinajeb ti poʼot xa tajek xtal li Armagedone. Poʼot xa me xtal li «Xnichʼon cristiano» sventa chchapan li jpasmuliletik kʼuchaʼal yaloj Jeovae (Sal. 37:10; Pro. 2:21, 22). Skʼan me oy kʼusi jpastik xchiʼuk kutsʼ kalaltik ta skoj ti jnaʼojtik taje.
19 ¿Mi yakal chachʼun li mantal laj yal Jesús ti skʼan lekuk noʼox li asate? ¿Mi yakal chavakʼ ta avoʼontonik stael kʼusitik ta mantal xchiʼuk li avutsʼ avalale, ti maʼuk jech chapasik kʼuchaʼal li krixchanoetik ta balumil ti jaʼ noʼox batem ta yoʼontonik ti tskʼanik ojtikinele, ti tskʼan smukʼulalike xchiʼuk ti tskʼan ep stakʼinike? ¿Mi yakal chapas li Akʼobal sventa Yichʼel ta Mukʼ Jeova ta Kutsʼ Kalaltike xchiʼuk mi yakal chachan aVivlia mi atuk oyote? ¿Mi yakal chkʼot ta pasel avuʼun li kʼusi anopoj chapase? Jech kʼuchaʼal laj kiltik ta yan xchanobile, ¿mi yakal chapas li kʼusi abainoj yuʼun Jeova kʼuchaʼal malalilot, ajnilalot xchiʼuk alab-nichʼnabiloxuk sventa vikʼiluk asatik ta mantale? (1 Tes. 5:6.) Mi jaʼ jech yakal chapasike, «chapa[lo]xuc me» kʼalal chtal li «Xnichʼon cristiano[e]».
[Tsʼib ta yok vun]
a Kʼelo li revista Li Jkʼel osil ta toyole, 15 yuʼun oktuvre ta 2009, pajina 29 kʼalal ta 31, sventa xanaʼ kʼusitik xuʼ xachanik li ta Akʼobal sventa Yichʼel ta Mukʼ Jeova ta Kutsʼ Kalaltike. Jech xtok, te chal kʼusi xuʼ xapas sventa jtuneluk lek avuʼunik xchiʼuk ti junuk noʼox avoʼontonik x-echʼe.
¿Mi xvul ta ajol?
• ¿Mi xuʼ xaval kaʼitik kʼuxi lek chapalutik xchiʼuk kutsʼ kalaltik...
... kʼalal lek noʼox li jsatike?
... kʼalal chkakʼ ta koʼontontik stael li kʼusitik sventa mantale?
... kʼalal chkichʼtik ta mukʼ Jeova xchiʼuk kutsʼ kalaltik jun akʼobal ta jujun xemanae?
[Lokʼol ta pajina 13]
Kʼalal lek noʼox li jsatike jaʼ me mu xchʼay-o koʼontontik li kʼusitik liʼ ta balumile