Jtsʼaklitik batel li Cristoe, li lekil jbeiltasvaneje
LI BUCHʼUTIK jaʼ tspat yoʼontonik ta stojolal li jpolitikoetike, xuʼ me mu junuk yoʼonton xkomik. Pe li buchʼutik jaʼ tstsʼakliik batel li Cristoe ep bendision tstaik. Xi laj yal li stuke: «Laʼic ta jtojol acotolic, voʼoxuc ti lubenoxuc yuʼun li tsatsal abtele, xchiʼuc li alal icatsile, vuʼun ta xcacʼ acux avoʼntonic. Jaʼ cuchic li icatsil cuʼune, jaʼ chanic cʼu xʼelan coʼnton yuʼun toj lec coʼnton, biqʼuit cacʼoj jba. Me jech chapasique, jech cux xi avoʼntonic» (Mat. 11:28, 29). Ta melel, li beiltaseletik chakʼbutik Jesuse jaʼ me tstsatsubtas koʼontontik. Yuʼun li Jesuse oy tajek ta yoʼonton li buchʼutik oy svokolike xchiʼuk li buchʼutik chat yoʼontonike, xchiʼuk chalbe ti akʼo jaʼ xkuchbeik li ikatsil yuʼune. Pe ¿bu kʼalal smakoj xchʼunel li beiltasel yuʼune?
Li jtakbol Pedroe xi chalbe smelolale: «Yuʼun jaʼ jech laj yichʼ vocol ta aventaic ec li Cristoe. Jaʼ laj yacʼboxuc avilic cʼusi tscʼan chapasic, yuʼun jech acʼo atsʼaclinic batel» (1 Ped. 2:21). ¿Mi toj tsots van skʼoplal ti jtsʼaklitik batel li Jesuse? Kalbetik junuk skʼelobil: nopo noʼox avaʼi ti te oyot ta jun ospital ta skoj ti stsakojot jun chamel ti muʼyuk xpoxile xchiʼuk ti ep buchʼutik jech ipike. Pe li te ta ospital taje oy jun doktor ti snaʼoj kʼuxi xuʼ xakol li ta achamel taje. ¿Mi mu tauk xachʼun skotol li kʼusitik chalbot xchiʼuk li kʼusitik skʼan chapase? Taje jaʼ me jech skʼan jpastik li yajtsʼaklomutik Cristoe. Mi ta jkʼantik kuxul xijkome, skʼan ta jchanbetik stalelal li Jesuse. Taje jaʼ te smakoj ti skʼan jchʼunbetik li kʼusi chalbutike xchiʼuk ti jmoj xij-abtejutik xchiʼuk li buchʼutik svaʼanojan avie.
Ta xkaʼibetik xchiʼuk ta jchʼunbetik
Li kʼusi laj yal Jesús te ta Mantaletik ta Vitse, jaʼ liʼe: «Li bochʼo ta xaʼay cʼusi chcale, me ta xchʼune, jaʼ coʼol jech chac cʼu chaʼal jun bijil vinic la spas sna ta ba ton. Ital tsots voʼ. Ijelov nojelal ta spat xocon li snae. Ital tsots icʼ. Tsots icʼot icʼ yoʼ bu oy li snae. Pero muc xlom li snae, yuʼun lec tsacal ta ton li snaclebe» (Mat. 7:24, 25).
Li Jesuse laj yal ti jaʼ jun «bijil vinic» li buchʼu ta xchʼun xchiʼuk ta xaʼi li kʼusi chale. ¿Kʼusi xuʼ xkaltik li ta jtojolaltike? ¿Mi ta van jchʼuntik ta slekil koʼontontik skotol li smantaltak Cristoe xchiʼuk ti jaʼ jech chkakʼtik ta ilel ti chkichʼtik ta mukʼ xchiʼuk ti oy sbalil chkiltik li chanubtaseletik laj yakʼe? ¿Mi jaʼ noʼox ta jchʼuntik li kʼusitik kʼunik ta pasel o li kʼusi lek chkaʼitike? Jvules ta joltik ti xi laj yale: «Yuʼun jaʼ ta jpasbe scotol cʼacʼal li cʼusi lec [chil li jTote]» (Juan 8:29). Taje jaʼ li talelal skʼan jchantike.
Li ta baʼyel sigloe, li jtakboletike laj yiktabutik jun slekil kʼelobil ti skʼan jchʼuntik li beiltasel chakʼ Cristoe. Jech kʼuchaʼal liʼe, jun veltae xi laj yalbe Jchanubtasvanej li jtakbol Pedroe: «Li vuʼuncutique laj xa jcomtsancutic scotol li cʼusitic oy toʼox cuʼuncutique. Liʼ xa jchiʼinojotcuti[ke]» (Mar. 10:28). Jech kʼuchaʼal chkiltike, li jtakboletike oy tajek sbalil laj yilik li beiltasel chakʼ Jesuse, jaʼ yuʼun ta sjunul yoʼonton laj yiktaik komel skotol li kʼusi oy yuʼunik sventa tstsʼakliik batel li Jesuse (Mat. 4:18-22).
Jmoj chij-abtejutik xchiʼuk li buchʼutik svaʼanojan li Cristoe
Kʼalal jutuk xaʼox skʼan xcham li Jesuse, laj yal li yan kʼusi xuʼ jpastik sventa jchʼunbetik li smantale, li «bochʼotic ta xichʼ ta mucʼ li bochʼo tacbilic cuʼune, jaʼ vuʼun chiyichʼun o ta mucʼ» (Juan 13:20). Li buchʼutik svaʼanojan ti jaʼ li buchʼutik tʼujbilik chbat ta vinajele laj yal ti jaʼ xchiʼiltake (Mat. 25:40). Kʼalal chaʼkuxi xchiʼuk bat ta vinajele, li Cristoe laj yal ti jaʼ «xqʼuexol» chkomike. Ti jaʼ xa chkʼopojik ta stojolal li Yajvalike, ta xalbeik li krixchanoetik ti akʼo lek xil sbaik yan velta xchiʼuk li Jeovae (2 Cor. 5:18-20). Jaʼ yuʼun, kʼalal jech chkiltik kʼuchaʼal jun Jbeiltasvanej li Jesuse, te smakojbe skʼoplal ti skʼan jchʼunbetik smantal li xchiʼiltake.
Skʼan me jnoptik lek kʼuyelan chkaʼi jbatik kʼalal chkaʼitik li tojobtaseletik ta jtatik kʼalal ta jchantik li Vivliae, kʼalal ta jkʼeltik li vunetik sventa yajtsʼaklomtak Cristoe xchiʼuk kʼalal chijbat ta tsobajeletike. Yuʼun jaʼ te xuʼ jtatik li kʼusi chalbutik li Jbeiltasvanej kuʼuntike (2 Ped. 3:1, 2). Mi ta jkʼeltik li vunetik taje jaʼ me jech chkakʼtik ta ilel ti ta jtojtik ta vokol li veʼliletik ta mantal chij-akʼbate. Vaʼun chaʼa, ¿kʼu van yelan chkaʼitik kʼalal chij-albat ep ta velta junuk tojobtasel ta Vivliae? Kalbetik skʼoplal li mantal ti skʼan jaʼ noʼox xijnupun xchiʼuk li buchʼu «xchʼunoj Cajvaltique» (1 Cor. 7:39). Li mantal taje mas xa ta sien jabil yichʼoj albel tal skʼoplal li ta revista Li Jkʼel osil ta toyole. Li tojobtaseletik ti yakʼoj Jeova ti chlokʼ ta revistaetike, jaʼ svinajeb ti skʼanojutik tajek xchiʼuk ti oyutik ta yoʼontonik li xchiʼiltak Cristoe. Kʼalal lek ta jchʼuntik li mantaletike, jaʼ me jech yakal ta jchʼunbetik li beiltaseletik chakʼ Jesuse.
«Li sbe bochʼotic tucʼ yoʼntonique lec sac jaman jech chac cʼu chaʼal chvocʼ tal yibel vinajel ta jujun sobe, jech ta cʼuncʼun tsacub batel jaʼ to cʼalal sac xa o lec li osile.» Jech kʼuchaʼal chal li Proverbios 4:18, li beiltasel chakʼbutik Jesuse mu teuk noʼox chpaj, moʼoj, yuʼun yakal-o chjam batel smelolal. Jaʼ yuʼun ti kʼuxi xuʼ jmoj xij-abtej xchiʼuk li xchiʼiltak Cristoe jaʼo kʼalal ta sjunul koʼontontik ta jchʼamtik li kʼusitik achʼ to chichʼ aʼibel smelolal ta Vivlia ti chal li «jʼabtel ti jun [«tukʼ», NM] yoʼnton [...], ti lec bije» (Mat. 24:45).
¿Kʼusi to xuʼ jpastik sventa jtsaktik ta mukʼ li yabtel akʼbil li xchiʼiltak Cristoe? Jaʼ ti kʼalal jmoj chij-abtej xchiʼuk li moletik ta tsobobbaile, jech kʼuchaʼal tojobtasvan li Pabloe: «Chʼunbeic me cʼusi chayalboxuc li bochʼotic sventainojoxuque; ichʼic me ta mucʼ. Yuʼun jaʼ ta xchabioxuc» (Heb. 13:17). Xuʼ van chalbutik junuk mol ta tsobobbail ti skʼan jpastik skotol xemana li Akʼobal sventa Yichʼel ta Mukʼ Jeova ta Kutsʼ Kalaltike o xuʼ van xalbutik ti oy to bu skʼan xlekub jtosuk kabteltik ta chol mantale. Yikʼaluk van xalbutik xtok li jkʼelvanej ta sirkuito ti oy to bu xuʼ xlekub jtalelaltik kʼuchaʼal yajtsʼaklomutik Cristoe. Kʼalal ta jchʼuntik li tojobtaseletik xchiʼuk chkakʼ ta jkuxlejaltike, jaʼ jech chkakʼtik ta ilel ti ta jchʼuntik li kʼusi chal Cristoe.
Li krixchanoetike muʼyuk buchʼu xuʼ lek xbeiltasatik. Akʼo mi jech, ¡solel xijmuyubaj ti chkichʼtik beiltasel yuʼun Cristoe! Jaʼ yuʼun li avie ta sjunul koʼontontik ta jchʼunbetik xchiʼuk ti jmojuk xij-abtej xchiʼuk li buchʼutik yakal tstunesane.
[Lokʼol ta pajina 27]
¿Kʼu van yelan chkaʼitik li tojobtasel ta Vivlia ti jaʼ noʼox skʼan xijnupun xchiʼuk li buchʼu «xchʼunoj Cajvaltique»?