Li kastigo laj yakʼ Diose: ¿Mi yuʼun muʼyuk xkʼuxul yoʼonton?

SVENTA jtakʼtike jkʼeltik chib skʼelobil ta Vivlia ti laj yakʼbe kastigo krixchanoetik li Diose: li Nojelal ta voʼ ta skʼakʼalil Noee xchiʼuk ti laj yichʼ lajesel li jcanaanetike.

NOJELAL TA VOʼ TA SKʼAKʼALIL NOE

LI KʼUSI CHALIK JLOME: «Muʼyuk xkʼuxul yoʼonton la smil ta nojelal ta voʼ skotol krixchanoetik li Diose, jaʼ noʼox kuxul laj yikta Noé xchiʼuk yutsʼ yalal».

LI KʼUSI CHAL VIVLIAE: Xi chal li Diose: «Mi jutebuc oy ta coʼnton ta xcham ti buchʼu muʼyuc xchʼulel xaʼi sbae. Jaʼ ta jcʼan ti yictauc sba ta spasel ti bu chopol stamoj batele yoʼ jech ta xcuxi» (Ezequiel 33:​11, Ch). Jaʼ yuʼun, mu jutebuk muyubaj Dios ti la slajes li chopol krixchanoetik ta skʼakʼalil Noee. Pe, ¿kʼu yuʼun jech la spas un chaʼa?

Kʼalal laj yakʼbe kastigo krixchanoetik li Diose, li Vivliae chal ti «jaʼ sqʼuelubil icom ta sventa li bochʼo toj chopol cʼusitic ta spasique» (2 Pedro 2:​5, 6). Jech xtok, li Vivliae chal kʼuyelan snopben xchiʼuk li kʼusi nopem xaʼi tspas li Diose.

Baʼyele, akʼo mi kʼux chaʼi ti tslajes chopol krixchanoetike, laj yakʼ ta naʼel Dios ti yakʼoj venta xtok kʼuyelan chilbajin xchiʼilike xchiʼuk ti sta-o xichʼik kastigo ta skoj li kʼusi tspasike. Ta mas tsʼakale tslajesbe skʼoplal skotol vokolil xchiʼuk ti muʼyuk tukʼilale.

Ta xchibale, li kʼuyelan la spas onoʼox ta voʼne li Diose chakʼ ta ilel ti kʼanvaneme, yuʼun chpʼijubtasvan kʼalal muʼyuk to chakʼ kastigoe. Jech kʼuchaʼal liʼe, laj yalbe ti akʼo xpʼijubtasvan li Noee, pe muʼyuk la xchikinta li krixchanoetike. Xi chal li Vivliae: «Muc xchʼunic ti chtal li pulel ta voʼe. Jaʼ to la ­xchʼunic ti cʼalal itale, pero ilaj o scotolic» (Mateo 24:​39).

¿Mi jel van snopben xchiʼuk li kʼusi nopem xaʼi spasel li Diose? Moʼoj. Yuʼun la spʼijubtas li steklumal ti jaʼ li j-israeletike. Laj yalbe ti mu xchanbeik xchopol talelal li lumetik te ta spat xokonike. Yuʼun mi moʼoje, li Diose tstunes junuk jteklum ti kontrainvanem sventa slajesik li kapital yuʼun j-israeletik ti jaʼ Jerusalene xchiʼuk ti x-ikʼatik batel ta mosoile. Muʼyuk la xchʼunik pʼijubtasel, la xchanbeik xchopol talelal li lumetik te nopole. Jech xtok, la smilik ololetik sventa chakʼik ta matanal. ¿Mi akʼbatik kastigo yuʼun Jeova? Laj, pe baʼyel la stak batel jayibuk velta yaj-alkʼoptak sventa sjel stalelalik kʼalal skʼan toʼox xakʼbe kastigoe. Xi to laj yalanbee: «Vuʼun li Mucʼul Diosune, muʼyuc cʼusi ta jpas ti me mu xcacʼbe snaʼ baʼyuc cʼusi oy ta coʼnton li jʼalcʼopetic cuʼune» (Amós 3:7).

TI KʼU YUʼUN TSOTS SKʼOPLAL LI STAKʼOBILE: Li kʼuyelan snopben xchiʼuk li kʼusi nopem xaʼi tspas Dios ta sventa li kastigo chakʼe tspat koʼontontik. Xuʼ jchʼuntik ta melel ti ch-akʼbat kastigo yuʼun Jeova li buchʼu muʼyuk xkʼuxul yoʼontone. Xi chal li Vivliae: «Li bochʼo chopolique, jʼechʼel chlajic o [...]. Yan li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o (Salmo 37:​9-​11). Pe, ¿kʼusi chanop ti jaʼuk sventa tskolta ta svokol krixchanoetik li kastigo chakʼ Diose? ¿Mi muʼyuk xkʼuxul yoʼonton xanaʼ o mi chkʼuxubinvan?

KʼALAL LAJIK LI JCANAANETIKE

LI KʼUSI CHALIK JLOME: «Toj chopol kʼuyelan laj yichʼ milel li jcanaanetike, xkoʼolaj ta junuk paskʼop lajik, jech kʼuchaʼal chlajik ta milel epal krixchano avie».

LI KʼUSI CHAL VIVLIAE: «Tucʼ cʼusi tspas; lec scotol li yabtele. Jaʼ Dios ti mu snaʼ xʼepalcʼopoje. Muʼyuc cʼusi chopol oy ta yoʼnton» (Deuteronomio 32:4). Li kʼusi tspas Diose mu stakʼ koʼoltasel xchiʼuk li paskʼop tspas krixchanoe. ¿Kʼu yuʼun? Yuʼun mu xil kʼusi oy ta yoʼonton yantik li krixchanoetike, yan li Diose xil.

Jech kʼuchaʼal liʼe, kʼalal la xchapan xchiʼuk la snop chakʼbe slajeb jteklum Sodoma xchiʼuk Gomorra li Diose, laj yat yoʼonton li Abrahame, yuʼun la snop ti maʼuk tukʼil chapanele. Xi la sjakʼbe li Diose: «¿Me te capal chavules li bochʼo lequic xchiʼuc li bochʼotic oy smulique?». Mu xchʼun ti jech tspas li Jeovae, ti jaʼ jun tukʼil Diose. Pe oy smalael yuʼun li Diose, yuʼun laj yalbe ti chchʼaybe smul jteklum mi oy lajunvoʼuk buchʼu tukʼ yakʼoj sba ta Sodomae (Génesis 18:​20-​33). Ta melel, li Diose laj yil kʼusi oy ta yoʼonton li vaʼ krixchanoetike, ti chopol kʼusi oy ta yoʼontonike (1 Crónicas 28:9).

Jaʼ jech li jcanaanetik eke, laj yilbe ta yoʼonton xchopolilik li Diose, jaʼ yuʼun laj yichʼik lajesel. Li jcanaanetike ojtikinbilik lek ti kuxul chchikʼik ololetik sventa smoton sdiosike xchiʼuk yan kʼusitik toj chopol tspasik (2 Reyes 16:3).a Li jcanaanetik snaʼojik xa onoʼox ti Jeovae jaʼ chakʼbe osil li j-israeletike. Ti mu skʼan xakʼ li yosilike maʼuk noʼox la skontrainik li j-israeletike, moʼoj, jaʼ li Jeovae, ti yakʼoj xa onoʼox ta ilel ti tskolta li steklumale.

Pe laj yakʼbe yil xkʼuxul yoʼonton li jcanaanetik ti laj yiktaik spasel kʼusitik toj chopole xchiʼuk ti laj yakʼ ta xkuxlejalik li mantaletik sventa talelal yakʼoj Jeovae. Jech kʼuchaʼal liʼe, pasatik ta perton yuʼun Jeova jun jmulavil ants ti Rahab sbie xchiʼuk li yutsʼ yalale. Jech xtok, kʼalal la skʼanik vokol li jnaklejetik ta Gabaone kuxul iktaatik xchiʼuk skotol yalab xnichʼnabik (Josué 6:​25; 9:​3, 24-​26).

TI KʼU YUʼUN TSOTS SKʼOPLAL LI STAKʼOBILE: Ti akʼbatik kastigo li jcanaanetike oy kʼusi tsots skʼoplal xuʼ jchantik yuʼun. Li avie toj nopol xa «yorail ti chapanele, ti jaʼ o xa ta stsuts o scʼoplal ti buchʼutic toj chopolique» (2 Pedro 3:7, Ch). Mi jkʼanojtik xchiʼuk ta jchʼunbetik smantal Jeovae ta me jkʼupin jkuxlejaltik ti bu muʼyuk xa vokolil mi laj xaʼox stupʼbe skʼoplal li buchʼu tspʼajik li tukʼil ajvalilal yuʼune.

Ta slekil yoʼonton tsvules ta joltik Jeova ti xuʼ staik ta makiel yalab xnichʼnabik li kʼusi tsnop tspas li totil meʼiletike. Xi chal ta Xchʼul Kʼope: «Jaʼ lec jaʼ cʼanic li cuxlejale yuʼun jech chacuxiic li voʼoxuque xchiʼuc li anichʼnabique xchiʼuc li amomnichʼnabique. Jaʼ me cʼanic li Mucʼul Dios avuʼunique. Chʼunbeic li cʼusi chayalboxuque, xchiʼuc junuc avoʼntonic o ta stojol» (Deuteronomio 30:​19, 20). Li kʼusi chal Vivliae, ¿mi chakʼ iluk ti muʼyuk xkʼuxul yoʼontone o jaʼ ti skʼanojutik xchiʼuk ti tskʼan ti jtʼujtik kʼusi lek li Diose?