«Muc tʼujbiluc bochʼo chcʼuxubin» li Jeovae

¿Mi oy ataoj pʼajel? ¿Mi oy junuk velta muʼyuk xa-akʼbat kʼusi chakʼan o muʼyuk xa-ichʼat ta mukʼ ta skoj ti jelel skoloral abekʼtal, alumal o ta skoj ti abol abae? Mi jeche, mu atukuk. Pe oy jun lekil aʼyej: akʼo mi jech onoʼox tspasik li krixchanoetike, li Diose mu jechuk tspas. Xi laj yal ta sjunul yoʼonton li jtakbol Pedroe: «Muc tʼujbiluc bochʼo chcʼuxubin li Diose». (Kʼelo Hechos 10:34, 35.)

Kʼalal jech laj yal li Pedroe jaʼo oy kʼusi la spas ti mu staleluke, te oy ta sna jun jyanlum vinik ti Cornelio sbie. Judío vinik vokʼem li Pedroe xchiʼuk jaʼo kuxi kʼalal ibal sba chilik jyanlumetik li judioetike xchiʼuk mu xa noʼox stakʼ chiʼinel chaʼiik. Vaʼun chaʼa, ¿kʼu yuʼun te oy ta sna Cornelio li Pedroe? Yuʼun jaʼ la xchapan Jeova ti te stsob sbaike. Oy kʼusi akʼbat yil yuʼun Dios li Pedro ti xi albate: «Li cʼusi lecubtasbil xa yuʼun Diose mu me xaval ti muʼyuc leque». Akʼo mi mu snaʼ toʼox li Pedroe, ta svoljeale oy kʼusi akʼbat yil yuʼun Dios li Cornelio eke, te albat yuʼun jun anjel ti xikʼ tal li Pedroe (Hechos 10:1-15). Li Pedroe laj yakʼ venta ti jaʼ xchapanoj li Jeovae.

Xi laj yal li Pedroe: «Ta melel laj xa jnaʼ ti muc tʼujbiluc bochʼo chcʼuxubin li Diose» (Hechos 10:34). Li jpʼel kʼop ta griego «tʼujbil» xi jelubtasbile, xi chalbe skʼoplal jun krixchano ti chchanbe skʼoplal Vivliae: «Taje jaʼ skʼoplal li jchapanvanej ti jaʼ noʼox tskʼelbe sat buchʼu chchapan yoʼ chal kʼusi sta-oe, maʼuk tstsak ta venta kʼusi spasoj, jaʼ mi lek xil li vinike o mi moʼoj». Li Diose mu xtʼujvan ta skoj ti jelel skoloral jbekʼtaltik, jlumaltik, ti abol jbatik o ta skoj ti kʼuyelan jpat jxokontike.

Jaʼ tskʼel kʼusi oy ta koʼontontik li Jeovae (1 Samuel 16:7; Proverbios 21:2, Ch). Li Pedroe laj yal ti buyuk lumal lek ch-ilatik yuʼun Dios «ti buchʼutic ta xiʼtaique, xchiʼuc ti lec cʼusi ta spasique» (Hechos 10:35, Ch). Li xiʼtael Diose jaʼ skʼan xal ti ta jtsaktik ta ventae, ti chkichʼtik ta mukʼe xchiʼuk ti jpat koʼontontik ta stojolale, ti mu jpastik li kʼusi chopol chile. Ti lek kʼusi ta jpastike jaʼ skʼan xal ti ta sjunul koʼonton ta jpastik li kʼusi lek chile. Li buchʼu chchʼunik mantal ta skoj ti chichʼik ta mukʼe xchiʼuk ti chlokʼ ta yoʼontonik spasel kʼusi leke, chmuyubaj-o yuʼunik li Jeovae (Deuteronomio 10:12, 13).

Mi oy ataoj pʼajel o avichʼoj chopol kʼoptael akʼo mi mu to xa ojtikinate, li kʼusi laj yal Pedro ta sventa Diose tspat avoʼonton. Li Jeovae chikʼ tal krixchano ta skotol lumetik sventa xichʼik ta mukʼ ta melel (Juan 6:44; Hechos 17:26, 27). Chchikinta xchiʼuk tstakʼbe s-orasion li buchʼutik chichʼik ta mukʼe, muʼyuk tstsak ta venta mi jelel skoloral sbekʼtal, slumal o mi abol sba (1 Reyes 8:41-43). Xuʼ jchʼuntik ta melel, kʼalal tskʼel yalel tal Balumil li Jeovae, jkotoltik jun noʼox jtsʼunbal chilutik. ¿Mi tstij avoʼonton xavojtikin mas li Dios ti mu snaʼ xtʼujvane?