Li relijione, ¿mi tsots skʼoplal chilik li lekil talelale?

Silvia, jun ants ti ch-abtej sventa poxiletike xi chale: «Kʼalal lichanunaj ta universidade, li buchʼutik oy srelijion chaʼi sbaike tslokʼtabe xchiʼilik ta jujun eksamen xchiʼuk tstunesik droga. Muʼyuk chakʼ ta xkuxlejal li srelijionike».

Jun vinik ti Lionel sbie xi chal eke: «Li jchiʼiltak ta abtele chalik ti muʼyuk ch-abtejik ta skoj ti ipike, akʼo mi maʼuk melel. Li srelijionike xkoʼolaj kʼuchaʼal jtosuk kʼusi oy ta yut na ti muʼyuk chichʼ tunesele, jaʼ noʼox sventa chichʼ kʼupinel».

Jutuk xvinaj ta stalelalik ti oy srelijion li krixchanoetike. Ep buchʼutik «chalic ti xchʼunojic li scʼop Rioxe pero mu spasic li cʼusi chale» (2 Timoteo 3:5, Scʼop Riox, ta skʼop Zinacantán). Li jbeiltasvanejetik yuʼunike muʼyuk bu chakʼik ta ilel mi jaʼuk chchanubtasvanik kʼusi chal Vivlia ta sventa li lekil talelale. Jaʼ yuʼun, ep buchʼutik tsnopik ti muʼyuk ta yoʼonton Dios ti kʼuyelan chkuxiike.

¿KʼUSI CHCHANUBTASVAN LI VIVLIAE?

Chal ti oy ta yoʼonton Dios li kʼusi ta jpastike xchiʼuk xuʼ chopol o lek chaʼi sba kuʼuntik. Ta skoj li stoyobbailike «ep laj yacʼbeic yat yoʼnton» Dios li j-israeletike (Salmo 78:40). Pe mi oy buchʼu tsutes yoʼonton xchiʼuk tsjel stalelale «toj xcuxet yoʼntonic te ta vinajel» (Lucas 15:7). Kʼalal chkojtikinbetik slekil talelaltak li Jtotik ta vinajele jaʼ tstij koʼontontik sventa jkʼantik mas, ti jkʼantik li kʼusi lek chile xchiʼuk ti jpʼajtik li kʼusi spʼajoje (Amós 5:15).

¿MI JECH TSPASIK LI STESTIGOTAK JEOVAE?

Xi laj yalbe skʼoplal stestigotak Jeova jlik periodiko ta Estados Unidos: «Chkoltavanik sventa lekuk xil sbaik li utsʼ alaliletike xchiʼuk ti jaʼikuk jnaklejetik ti xakʼ ta yoʼontonik abtel xchiʼuk ti jamaluk snaʼ xkʼopojike». Xi to laj yal li periodikoe: «Chakʼ ta xkuxlejalik ta melel li kʼusitik chchanike. Xchʼunojik ti tsokesvan ta mantal li sikʼolajele, li yuchʼel ep poxe, li drogae, li mulivajel xchiʼuk buchʼuuk xa noʼox krixchanoale xchiʼuk li skʼupinel chiʼilil ta vinikal o ta antsile».

¿Kʼusi sbalil staojbeik li stestigotak Jeova ti xojtikinbeik li stalelaltak Diose? Xi chal li Silviae: «Li loʼlael ta takʼine stalel onoʼox yileluk li ta abtelal sventa poxile. Lek xa noʼox ta pasel yaʼel. Pe kʼalal jnaʼoj kʼuyelan chil Jeovaa li talelal taje jaʼ tskoltaun sventa mu jpas. Xuʼ xkal ti ximuyubaje xchiʼuk jun tajek koʼonton». Li Silviae snaʼoj ta melel ti jaʼ lekub-o xkuxlejal li kʼusitik xchʼunoj ta srelijione.