KʼUSITIK CHICHʼ JAKʼEL TA SVENTA VIVLIA

¿Mi chchikinta skotol orasionetik li Diose?

Chchikintabe s-orasionik krixchanoetik ta skotol lumetik li Diose (Salmo 145:18, 19). Li Vivliae tstij koʼontontik sventa xkalbetik Dios li kʼusitik chkat-o koʼontontike (Filipenses 4:6, 7). Pe oy jlom orasionetike mu lekuk chil li Diose. Jech kʼuchaʼal liʼe, mu lekuk chil kʼalal jaʼ noʼox chkalilantik li kʼusi jkomesoj ta joltike. (Kʼelo Mateo 6:7.)

Jech xtok, kʼalal tspasik orasion li buchʼutik yolbaj mu xchʼunik li kʼusi chal ta Smantale mu lekuk chil li Jeovae (Proverbios 28:9). Jech kʼuchaʼal liʼe, li Jeovae muʼyuk la skʼan la xchikintabe s-orasionik li buchʼutik te tikʼil skʼoplalik ta milvanej li ta skʼakʼalil Vivliae. Jaʼ yuʼun chaʼa, xuʼ xkakʼtik venta ti oy kʼusitik skʼan jpastik sventa xchikinta j-orasiontik li Diose. (Kʼelo Isaías 1:15.)

¿Kʼusi skʼan jpastik sventa xchikinta j-orasiontik li Diose?

Mu me stakʼ jkʼopontik Dios mi muʼyuk xchʼunel koʼontontike (Santiago 1:5, 6). Yuʼun skʼan jchʼunojtik lek ti oy ta melel li Diose xchiʼuk ti oyutik ta yoʼontone. Xuʼ me stsatsub xchʼunel koʼontontik mi ta jchantik li Vivliae, yuʼun te ta jtatik sprevailtak ti jech tspase xchiʼuk ti ta melel chkʼot ta pasel li kʼusi chale, taje jaʼ me chchʼi-o li melel xchʼunel oʼontonale. (Kʼelo Hebreos 11:1, 6.)

Skʼan me bikʼit xkakʼ jbatik xchiʼuk ta sjunuluk me koʼontontik jpastik orasion. Yuʼun akʼo mi jaʼ Xnichʼon Dios li Jesuse, bikʼit laj yakʼ sba kʼalal la spas orasione (Lucas 22:41, 42). Li Diose muʼyuk chalbutik ti kʼusi skʼan jpastik ta sventa li orasione, jaʼ yuʼun skʼan jchanilantik Vivlia sventa xkaʼibetik smelolal li kʼusitik tskʼanbutike. Mi jeche, xuʼ me jech jpastik orasion kʼuchaʼal lek chil stuke. (Kʼelo 1 Juan 5:14.)