MANTAL TA SLIKEBALTIK PAJINA: ¿KʼU YUʼUN TOJ EP VOKOLIL? ¿BAKʼIN TO CHLAJ?
Ep buchʼutik chil svokolik ti muʼyuk smulike
Oy jun tseb ti Noelle sbie toj lek yoʼonton xchiʼuk lek tajek xaʼi spasel divujar. Kʼalal lokʼ ta xanbal ta yamakʼil spat sna ta jun ikʼ osil kʼalal jaʼo kʼepelaltike pʼaj yalel li ta nuxinajebale. Jaʼ xa noʼox chib xemana skʼan xlokʼ ta chanib jabil kʼalal chame.
Li Charlotte, Daniel, Olivia, Josephine xchiʼuk yantike jaʼ jech sbiik jlom li ololetik ti vakib o vukub sjabilalik ti lajik ta milel ta pistola ta jun chanob vun ta Connecticut, Estados Unidos, li ta 14 yuʼun disiembre ta 2012. Ta skotole lajik 26, pe oy 20 ti jaʼ ololetike. Kʼalal jaʼo chmuklomajike laj yalbe sbi ololetik li presidente Barack Obamae xchiʼuk xi laj yalbe li buchʼutik te oyike: «Skʼan xlaj skʼoplal li kʼusitik chopol chkʼot ta pasel liʼe».
Jun tseb ti Bano sbi ti vaxaklajuneb sjabilale lokʼ tal ta Irak ta 1996, vaʼun bat ta naklej xchiʼuk yutsʼ yalal ta Noruega. Li yamigotake xojobal Kʼakʼal yixtol bi yuʼunik. Akʼo mi jech, kʼux ta aʼiel ti te tsakal skʼoplal laj ek li ta 77 ti lajik ta milel yuʼun jun chuvaj vinik ta 22 yuʼun julio ta 2011, ti xtoyet to chaʼi sba xi laj yale: «Chopol chkaʼi [...] ti muʼyuk xa mas krixchanoetik la jmile».
Li kʼusitik chkʼot ta pasel ti toj chopol xchiʼuk toj kʼux ta aʼiele jaʼ jech chkʼot ta pasel ta spʼejel Balumil. Jnoptik noʼox kʼuyepal vokolil chakʼ xchiʼuk ti kʼuyelan kʼux chaʼiik li buchʼutik oy kʼusi xibal sba chkʼot ta stojolalike, li choplejale, li paskʼope, li terrorismoe, nikel, nojelal ta voʼ o yan kʼusitik ti chakʼ vokolile. Jaʼ yuʼun, ep buchʼutik chamemik o yiloj svokolik ti mu staik-oe.
Jlom krixchanoetike chalik ti jaʼ ta smul li Diose, ti muʼyuk la ta yoʼonton li krixchanoetike. Yantik xtoke chalik ti akʼo mi yiloj jvokoltik li Diose xuʼ noʼox la chaʼi ti mu skoltautike. Jech xtok, li yantike chalik ti jech xa onoʼox la albil li kʼusi chkʼot ta jtojolaltike. Yileluke muʼyuk spajeb li kʼusitik tsnopik ta sventa taje. ¿Mi oy van bu xuʼ jtatik stakʼobiltak ti xuʼ jun koʼonton xijkom xchiʼuk ti jpat koʼontontik yuʼune? Li mantaletik chtale te ta jtabetik stakʼobil ti lokʼem ta Vivliae, te chal ti kʼu yuʼun oy jvokoltike xchiʼuk chal kʼuxi xuʼ chlaj skʼoplal skotol taje.