¿Kʼu yuʼun oy ep vokolil?

LI KʼUSI KʼOTEM TA PASEL TI CHOPOL CH-AJVALILAJIKE

Xi chal li Vivliae: «Cʼalal jaʼ chlic spas mantal li bochʼotic chopolique, ta xlic svocol li jteclume» (Proverbios 29:2).

Li kʼu xa sjalil echʼem tal li kuxlejale, chichʼ albel skʼoplal ti chopol li ajvaliletik echʼik tale, yuʼun jaʼ noʼox chakʼbe svokol li krixchanoetike. Akʼo mi jech, mu skotolikuk jech tspasik, yuʼun junantike oy ta yoʼontonik skoltael li krixchanoetike. Pe kʼalal jaʼ xa ch-ajvalilajike chakʼik venta ti mu spas yuʼunik li kʼusi snopoj tspasike xchiʼuk ti tstsal sbaik sventa x-ochik ta ajvalile. Bakʼintike jaʼ noʼox tspasik li kʼusi tsbalin stukike, ti jaʼ chakʼbe svokol li yantike. Li Henry Kissinger ti jaʼ toʼox j-abtel yuʼun li ajvalil ta Estados Unidose xi laj yale: «Li kʼu xa sjalil kuxiem tal li krixchanoetike chakʼ ta ilel ti jecheʼ noʼox chakʼ svokolike xchiʼuk ti mu staik li kʼusi tskʼanike».

Xi chalbe skʼoplal krixchanoetik li Vivliae: «Mu xuʼ yuʼun tspas mantal stuc li cʼusi chcʼot ta pasel ta stojole» (Jeremías 10:23). Ta skoj ti jmulavilutike muʼyuk mas jpʼijiltik xchiʼuk mu jnaʼtik mi lek chkʼot ta lokʼel li kʼusi ta jpastike. Mi mu xuʼ yuʼun tspas sba ta mantal stuk li jun krixchanoe, ¿kʼuxi xa noʼox xuʼ tspas ta mantal junuk jteklum? ¿Mi xkakʼtik venta ti kʼu yuʼun mu xlaj yuʼun vokolil li ajvaliletike? Ta melel, oy vokolil ta skoj ti oy chopol ajvaliletike.

TI KʼUSI TSPAS LI JECHEʼ RELIJIONE

Xi laj yal li Jesuse: «Jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35).

Li jnitvanejetik ta relijione chalik ti akʼo skʼan sbaik xchiʼuk ti jmojuk oyikuk li krixchanoetike. Pe mu jechuk tspasik, anil kʼusi chopol tsnopik ta stojolal li yantike. Yuʼun li relijione jaʼ chakʼ ti stoy sbaike xchiʼuk ti xchʼak sbaik ta skoj ti yan-o slumalik xchiʼuk ti jelelike. Li Hans Küng xi la stsʼiba ta slajebal slivro ti El cristianismo y las grandes religiones sbie: «Li tsatsal kʼopetik ta skoj politika ti nabil lek skʼoplale xchiʼuk ti yakʼoj ep vokolile jaʼ te likem tal li ta relijione, yuʼun lek noʼox chilik xchiʼuk jaʼ tstij oʼontonal ta spasel».

Jech xtok, li jnitvanejetik ta relijione muʼyuk chopol chilik ti chchiʼin sbaik ta vayel ti maʼuk snup xchiʼil sbaike xchiʼuk li skʼupinel xchiʼilik ta vinikal o ta antsile. Ta skoj taje tsnuptanik chameletik, syalesel olol, chchiʼin yolik akʼo mi muʼyuk snopojik, chchʼak nupultsʼakal, utsʼ alalil, tsvul-o tajek yoʼontonik xchiʼuk chopol tajek chaʼiik kʼalal jech chkʼot ta pasele.

JPASMULIL XCHIʼUK TSPAS KʼUSI TSKʼAN YOʼONTON STUK LI KRIXCHANOE

«Li jujunutique scoj yuʼun jech coʼnton ta jpastic li cʼusi chopole, jech chijyicʼutic, chisloʼlautic. Yuʼun cʼalal chcacʼtic ayinuc li xpichʼetel coʼntontique, ta xlic vocʼuc li mulile.» (Santiago 1:14, 15.)

Jmulavilutik jkotoltik, jaʼ yuʼun oy onoʼox muʼyuk lek chbat kuʼuntik li kʼusi ta jpastike xchiʼuk ti chkakʼtik persa sventa mu jpastik «li cʼusitic lec chaʼay jbecʼtaltique» (Efesios 2:3). Kʼalal xuʼ jpastik li kʼusi oy ta koʼontontik spasele, mas to tsots chkaʼitik li prevae, pe mi la jpastike mas to me tsots ta jta jvokoltik.

Jun jtsʼibajom ti P.D. Mehta sbie xi la stsʼibae: «Ti oy ep jvokoltike jaʼ ta skoj jlomuk ti mu xpaj li kʼusitik ta jkʼan ta jkʼupintike, ti solel ta jkʼantik tajek li kʼusitik oy yuʼun yantike, ti solel batem ta koʼontontik saʼel xchiʼuk ti mu xpaj chkaʼitik skʼanel kʼusitike». Li yuchʼel ep poxe, li slajesel drogae, li tajimol ta takʼine, li chiʼinejbail ta vayele xchiʼuk yantike sokesojbe xkuxlejal li buchʼu ichʼbilik toʼox ta mukʼ xchiʼuk ti ojtikinbilike, staoj svokol yutsʼ yalal, yamigotak xchiʼuk yantik. Ta skoj ti jmulavilutike jnaʼojtik ti melel li kʼusi chal Vivlia liʼe: «Yuʼun scotol li jujuchop cʼusitic spasoj Diose ta jnaʼtic ti toj cʼux svocol chaʼyic cʼalal to tanae. Jaʼ jech xʼayetic ta svocolic o batel jech chac cʼu chaʼal jun ants ti xʼayet ta xcʼuxul xchʼut cʼalal yuʼun xa ta xcuxe» (Romanos 8:22).

LI KʼUSITIK TSPASIK LI CHOPOL ESPIRITUETIKE

Li Vivliae chal ti jaʼ Satanás «li yajval banamile», ti koʼol ch-abtejik xchiʼuk li chopol espirituetik ti jaʼik li pukujetike (2 Corintios 4:4; Apocalipsis 12:9).

Jech kʼuchaʼal tspas li Satanase, tsots ch-abtejik ta sloʼlael li krixchanoetike xchiʼuk tstunesik sventa jaʼuk xichʼ pasel kʼusi tskʼan yoʼontonik li pukujetike. Li jtakbol Pabloe snaʼoj taje, yuʼun xi laj yale: «Maʼuc ta jpastic cʼop jchiʼuctic li bochʼo oy sbecʼtal, oy xchʼichʼalique. Jaʼ ta jtsal jba jchiʼuctic li pucujetic ti tsots tspasic mantale, ti tsots svuʼelique, ti ch-ilbajinvanic liʼ ta banamil ti oy ta icʼ osile, ti ta icʼ chanovique ti muʼyuc sbecʼtalique» (Efesios 6:12).

Akʼo mi tskʼupinik yilbajinel krixchanoetik li pukujetike maʼuk li kʼusi mas tsots skʼoplal chaʼiike. Yuʼun tskʼanik ti xnamajik ta stojolal Mukʼul Dios Jeova li krixchanoetike (Salmo 83:18). Li sabel skʼoplal kʼanaletik, spasel majia, akʼ chamel xchiʼuk li tʼunolajele jaʼ jlom li kʼusi tstunesik sventa sloʼlaik li krixchanoetike. Jaʼ yuʼun, li Jeovae chal ti mu jpastik li kʼusitik xibal sba taje xchiʼuk chalbe ti chchabi li buchʼu tskontrain li Satanás xchiʼuk spukujtake (Santiago 4:7).

KUXULUTIK XA LI TA «SLAJEBAL CʼACʼALE»

Leʼ xa van ta chaʼmil jabile, xi onoʼox laj yal li Vivliae: «Yuʼun tscʼan chanaʼ ti cʼalal poʼot xa slajebal cʼacʼale ta to xlic tsots vocol».

Vaʼun xi to chal li Vivliae: «Yuʼun li cristianoetique jaʼ noʼox tspasic cʼusi tscʼan stuquic. Ta xbat yoʼntonic yuʼun taqʼuin. Tstoy sbaic. Stuc noʼox xaʼay sbaic. [...] Muʼyuc slequil yoʼntonic, muʼyuc xcʼuxul yoʼntonic, ta saʼbeic smul yantic, muʼyuc spajeb chaʼyic li cʼusi tscʼan yoʼntonique, solel mu xqʼuexovic o, simaronijemic o ta jyalel, jaʼ tscontrainic o li cʼusitic leque. Ta xʼacʼvanic ta cʼabal; sujoj noʼox sbaic o. Toj mucʼ chacʼ sbaic. Jaʼ batem ta yoʼntonic o li cʼusi tscʼan stuquique; mu jaʼuc tsaʼic li Diose». Jamal ta aʼiel ti chkil jvokoltike jaʼ ta skoj xtok ti kuxulutik ta «slajebal cʼacʼale» (2 Timoteo 3:1-4).

Li srasonaltak la jkʼeltik xae, ¿mi mu jamaluk chakʼ ta ilel ti mu xuʼ yuʼun slajesbe skʼoplal vokolil li krixchanoetike, akʼo mi lek li kʼusi tskʼan tspasike? ¿Buchʼu noʼox van xuʼ yuʼun skoltautik? Jaʼ noʼox li Jpasvanej kuʼuntike, yuʼun yaloj ti ta «slajesbe stsatsal yabtel li pucuje» xchiʼuk li xchiʼiltake (1 Juan 3:8). Li xchanobil chtale chalbe skʼoplal kʼusi tspas Dios sventa slajes skotol li kʼusitik chakʼ vokolile.