¡Lajebal xa skotol li vokolile!

CHVENTAINVAN TUKʼIL AJVALIL

«Li Dios te oy ta vinajele ta sliques jun ajvalil; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil.» (Daniel 2:44.)

Li Ajvalilal yuʼun Diose jaʼ jun ajvalil te ta vinajel. Jaʼ laj yichʼ tʼujel ta ajvalil li Jesucristoe, jaʼ chkʼot ta xkʼexol skotol li ajvaliletike xchiʼuk jaʼ tskʼel ti xichʼ pasel kʼusi tskʼan yoʼonton Dios liʼ ta Balumil ti maʼuk noʼox te ta vinajele (Mateo 6:9, 10). Ta skoj ti jaʼ «chventainvan sbatel osil li Cajvaltique, jaʼ li Jesucristo Jcoltavanej cuʼuntique», mi junuk ajvalil xuʼ ch-och ta xkʼexol. Jaʼ yuʼun, jpʼel skʼoplal ti oy jun oʼontonal ta mas tsʼakale (2 Pedro 1:11).

CHLAJ SKʼOPLAL LI JECHEʼ RELIJIONE

«Li banquilal pucuje toj lec snaʼ scʼatajes sba ec; xcoʼlaj xa xchiʼuc yajʼalmantal Dios tscuy sba. Jaʼ yuʼun maʼuc toj labal sba me jaʼ xa yabtelic xcholel cʼusi tucʼ yilel ec li jʼabteletic yuʼune. Yuʼun ti cʼu xʼelan tspasique jaʼ jech chichʼ stojolic.» (2 Corintios 11:14, 15.)

Te chvinaj ti jaʼ yabtel pukuj li jecheʼ relijionetike xchiʼuk ti chlaj-o skʼoplale. Chlaj skʼoplal xtok li toybail ta relijion xchiʼuk li smalel chʼichʼe. Mi jkʼanojtik li «batsʼi cuxul Diose», «jun noʼox li xchʼunojel coʼntontique» xchiʼuk «ta espiritu xchiʼuk ta melel» chkichʼtik ta mukʼ. ¡Jaʼ to xuʼ jun koʼontontik mi jech kʼot ta pasele! (1 Tesalonicenses 1:9; Efesios 4:5; Juan 4:23, TNM.)

CHTUKʼIB YAN VELTA LI KRIXCHANOETIKE

«Ta xchiʼin ti jnaclejetique [...]. Scotol ta scusbat yaʼlel satic yuʼun ti Diose, yuʼun laj xa scʼoplal ti chamebal lajel ta stojolique, ti oqʼuel avanele, ti at-oʼntone, ti ip cʼux ta xaʼiique, yuʼun xʼechʼ jelav xa scʼoplal ti cʼu sʼelan oy ta voʼnee.» (Apocalipsis 21:3, 4, Ch.)

Li Jeovae tstunes Xnichʼon yoʼ xkʼot ta pasel yuʼun taje, yuʼun laj yakʼ xkuxlejal ta stojolal krixchanoetik li Jesuse (Juan 3:16). Kʼalal jaʼ xa tspas mantal li Jesuse ta xtukʼib yan velta li krixchanoetike. Ta skoj ti «ta xchiʼin ti [jnaklejetik]» li Diose muʼyuk xa vokolil xchiʼuk «muʼyuc xa bochʼo ch-ocʼ». Kom xaʼox skʼoplal skotol li vokoliletik xchiʼuk ti muʼyuk jtukʼiltike. «Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o.» (Salmo 37:29.)

CHLAJ SKʼOPLAL LI CHOPOL ESPIRITUETIKE

Li Jesuse «bat stsac li dragone, jaʼ li chon ta voʼonee, jaʼ li pucuje, jaʼ li Satanase. La xchuc ta cadena jmil (1,000) jabil. La sjip ochel ta natil xab; la smacbe lec stiʼ. Laj yacʼbe lec sello li stiʼe, yuʼun jech mu me sloʼla cristianoetic ta jujun banamil» (Apocalipsis 20:2, 3).

Chlaj skʼoplal skotol li kʼusitik tspas Satanase xchiʼuk chtikʼatik ta «natil xab» xchiʼuk spukujtak, ti muʼyuk kʼusi xuʼ spasik tee. Mu xa xuʼ stunesik krixchanoetik sventa jaʼuk spasik li kʼusi tskʼanike. ¡Xijmuyubaj tajek ti xuʼ xijkuxi ta jun balumil ta mas jelavel ti muʼyuk xa ta skʼob li Satanás xchiʼuk spukujtake!

POʼOT XA STSUTS LI «SLAJEBAL CʼACʼALE»

Li «slajebal cʼacʼale» jaʼ te tstsuts li ta tsatsal vokolil ti jaʼ jech sbi laj yal li Jesuse. Xi laj yale: «Ta onoʼox xtal li tsots vocole. Muʼyuc onoʼox jech cʼalal ilic li banamile xchiʼuc cʼalal to tana. Muʼyuc ta xcʼot ta pasel jech yan velta noxtoc» (Mateo 24:21).

Ti tsatsal vokolil sbie jaʼ ta skoj ti muʼyuk jech ilbil-o li kʼusi chkʼot ta pasele. Laje jaʼ chlik li «mucʼta pleito ta scʼacʼalil yuʼun li Dios ti echʼem svuʼele», ti ojtikinbil kʼuchaʼal «Armagedón» xtoke (Apocalipsis 16:14, 16).

Tskʼanik xa ti xtal slajeb chopol balumil li buchʼutik oy ta yoʼontonik spasel kʼusi tukʼe. Jkʼeltik jayibuk noʼox li epal bendisionetik chichʼ tal li Ajvalilal yuʼun Diose.

¡EP TO KʼUSITIK TSPAS LI DIOSE!

«Epal cristianoetic» jun noʼox yoʼonton chkuxiik ta achʼ balumil: Li Skʼop Diose chal ta melel ti kuxul chjelavik ta tsatsal vokolil «epal cristianoetic» ti chkuxiik ta achʼ balumil ti jaʼ xa noʼox oy tukʼilal tee (Apocalipsis 7:9, 10; 7:14, Ch; 2 Pedro 3:13). Li buchʼutik kuxul chjelavike te oy ta sjolik ti jaʼ koltavan «li chʼium chij yuʼun Dios ti chchʼaybe smul scotol cristianoetic ta banamile» (Juan 1:29).

Tstabeik sbalil ti chchanubtasatik yuʼun Diose: Li ta achʼ balumile «chnoj ta yotquinel Mucʼul Dios» (Isaías 11:9). Ti chchanubtasutik li Jpasvanej kuʼuntike te tsakal skʼoplal ti kʼusi skʼan jpastik sventa lekuk noʼox xkil jbatik xchiʼuk yantike xchiʼuk ti kʼuxi xuʼ jkʼuxubintik li kʼusitik tee. Xi chal ta melel li Diose: «Vuʼun li Mucʼul Diosun avuʼune, vuʼun ta jchanubtasot cʼusi lec ta pasel ta sventa alequilal; vuʼun ta jtojobtasot bu beal tscʼan chatam batel» (Isaías 48:17).

Chchaʼkuxiik tal li kutsʼ kalaltik ti chamemike: Kʼalal liʼ toʼox ta Balumil li Jesuse la xchaʼkuxes jun yamigo ti Lázaro sbie (Juan 11:1, 5, 38-44). Taje jaʼ skʼelobil ti kʼusitik xuʼ spas ti jaʼ ajvalil li ta Ajvalilal yuʼun Diose (Juan 5:28, 29).

Te oy-o sbatel osil li jun oʼontonal xchiʼuk tukʼilale: Muʼyuk xa il vokolil ta skoj chopol ajvalil kʼalal jaʼ xa tspas mantal li Cristoe. ¿Kʼuxi jnaʼojtik taje? Yuʼun xil kʼusi oy ta koʼontontik li Jesuse, snaʼ skʼelel buchʼu tukʼ xchiʼuk buchʼu chopol. Li buchʼu mu skʼan xikta li kʼusi chopol tspase muʼyuk chkuxi li ta achʼ balumil chakʼ Diose (Salmo 37:9, 10; Isaías 11:3, 4; 65:20; Mateo 9:4).

Liʼe jayib noʼox li bendisionetik la jchanbetik skʼoplale, yuʼun ep tajek ti chal ta Vivlia li kʼusitik chkʼot ta pasel ta jelavele. Mas me «jun noʼox yoʼnton te oyic o» mi lik spas mantal ta Balumil li Ajvalilal yuʼun Diose (Salmo 37:11, 29). Ta xchʼay skʼoplal skotol li kʼusitik yakʼoj jvokoltike. Yuʼun xi yakʼoj ye li Diose: «Aʼyo avaʼyic, ta jpas ta achʼ scotol li cʼusitic oye [...] yuʼun li jcʼop liʼi jaʼ melel scotol; persa chcʼot ta pasel» (Apocalipsis 21:5).