¿Kʼu yuʼun chakʼ to oyuk vokolil li Diose?

¿KʼU VAN YELAN CHAʼI SBA DIOS KʼALAL CHKIL JVOKOLTIKE?

Micaela: Mi liʼote Sofía. Toj lek chkaʼi ti liʼ la jtaot ta anae.

Sofía: Toj lek ti latale.

Micaela: Kʼalal ay jvulaʼanot jun veltae, laj kalbetik skʼoplal kʼu yelan chaʼi sba Dios kʼalal chkil jvokoltike.a La avalbun ti voʼne xa onoʼox ti jech chajakʼbe abae, mas to kʼalal laj ta karo li ameʼe. Aa, ¿kʼu yelan oy li ameʼ batsʼile?

Sofía: Bakʼintike lek noʼox oy, pe bakʼintik xtoke ip noʼox chaʼi sba. Pe li avie lek yileluk.

Micaela: Toj lek chkaʼi ti jech chavale. Toj vokol van chavaʼi ta skoj ti kʼusi kʼot ta atojolale.

Sofía: Melel onoʼox avaʼuk ti vokol chkaʼie. Bakʼintike ta jakʼbe jba kʼu to van sjalil mas ta xil svokol li jmeʼe.

Micaela: Stalel onoʼox ti jech ta jnoptik taje. Xuʼ van xvul to ta ajol kʼalal ay jvulaʼanot li yan veltae laj jakʼbot kʼu yuʼun yakʼoj to oyuk vokolil Dios ti oy sjuʼel sventa tslajese.

Sofía: Jech avaʼuk, xvul to ta jol.

Micaela: Sventa jkʼeltik kʼusi tstakʼ li Vivliae, baʼyuk jvules ta joltik jlomuk kʼusitik la jchantik li jun veltae.

Sofía: Lek oy.

Micaela: Jtos li kʼusi la jchantike. Jaʼ ti oy toʼox jun tukʼil vinik chal ta Vivlia ti jech la sjakʼbe sba ti kʼu yuʼun yakʼoj to oyuk vokolil li Diose. Akʼo mi jech, muʼyuk bu laj yut ta skoj ti jech la sjakʼ li vinik taje xchiʼuk muʼyuk laj yalbe ti skʼan mas xchʼunel yoʼontone.

Sofía: Taje muʼyuk toʼox bu kaʼioj.

Micaela: Jech xtok, la jchantik ti muʼyuk lek chil Jeova Dios kʼalal chkil jvokoltike. Jech kʼuchaʼal liʼe, li Vivliae laj yal ti kʼalal laj yil svokol li slumale jaʼ svokol stuk laj yaʼi.b ¿Mi mu tspatuk koʼontontik ti xaʼi kʼu yelan chkaʼi jbatik Dios kʼalal chkil jvokoltike?

Sofía: Ta melel tspat koʼontontik.

Micaela: Li kʼusi la jchantik ta slajebale, jaʼ ti xuʼ jchʼuntik ti ta skoj ti echʼem sjuʼel li Jpasvanej kuʼuntike, xuʼ tslajes vokoliletik ti kʼusi ora tskʼane.

Sofía: Taje jaʼ li kʼusi mu xkaʼibe smelolale. Mi xuʼ slajes kʼusitik chopol li Diose, ¿kʼu van yuʼun ti yakʼoj to oyuk li vokolile?

¿BUCHʼU JUNUKAL TI MELEL XKʼOPOJE?

Micaela: Sventa jtakʼtik li kʼusi la ajakʼe, baʼyel jkʼeltik kʼusi chal Vivlia ta slivroal Génesis. ¿Mi oy xavaʼibe sloʼilal Adán xchiʼuk Eva xchiʼuk li sat teʼ ti mu stakʼ loʼele?

Sofía: Oy xkaʼi, yuʼun la xchanubtasikun ta jtemplo kʼalal bikʼitun toʼoxe. Li Diose laj yal ti mu stakʼ slobeik sat li jtekʼ teʼe, pe muʼyuk la xchʼunik.

Micaela: Jech kʼuchaʼal taje. Li avie jkʼeltik kʼu yuʼun muʼyuk la xchʼunik mantal li Adán xchiʼuk Evae. Taje jaʼ srasonal ti kʼu yuʼun chkil jvokoltike. Avokoluk, ¿mi xuʼ xakʼel talel Génesis ta kapitulo 3 versikulo 1 kʼalal ta 5?

Sofía: Lek oy, xi chale: «Li quiletel chon ta voʼonee jaʼ noʼox stuc toj manya cʼusi tspas xchiʼuc sbijil ta scotol yantic chonbolometic ti pasbil yuʼun Mucʼul Diose. Jaʼ yuʼun jech la sjacʼbe li antse: —¿Me ta melel laj yalboxuc Mucʼul Dios mu xuʼ chaloʼbeic sat jpetsuc li teʼetic liʼ ta tsʼunubaltique? —xi. Itacʼov li antse: —Xuʼ ta jloʼbecutic sat scotol li teʼetic liʼ ta tsʼunubaltique. Jaʼ noʼox mu xuʼ ta jloʼbecutic sat li jpets teʼ te ta oʼlol tsʼunubaltique. Laj yalbuncutic Dios ti mu xuʼ ta jloʼcutique, ti mu xuʼ ta jpicutique. Me jech ta jpascutique, ta xichamcutic —xi. Pero li chone jech laj yalbe li antse: —Mu meleluc. Mu xachamic yuʼun. Yuʼun li Diose snaʼoj ti chjam asatic me laj aloʼique; chlic anaʼic cʼusi lec xchiʼuc cʼusi chopol. Chacoʼlajic jech chac cʼu chaʼal Dios —xi».

Micaela: Kolaval ti la akʼel talele. Jnopbetik avaʼi lek smelolal li versikuloetik la jkʼeltike. Kakʼtik avil venta baʼyuk ti kʼoponat yuʼun jkot kiletel chon li antse, jaʼ xkaltik li Evae. Jech xtok, li ta yan slivroal Vivliae chakʼ ta ilel ti jaʼ Diablo ti yakal chkʼopoj ta jkot kiletel chone.c Li Satanase la sjakʼbe Eva li mantal akʼbil yuʼun Dios ta sventa li jtekʼ teʼe. ¿Mi la avakʼ venta kʼusi chkʼot ta stojolalik Adán xchiʼuk Eva mi la sloʼik li sat teʼe?

Sofía: Jaʼ ti chchamike.

Micaela: Jech taje. Kʼalal laj yal Satanás jech kʼuchaʼal ta jkʼeltike te vinaj ti la xchibal kʼopta li kʼusi laj yal Diose. Jkʼeltik avil li kʼusi laj yale: «Mu meleluc. Mu xachamic yuʼun». ¡Taje jaʼ tskʼan chakʼ ta aʼiel Satanás ti jaʼ jutkʼop li Diose!

Sofía: Taje muʼyuk bu xkaʼi-o li jvokʼ loʼile.

Micaela: Xchiʼuk kʼalal laj yal Satanás ti jaʼ jun jutkʼop li Diose, la xchibal kʼopta li kʼusi laj yal Diose, taje jal chichʼ sventa xichʼ pakbel skʼoplal. ¿Mi xavakʼ venta kʼu yuʼun?

Sofía: Mmm... mu jnaʼ lek.

Micaela: Sventa xkaʼibetik lek smelolale kalbetik junuk skʼelobil. Jnoptik noʼox ti oy jun kʼakʼal chkalbot ti mas tsots kip li voʼone. ¿Kʼu van yelan xuʼ xavakʼ venta ti mu meleluk taje?

Sofía: Chkal noʼoxe jaʼ to te chvinaj mi la jpastik prevae.

Micaela: Jech taje. Xuʼ van jtʼujtik junuk kʼusi ti ol tajeke, mi laje jkʼeltik buchʼu xlik yuʼun. Melel onoʼox ti mu vokoluk chkakʼtik venta ti buchʼu mas tsots yipe.

Sofía: Xkaʼibe smelolal li kʼusi chavale.

Micaela: Ti xkalbot ti voʼon mas melel jnaʼ xikʼopoje, pe li voʼote muʼyuk. ¿Mi mu jechuk ti mas vokol ta akʼel ta ilel taje?

Sofía: Jech van avaʼuk.

Micaela: Sventa xkakʼtik ta ilel ti melel jnaʼ xijkʼopoje, mu xuʼ xkakʼtik ta ilel jech kʼuchaʼal laj kaltik ta sventa ti buchʼu mas tsots yipe.

Sofía: Jech avaʼuk, oy arason.

Micaela: Sventa xvinaj ti chʼabal srasonal li kʼusi chkale, skʼan x-echʼ kʼuk sjaliluk sventa xakʼik venta yantik buchʼu melel snaʼ xkʼopoj.

Sofía: Oy srasonal li kʼusi chavale.

Micaela: Jkʼeltik yan velta li kʼusi chal Genesise. ¿Mi laj yal Satanás ti jaʼ mas tsots yip li stuke ti jaʼ muʼyuk li Diose?

Sofía: Muʼyuk.

Micaela: Ti jechuk taje mas van kʼun laj yaʼi Dios yakʼel ta ilel ti mu meleluk li kʼusi laj yal Satanase. Pe mu jechuk kʼot ta pasel taje, yuʼun li Satanase laj yal ti melel snaʼ xkʼopoj li stuke ti jaʼ muʼyuk li Diose. Xkoʼolaj ti xi laj yalbe li Evae: «Li Diose tsloʼlaot, pe li voʼone melel li kʼusi chkalbote».

Sofía: Toj labal sba chkaʼi.

Micaela: Pe ta skoj ti oy lek spʼijil li Diose, snaʼoj ti jaʼ mas lek ti x-echʼ kʼuk sjaliluk sventa xchapaj li kʼusi la xchibal kʼopta li Satanase. Vaʼun jaʼ to te chvinaj buchʼu melel snaʼ xkʼopoj xchiʼuk buchʼu tsjut kʼop.

JTOS TI KʼUSI TSOTS SKʼOPLALE

Sofía: Pe, ¿mi mu teuk vinaj ti melel snaʼ xkʼopoj Dios kʼalal cham li Evae?

Micaela: Xkaltike la stakʼ jlomuk. Pe li kʼusi la xchibal kʼopta li Satanase oy to kʼusi yan smakojbe skʼoplal. Jkʼeltik yan velta kʼusi chal li versikulo 5. ¿Mi xavakʼ venta kʼusi to mas laj yal li Satanase?

Sofía: Laj yalbe ti mi la sloʼ li sat teʼe, chjam la li satike.

Micaela: Jech taje, xchiʼuk chkʼot la kʼuchaʼal Dios ti «chlic [snaʼik] cʼusi lec xchiʼuc cʼusi [chopole]». Jech xtok, li kʼusi laj yal Satanás taje, jaʼ chakʼ ta aʼiel ti oy la kʼusi lek snakʼoj Dios ta sventa li krixchanoetike.

Sofía: Jech avaʼuk.

Micaela: Taje toj tsots ta chapanel xtok li kʼusi laj yal li Satanase.

Sofía: ¿Kʼusi chakʼan chaval taje?

Micaela: Ti kʼu yelan laj yal li Satanase, laj yakʼbe ta aʼiel Eva xchiʼuk skotol krixchanoetik ti jaʼ mas lek ti mu X-ajvalilaj Dios ta stojolalike. Ta sventa liʼ xtoke, li Jeovae snaʼoj lek ti skʼan x-echʼ kʼuk sjaliluk yoʼ xakʼ ta ilel Satanás mi melel li kʼusi laj yale. Jaʼ yuʼun li Diose yakʼoj to akʼo ajvalilajuk kʼuk sjalil ta balumil li Satanase. Jaʼ yuʼun chkiltik ep vokoliletik liʼ ta Balumile, ta skoj ti jaʼ mero ajvalil li Satanase, ti maʼuk li Diose.d ¡Pe oy lekil aʼyejetik!

Sofía: ¿Kʼusi jaʼ li lekil aʼyejetike?

Micaela: Li Vivliae chchanubtasvan chaʼtos kʼusitik alakʼik sba ta sventa li Diose. Li baʼyele, jaʼ ti tsvul yoʼonton ta jtojolaltik kʼalal chkil jvokoltik li Jeovae. Jech kʼuchaʼal liʼe, jkʼeltik avil kʼusi laj yal ajvalil David ta Salmo 31:7. Li Davide ep laj yil svokol ti kʼu sjalil kuxie, pe aʼio avaʼi li kʼusi laj yal ta s-orasione. Avokoluk, ¿mi xuʼ xakʼel talel li tekstoe?

Sofía: Lek oy, xi chale: «Xitseʼin noʼox, xcuxet noʼox coʼnton yuʼun li xcʼuxul avoʼntone. Aviloj xa cʼu xʼelan li jvocole; laj xa anaʼ ti ep at-oʼnton chcaʼye».

Micaela: Jaʼ yuʼun, akʼo mi yakal chil svokol li Davide, jaʼ patbat yoʼonton kʼalal laj yaʼi ti snaʼoj skotol Jeova li kʼusi yakal tsnuptane. ¿Mi mu tspatuk avoʼonton ti snaʼoj skotol Jeova li jvokoltik xchiʼuk li kʼusi chkaʼi ta koʼontontike, akʼo mi mu xaʼibeik lek smelolal li yan krixchanoetike?

Sofía: Jech, tspatbun koʼonton.

Micaela: Li xchibal kʼusitik alakʼik sba ta sventa Diose, jaʼ ti muʼyuk chakʼ kil-o jvokoltik ta sbatel osile. Li Vivliae chchanubtasutik ti Diose poʼot xa chakʼbe slajeb li xchopol balumil Satanase xchiʼuk chakʼbe slajeb skotol li kʼusitik chopol kʼotemik ta pasele, ti te tsakal skʼoplal li vokoliletik la anuptanik xchiʼuk li ameʼe. ¿Mi xuʼ xtal jkʼelot ta yan xemana sventa chtal kakʼ avil ti kʼu yuʼun xuʼ jpat lek koʼontontik ti tslajes Dios li vokoliletike?e

Sofía: Lek chkaʼi, liʼ ta jmalaote.