MANTAL TA SLIKEBALTIK PAJINA

¿Kʼu yuʼun tspasik orasion li krixchanoetike?

¿Mi chapasilan orasion li voʼote? Oy ep buchʼutik ti tspasilanike, yuʼun kʼalal ta krixchanoetik ti mu xchʼunik mi oy Diose tspasik orasion ek. ¿Pe kʼu yuʼun ti tspasik orasione? Kʼalal laj yichʼik jakʼbel mi tspasik orasion li krixchanoetik ta Franciae oʼlol laj yalik ti tanae, yuʼun la «jaʼ mas jun yoʼonton chaʼi-o sbaik». Kʼalal tspasik orasion li krixchanoetik ta Europae maʼuk ti yuʼun oy ta yoʼontonik chichʼik ta mukʼ li Diose. Yuʼun jaʼ noʼox tskʼanik sventa chkoltaatik yoʼ «junuk noʼox yoʼonton chaʼi sbaik». Li jlom xtoke, jaʼ noʼox tsaʼik Dios kʼalaluk oy svokolike xchiʼuk tskʼanik ti x-akʼbatik ta anil li kʼusi tskʼanike (Isaías 26:16).

Pe ¿kʼusi chanop li voʼote? ¿Mi ta van xanop ti jaʼ noʼox tskoltaot yoʼ junuk avoʼonton xavaʼi aba li orasione? Mi achʼunoj ta sventa Diose, ¿mi chavakʼ venta kʼuxi tskoltaot ta akuxlejal li orasione? ¿O mi muʼyuk van buchʼu tstakʼbot chavaʼi li aorasione? Li Vivliae tskoltaot ta yaʼibel smelolal ti maʼuk noʼox sventa mas jun avoʼonton chavaʼi-o aba li spasel orasione, yuʼun jaʼ tsnopajesot ta stojolal Dios.