MANTAL TA SLIKEBALTIK PAJINA

¿Mi skʼan van xapas orasion?

Xuʼ van xi chajakʼbe abae: «Mi snaʼoj skotol kʼusitik ta jnop li Diose xchiʼuk li kʼusitik chtun kuʼune, ¿kʼu yuʼun skʼan xkalbe?». Muʼyuk chopol ti jech ta jakʼbe jbatik taje. Yuʼun li Jesuse xi onoʼox laj yale: «[Li Diose] snaʼoj xa onoʼox cʼusitic chtun avuʼunic ti cʼalal muʼyuc toʼox chacʼanbeique» (Mateo 6:8). Li ajvalil David ta voʼneal Israele laj yakʼ venta taje, yuʼun xi la stsʼibae: «Acʼo me muʼyuc toʼox chlocʼ ta que li cʼusi chcale, pero li voʼote, Mucʼul Dios, avotquinoj xa onoʼox» (Salmo 139:4). Vaʼun chaʼa, ¿kʼu yuʼun skʼan jpastik orasion? Sventa jtakʼtik taje, baʼyel jkʼeltik kʼusi chal Vivlia ta sventa li spasel orasione.a

LI SPASEL ORASIONE TSNOPAJESUTIK TA STOJOLAL DIOS

Akʼo mi chal Vivlia ti snaʼoj skotol li Jeovae,b pe chal xtok ti maʼuk noʼox jecheʼ tskʼan tsnaʼ li kʼusitik chal li tukʼil yajtuneltake (Salmo 139:6; Romanos 11:33). Li smukʼul nopben Jeovae mu jechuk kʼuchaʼal jpʼej komputadora ti naka noʼox tskʼej li kʼusitik ta sventa krixchanoetike. Li stuke tskʼan tsnaʼ li kʼusitik oy ta koʼontontike, yuʼun tskʼan ti xijnopaj ta stojolale (Salmo 139:23, 24; Santiago 4:8). Jech oxal, li Jesuse tstij koʼontontik ti akʼo jpastik orasione, akʼo mi snaʼoj xa onoʼox kʼusitik ta xtun kuʼuntik li Stote (Mateo 6:6-8). Kʼalal mas chkalbetik kʼusitik ta jnoptik li Jpasvanej kuʼuntike, mas chijnopaj ta stojolal.

Bakʼintike xuʼ van mu jnaʼtik lek kʼusi ta xkaltik li ta j-orasiontike. Akʼo mi jech, li Diose xil li kʼusi oy ta koʼontontike akʼo mi muʼyuk toʼox kalojbetik xchiʼuk chakʼbutik li kʼusi chtun kuʼuntik ta melele (Romanos 8:26, 27; Efesios 3:20). Kʼalal chkakʼtik venta ti tskoltautik li Diose, mas chijnopajutik ta stojolal, akʼo mi mu jnaʼtik lek kʼuxi la skoltautik.

¿MI TA STAKʼ SKOTOL ORASIONETIK LI DIOSE?

Li Vivliae chalbutik ta jamal ti tstakʼbe s-orasion tukʼil yajtuneltak li Dios ti skotol xuʼ yuʼune, pe chal xtok ti kʼu yuʼun muʼyuk tstakʼ junantik orasione. Jun skʼelobile jaʼo kʼalal oy tajek milbail li ta Israele, li Diose la stak batel li j-alkʼop Isaías sventa xbat yal liʼe: «Cʼalal ep chacʼopanicune, muʼyuc ta jtucʼulanboxuc yuʼun nojem ta chʼichʼ chquil li acʼobique» (Isaías 1:15). Lek jamal xvinaj ti buchʼutik muʼyuk ta xchʼunbeik smantal li Diose o muʼyuk lek li kʼusi tskʼanik li ta s-orasionike, muʼyuk ta xchikintabatik yuʼun li Diose (Proverbios 28:9; Santiago 4:3).

Pe li Vivlia xtoke xi chale: «Cʼalal oy cʼusi ta jcʼanbetic jech chac cʼu chaʼal tscʼan stuque, ta jnaʼtic ti ta xaʼay jcʼoptique» (1 Juan 5:14). ¿Mi jaʼ van skʼan xal ti chakʼbe skotol li kʼusitik tskʼanik li yajtuneltake? Xuʼ van mu jechuk. Jkʼeltik li kʼusi kʼot ta stojolal jtakbol Pabloe, oxib to velta la skʼanbe vokol Dios ti akʼo xlokʼesbat li chʼix ti chtiʼvan ta sbekʼtale (2 Corintios 12:7, 8, Ch). Xuʼ van te noʼox xlik-xkaj xchamel ta sat li Pabloe. ¡Laj van svul-o tajek yoʼonton! Laj yichʼ akʼbel jun matanal ti xuʼ xpoxtavan ta skʼelobil juʼelale xchiʼuk la xchaʼkuxes jun krixchano, akʼo mi jech, laj onoʼox stsʼik li xchamel stuke (Hechos 19:11, 12; 20:9, 10). Akʼo mi muʼyuk takʼbat yuʼun Dios li s-orasion jech kʼuchaʼal la skʼane, ta sjunul yoʼonton la xchʼam li koltael akʼbate (2 Corintios 12:9, 10).

Oy junantik krixchanoetik ti chalbe skʼoplal Vivliae laj yichʼik takʼbel li s-orasionik ta skʼelobil juʼelale (2 Reyes 20:1-7). Pe li Diose mu skotoluk jech la stakʼbe s-orasion li yajtuneltake. Oy junantik yajtuneltak Dios ti chopol laj yaʼi sbaik kʼalal muʼyuk takʼbatik yileluk yuʼun Dios li s-orasionike. Li ajvalil Davide xi la sjakʼe: «Mucʼul Dios, ¿baqʼuin to chanaʼun? ¿Me yuʼun jʼechʼel laj achʼayun o ta avoʼnton?» (Salmo 13:1). Pe kʼalal laj yakʼ venta ti ep ta velta koltaat yuʼun Jeova li Davide la spat mas yoʼonton ta stojolal. Xi to laj yale: «Jchʼunoj ti ep cʼuxun ta avoʼntone» (Salmo 13:5). Li yajtuneltak Dios avi eke skʼan mu xikta sbaik ta spasel orasion jaʼ to mi takʼbatik yuʼun li Diose, jech kʼuchaʼal la spas li Davide (Romanos 12:12).

TI KʼUXI TSTAKʼ ORASIONETIK LI DIOSE

Li Diose chakʼbutik li kʼusi chtun kuʼuntik ta melele.

Oy lek srasonal yuʼunik li jkʼanvanej totil meʼiletik ti mu skotoluk velta chakʼbeik ta anil yalab xnichʼnabik li kʼusitik tskʼanike. Li Dios eke, xuʼ van mu stakʼ li j-orasiontik jech kʼuchaʼal jnopoj ta jkʼantike o li kʼusi ora ta jkʼantike. Pe xuʼ jpat lek koʼontontik ta stojolal li Jpasvanej kuʼuntik ti chakʼbutik li kʼusitik chtun kuʼuntik ta melel mi sta yorail chile, jech kʼuchaʼal li jun jkʼanvanej totile (Lucas 11:11-13).

Xuʼ mu xkakʼtik venta kʼu yelan tstakʼ j-orasiontik li Diose.

Mi yakal ta jkʼanbetik koltael ta sventa jtosuk jvokoltik li Jeovae, mu me lekuk ti jnoptik ti yuʼun muʼyuk tstakʼ j-orasiontik ta skoj ti muʼyuk tskoltautik ta skʼelobil juʼelale. Jaʼ lek ti jnoptik kʼutik yelan skoltaojutik talel li Diose. Jech kʼuchaʼal liʼe, yikʼaluk van oy junuk jlekil amigotik ti la skoltautik kʼalal jaʼo chtun kuʼuntik koltaele (Proverbios 17:17). Li Jeovae xuʼ van la stijbe yoʼonton li kamigotik sventa tskoltautike. Jech xtok, li stakʼobil j-orasiontik chakʼbutik li Jeovae xuʼ te jtatik ta Vivlia. Yuʼun xuʼ te jtatik jpʼijiltik sventa stsal kuʼuntik li jvokoltike (2 Timoteo 3:16, 17).

Jutuk mu skotoluk velta muʼyuk chchʼay jvokoltik li Diose, jaʼ noʼox ta xakʼbutik jtsatsaltik sventa xkuch batel kuʼuntik (2 Corintios 4:7). Jun skʼelobile, jaʼo kʼalal la skʼanbe koltael Stot li Jesús sventa xlokʼesbat li jtos svokole, yuʼun chiʼ mi xakʼbe ta kʼexlal sbi li Diose, pe li Jeovae jaʼ noʼox la stak tal yaj-anjel yoʼ tstsatsubtas li Xnichʼone (Lucas 22:42, 43). Xuʼ stunes junuk kamigotik ek sventa tspat koʼontontik kʼalal jaʼo chtun kuʼuntik tajek koltaele (Proverbios 12:25). Ta skoj ti oy bakʼintik ti mu xkakʼtik venta kʼu yelan tstakʼ j-orasiontik li Diose, skʼan vikʼiluk lek jsatik kʼu yelan tstakʼbutik.

Bakʼintike jaʼ to tstakʼ j-orasiontik mi la sta yorail chil li Diose.

Li Vivliae chal li Dios ti skotol xuʼ yuʼune tskolta li buchʼutik bikʼit chakʼ sbaik mi la «sta yoraile» (1 Pedro 5:6). Jaʼ yuʼun, mi chkiltik ti muʼyuk tstakʼ ta anil j-orasiontik li Jeovae, maʼuk skʼan xal ti yuʼun muʼyuk oyutik ta yoʼontone. Ta skoj ti toj ep kʼusitik snaʼ li Jpasvanej kuʼuntike, ti jaʼ mu sta li voʼotike, snaʼoj kʼusi ora chakʼbutik li kʼusitik chtun kuʼuntike.

Kalbetik junuk skʼelobil, nopo noʼox avaʼi ti oy jun akerem ti bikʼit to ti tskʼan manbel jkotuk svisikletae. ¿Mi ta van xamanbe ta anil? Mi chavakʼ venta ti mu to xtojob ta stsʼotele, xuʼ van chanop ti jaʼ lek ti akʼo to smalae. Pe ta mas tsʼakale xuʼ van chanop chamanbe kʼalal mi chʼi xaʼox jutuke. Jaʼ jech li Dios eke, mi muʼyuk la avikta aba ta skʼanbele xuʼ «chayacʼbot li cʼusi oy ta avoʼnton» mi la sta yorail chile (Salmo 37:4).

PATO AVOʼONTON TI CHCHIKINTA AORASION LI JEOVAE

Li Vivliae tstijbe yoʼonton li melel yajtsʼaklomtak Cristo ti akʼo xchʼunik ti chkoltaatik yuʼun li orasione. Xuʼ van oy buchʼu chal ti kʼun ta alele, pe jaʼ vokol li ta pasele. Melel onoʼox ti ta jkʼantik ti akʼo stakʼ ta anil j-orasiontik li Dios kʼalal jaʼo oy jvokoltike o kʼalal oy kʼusi chopol chkichʼtik pasbele. Akʼo mi jech, skʼan jvules ta joltik ti laj yal komel Jesús ti mu xkikta jbatik ta spasel orasione.

Li Jesuse laj yalbe skʼoplal jun meʼon ants ti ep ta velta ay skʼopon jun jchapanvanej ti muʼyuk slekil yoʼonton sventa xpakbat skʼoplale (Lucas 18:1-3). Akʼo mi mu toʼox skʼan skolta meʼon ants li jchapanvaneje, ta tsʼakale xi la snope: «Liʼ xvaʼvun tsaʼbun xcʼuxul jol li meʼon antse, jech ta jchapan. Yuʼun ch-echʼ coʼnton yuʼun ti liʼ noʼox xvaʼvune» (Lucas 18:4, 5). Kʼalal laj yichʼ tsʼibael ta hebreo kʼop li teksto taje, chal ti la skolta meʼon ants ta skoj ti mu skʼan ti chopol skʼoplal xkom li jchapanvaneje.c Mi la skolta jun meʼon ants li jchapanvanej ti chʼabal slekil yoʼonton ta skoj ti mu skʼan ti chopol skʼoplal xkome, li Dios ti toj ep chkʼanvane oy mas srasonal ti tskolta li buchʼu ta «cʼacʼal ta acʼubal» ta skʼanik koltaele. Jech kʼuchaʼal laj yal li Jesuse, li Diose «mu xjalij yuʼun. Ta ora chaxchapanboxuc» li avokolike (Lucas 18:6-8).

Oy bakʼintik ti chijlubutik ta skʼanel koltaele, pe skʼan mu xijlubtsajutik. Kʼalal muʼyuk chkikta jbatik ta spasel orasione chkakʼtik ta ilel ti chtun kuʼuntik li koltael chakʼ Diose. Jech xtok, ta jchantik kʼuxi tstakʼ j-orasiontik li Diose, vaʼun jech chijnopajutik mas ta stojolal. Ta melel, xuʼ jpat lek koʼontontik ti tstakʼ j-orasiontik li Jeova mi muʼyuk laj kikta jbatik ta skʼanbele xchiʼuk mi oy lek xchʼunel koʼontontike (Lucas 11:9).

[Tsʼibetik ta yok vun]

[Tsʼib ti mukʼtik sletraile ta pajina 4]

«Nopajanic ta stojol li Diose, jech chnopaj ta atojolic ec.» (Santiago 4:8)

[Tsʼib ti mukʼtik sletraile ta pajina 5]

«Jtaoj xa spatubil coʼntontic ta stojol li Diose, jech cʼalal oy cʼusi ta jcʼanbetic jech chac cʼu chaʼal tscʼan stuque, ta jnaʼtic ti ta xaʼay jcʼoptique.» (1 Juan 5:14)

[Tsʼib ti mukʼtik sletraile ta pajina 6]

«Jaʼ yuʼun biqʼuit me xavacʼ abaic ta stojol li Dios ti echʼem stsatsale, jech chayacʼoxuc ta ichʼel ta mucʼ ti cʼalal ta sta yoraile.» (1 Pedro 5:6)

[Tsʼib ti mukʼtik sletraile ta pajina 7]

«Cʼanic, chaʼacʼbatic.» (Lucas 11:9)

[Lokʼol ta pajina 7]

Li stakʼobil j-orasiontik chakʼbutik li Diose xuʼ te jtatik ta Vivlia

[Lokʼol ta pajina 7]

Li Diose xuʼ tstunes kamigotaktik sventa tskoltautik kʼalal jaʼo ta xtun kuʼuntike