MANTAL TA SLIKEBALTIK PAJINA: XUʼ XANOPAJ TA STOJOLAL DIOS
Muʼyuk yan kʼuxi xuʼ lek xijkuxi-o
¿Kʼusi skʼan xapas sventa xanopaj ta stojolal li Diose? Laj xa jchantik tal jaytosuk kʼusitik skʼan jpastik sventa lek xkil jbatik xchiʼuk li Jpasvanej kuʼuntike.
Skʼan jnaʼtik xchiʼuk jtunesbetik li sbie, ti jaʼ li Jeovae.
Skʼan nopolik noʼox jkʼopontik ta orasion xchiʼuk jkʼel Jvivliatik.
Skʼan jpastik skotol ora li kʼusi tskʼanbutike.
Sventa xanopaj ta stojolal li Diose tunesbo sbi, kʼopono ta orasion, kʼelo li Vivliae xchiʼuk paso li kʼusi tskʼanbote
¿Li voʼot une? ¿Mi yakal van chapas li kʼusitik laj yichʼ alel sventa xanopaj ta stojolal li Diose? ¿Mi oy van bu jtosukal skʼan mas xavakʼ ta avoʼonton spasel? Ta melel oy van bu skʼan mas xavakʼ persa spasel, pe mu xavikta aba, jaʼ nopbo li sbalil chatabe mi jech la apase.
Xi laj yal Jennifer ti likem ta Estados Unidose: «Kʼusiuk noʼox ti chkakʼtik persa spasel sventa xlekub mas ti kʼu yelan xkil jbatik xchiʼuk Diose, oy sbalil. Ta skoj taje ta jtatik-o ep bendision: ta jpat mas koʼontontik ta stojolal, ta xkojtikinbetik lek stalelal, pe li kʼusi mas leke, jaʼ ti chlik jkʼantik tajeke. Muʼyuk yan kʼuxi xuʼ lek xijkuxi-o».
¿Mi chakʼan ti jech lek chavil aba xchiʼuk li Dios eke? Li stestigotak Jeovae oy me tajek ta yoʼontonik tskoltaikot xchiʼuk chchanubtasvanik ta Vivlia ta moton. Xuʼ xabat xtok li ta Salon sventa Tsobobbail sbi yuʼunike, ti jaʼ te chbat yaʼiik tal mantale. Te chavojtikin krixchanoetik ti tsots skʼoplal chilik ti lek xil sbaik xchiʼuk Diose.a Ta kʼunkʼun jech chavaʼi aba kʼuchaʼal li jtsʼibajom yuʼun salmo ti xi laj yale: «Li vuʼune chinopaj ta atojol [Dios], yuʼun jaʼ toj lec chcaʼay» (Salmo 73:28).
a Mi chakʼan chachan li Vivliae o chasaʼ bu nopol xkom li Salon sventa Tsobobbail ti bu nakalote, jakʼbo li buchʼu laj yakʼbot li revista liʼe o saʼo ta jpajinakutik ta Internet ta www.jw.org/tzo. Li ta yolon pajina chlokʼ tale, tʼujo bu junukal lek chavil yoʼ bu chal «TSʼIBAJAN TAL» xie.