¿Kʼu yuʼun skʼan xachan-o batel li Vivliae?

1. ¿Kʼusi sbalil chatabe mi muʼyuk laj avikta xchanel li Vivliae?

Ta melel, koliyal ti laj xa achan li kʼusitik tsotsik skʼoplal ta Vivliae mas xa lik akʼan li Jeovae. Pe skʼan me xavakʼbe yipal sventa mas to xakʼane (1 Pedro 2:2). Mi la achanilan-o batel li Vivliae, mas me chanopaj ta stojolal li Diose, vaʼun xuʼ chakuxi sbatel osil. Kʼelo Juan 17:3; Judas 21.

Kʼalal mas chavojtikin batel li Diose, mas me tstsatsub li xchʼunel avoʼontone, vaʼun jech chamuyubtabe yoʼonton li Diose (Ebreos 11:1, 6). Li xchʼunel koʼontontike jaʼ tskoltautik sventa jsutes koʼontontik xchiʼuk ti oyuk kʼusitik jel ta jkuxlejaltike. Kʼelo Echos 3:19.

2. ¿Kʼuxi xuʼ xakolta li yantike?

Xuʼ van oy ta avoʼonton yalbel yantik li kʼusi laj xa achane, yuʼun lek xkaʼitik yalel li lekil aʼyejetike. Mi laj avojtikin batel mas li kʼusi chchanubtasvan li Vivliae, ta me xachan stunesel Vivlia sventa xavalbe batel skʼoplal li Jeovae xchiʼuk li lekil aʼyejetike. Kʼelo Romanos 10:13-15.

Xuʼ van xlik avalbe avutsʼ avalaltak xchiʼuk avamigotak. Pe ichʼvanan me ta mukʼ xchiʼuk ta slekiluk me avoʼonton xavalbe. Jaʼ albo li kʼusi yaloj tspas Diose, maʼuk xavalbe ti muʼyuk lek li kʼusi xchʼunojike. Vuleso ta ajol ti jaʼ mas chkʼot ta yoʼontonik ti kʼu yelan chavakʼ ta ilel atalelale. Kʼelo 2 Timoteo 2:24, 25.

3. ¿Kʼu van yelan xuʼ xavil abaik xchiʼuk li Diose?

Mas me chachʼi ta mantal xchiʼuk mas me lek chavil aba xchiʼuk Jeova mi la achan batel li Vivliae. Li voʼote xuʼ me te tsakal akʼoplal li ta yutsʼ yalal Diose. Kʼelo 2 Korintios 6:18.

4. ¿Kʼusi tskoltaot sventa xachʼi-o batel li ta mantale?

Mu me xavikta xchanel li Skʼop Diose (Ebreos 5:13, 14). Kʼanbo junuk stestigo Jeova sventa xakʼbot chanubtasel ta Vivlia xchiʼuk li livro ¿Kʼusi chchanubtasvan li Vivliae? Mi mas la achan batele, mas me xamuyubaj. Kʼelo Salmo 1:1-3; 73:27, 28.

Vuleso ta ajol ti likem tal ta stojolal Jeova li lekil aʼyejetik ta Vivliae, ti jaʼ jun Dios ti xmuyubaj noʼoxe. Mi chakʼan nopol oyot ta stojolale, skʼan me xabat ti bu tstsob sbaik li tukʼil yajtuneltake (Ebreos 10:24, 25). Mi chavakʼ persa spasbel kʼusi tskʼan yoʼonton li Jeovae, ta me xata li melel kuxlejale: li kuxlejal sbatel osile. Ta melel, li kʼusi mas lek xuʼ xapase jaʼ ti xanopaj ta stojolal li Jeovae. Kʼelo 1 Timoteo 1:11; 6:19.