Ta sjunul yoʼonton bat tunikuk ta Nueva York

LEʼ XA tal jayibuk jabile, li César xchiʼuk li yajnil ti Rocío sbie, jun toʼox yoʼontonik te nakalik ta California. Li Cesare ch-abtej skotol kʼakʼal ta smeltsanel calefacción, ventilación xchiʼuk aire acondicionado, li yajnile ch-abtej oʼlol kʼakʼal xchiʼuk jun doktor. Li bu nakalike jaʼ sna stukik xchiʼuk muʼyuk yalab xnichʼnabik. Pe oy kʼusi kʼot ta pasel ti jelbat-o xkuxlejalike.

Li ta oktuvre ta 2009, li Betel ta Estados Unidose la stak batel jun karta ta skotol tsobobbailetik li ta lum taje. Li karta taje la stijbe yoʼonton li buchʼutik xtojobik spasel jaytosuk abtelaletik ti xlokʼuk ta yoʼontonik sventa xbat koltavanikuk ta smukʼibtasel li Betel ta Wallkill (Nueva York). Jech xtok, li buchʼutik mu xa x-ikʼatik ta Betel ta skoj li sjabilalike takatik ta ikʼel li ta abtelal taje. Xi chal li César xchiʼuk Rocioe: «Ta skoj ti ep xa jabilalkutike, laj kakʼkutik venta ti xuʼ muʼyuk xa jech xkichʼkutik takel ta ikʼele, jaʼ yuʼun muʼyuk la jpʼajkutik li mukʼta matanal taje». ¿Kʼusi la spasik un? La snojesik noʼox ta anil li solisitudike.

Echʼ mas ta jun jabil pe muʼyuk kʼusi x-albatik-o. Akʼo mi jech, la sjutukajesik li kʼusitik oy yuʼunike. Xi chal li Cesare: «La jpaskutik ta bikʼit kuarto li skotleb jkarokutike xchiʼuk jaʼ te bat naklikunkutik sventa xkakʼkutik ta lokʼel li bu toʼox nakalunkutike. Lek mukʼ li jnakutike, chib sien metro kuadrado smukʼul, pe laj kiktakutik akʼo mi jaʼ jkʼupil nakutik xchiʼuk ti mu to jaluk la jvaʼankutike. Vaʼun jaʼ te bat naklikunkutik li ta skotleb jkarokutik ti 25 metro kuadrado noʼox smukʼule. Ti jech la jpaskutike jaʼ tskoltaunkutik mi laj kichʼkutik to ikʼele». ¿Kʼusi kʼot ta pasel? Xi chal li Rocioe: «Kʼalal jun xaʼox u te nakalunkutik li ta bikʼit jkuartokutike, laj kichʼkutik ikʼel sventa xbat koltavankunkutik kʼuk sjalil li ta abtel ta Wallkille. Laj kakʼkutik venta ti kʼalal la jutukajes li kʼusitik oy kuʼunkutike, la jpaskutik li kʼusi xuʼ xakʼbunkutik-o sbendision Jeovae».

LI JEOVAE CHAKʼBE BENDISION LI KʼUSITIK TSPASIKE

Toj ep xa noʼox ermanoetik xkoʼolajik kʼuchaʼal César xchiʼuk Rocío ti mu sjalan sbaik sventa chkoltavanik li ta abtelaletik ta svaʼanel Betel li ta s-estadoal Nueva Yorke. Jlome te chkoltavanik ta smukʼibtasel li Betel ta Wallkille, li jlome jaʼ jun matanal chaʼiik ti chkoltavanik ta smeltsanel li smeʼ nail abtelal ta Warwicke.a (Kʼelo li tsʼib ta yok vune.) Ep nupultsʼakaletike yiktaoj skʼupil naik, lek yabtelik xchiʼuk xchonbolomik sventa mas chtunik ta stojolal Jeova. ¿Kʼu yelan chil Jeova taje? ¿Mi yakʼojbe bendision li buchʼutik jech spasojike? ¡Ta melel jech!

Jech kʼuchaʼal Way ti jaʼ yabtel smeltsanel lus xchiʼuk ti jutuk mu 60 xa sjabilalik xchiʼuk li yajnil ti Debra sbie, la xchon komel snaik xchiʼuk jutuk mu skotoluk li kʼusitik oy yuʼunik ta Kansase. Bat tunikuk jayib kʼakʼal ta xemana ta Betel ta Wallkill.b (Kʼelo li tsʼib ta yok vune.) Akʼo mi ep kʼusitik la sjel li ta xkuxlejalike, chaʼiik ti toj ep sbalil staojbeike. Xi chal ta sventa li yabtel tspas ta Betel li Debrae: «Bateltike te xa chkil jba li ta lokʼoletik ti chlokʼ ta jvuntik ti bu chvinaj ti yakal tsvaʼanik naetik li ermanoetik kʼalal oyik xa ta Paraisoe».

Yan ti buchʼutik la xchon snaik xchiʼuk li kʼusitik oy yuʼunik sventa chbat koltavanikuk li ta Warwicke jaʼ li Melvin xchiʼuk Sharon, ti likemik ta Carolina del Sure. Mu kʼunuk laj yaʼiik spasel taje, pe jaʼ jun matanal laj yaʼiik xtok ti chkoltavanik li ta chʼul abtelale. Xi chalike: «Jaʼ jun muyubajel chkaʼikutik ti chikolvankutik ta jun abtelal ti xuʼ stabe sbalil sjunul j-organisasiontik ta spʼejel Balumile».

Li Kenneth ti snaʼ smeltsanel na ti juvilado xae xchiʼuk li yajnil Maureen, ti oy xa mas ta 50 sjabilalike, bat koltavanikuk ta Warwick. Li jun nupultsʼakal taje likik batel ta California. Pe baʼyel la xchiʼinik ta loʼil jun ermana ta stsobobbailik sventa xchabibat li snaike. Jech xtok la skʼanbeik vokol yutsʼ yalal li ermana taje ti akʼo xchabibeik li stot Ken, ti mol xae. ¿Mi la xchaʼnaʼik ta tsʼakal ti jech la spasik sventa chbat tunikuk ta Betele? Xi chal li Kene: «Toj ep xa noʼox sbalil jtaojbekutik. Akʼo mi ta jnuptankutik vokoliletik bateltik, jun noʼox koʼontonkutik. Ta jtijbekutik yoʼonton ti jech akʼo spasik li buchʼutik xuʼ yuʼunike».

MU KʼUNUK LAJ YAʼIIK

Jkʼeltik batel kʼusi stsalojik jutuk mu skotoluk li ermanoetik ti batemik li ta abtelaletik taje. William xchiʼuk Sandra, ti mas xa ta 60 sjabilalike, oy toʼox lek snaik ta Pensilvania. Oy toʼox vuklajunvoʼ svinikik ti te ch-abtej yuʼunik li ta smukʼta empresaik ti tspasik stakʼinaltak makinaetike. Muʼyuk bu xlokʼik-o li ta stsobobbailik bu chʼiik tale xchiʼuk jutuk mu skotoluk li yutsʼ yalalike te nopol nakalik. Pe kʼalal kʼot skʼakʼalil ti albatik ti xuʼ xtunik jayibuk kʼakʼal ta xemana ta Wallkille, snaʼojik ti skʼan xikta li buchʼutik xojtikinike, li yutsʼ yalalik xchiʼuk li yamigoike. Xi chal li Williame: «Li kʼusi mas vokol laj kaʼikutike jaʼ ti persa laj kiktakutik li bu onoʼox nakalunkutike». Ep tajek ta velta la spasik orasion xchiʼuk la spasik onoʼox li kʼusi oy ta yoʼontonike, li avie jun-o yoʼontonik ta skoj taje. Xi to chale: «Ti tsakbilunkutik ta venta xchiʼuk ti koʼol chitunkutik xchiʼuk li betelitaetike, mu kʼusi xkoʼolaj-o. ¡Mu xa noʼox bu jech ximuyubaj ta jkuxlejalkutik xchiʼuk li Sandrae!».

Ricky, ti jaʼ toʼox jkʼel-abtel ta svaʼanel naetik ta Hawaie, laj yichʼ takel ta ikʼel sventa chbat koltavanuk ta abtel jayib kʼakʼal ta xemana li ta Warwicke. Kendra, ti jaʼ li yajnile, oy ta yoʼonton ti xbat koltavanuk li smalale. Pe oy kʼusi ta svul-o yoʼontonik: ¿kʼu van yelan chaʼi li skeremik ti Jacob sbi ti lajcheb sjabilale? Tsjakʼilanbe sbaik mi lek van ti te chbatik ta naklej li ta s-estadoal Nueva Yorke. ¿Mi chnop van chaʼi skeremik ta skoj ti toj jelel li bu chkʼotike?

Xi chal li ermanoe: «Toj tsots skʼoplal chkaʼikutik ti jtakutik jun tsobobbail ti bu oy kʼoxetik ti koʼoltikuk sjabilalik xchiʼuk Jacob xchiʼuk ti lek tsotsikuk ta mantale. Yuʼun ta jkʼankutik ti akʼo sta slekil amigotake». Li utsʼ alalil taje kʼotik ta jun tsobobbail ti jutuk tajek kerem tsebetike, pe ti oy jayvoʼuk betelitaetik ti keremik toe. Xi to chal xtoke: «Kʼalal jaʼo tsuts li jtsobajelkutik li ta achʼ tsobobbaile, la jakʼbe kʼu yelan chaʼi sba Jacob ti chʼabal kerem tsebetik ti koʼol sjabilalike. Xi laj yalbune: ‹Mu kʼu xal avoʼonton tot, jaʼ chkamigoin li betelitaetike›».

Taje jech kʼot ta pasel, yuʼun li betelitaetike lek yamigo sbaik xchiʼuk li Jacobe. ¿Kʼusi sbalil staojbe un? Xi chal li ermanoe: «Oy jun akʼobal jaʼo te li-echʼ ti bu oy skuarto li jkereme, vaʼun tsanal slus laj kil. Kaloje yakal chtajin ta videojuego, pe jaʼ to laj kile, ¡yakal tskʼel Svivlia! La jakʼbe kʼusi tspas, vaʼun xi la stakʼbune: ‹Kʼox betelitaun, jaʼ yuʼun ta jkʼan ta jtsutses skʼelel Vivlia ta jun jabil›». Lek xvinaj ti jun yoʼontonik li Ricky xchiʼuk Kendrae. ¿Kʼu yuʼun? Maʼuk noʼox ti chkoltavan ta Warwick li ermanoe, yuʼun jaʼ ti lek chchʼi-o talel ta mantal li skeremik ta skoj ti laj yikta komel li snaike (Proverbios 22:6).

CHIKTABEIK TA SKʼOB JEOVA LI XKUXLEJALIKE

Li ermanoetik ti chkoltavanik ta Wallkill xchiʼuk Warwicke, snaʼojik ti chlaj li abtelaletik tee, xchiʼuk ti chkʼot skʼakʼalil ti tstsuts li yabtelike. ¿Mi ta van svul yoʼontonik ta skoj ti mu snaʼ bu chbatik o kʼusi tspasike? ¡Moʼoj! Ep buchʼutik jech chaʼi sbaik kʼuchaʼal chib nupultsʼakaletik ti oy xa van mas ta 50 sjabilalik, ti likemik ta Floridae. Jun nupultsʼakal ti takatik ta ikʼel sventa chtunik kʼuk sjalil li ta Warwicke, jaʼ li John xchiʼuk li yajnil ti Carmen sbie. Li Johne jaʼ jun jkʼel-abtel sventa svaʼanel naetik. Xi chalike: «Lek tajek kilojkutik ti yakal-o chakʼbunkutik kʼusitik chtun kuʼunkutik li Jeovae. Pe mu jaʼuk noʼox tskoltaunkutik li avie, moʼoj, lek jchʼunojkutik ti jech-o tspas kʼalal mi lisutkutik batele» (Salmo 119:116). Li Luis ti jaʼ yabtel tspas stupʼobil kʼokʼ ti koʼol te chtun ta Wallkill xchiʼuk li yajnil ti Quenia sbie, xi chalike: «Kilojkutik ti ta slekil yoʼonton chakʼbunkutik li kʼusi chtun kuʼunkutik li Jeovae. Lek tajek jpatoj koʼontonkutik ti ta onoʼox xchabiunkutik Jeova akʼo mi mu jnaʼkutik kʼuxi chut, bakʼin o ti bu oyunkutike» (Salmo 34:10; 37:25).

‹BENDISION SVENTA CH-EPAJ KʼUSITIK OY AVUʼUNIK›

Jutuk mu skotoluk li buchʼutik te batik ta abtel ta Nueva Yorke, xuʼ van ep kʼusitik la snopik sventa mu xbatike. Pe laj yakʼik ta preva Jeova jech kʼuchaʼal xi chkichʼtik albel eke: «Pasic preva avilic; te chavilic me muc ta jamboxuc li sventanail vinajele, me muc ta jmalboxuc yalel tal li bendición sventa ch-epaj cʼusitic oy avuʼunique» (Malaquías 3:10).

Li voʼot une, ¿mi ta van xavakʼ ta preva li Jeova eke? Ta jtijkutik avoʼonton sventa xavalbe ta orasion xchiʼuk xakʼel mi xuʼ xakoltavan ta Nueva York o ta svaʼanel yan kʼusitik sventa li yichʼobil ta mukʼe. Mi jech la apase, chavil kʼu yelan tskoltaot li Jeovae (Marcos 10:29, 30).

Oy jun nupultsʼakal ti likemik ta Alabamae. Li vinike Dale sbi, jaʼ jun injeniero sventa spasel kareteraetik xchiʼuk bakʼoetik, li yajnile Cathy sbi. Xchaʼvoʼalik chkʼot koltavanikuk jayibuk kʼakʼal ta xemana li ta Wallkille xchiʼuk chalik ti toj kʼupil tajek ti jech chtunik ta stojolal Jeovae. Xi chalike: «Mi ayan stsatsal avoʼonton sventa chapas taje xchiʼuk ti xapas preva avil li kʼusi muʼyuk nopemot spasele, te me chavil ch-abtej li xchʼul espiritu Jeovae». ¿Kʼusi stakʼ xapas mi oy ta avoʼonton jech chatun ta stojolal Jeova taje? Xi chal Dale ti kʼusi xuʼ jpastike: «Jutukajeso li kʼusitik oy avuʼune, vaʼun chaʼjutukajeso, mi jech xaʼox la apase jutukajeso to yan. ¡Muʼyuk chachaʼnaʼ ta tsʼakal mi jech la apase!». Gary ti ta Carolina del Norte likeme, oy xa ta 30 jabil ch-abtej ta skʼelel ti lekuk xichʼ vaʼanel naetike. Te chtun ta Warwick xchiʼuk li yajnil ti Maureen sbie. Xchaʼvoʼalik chalik ti «jaʼ jun bendision ti jmoj ch-abtejik xchiʼuk epal yajtuneltak Jeova ti ep xa jabil tunemik ta Betele». Xi chal li ermanoe: «Sventa chijtun li ta Betele skʼan lek noʼox sba jkuxlejaltik, pe taje jaʼ lek sta-o ti jech xijkuxi li avie». Yan nupultsʼakale te toʼox nakalik ta Illinois. Li vinike Jason sbi, ch-abtej toʼox ta jun empresa sventa stsakanel lus, li yajnile Jennifer sbi. Ta skoj ti chkoltavanik li ta Wallkille xkoʼolaj chaʼiik li kuxlejal ta achʼ balumile. Xi to chal li Jennifere: «Toj echʼ xa noʼox lek chkaʼi jbatik ti kʼupil chil Jeova xchiʼuk ti mu xchʼay ta sjol skotol li kʼusi ta jpastike. Jech xtok toj ep chakʼbot bendision li Jeovae».