KʼUSITIK CHICHʼ JAKʼEL TA SVENTA VIVLIA
¿Kʼusi skʼan xapas sventa xakʼot ta lekil totil o lekil meʼile?
¿Mi chachanubtas avalab anichʼnab yoʼ skʼanik li Diose?
Sventa lek xchʼi tal li alab nichʼnabiletike skʼan ti skʼanojuk sbaik xchiʼuk ti yichʼojuk sbaik ta mukʼ li stot smeʼike (Kolosenses 3:14, 19). Jech xtok skʼan snaʼik ti kʼanbilik yuʼun li stot smeʼike xchiʼuk ti xmuyubajik ta stojolalike. Li Jeovae laj yakʼbe jun skʼelobil li totil meʼiletike, yuʼun laj yal ti lek skʼanoj xchiʼuk ti spatoj yoʼonton ta stojolal li Xnichʼon ti jaʼ Jesukristoe. (Kʼelo Mateo 3:17.)
Li Jtotik Jeova ta vinajele chaʼibutik li kʼusi chkaltike xchiʼuk tstsak ta venta ti kʼu yelan chkaʼi jbatike. Li totil meʼiletike skʼan xchanbeik li Jeovae, jaʼ yuʼun skʼan xchikintabeik li yalab xnichʼnabike (Santiago 1:19). Tsots skʼoplal ti skʼan stsakik ta venta ti kʼu yelan chaʼi sbaike xchiʼuk skʼan me mu labaluk sba xaʼiik mi muʼyuk lek chtakʼavike. (Kʼelo Números 11:11, 15.)
¿Kʼuxi xuʼ xakolta avalab anichʼnab sventa lek xbat xkuxlejalike?
Li totil meʼiletike oy ta sbaik yakʼel mantal li ta snaike (Efesios 6:1). Jech kʼuchaʼal li Jeovae, li totil meʼiletike skʼan xalbeik kʼusi li mantaletik skʼan xchʼunike xchiʼuk skʼan xalbeik kʼusi chkʼot ta pasel mi muʼyuk la xchʼunike. Ti jech tspasike jaʼ ta skoj ti skʼanoj li yalab xnichʼnabike (Génesis 3:3). Jech xtok mu stakʼ xichʼik sujel sventa xchʼunik mantal, jaʼ mas lek ti xichʼik albel kʼusi lekilal tstaik mi jaʼ tspasik li kʼusitik leke. (Kʼelo Isaías 48:18, 19.)
Akʼo persa skoltael avalab anichʼnab yoʼ xlik skʼanik li Jeovae. Vaʼun lek kʼusi chkʼot ta nopel yuʼunik mi chlik skʼanike akʼo mi muʼyuk te achiʼukik. Kʼalal oy kʼusi chakʼ jchantik li Diose, yuʼun jaʼ jech stalelal li stuke. Jaʼ yuʼun skʼan jech spasik li totil meʼiletike. (Kʼelo Deuteronomio 6:5-7; Efesios 4:32; 5:1.)