‹Ti chinopaj ta stojol ti Diose, jaʼ xlokʼ venta chkaʼi›

KʼALAL baluneb toʼox jabilale, muʼyuk xa lichʼi, jech-o jnatil likom. Li avie 43 xa jabilal, pe kʼajomal noʼox jun metro jnatil. Sventa mu jvul-o tajek koʼonton yuʼun li jnatile, li jtot jmeʼe laj yalbeikun ti jaʼ lek akʼo xi-abteje. Jaʼ yuʼun laj kakʼ jun jchonolajeb ta stiʼ jna sventa jchon sat teʼetik. Ta skoj ti lek noʼox sak xchiʼuk chʼubabil kuʼun li jchonolajebe, ep buchʼutik chtal manolajikuk.

Pe maʼuk te paj-o jvokol ti ep xa chi-abteje. Kʼalal chbat manolajkun ta jun tiendae, mu jtabe lek staylej li mexae yuʼun mas toyol yakʼojik. Skotol li kʼusitik pasbile jaʼ sventa tayal krixchanoetik. Chkat-o tajek koʼonton yuʼun taje. Pe kʼalal chanlajuneb xaʼox jabilale, lik jeluk li jnopbene.

Jun veltae kʼotik ta manolajel chaʼvoʼ stestigotak Jeova li bu chichonolaje. Laj yalik ti chakʼbeikun chanubtasel ta Vivliae, vaʼun la jchʼam ek. La xchanubtasikun ti skʼan jaʼ mas tsots skʼoplal xkil li Jeovae, ti maʼuk li jnatile. Jaʼ la skoltaun tajek taje. Li teksto ti mas tspat koʼontone jaʼ li kʼusi laj yal jun jtsʼibajom yuʼun Salmoe. Li sbavokʼal teksto taje xi chale: «Li vuʼun une ta xinopaj ta stojol ti Diose, xlocʼ venta ta xcaʼi» (Salmo 73:28, Ch).

Te toʼox nakalunkutik xchiʼuk kutsʼ kalal ta Costa de Marfil. Li krixchanoetik tee mu xa bu labal chilikun. Pe jel tajek jkuxlejal kʼalal laj yikʼikun batel ta naklej ta Burkina Faso li jtot jmeʼe. Li krixchanoetik tee jaʼ noʼox chkʼelvanik tajek, jech oxal mu xa bu lilokʼ ta jna. Te van jayibuk xemana ta tsʼakale, vul ta jol ti la jkʼupin tajek li kʼusitik laj toʼox jchan ta sventa Jeovae. Pe muʼyuk buchʼu xchanubtasun ta Vivlia li ta Burkinae. Jaʼ yuʼun litsʼibaj batel li ta Betel yuʼun Stestigotak Jeovae, vaʼun la stakbeikun tal jun misionera ti Nani sbie. Kajal tal ta smotosikleta. Li ermana taje lek tajek xkʼopoj.

Ta skoj ti achʼeltik li be bu nakalune chijachʼkutik tajek, mas to kʼalal yorail voʼtike vokol tajek chijelavutik. Kʼalal chbat skʼelun ta jna li Nanie ep ta velta pʼaj li ta smotosikletae, pe muʼyuk bu xikta sba. Jun veltae, laj yalbun mi xuʼ xibat xchiʼuk li ta Salon sventa Tsobobbaile. Toj chʼayal likom, yuʼun jnaʼoj ti persa skʼan stsʼik kuʼun ti chkʼelvanik li krixchanoetike. Jech xtok, ta skoj ti ta patil chibat li voʼone, xuʼ van mas xa vokol chaʼi stsʼotel batel li Nanie, yuʼun mas xa ol li motosikletae. Pe libat onoʼox xchiʼuk. Ti kʼusi la skoltaun sventa spas kuʼun taje, jaʼ li kʼusi chal li xchaʼvokʼal teksto ti mas tspat koʼontone, yuʼun xi chale: «Cajval Dios, cʼotemot ta jnacʼobbailot».

Ep ta velta lipʼajkutik ta achʼeltik xchiʼuk li Nanie. Akʼo mi jech muʼyuk laj kikta jbakutik, yuʼun toj kʼupil tajek chkaʼikutik ti chibatkutik ta salone. Toj yan xa noʼox sba kʼu yelan chkʼelvanik li krixchanoetik ta kayeetike, yan li ta salone lek noʼox stseʼet sat li ermanoetike. Kʼalal echʼ xaʼox baluneb ue, laj kichʼ voʼ.

Xi tstsuts li teksto ti mas tspat koʼontone: «Ta xcacʼ ta jba ta yalel scotol ti cʼusitic laj apase». Li teksto taje tsvulesbun ta jol ti skʼan jcholmantale, pe jnaʼoj xtok ti toj vokol chkaʼi xcholel mantal li ta naetike. Li ta sba velta lilokʼ ta cholmantale tskʼelikun tajek li krixchanoetike, ta bikʼit ta mukʼ jech tspasik, jech xtok te tijil chbatik ti bu chibate xchiʼuk tstseʼinik ta skoj ti kʼu yelan chixanave. Toj chopol xa noʼox laj kaʼi jba yuʼun. Li kʼusi la skoltaun sventa mu xichibaje jaʼ ti la jnop ti koʼol tajek chtun kuʼunkutik li Paraisoe.

Sventa mas xuʼ jchol mantale la jman jkot jtrisiklo ti tsʼotbil ta kʼabale. Mi skʼan ximuykutik ta junuk vitse ta xujun muyel li jchiʼil ta cholmantale, pe mi yalobaltike chimuy jchaʼvoʼalkutik. Ta melel, mu kʼunuk laj kaʼi ta slikebal li cholmantale, pe kʼunkʼun nop xkaʼi. Lek tajek laj kaʼi, jaʼ yuʼun li-och ta prekursora regular li ta 1998.

Ep buchʼutik laj kakʼbe estudio, li chanvoʼe kʼotik ta stestigotak Jeova. Jech xtok, li jun jmuke och ta stestigo Jeova ek. Kʼalal chkat tajek koʼontone, jaʼ tstsatsubtasun ti ta jnopbe skʼoplal ti oy krixchanoetik ti chnopajik ta stojolal Jeovae. Xi jun skʼelobile: ta toʼox xkʼot kakʼbe estudio ta stiʼ sna jun kerem ti oy ta universidade. Ta tsʼakale laj kalbe jun ermano ti jaʼ xa akʼo bat svulaʼane. Ta jelavele bat nakluk ta Costa de Marfil li kereme. Pe jun veltae, kʼalal jaʼo ipun ta sik-kʼokʼe la stakbeikun talel jlik karta. ¿Mi xanaʼ bu lik tal? Ta Costa de Marfil. Li ta kartae te chal ti lik xa xchol mantal li kerem taje. ¡Limuyubaj-o tajek!

Sventa xuʼ jtabe stojol li kʼusitik chtun kuʼun jujun kʼakʼale, oy jun organisasion ti tskolta li buchʼutik oy svokolike, laj yalbun ti chchanubtasikun sventa jchan tsʼisome. Li jun maestrae laj yakʼ venta ti lek tsots jnaʼ xi-abteje, jaʼ yuʼun laj yalbun ti xuʼ xchanubtasikun ta spasel xavone. Jech oxal li avie ta jpas ta jna li xavon sventa chukʼob kʼuʼil xchiʼuk sventa atimole xchiʼuk chbat kikta komel ta snaik kʼalal oy buchʼu tskʼane. Kajal chibat ta jmotosikleta ti oxib syantaile. Lek tajek xmuyubajik li buchʼutik tsmanbeikune, jech oxal chalbeik yantik ti akʼo smanik eke.

Kʼux ta alel, pe li ta 2004 persa laj kikta li prekursoral ta skoj ti ipaj tajek li jpate. Akʼo mi jech, ta to xilokʼ ta cholmantal ti bu kʼalal xuʼ kuʼune.

Ta skoj ti ximuyubaje, xitseʼet noʼox chilikun li krixchanoetike. ¿Mi xanaʼ kʼu yuʼun jech chkaʼi jba? Yuʼun ti chinopaj ta stojol Diose, jaʼ xlokʼ venta chkaʼi. (Jaʼ la sloʼilta Sarah Maiga.)