MANTAL TA SLIKEBALTIK PAJINA: JKOTOLTIK XUʼ XKAʼIBETIK SMELOLAL LI VIVLIAE
¿Mi oy sbalil li xchanel Vivliae?
«Li Vivliae jaʼ jlik livro sventa relijion ti lek ojtikinbile. Pe li ta Chinae muʼyuk tsots skʼoplal chilik.» (LIN, LIKEM TA CHINA)
«Mi mu xkaʼibe smelolal li chʼul tsʼibetik ta jrelijion ti hinduista sbie, ¿kʼuxi xa noʼox chkaʼibe smelolal li Chʼul Vivliae?» (AMIT, LIKEM TA INDIA)
«Ta skoj ti jaʼ li livro ti mas voʼne li Vivliae kichʼoj ta mukʼ xchiʼuk jnaʼoj ti jaʼ li mas ep chichʼ chonel ta spʼejel Balumile. Pe muʼyuk bu xkil-o jlikuk.» (YUMIKO, LIKEM TA JAPÓN)
Ta spʼejel Balumile oy buchʼutik ti yichʼojik ta mukʼ li Vivliae akʼo mi uni jutuk noʼox xojtikinik li kʼusi chale o mi jsetʼuk. Taje jaʼ mas jech chkʼot ta stojolalik li ta smiyonal xa noʼox krixchanoetik ta Asiae, pe jech chkʼot ta pasel xtok li ta lumetik ti bu chichʼ pukel epal Vivliaetike.
Xuʼ van xi chanope: «¿Kʼusi sbalil ta jtabe mi la jkʼel li Vivliae?». Kʼalal mi la avojtikin li kʼusi chchanubtasvane, xuʼ skoltaot ta sventa liʼe:
Chamuyubaj ta akuxlejal
Chatojob xchapanel li kʼopetik ta avutsʼ avalale
Chatsal li vul oʼontone
Lek xavil aba xchiʼuk yantik
Chatojob lek stunesel li atakʼine
Jun skʼelobile, oy jun ants ta Japón ti Yoshiko sbie la skʼan chojtikin li kʼusi chal li Vivliae, jaʼ yuʼun lik xchan stuk. ¿Kʼusi sbalil la stabe? Xi chale: «Li Vivliae la skoltaun sventa oyuk sbalil li jkuxlejale xchiʼuk ti oyuk spatobil koʼonton ta jelavele. Li avie mas xa jun koʼonton chkaʼi jba». Li Amit, ti laj xa kalbetik tal skʼoplale, la snop tskʼel li kʼusi chal Vivliae. Xi chale: «Solel chʼayal to kʼot koʼonton yuʼun li kʼusi la jchane. Li mantaletik ta Vivliae chtun yuʼun skotol li krixchanoetike».
Li Vivliae ta smiyonal xa noʼox krixchanoetik skoltaoj sventa xlekub xkuxlejalik. Li voʼote, ¿kʼu yuʼun mu xachan Vivlia sventa xavakʼ venta ti kʼuxi xuʼ skoltaote?