KʼUSITIK CHICHʼ JAKʼEL TA SVENTA VIVLIA
¿Mi xuʼ xkojtikintik li kʼusi melel ta sventa Diose?
Li Diose, ¿kʼu yuʼun tskʼan ti xkojtikintik li kusi melele? Kʼelo Juan 17:3
Li Diose oy kʼusi stunesoj tal sventa chchiʼin ta loʼil li krixchanoetike, stunesoj xchʼul espiritu o li yip ch-abtej sventa laj yakʼbe snaʼ li kʼusi tstsʼibaik li jtsʼibajometik ta Vivliae (2 Pedro 1:20, 21). Jaʼ yuʼun xuʼ xkojtikintik lek Dios mi ta jkʼelbetik li Skʼope. (Kʼelo Juan 17:17; 2 Timoteo 3:16.)
Li ta Vivliae, li Diose ep kʼusitik chakʼ jnaʼtik ta stojolal. Chalbutik kʼu yuʼun la spas li krixchanoetike, li kʼusi tspas ta stojolale xchiʼuk ti kʼu yelan skʼan jpas jtalelaltike (Echos 17:24-27). Li Jeovae tskʼan ti xkojtikintik li kʼusi melel ta stojolale (Kʼelo 1 Timoteo 2:3, 4.)
¿Kʼu yelan chil Dios li buchʼutik tsaʼik li kʼusi melele?
Li Jeovae jaʼ li Dios ti melel kʼusi chale, jaʼ yuʼun la stak talel Xnichʼon sventa chchanubtasutik. Jech oxal, li buchʼutik tsaʼik li kʼusi melele ta xchʼamik li chanubtasel laj yakʼ Jesuse (Juan 18:37). Li Diose tskʼan ti akʼo x-ichʼat ta mukʼ yuʼun li buchʼutik jech stalelalik kʼuchaʼal taje. (Kʼelo Juan 4:23, 24.)
Sventa mu xojtikinik Dios li krixchanoetike, li Satanase chal nopbil kʼopetik o jutbil kʼopetik ta stojolal Dios (2 Korintios 4:3, 4). Li buchʼutik lek noʼox chaʼiik li jecheʼ chanubtasele muʼyuk oy ta yoʼontonik li kʼusi melele (Romanos 1:25). Li avie, ta smiyonal xa noʼox krixchanoetik ta xojtikinik li kʼusi melel ta sventa Dios kʼalal chchanik li Vivliae. (Kʼelo Echos 17:11.)