Jkotoltik jna’ xijchamutik

NOPO ti yakal chakʼel jun pelikula ta stojolal jun krixchano ti lek ojtikinbile, yikʼaluk van jaʼ jun jtajimol ta futbol ti chakʼupin ti kʼu yelan chtajine. Li ta slikeb pelikulae te chakʼ ta ilel kʼalal kʼox toʼoxe, kʼalal lik xchan tajimole xchiʼuk ti kʼalal laj yakʼbe tajek yipal xchanele. Ta tsʼakale, chvinaj ti oy xa jun s-ekipo ti lek ojtikinbile xchiʼuk ti jaʼ xa direktor li ta ekipoe. Pe kʼalal skʼan toʼox stsuts li pelikulae, te chvinaj slokʼoltak k’alal mas xa ox oy sjabilale, vaʼun ta slajebe ta xcham.

Taje jech kʼot ta pasel ta melel, pe li buchʼu jech kʼot ta xkuxlejale muʼyuk xa kuxul. Taje xuʼ jech xkʼot ta stojolal akʼo mi jaʼ jun sientifiko, jun j-anilajel o yan krixchano ti lek ojtikinbile. Akʼo mi ep kʼusitik la spas li ta xkuxlejale, xuʼ van ta jakʼbe jbatik kʼusitik to mas la spas ta xkuxlejal ti muʼyukuk xmalub xchiʼuk xchame.

Kʼux ta alel ti jaʼ onoʼox jech chkʼot ta jtojolal jkotoltike (Eclesiastés 9:5). Akʼo mi ep kʼusi chkakʼtik persa spasel, mu kʼusi stakʼ jpastik sventa mu xijmalub xchiʼuk ti mu xijchame. Maʼuk noʼox taje, yuʼun xuʼ xijcham ta skoj ti oy kʼusi ta jnuptantike o ta jtosuk tsatsal chamel. Jech kʼuchaʼal chal li Vivliae, xijkoʼolaj ta «lumal tok ti jlikel noʼox te oye, ti chchʼay noʼox batele» (Santiago 4:14).

Junantik krixchanoetike chalik ti mu nabajuk li kʼusi chkʼot ta jtojolaltike o ti chʼabal sbalil li jkuxlejaltike, jaʼ yuʼun xi chalike: «Veʼkutik, uchʼbolajkutik, yuʼun chijcham okʼom» (1 Korintios 15:32). Pe ¿mi mu jechuk ti chakʼik ta aʼiel ti snaʼojik ti chchamik kʼalal jech chalike? Jkotoltik chkʼot skʼakʼalil ti ta jakʼbe jbatik mi oy sbalil li jkuxlejaltike, mas to kʼalal oy kʼusi tsots ta jnuptantike. ¿Kʼusi van xuʼ skoltautik?

Epal krixchanoetike jaʼ spatoj yoʼontonik ta stojolal li siensiae. Li sientifikoetik xchiʼuk li doktoretike oy kʼusitik spasojik o staojik sventa xnatub li jkuxlejaltike. Jech xtok, li junantik pʼijil krixchanoetike oy kʼusitik yakal tspasik sventa xnatub mas li jkuxlejaltike. Pe akʼo mi jech, muʼyuk buchʼu snaʼoj ti kʼu yuʼun chijmalube, ti chijchamutike xchiʼuk mi chlaj van skʼoplal junuk kʼakʼal li lajelale. Taje jaʼ chalbe mas skʼoplal li ta mantaletik chtale xchiʼuk chichʼ takʼel li sjakʼobil liʼe: ¿K’u yuʼun ti kuxulutike?