Jaʼ sventa ta jlikestik chanubtasel ta Vivlia

Yiloj xa ep krixchanoetik jun bikʼit video ta jw.org/tzo ti xi sbie: ¿Kʼu yuʼun skʼan jchantik li Vivliae? Li videoe jaʼ sventa xtijbat yoʼontonik ta skʼanel jun matanal chanubtasel ta Vivlia li buchʼutik tskʼan chchanike. Sventa jkʼeltike kakʼbetik klik li bu chal «Kʼano chanubtasel ta Vivlia» ta yok li slikebal pajina ta Internete, o jtunestik li kodigo QR (kodigo ti chtakvan batel ta anile), ti te ta jtatik ta slajebal pajina li ta achʼ tratadoetike. Liʼ chichʼ alel batel kʼu yelan xuʼ lek jtunestik li videoe:

• Kʼalal oy buchʼu chbat jchaʼvulaʼantike, xuʼ xi xkalbetike: «¿Mi xuʼ xkakʼbot avil jun bikʼit video ti chakʼ kiltik kʼuxi xuʼ jtabetik stakʼobil li kʼusi ta jakʼbe jbatik ta sventa Vivliae?». Mi «lek» xie, kakʼbetik yil ta jselulartik, ta yan kʼusi o mi moʼoje ta skomputadora stuk.

• Mi chkakʼtik jlikuk tratado kʼalal ta jcholtik mantal ta jtuktik o xchiʼuk li grupoe kakʼbetik yil li kodigo QR sventa skʼel ta selular o ta yan kʼusi li videoe. O xuʼ xkakʼbetik yil ta jselulartik o ta yan kʼusi, yuʼun tukʼ chtakvan batel ta jpajinatik sventa jkʼeltik ta jeltos kʼopetik li videoe.

• Yan ti kʼusi xuʼ jpastike jaʼ ti xkalbetik jchiʼiltaktik ta abtel, ta chanun, kutsʼ kalaltik xchiʼuk li buchʼutik xkojtikintik ti oy jun videoe, kalbetik xtok ti xuʼ xkakʼbetik yilike. Jech xtok, xuʼ jtakbetik batel ta koreo li sdireksional bu chtakvan batel ta skʼelel li videoe, vaʼun kalbetik ti akʼo skʼelike.

Kʼalal ta jtunestik lek li abtejebal taje xuʼ me jlikestik mas chanubtasel ta Vivlia, vaʼun jaʼ jech ta jkoltatik ta mantal «li bochʼotic scʼoplal onoʼox chcuxiic sbatel osile» (Hech. 13:48).