Jtunestik ta cholmantal li jpajinatik ta Internet jw.org

Li jpajinatik ta Internete jaʼ jun lekil abtejebal sventa tskoltautik ta xcholel li lekil aʼyej ta «sbejel banamil» (Hech. 1:8). Akʼo mi jech, jutuk mu skotoluk li yajval nae mu xojtikinik li jpajinatik jw.org/tzo. Jaʼ to tsnaʼik mi albatik yuʼun junuk jcholmantale o kʼalal ch-akʼbat yilike.

Jun jkʼelvanej ta sirkuito syalesoj ta selular li video ¿Kʼu yuʼun skʼan jchantik li Vivliae? xchiʼuk chakʼbe yil krixchanoetik mi xuʼ chile. Jech kʼuchaʼal liʼe, kʼalal chbat xchol mantal ta naetike, xi chalbe li krixchanoe: «Yakal chivulaʼaj jlikeluk sventa ta jkolta krixchanoetik ta stakʼel oxib sjakʼobil ti toj tsotsik skʼoplale: ¿Kuʼ yuʼun ep kʼusitik chopol chkʼot ta pasele? ¿Kʼuxi chakʼbe slajeb li Diose? xchiʼuk ¿Kʼuxi xuʼ xkuch kuʼuntik yoʼ to muʼyuk chichʼ lajesele? Li uni video liʼe tstakʼ li sjakʼobiltak taje». Ta anil noʼox chakʼbe yil li videoe xchiʼuk tskʼel kʼu yelan chaʼi sba li krixchanoe. Li video taje toj kʼupil sba yuʼun jutuk mu skotoluk li krixchanoetike muʼyuk chiktaik skʼelel jaʼ to ti kʼuxi xlaje. Ta tsʼakale, xi chalbe li krixchanoe: «Jech kʼuchaʼal naka to laj avile xuʼ xakʼan junuk chanubtasel ta Vivlia ta Internet ta jw.org. Pe yoʼ to talemun xa jvulaʼanote chkakʼ avil jlikeluk kʼu yelan li jun chanubtasele». Mi oy ta yoʼonton li yajval nae, chakʼbe yil kʼu yelan li jun chanubtasel ta Vivlia ti jaʼ tstunes li foyeto Lekil aʼyejetik yakʼoj Dios. Mi muʼyuk xokol li yajval nae chchapik kʼusi ora xokol sventa chtal skʼel ta yan velta. Kʼalal chbat yuchʼ skafe li ermano sventa chkux-o uni jlikele, jechtik tspas ta stojolal li buchʼu te chotol ta stsʼel kʼalal mi laj xa ox xchiʼin ta loʼil uni jlikeluke. ¿Li voʼotike? ¿Mi yakal ta jtunestik ta cholmantal li jpajinatik jw.org/tzo?