Jtunestik ta cholmantal li jw.org ti bu chal: «Li kʼusitik tsjakʼilanike»

Li ta jpajinatik jw.org ti «Jkʼoplalkutik» xie, oy jvokʼ ti xi chale: «Li kʼusitik tsjakʼilanike». Mi laj kojtikintik lek li kʼusitik yichʼoj tale toj jtunel me li ta cholmantale, yuʼun mi oy kʼusi laj kichʼtik jakʼbel ti jaʼ te chalbe skʼoplal li ta jvokʼ taje, xuʼ xkakʼbetik yil li ta jpajinatik ta Internet yoʼ stabeik li stakʼobile. Jech xtok, xuʼ jtunestik li sjakʼobiltak yichʼojan tal sventa jlikes-o jloʼiltike. Jech kʼuchaʼal liʼe, xuʼ jtʼujtik junuk ti bu xuʼ xtijbat-o yoʼonton li krixchanoetik ti bu ta jcholtik mantale, jakʼbetik kʼusi tsnopik, ta tsʼakale kalbetik smelolal li kʼusi chal Vivlia ti jaʼ jtunestik li jw.org. Mi laje xuʼ xkalbetik ti te la jtatik ta jw.org li mantal laj kalbetike xchiʼuk kakʼbetik yil li jpajinatik ta Internete. Yan kʼusi xuʼ jpastike jaʼ ti xkakʼbetik skʼel stukik ta jpajinatik li stakʼobile. Xuʼ van xi xkalbetike: «Ep krixchanoetik tsjakʼbe sbaik kʼu yuʼun chbat xcholik mantal ta naetik li stestigotak Jeovae. ¿Mi chakʼan chanabe li stakʼobile? Mu sta jun minuto chjalij». Vaʼun xuʼ xkakʼbetik yil ta jw.org ta junuk selular o ta yan kʼusitik. Ta slajebale xuʼ xkakʼbetik komel jlikuk li jvuntike.